ਅੰਕਾਰਾ – ਤੁਰਕੀ ਦੇ ਰਾਸ਼ਟਰਪਤੀ ਰੇਸੇਪ ਤਇਪ ਏਰਦੋਗਨ ਨੇ ਮੰਤਰੀ ਮੰਡਲ ਅਤੇ ਸੱਤਾਧਾਰੀ ਜਸਟਿਸ ਐਂਡ ਡਿਵੈਲਪਮੈਂਟ ਪਾਰਟੀ (ਏ.ਕੇ.ਪੀ.) ਵਿਚ ਫੇਰਬਦਲ ਕਰਨ ਦੀ ਯੋਜਨਾ ਬਣਾਈ ਹੈ। ਤੁਰਕੀ ਸਰਕਾਰ ਦੇ ਨਜ਼ਦੀਕੀ ਏਰਦੋਗਨ ਦੇ ਸਮਰਥਕ ਯੇਨੀ ਸਫਾਕ ਅਖ਼ਬਾਰ ਦੇ ਇੱਕ ਕਾਲਮਨਵੀਸ ਇਸਮਾਈਲ ਕਿਲੀਕਾਰਸਲਾਨ ਨੇ ਵੀਰਵਾਰ ਨੂੰ ਸਥਾਨਕ ਮੀਡੀਆ ਨੂੰ ਦੱਸਿਆ ਕਿ ਰਾਸ਼ਟਰਪਤੀ ਏ.ਕੇ.ਪੀ ਵਿੱਚ ਤਬਦੀਲੀਆਂ ਦੀ ਯੋਜਨਾ ਬਣਾ ਰਹੇ ਹਨ। ਮਾਰਚ ਵਿੱਚ ਹੋਈਆਂ ਸਥਾਨਕ ਚੋਣਾਂ ਵਿੱਚ ਏ.ਕੇ.ਪੀ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ। ਇਨ੍ਹਾਂ ਚੋਣਾਂ ਵਿੱਚ 20 ਸਾਲਾਂ ਵਿੱਚ ਪਹਿਲੀ ਵਾਰ ਵਿਰੋਧੀ ਰਿਪਬਲਿਕਨ ਪੀਪਲਜ਼ ਪਾਰਟੀ ਆਫ਼ ਤੁਰਕੀ (ਸੀ.ਐਚ.ਪੀ) ਨੇ ਸੱਤਾਧਾਰੀ ਪਾਰਟੀ ਨੂੰ ਪਛਾੜ ਦਿੱਤਾ। ਅੰਕਾਰਾ, ਇਸਤਾਂਬੁਲ ਅਤੇ ਇਜ਼ਮੀਰ ਵਿਚ ਵਿਰੋਧੀ ਮੇਅਰ ਆਪਣੇ ਅਹੁਦਿਆਂ ‘ਤੇ ਬਣੇ ਰਹੇ। ਚੋਣ ਹਾਰ ਲਈ ਤੁਰਕੀ ਦੀਆਂ ਆਰਥਿਕ ਮੁਸ਼ਕਿਲਾਂ ਨੂੰ ਜ਼ਿੰਮੇਵਾਰ ਠਹਿਰਾਇਆ ਗਿਆ ਹੈ। ਏਰਦੋਗਨ ਨੇ ਚੋਣ ਨਤੀਜਿਆਂ ਤੋਂ ਸਿੱਖਣ ਅਤੇ ਜਨਤਾ ਦੀ ਗੱਲ ਸੁਣਨ ਦਾ ਵਾਅਦਾ ਕੀਤਾ ਹੈ।