ਕਾਬੁਲ – ਅਫਗਾਨਿਸਤਾਨ ਵਿਚ ਤਾਲਿਬਾਨ ਵਿਰੋਧੀ ਤਾਕਤਾਂ ਨੂੰ ਵੱਡੀ ਸ਼ੁਰੂਆਤੀ ਬੜ੍ਹਤ ਹਾਸਲ ਹੋਈ ਹੈ। ਖ਼ਬਰ ਏਜੰਸੀ ਰਾਇਟਰ ਦੀ ਰਿਪੋਰਟ ਮੁਤਾਬਕ ਉੱਤਰੀ ਅਫਗਾਨਿਸਤਾਨ ਵਿਚ ਤਾਲਿਬਾਨ ਦਾ ਵਿਰੋਧ ਕਰਨ ਵਾਲੀਆਂ ਤਾਕਤਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਨੇ ਪੰਜਸ਼ੀਰ ਘਾਟੀ ਦੇ ਕਰੀਬ ਤਿੰਨ ਜ਼ਿਲ੍ਹਿਆਂ ਨੂੰ ਆਪਣੇ ਕਬਜ਼ੇ ਵਿਚ ਲੈ ਲਿਆ ਹੈ। ਇਨ੍ਹਾਂ ਇਲਾਕਿਆਂ ਵਿਚ ਸਰਕਾਰੀ ਬਲ ਦੇ ਜਵਾਨ ਹੋਰ ਮਿਲਿਸ਼ੀਆ ਸਮੂਹਾਂ ਦੇ ਲੜਾਕਿਆਂ ਨਾਲ ਇਕਜੁਟ ਹੋਣਾ ਸ਼ੁਰੂ ਹੋ ਗਏ ਹਨ। ਸਰਕਾਰੀ ਬਲ ਦੇ ਜਵਾਨਾਂ ਦੀ ਮਿਲਿਸ਼ੀਆ ਸਮੂਹਾਂ ਨਾਲ ਹੋਈ ਇਹ ਲਾਮਬੰਦੀ ਤਾਲਿਬਾਨ ਲਈ ਵੱਡਾ ਖ਼ਤਰਾ ਮੰਨੀ ਜਾ ਰਹੀ ਹੈ।
ਤਾਲਿਬਾਨ ਦਾ ਵਿਰੋਧ ਕਰਨ ਦੀ ਕਸਮ ਖਾਣ ਵਾਲੇ ਰੱਖਿਆ ਮੰਤਰੀ ਜਨਰਲ ਬਿਸਮਿੱਲਾਹ ਮੁਹੰਮਦੀ ਨੇ ਟਵੀਟ ਕਰ ਕੇ ਕਿਹਾ ਹੈ ਕਿ ਪੰਜਸ਼ੀਰ ਦੇ ਉੱਤਰ ਵਿਚ ਬਗਲਾਨ ਪ੍ਰਾਂਤ ਦੇ ਦੇਹ ਸਾਲੇਹ, ਬਾਨੋ ਤੇ ਪੁਲ-ਹੇਸਰ ਜ਼ਿਲ੍ਹਿਆਂ ਨੂੰ ਆਪਣੇ ਕਬਜ਼ੇ ਵਿਚ ਲੈ ਲਿਆ ਗਿਆ ਹੈ। ਸਭ ਤੋਂ ਵੱਡੀ ਗੱਲ ਇਹ ਹੈ ਕਿ ਤਾਲਿਬਾਨ ਵੱਲੋਂ ਇਸ ਤਾਜ਼ਾ ਘਟਨਾਕ੍ਰਮ ’ਤੇ ਕੋਈ ਬਿਆਨ ਨਹੀਂ ਆਇਆ ਹੈ। ਟੋਲੋ ਨਿਊਜ਼ ਨੇ ਇਕ ਸਥਾਨਕ ਪੁਲਿਸ ਕਮਾਂਡਰ ਦੇ ਹਵਾਲੇ ਨਾਲ ਕਿਹਾ ਹੈ ਕਿ ਬਗਲਾਨ ਵਿਚ ਬਾਨੋ ਜ਼ਿਲ੍ਹਾ ਸਥਾਨਕ ਮਿਲਿਸ਼ੀਆ ਬਲਾਂ ਦੇ ਕੰਟਰੋਲ ਵਿਚ ਹੈ ਤੇ ਲੜਾਈ ਵਿਚ ਵੱਡੀ ਗਿਣਤੀ ਵਿਚ ਮੌਤਾਂ ਹੋਈਆਂ ਹਨ।