ਕਿਸਾਨੀ ਸੰਘਰਸ਼ ਨੂੰ ਸਮਰਪਿਤ ਗ਼ਜ਼ਲ
ਗ਼ਜ਼ਲ – ਕੁੱਝ ਬੰਦੇ
ਕੁੱਝ ਬੰਦੇ ਐਸੇ ਵੀ ਨੇ ਸ਼ਾਮਲ, ਵਿੱਚ ਸੂਚੀ ਮੇਰੇ ਯਾਰਾਂ ਦੀ,
ਉੱਪਰੋਂ ਅਪਣੱਤ ਦਿਖਾਉਂਦੇ ਨੇ,ਐਪਰ ਦਿਲ ਤੋਂ ਰੱਖਣ ਖਾਰਾਂ ਜੀ।
ਬਦਨਾਮ ਕਰਨ ਦਾ ਕੋਈ ਮੌਕਾ, ਇਹ ਹੱਥੋਂ ਜਾਣ ਨਾ ਦਿੰਦੇ ਨੇ
ਛੱਡਣ ਪਲਾਂ ਦੇ ਵਿੱਚ ਬਣਾ ਕੇ, ਖੰਭਾਂ ਦੀਆਂ ਇਹ ਡਾਰਾਂ ਜੀ।
ਸੱਚੀ ਯਾਰ ਵੀ ਚੰਦਰੇ ਹੋ ਗਏ, ਅੱਜ ਦੀ ਸਿਆਸਤ ਵਰਗੇ ਨੇ,
ਕੀ ਪਤਾ ਕਦ ਬਹੁਮਤ ਦੇ ਕੇ ਗੈਰਾਂ ਨੂੰ, ਡੇਗ ਜਾਣ ਸਰਕਾਰਾਂ ਜੀ।
ਦੌਲਤ ਸ਼ੌਹਰਤ ਦੇਣ ਰੱਬ ਦੀ, ਨਾ ਜਾਣੇ ਕਿਹੜੀ ਗੱਲੋਂ ਸੜਦੇ ਨੇ,
ਜੋ ਮੇਰੀ ਮੌਤ ਦੀ ਖਬਰ ਪੜਨ ਲਈ, ਰੋਜ਼ ਪੜ੍ਹਨ ਅਖਬਾਰਾਂ ਜੀ।
ਦੁਸ਼ਮਣ ਨਾਲ ਤੇ ਲੜ ਕੇ ਔਖਾ, ਸੌਖਾ ਜਿੱਤ ਹੀ ਜਾਂਦਾ ਮੈਂ
ਕੀਕਣ ਲੜ ਦਾ ਉਸਦੇ ਨਾਲ, ਜਿੱਥੇ ਜਿੱਤ ਵੀ ਹੋਵਣ ਹਾਰਾਂ ਜੀ।
ਚੰਦਨ ਨੇ ਤਾਂ ਚੰਦਨ ਰਹਿਣਾ, ਇਹ ਸਭ ਕੁਦਰਤ ਦਾ ਵਰਦਾਨ,
ਆ ਲੱਖ ਜ਼ਹਿਰੀਲਾ ਨਾਗ ਵੀ ਮਾਰੇ, ਭਾਵੇਂ ਕੋਟ ਫੂਕਾਰਾ ਜੀ।
ਚੱਲ ‘ਬਰਾੜਾ’ ਕੱਢ ਭੜਾਸ, ਲਿਖਕੇ ਦਿਲ ਦੇ ਡੂੰਘੇ ਦਰਦਾਂ ਨੂੰ,
ਸੂਚੀ ਵਾਲੇ ਦੀ ਜੜ੍ਹ ਦੇ ਉੱਤੇ, ਨਾ ਆਪਾ ਕਦੇ ਚਲਾਈਏ ਆਰਾ ਜੀ।
———————00000———————
ਗ਼ਜ਼ਲ – ਬਦਲ ਗਈ ਏ ਦੁਨੀਆ
ਬਦਲ ਗਈ ਏ ਦੁਨੀਆ ਬਦਲ ਗਏ ਨੇ ਸਭਨਾਂ ਦੇ ਕਿਰਦਾਰ,
ਇੱਕੋ ਚੀਜ਼ ਜੋ ਅੱਜ ਵੀ ਬਦਲੀ ਨਾਹੀਂ ਮਾਂ ਦਾ ਬੱਚਿਆਂ ਲਈ ਪਿਆਰ।
ਰਿਸ਼ਤੇ ਨਾਤੇ ਸਭ ਮਿੱਟੀ ਹੋ ਗਏ ਮਿੱਟੀ ਹੋ ਗਏ ਧਰਮ ਇਮਾਨ,
ਇੱਕੋ ਰਿਸ਼ਤਾ ਮਾਂ ਦਾ ਸੱਚਾ ਬਚਿਆ ਬਾਕੀ ਗਰਕ ਗਿਆ ਸੰਸਾਰ।
ਰੱਥ ਅਗਨ ਦਾ ਤਾਂਡਵ ਕਰਦਾ ਤਾਂਡਵ ਕਰਦਾ ਸੱਚ ਦੀ ਹਿੱਕ ਤੇ ਆਣ,
ਨਿੱਤ ਰੋਜ਼ ਹੁੰਦਾ ਹੈ ਦੂਣ ਸਵਾਇਆ ਮਜ਼ਲੂਮਾਂ ਦਾ ਚੀਕ ਚਿਹਾੜਾ ਹਾਹਾਕਾਰ।
ਪੰਜ – ਪੰਜ ਕਹਿ ਕੇ ਆਵਣ ਆਵਣ ਚੂੰਢਣ ਵਾਲੇ ਲੋਕ ਮਹਾਨ
ਚੂੰਢਿਆ ਗਿਆ ਕਰੰਗ ਨਾ ਬਦਲੇ ਬੱਸ ਬਦਲਣ ਚੂੰਢਣ ਵਾਲੇ ਦੇ ਪ੍ਰਕਾਰ।
ਵਿਚਲੀ ਗੱਲ ਕਰੰਗ ਨਾ ਸਮਝੇ ਨਾ ਸਮਝੇ ਕਾਗਾ ਦੀ ਟੇਢੀ ਚਾਲ,
ਕਰੰਗ ਕਾਗਾ ਨੂੰ ਰੱਖਿਅਕ ਜਾਣੇ ਚੁਣਦਾ ਕਾਗਾ ਚੋਂ ਸਰਕਾਰ।
‘ਬਰਾੜਾ’ ਤੂੰ ਕੱਲਾ ਨਹੀਂ ਮੂਰਖ ਇੱਥੇ ਮੂਰਖ ਹੈ ਏ ਕੁੱਲ ਜਹਾਨ,
ਆਤਸੀਨ ਵਿੱਚ ਸੱਪ ਪਾਲ ਕੇ ਯੁੱਗੋਂ ਲੰਮੀ ਉਮਰ ਲਈ ਕਰਨ ਪੁਕਾਰ,
———————00000———————