ਥਾਈਲੈਂਡ ਦੀ ਪ੍ਰਤੀਯੋਗੀ ਓਪਲ ਸੁਚਾਤਾ ਚੁਆਂਗਸਰੀ ਨੇ 72ਵਾਂ ਮਿਸ ਵਰਲਡ’ ਦਾ ਖਿਤਾਬ ਜਿੱਤਿਆ ਹੈ। ਜੇਤੂ ਓਪਲ ਕੌਮਾਂਤਰੀ ਸਬੰਧਾਂ ਦੀ ਵਿਦਿਆਰਥਣ ਹੈ। ਉਸ ਨੂੰ ਮਨੋਵਿਗਿਆਨ ਅਤੇ ਮਾਨਵ ਵਿਗਿਆਨ ’ਚ ਦਿਲਚਸਪੀ ਹੈ ਅਤੇ ਉਹ ਇਕ ਦਿਨ ਰਾਜਦੂਤ ਬਣਨਾ ਚਾਹੁੰਦੀ ਹੈ। ਉਸ ਨੇ ਛਾਤੀ ਦੇ ਕੈਂਸਰ ਦੇ ਖੇਤਰ ’ਚ ਕੰਮ ਕਰਨ ਵਾਲੀਆਂ ਸੰਸਥਾਵਾਂ ਲਈ ਸਵੈ-ਇੱਛਾ ਨਾਲ ਕੰਮ ਕੀਤਾ ਹੈ। ਓਪਲ ਕੋਲ ਯੂਕੇਲੇਲ ਨੂੰ ਪਿੱਛੇ ਵਲ ਖੇਡਣ ਦੀ ਵਿਸ਼ੇਸ਼ ਪ੍ਰਤਿਭਾ ਹੈ ਅਤੇ ਪਾਲਤੂ ਜਾਨਵਰਾਂ ਵਜੋਂ 16 ਬਿੱਲੀਆਂ ਅਤੇ ਪੰਜ ਕੁੱਤੇ ਹਨ।
72ਵਾਂ ਮਿਸ ਵਰਲਡ’ ਈਵੈਂਟ ਸਮਾਪਤ ਹੋ ਗਿਆ ਹੈ ਅਤੇ ਇਸ ਸਾਲ ਥਾਈਲੈਂਡ ਦੀ ਓਪਲ ਸੁਚਾਤਾ ਚੁਆਂਗਸਰੀ ਨੇ ਮਿਸ ਵਰਲਡ ਦਾ ਤਾਜ ਜਿੱਤਿਆ ਹੈ। ਇਸ ਦੇ ਨਾਲ ਹੀ ਭਾਰਤ ਦੀ ਨੁਮਾਇੰਦਗੀ ਕਰ ਰਹੀ ਨੰਦਿਨੀ ਗੁਪਤਾ ਦਾ ਸੁਪਨਾ ਵੀ ਚਕਨਾਚੂਰ ਹੋ ਗਿਆ ਹੈ ਅਤੇ ਅਜਿਹੀ ਸਥਿਤੀ ਵਿੱਚ ਕਰੋੜਾਂ ਭਾਰਤੀ ਵੀ ਉਸ ਤੋਂ ਨਿਰਾਸ਼ ਹੋ ਗਏ ਹਨ। ਨੰਦਿਨੀ ਨੇ ਚੋਟੀ ਦੇ 20 ਵਿੱਚ ਆਪਣੀ ਜਗ੍ਹਾ ਬਣਾਈ ਸੀ. ਇਸ ਲਈ ਸਾਰਿਆਂ ਨੂੰ ਲੱਗ ਰਿਹਾ ਸੀ ਕਿ ਭਾਰਤ ਨੂੰ 7ਵੀਂ ਵਾਰ ਮਿਸ ਵਰਲਡ ਦਾ ਖਿਤਾਬ ਮਿਲੇਗਾ ਪਰ ਜਦੋਂ ਚੋਟੀ ਦੇ 8 ਦਾ ਐਲਾਨ ਕੀਤਾ ਗਿਆ ਤਾਂ ਨੰਦਿਨੀ ਪਿੱਛੇ ਰਹਿ ਗਈ ਅਤੇ ਉਹ ਇਹ ਖਿਤਾਬ ਨਹੀਂ ਜਿੱਤ ਸਕੀ।
ਇਸ ਸਾਲ ‘ਮਿਸ ਵਰਲਡ 2025’ ਤੇਲੰਗਾਨਾ ਦੇ ਹੈਦਰਾਬਾਦ ਵਿੱਚ ਆਯੋਜਿਤ ਕੀਤਾ ਗਿਆ ਸੀ। 108 ਦੇਸ਼ਾਂ ਦੀਆਂ ਸੁੰਦਰੀਆਂ ਮਿਸ ਵਰਲਡ ਮੁਕਾਬਲੇ ਵਿੱਚ ਹਿੱਸਾ ਲੈਣ ਲਈ ਆਈਆਂ ਸਨ। ਤੇਲੰਗਾਨਾ ’ਚ ਇਕ ਮਹੀਨੇ ਦੀਆਂ ਉਦੇਸ਼-ਸੰਚਾਲਿਤ ਗਤੀਵਿਧੀਆਂ, ਸਭਿਆਚਾਰਕ ਗਤੀਵਿਧੀਆਂ ਅਤੇ ਪ੍ਰੇਰਣਾਦਾਇਕ ਚੁਨੌਤੀਆਂ ਤੋਂ ਬਾਅਦ, ਦੁਨੀਆਂ ਭਰ ਦੀਆਂ 108 ਮੁਕਾਬਲੇਬਾਜ਼ਾਂ ਨੇ ਸੁੰਦਰਤਾ, ਉਦੇਸ਼ ਅਤੇ ਏਕਤਾ ਦੇ ਸ਼ਾਨਦਾਰ ਜਸ਼ਨ ’ਚ ਹਿੱਸਾ ਲਿਆ। ਚੇਅਰਪਰਸਨ ਜੂਲੀਆ ਮੋਰਲੇ ਨੇ ਵੱਕਾਰੀ ਜਿਊਰੀ ਦੀ ਪ੍ਰਧਾਨਗੀ ਕੀਤੀ। ਇਸ ਸਮੇਂ ਬਾਲੀਵੁੱਡ ਅਦਾਕਾਰ ਸੋਨੂੰ ਸੂਦ, ਮਸ਼ਹੂਰ ਉੱਦਮੀ ਸੁਧਾ ਰੈਡੀ, ਮਾਨੁਸ਼ੀ ਛਿੱਲਰ, ਰਾਣਾ ਡੱਗੂਬਾਤੀ ਜਿਊਰੀ ਮੈਂਬਰਾਂ ਵਜੋਂ ਮੌਜੂਦ ਸਨ। ‘ਮਿਸ ਵਰਲਡ’ ਸੁੰਦਰਤਾ ਮੁਕਾਬਲੇ ਵਿੱਚ ਤੇਲੰਗਾਨਾ ਦੇ ਮੁੱਖ ਮੰਤਰੀ ਰੇਵੰਤ ਰੈੱਡੀ ਅਤੇ ਦੱਖਣ ਦੇ ਮੈਗਾਸਟਾਰ ਚਿਰੰਜੀਵੀ ਵੀ ਮੌਜੂਦ ਸਨ। ਦੋਵਾਂ ਨੂੰ ਇੱਕੋ ਮੇਜ਼ ‘ਤੇ ਇਕੱਠੇ ਬੈਠੇ ਦੇਖਿਆ ਗਿਆ ਸੀ।
