ਜ਼ੀਰਕਪੁਰ – ਅੱਜ ਕਾਮਨ ਲੈਂਡ ਪੋ੍ਟੈਕਸ਼ਨ ਸੁਸਾਇਟੀ ਪੰਜਾਬ (ਰਜਿ.) ਦੇ ਸਰਪ੍ਰਸਤ ਅਵਤਾਰ ਸਿੰਘ ਨਗਲਾ ਨੇ ਇਕ ਪ੍ਰਰੈੱਸ ਕਾਨਫ਼ਰੰਸ ਦੌਰਾਨ ਸਿਆਸੀ ਰਸੂਖਦਾਰਾਂ ਵੱਲੋਂ ਹਲਕਾ ਡੇਰਾਬੱਸੀ ‘ਚ ਸੰਗਠਿਤ ਤਰੀਕੇ ਨਾਲ ਸਰਕਾਰੀ ਜ਼ਮੀਨਾਂ (ਸਰਪਲਸ ਲੈਂਡ) ਤੇ ਬੀਤੇ ਲੰਬੇ ਸਮੇਂ ਤੋਂ ਕੀਤੇ ਗਏ ਕਬਜ਼ਿਆਂ ਦੀ ਜਾਣਕਾਰੀ ਦਿੰਦੇ ਹੋਏ ਕਿਹਾ ਕਿ ਤਹਿਸੀਲ ਡੇਰਾਬੱਸੀ ਅਧੀਨ ਆਉਂਦੇ ਪਿੰਡ ਜੌਲਾਂ ਕਲਾਂ ‘ਚ ਐੱਸਜੀਪੀਸੀ ਮੈਂਬਰ ਰਹੇ ਨਿਰਮੈਲ ਸਿੰਘ ਜੌਲਾਂ ਅਤੇ ਉਨ੍ਹਾਂ ਦੇ ਭਰਾ ਨੰਬਰਦਾਰ ਗੁਰਮੀਤ ਸਿੰਘ ਵੱਲੋਂ ਲੰਬੇ ਸਮੇਂ ਤੋਂ ਪਿੰਡ ‘ਚ ਆਉਂਦੀ ਗੋਲਡਨ ਫੋਰੈਸਟ ਦੀ ਜ਼ਮੀਨ ਜੋ ਕਿ ਪੰਜਾਬ ਸਰਕਾਰ ਦੇ ਨਾਮ ‘ਤੇ ਨੋਟੀਫਾਈ ਹੋ ਚੁੱਕੀ ਹੈ ਦੇ 514 ਬਿਘੇ 16 ਵਿਸਵੇ ਜ਼ਮੀਨ ‘ਤੇ ਨਾਜਾਇਜ਼ ਕਬਜਾ ਕੀਤਾ ਹੋਇਆ ਹੈ।
ਜ਼ਿਕਰਯੋਗ ਹੈ ਕਿ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਵੱਲੋਂ ਬੇਜ਼ਮੀਨੇ, ਦਰਮਿਆਨੇ ਅਤੇ ਛੋਟੇ ਕਿਸਾਨਾਂ ਦੀ ਭਲਾਈ ਲਈ “ਦ ਪੰਜਾਬ (ਵੈੱਲਫੇਅਰ ਐਂਡ ਸੈਟਲਮੈਂਟ ਆਫ਼ ਲੈਂਡਲੈੱਸ, ਮਾਰਜੀਨਲ ਐਂਡ ਸਮਾਲ ਆਕਿਊਪੈਂਟ ਫਾਰਮਰਸ) ਅਲਾਟਮੈਂਟ ਆਫ਼ ਸਟੇਟ ਗਵਰਨਮੈਂਟ ਲੈਂਡ ਐਕਟ, 2021 ਨੂੰ ਲਾਗੂ ਕੀਤਾ ਗਿਆ ਹੈ ਜਿਸ ਅਨੁਸਾਰ ਅਜਿਹੇ ਕਿਸਾਨ ਜ਼ਮੀਨ ਦੀ ਅਲਾਟਮੈਂਟ ਲਈ ਬੇਜ਼ਮੀਨੇ, ਸੀਮਾਂਤ ਜਾਂ ਛੋਟੇ ਕਿਸਾਨ ਸਰਕਾਰੀ ਜ਼ਮੀਨ ਦੀ ਅਲਾਟਮੈਂਟ ਲਈ ਅਰਜ਼ੀ ਦੇ ਸਕਦੇ ਹਨ। ਇਸ ਨੂੰ ਮੁੱਖ ਰੱਖਦਿਆਂ ਅਵਤਾਰ ਸਿੰਘ ਨਗਲਾ ਨੇ ਮੰਗ ਕੀਤੀ ਹੈ ਕਿ ਐੱਸਜੀਪੀਸੀ ਮੈਂਬਰ ਰਹੇ ਨਿਰਮੈਲ ਸਿੰਘ ਜੌਲਾਂ ਅਤੇ ਉਨ੍ਹਾਂ ਦੇ ਭਰਾ ਨੰਬਰਦਾਰ ਗੁਰਮੀਤ ਸਿੰਘ ਨੇ ਬਿਨਾਂ ਕਿਸੇ ਕਨੂੰਨੀ ਅਧਿਕਾਰ ਤੋਂ ਸਰਪਲਸ ਜ਼ਮੀਨ ‘ਤੇ ਕਬਜ਼ਾ ਕੀਤਾ ਹੋਇਆ ਹੈ ਜਦੋਂ ਕਿ ਰਿਕਾਰਡ ਅਨੁਸਾਰ ਇਹ ਸਰਕਾਰੀ ਜ਼ਮੀਨ ਖੁਦ ਕਾਸ਼ਤ ਬਾ ਮਕਬੂਜਾ ਮਾਲਕ ਹੈ ਜਿਸ ਨੂੰ ਕਿ ਇਨਾਂ੍ਹ ਰਾਜਨੀਤਿਕ ਰਸੂਖਦਾਰਾਂ ਤੋਂ ਖ਼ਾਲੀ ਕਰਵਾ ਕੇ ਬੇਜ਼ਮੀਨੇ, ਸੀਮਾਂਤ ਜਾਂ ਛੋਟੇ ਕਿਸਾਨਾਂ ਨੂੰ ਦੇਣੀ ਚਾਹੀਦੀ ਹੈ। ਉਨਾਂ੍ਹ ਕਿਹਾ ਕਿ ਇਸ ਲਈ ਜ਼ਰੂਰੀ ਹੈ ਕਿ ਤਹਿਸੀਲਦਾਰ ਡੇਰਾਬੱਸੀ ਦੀ ਜ਼ਿੰਮੇਵਾਰੀ ਤਹਿ ਕਰਕੇ ਉਕਤਾਨ ਨੂੰ ਝੋਨੇ ਦੀ ਫ਼ਸਲ ਦੀ ਵਢਾਈ ਤੋਂ ਰੋਕਿਆ ਜਾਵੇ ਅਤੇ ਫਸਲ ਦੀ ਕਟਾਈ ਸਰਕਾਰੀ ਪੱਧਰ ‘ਤੇ ਕਰਵਾ ਕੇ ਫ਼ਸਲ ਦੀ ਕੀਮਤ ਸਰਕਾਰੀ ਖਜ਼ਾਨੇ ‘ਚ ਜਮਾਂ ਕਰਵਾਈ ਜਾਵੇ। ਉਨ੍ਹਾਂ ਕਿਹਾ ਕਿ ਉਕਤ ਜ਼ਮੀਨ ‘ਚ ਖੜ੍ਹੀ ਫ਼ਸਲ ਦੀ ਕੀਮਤ ਅੰਦਾਜ਼ਨ 1 ਕਰੋੜ ਦੇ ਲਗਪਗ ਬਣਦੀ ਹੈ। ਇਸ ਤੋਂ ਇਲਾਵਾ ਨਾਜਾਇਜ਼ ਕਬਜ਼ਾਧਾਰੀਆਂ ਤੋਂ ਹੁਣ ਤਕ ਦਾ ਚਕੌਤਾ ਲਗਾਨ ਬਤੌਰ ਭੌ ਮਾਲੀਆ ਏਰੀਅਰ ਵਸੂਲ ਕੀਤਾ ਜਾਵੇ। ਉਨਾਂ੍ਹ ਮੰਗ ਕੀਤੀ ਕਿ ਗੁਰਮੀਤ ਸਿੰਘ ਦੀ ਲੰਬੜਦਾਰੀ ਮਨਸੂਖ ਕੀਤੀ ਜਾਵੇ ਅਤੇ ਮੁੱਖ ਥਾਣਾ ਅਫ਼ਸਰ ਲਾਲੜੂ ਨੂੰ ਹਦਾਇਤ ਕਰ ਕੇ ਮੁਲਜ਼ਮਾਂ ਖ਼ਿਲਾਫ਼ ਸਰਕਾਰੀ ਜ਼ਮੀਨ ਤੇ ਧੱਕੇ ਨਾਲ ਕਬਜ਼ਾ ਕਰਨ ਦੇ ਦੋਸ਼ ਹੇਠ ਮੁਕੱਦਮਾ ਦਰਜ ਕੀਤਾ ਜਾਵੇ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਉਕਤ ਸ਼ਿਕਾਇਤ ਡੀਸੀ ਮੋਹਾਲੀ ਤੋਂ ਇਲਾਵਾ ਪ੍ਰਧਾਨ ਸ਼ੋ੍ਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਅੰਮਿ੍ਤਸਰ ਨੂੰ ਵੀ ਦਿੱਤੀ ਹੈ। ਮਾਮਲੇ ਸਬੰਧੀ ਗੱਲ ਕਰਨ ‘ਤੇ ਐੱਸਜੀਪੀਸੀ ਮੈਂਬਰ ਨਿਰਮੈਲ ਸਿੰਘ ਜੌਲਾਂ ਨੇ ਮੰਨਿਆ ਕਿ ਉਹ ਆਪਣੀ 60 ਕਿਲੇ ਪੁਸ਼ਤੈਨੀ ਜ਼ਮੀਨ ਦੇ ਨਾਲ ਪਈ ਗੋਲਡਨ ਫੋਰੈਸਟ ਦੀ ਜ਼ਮੀਨ ਦੀ ਵਹਾਈ ਕਰ ਰਹੇ ਹਨ ਪਰ ਇਹ ਵਹਾਈ ਉਨ੍ਹਾਂ ਨੂੰ ਮਜਬੂਰੀ ਕਾਰਨ ਕਰਨੀ ਪੈ ਰਹੀ ਹੈ ਕਿਉਂਕਿ ਗੋਲਡਨ ਫੋਰੈਸਟ ਦੀ ਜ਼ਮੀਨ ਨੇ ਉਨਾਂ੍ਹ ਦੀ ਜ਼ਮੀਨ ਘੇਰ ਰੱਖੀ ਹੈ ਜਿਸ ‘ਚ ਜੰਗਲ ਖੜ੍ਹਾ ਹੋਣ ਕਰ ਕੇ ਇਕ ਤਾਂ ਉਨਾਂ੍ਹ ਦੇ ਖੇਤ ਖ਼ਰਾਬ ਹੋ ਰਹੇ ਹਨ ਅਤੇ ਉਪਰੋਂ ਗੋਲਡਨ ਫੋਰੈਸਟ ਦੀ ਜ਼ਮੀਨ ‘ਚ ਖੜੇ੍ਹ ਜੰਗਲ ‘ਚ ਨਸ਼ੇੜੀਆਂ ਵੱਲੋਂ ਅੱਡੇ ਬਣਾਏ ਜਾਣ ਤੋਂ ਇਲਾਵਾ ਜੰਗਲੀ ਜਾਨਵਰ ਵੀ ਉਨ੍ਹਾਂ ਦੀ ਫ਼ਸਲ ਨੂੰ ਨੁਕਸਾਨ ਪਹੁੰਚਾਉਂਦੇ ਹਨ। ਉਨ੍ਹਾਂ ਦਾਅਵਾ ਕੀਤਾ ਕਿ ਜੇ ਸਰਕਾਰ ਇਨ੍ਹਾਂ ਜ਼ਮੀਨਾਂ ਸਬੰਧੀ ਕੋਈ ਪਾਲਿਸੀ ਲੈ ਕੇ ਆਉਂਦੀ ਹੈ ਤਾਂ ਉਹ ਪਹਿਲ ਦੇ ਆਧਾਰ ‘ਤੇ ਜ਼ਮੀਨ ਸਿਰੰਡਰ ਕਰਨਗੇ। ਅਵਤਾਰ ਸਿੰਘ ਨੇ ਦਸਤਾਵੇਜ਼ੀ ਸਬੂਤ ਵਿਖਾਉਂਦੀਆਂ ਦੱਸਿਆ ਕਿ ਜੌਲਾਂ ਪਿੰਡ ‘ਚ 514 ਬਿਘੇ 16 ਵਿਸਵੇ ਸਰਕਾਰੀ ਸਰਪਲਸ ਜ਼ਮੀਨ ਹੈ। ਉਨ੍ਹਾਂ ਦੱਸਿਆ ਕਿ ਜਾਮਬੰਦੀ ਸਾਲ 2016-17 ਮੁਤਾਬਕ ਖੇਵਟ ਨੰਬਰ-71 ਖਤੋਨੀ ਨੰਬਰ-148 ਸਰਪਲਸ ਰਕਬਾ-65 ਬਿਘੇ 17 ਵਿਸਵੇ, ਖੇਵਟ ਨੰਬਰ-73 ਖਤੋਨੀ ਨੰਬਰ-150 ਸਰਪਲਸ ਰਕਬਾ 18 ਬਿਘੇ 16 ਵਿਸਵੇ ਅਤੇ ਖੇਵਟ ਨੰਬਰ-120 ਖਤੋਨੀ ਨੰਬਰ-245 ਸਰਪਲਸ ਰਕਬਾ 430 ਬਿਘੇ 3 ਵਿਸਵੇ ਮੌਜੂਦ ਹੈ।