ਪੋਲੈਂਡ ਦੀ ਮਾਜਾ ਕਲਾਜ਼ਦਾ, ਮਾਰਟਿਨਿਕ ਦੀ ਔਰੇਲੀ ਜੋ, ਇਥੋਪੀਆ ਦੀ ਹਸੇਟ ਡੇਰੇਜੇ ਅਤੇ ਥਾਈਲੈਂਡ ਦੀ ਓਪਲ ਸੁਚਾਤਾ ਨੇ ‘ਮਿਸ ਵਰਲਡ 2025’ ਦੇ ਸਿਖਰਲੇ 4 ਵਿੱਚ ਜਗ੍ਹਾ ਬਣਾਈ। ਇਨ੍ਹਾਂ ਵਿੱਚੋਂ ਇਥੋਪੀਆ ਦੀ ਹਸੇਟ ਡੇਰੇਜੇ ਪਹਿਲੀ ਰਨਰ ਅੱਪ ਸੀ। ਉਸਨੇ ਇਸ ਮੁਕਾਬਲੇ ਵਿੱਚ ਓਪਲ ਨੂੰ ਸਖ਼ਤ ਮੁਕਾਬਲਾ ਦਿੱਤਾ। ਇਸ ਦੇ ਨਾਲ ਹੀ ਮਾਰਟਿਨਿਕ ਦੀ ਔਰੇਲੀ ਜੋ ਤੀਜੇ ਨੰਬਰ ‘ਤੇ ਸੀ। ਨਿਯਮਾਂ ਅਨੁਸਾਰ, ਪਿਛਲੇ ਸਾਲ ਦੀ ਮਿਸ ਵਰਲਡ, ਚੈੱਕ ਗਣਰਾਜ ਦੀ ਕ੍ਰਿਸਟੀਨਾ ਨੇ ਇਸ ਸਾਲ ਓਪਲ ਨੂੰ ਤਾਜ ਪਹਿਨਾਇਆ।
ਬਾਲੀਵੁੱਡ ਅਦਾਕਾਰਾ ਜੈਕਲੀਨ ਅਤੇ ਅਦਾਕਾਰ ਈਸ਼ਾਨ ਖੱਟਰ ਨੇ ਵੀ ‘ਮਿਸ ਵਰਲਡ’ ਮੁਕਾਬਲੇ ਵਿੱਚ ਆਪਣਾ ਧਮਾਕੇਦਾਰ ਡਾਂਸ ਪ੍ਰਦਰਸ਼ਨ ਦਿੱਤਾ। ਦੋਵਾਂ ਨੇ ਆਪਣੇ ਗੀਤਾਂ ‘ਤੇ ਨੱਚਿਆ ਅਤੇ ਸੁੰਦਰਤਾ ਮੁਕਾਬਲੇ ਦਾ ਮੰਚ ਬੰਨ੍ਹ ਦਿੱਤਾ। ਤੁਹਾਨੂੰ ਦੱਸ ਦੇਈਏ ਕਿ ਕੁਝ ਦਿਨ ਪਹਿਲਾਂ ਮਿਸ ਵਰਲਡ 2025 ਨੂੰ ਲੈ ਕੇ ਵਿਵਾਦ ਹੋਇਆ ਸੀ, ਜਦੋਂ ਮਿਸ ਇੰਗਲੈਂਡ ਸ਼ੋਅ ਵਿਚਕਾਰ ਹੀ ਛੱਡ ਕੇ ਚਲੀ ਗਈ ਸੀ। ਉਸਨੇ ਸੁੰਦਰਤਾ ਮੁਕਾਬਲੇ ‘ਤੇ ਕਈ ਦੋਸ਼ ਲਗਾਏ ਸਨ। ਇਸ ਖ਼ਬਰ ਨੂੰ ਵਿਸਥਾਰ ਵਿੱਚ ਪੜ੍ਹਨ ਲਈ ਇੱਥੇ ਕਲਿੱਕ ਕਰੋ।