ਇਸਲਾਮਾਬਾਦ – ਪਾਕਿਸਤਾਨ ਦੇ ਲੋਕਾਂ ਤੇ ਵਿਰੋਧੀ ਧਿਰ ਦੇ ਨੇਤਾਵਾਂ ਨੇ ਮਰੀ ਹਾਦਸੇ ’ਤੇ ਦਿੱਤੇ ਗਏ ਗ਼ੈਰ-ਸੰਵੇਦਨਸ਼ੀਲ ਬਿਆਨ ਲਈ ਪ੍ਰਧਾਨ ਮੰਤਰੀ ਇਮਰਾਨ ਖ਼ਾਨ ਦੀ ਸਖ਼ਤ ਆਲੋਚਨਾ ਕੀਤੀ ਹੈ। ਇਮਰਾਨ ਨੇ ਹਾਦਸੇ ਲਈ ਸੈਲਾਨੀਆਂ ਨੂੰ ਹੀ ਜ਼ਿੰਮੇਵਾਰ ਠਹਿਰਾ ਦਿੱਤਾ ਸੀ ਤੇ ਕਿਹਾ ਸੀ ਕਿ ਭੀੜ ਵੱਧਣ ਕਾਰਨ ਪ੍ਰਸ਼ਾਸਨ ਦੀਆਂ ਤਿਆਰੀਆਂ ਦੇ ਮੁਕਾਬਲੇ ਪ੍ਰਸ਼ਾਸਨ ਦੀਆਂ ਤਿਆਰੀ ਘੱਟ ਪੈ ਗਈਆਂ। ਦੂਜੇ ਪਾਸੇ, ਇਕ ਨਾਬਾਲਿਗ ਦੀ ਮੌਤ ਨਾਲ ਹਾਦਸੇ ’ਚ ਮਿ੍ਰਤਕਾਂ ਦੀ ਗਿਣਤੀ 23 ਹੋ ਚੁੱਕੀ ਹੈ। ਇਮਰਾਨ ਖ਼ਾਨ ਨੇ ਸ਼ਨਿਚਰਵਾਰ ਨੂੰ ਟਵੀਟ ਕੀਤਾ ਸੀ, ‘ਮਰੀ ਦੀਆਂ ਸੜਕਾਂ ’ਤੇ ਸੈਲਾਨੀਆਂ ਦੀ ਮੌਤ ਤੋਂ ਦੁਖੀ ਹਾਂ। ਉਮੀਦ ਤੋਂ ਪਰੇ ਬਰਫ਼ਬਾਰੀ ਤੇ ਮੌਸਮ ਦੀ ਜਾਣਕਾਰੀ ਲਏ ਬਿਨਾਂ ਵੱਡੀ ਗਿਣਤੀ ’ਚ ਸੈਲਾਨੀਆਂ ਦੇ ਮਰੀ ਪੁੱਜਣ ਕਾਰਨ ਜ਼ਿਲ੍ਹਾ ਪ੍ਰਸ਼ਾਸਨ ਢੁੱਕਵੀਆਂ ਤਿਆਰੀਆਂ ਨਹੀਂ ਕਰ ਸਕਿਆ।’ ਉਨ੍ਹਾਂ ਦੀ ਟਿੱਪਣੀ ਨੂੰ ਦੇਸ਼ ਦੀ ਜਨਤਾ ਤੇ ਪਾਕਿਸਤਾਨ ਮੁਸਲਿਮ ਲੀਗ-ਨਵਾਜ਼ ਦੇ ਨੇਤਾਵਾਂ ਨੇ ਸਖ਼ਤ ਆਲੋਚਨਾ ਕੀਤੀ ਹੈ।ਪੀਐੱਮਐੱਲ-ਐੱਨ ਦੇ ਬੁਲਾਰੇ ਮਰੀਅਮ ਔਰੰਗਜ਼ੇਬ ਨੇ ਟਵੀਟ ਕੀਤਾ, ‘ਇਹ ਬਿਆਨ ਤੁਹਾਡੀ ਉਦਾਸੀਨਤਾ, ਕਰੂਰਤਾ ਤੇ ਅਸਮਰੱਥਾ ਦੀ ਪ੍ਰੀਭਾਸ਼ਾ ਹੈ।’ ਜਿਓ ਨਿਊਜ਼ ਮੁਤਾਬਕ ਮਰੀਅਮ ਨੇ ਇਸ ‘ਅਪਰਾਧਿਕ ਲਾਪਰਵਾਹੀ’ ਲਈ ਇਮਰਾਨ ਖ਼ਾਨ ਤੋਂ ਜਵਾਬ ਮੰਗਿਆ। ਪਾਰਟੀ ਦੀ ਮੀਤ ਪ੍ਰਧਾਨ ਪਰਵੇਜ਼ ਰਸ਼ੀਦ ਨੇ ਇਮਰਾਨ ਨੂੰ ਇਸ ਟਵੀਟ ਨੂੁੰ ਵਾਪਸ ਲੈਣ ਦੀ ਮੰਗ ਕੀਤੀ। ਇਹਸਾਨ ਇਕਬਾਲ ਨੇ ਇਮਰਾਨ ਖ਼ਾਨ ਨੂੰ ਬੇਦਰਦੀ ਕਰਾਰ ਦਿੰਦੇ ਹੋਏ ਕਿਹਾ ਕਿ ਮੌਸਮ ਵਿਗਿਆਨ ਵਿਭਾਗ ਨੇ 31 ਦਸੰਬਰ ਨੂੰ ਭਾਰੀ ਬਰਫ਼ਬਾਰੀ ਦੀ ਚਿਤਾਵਨੀ ਦਿੱਤੀ ਸੀ, ਇਸ ਦੇ ਬਾਵਜੂਦ ਸਰਕਾਰ ਸੌਂ ਰਹੀ ਸੀ। ਗੰਭੀਰ ਤੌਰ ’ਤੇ ਠੰਢ ਦੀ ਸ਼ਿਕਾਰ ਚਾਰ ਸਾਲਾ ਬੱਚੀ ਨੂੰ ਸਮੇਂ ’ਤੇ ਹਸਪਤਾਲ ਨਹੀਂ ਪਹੁੰਚਾਇਆ ਜਾ ਸਕਿਆ, ਜਿਸ ਨਾਲ ਉਨ੍ਹਾਂ ਦੀ ਮੌਤ ਹੋ ਗਈ। ਇਸ ਦੇ ਨਾਲ ਹੀ ਮਰੀ ਹਾਦਸੇ ’ਚ ਮਰਨ ਵਾਲਿਆਂ ਦੀ ਗਿਣਤੀ 23 ਹੋ ਗਈ। ਮੌਕੇ ’ਤੇ ਰਾਹਤ ਕਾਰਜ ਜਾਰੀ ਹੈ। ਲੋਕ ਵਾਹਨਾਂ ਨੂੰ ਮੌਕੇ ’ਤੇ ਛੱਡ ਕੇ ਪੈਦਲ ਹੀ ਸ਼ਹਿਰ ਤੋਂ ਬਾਹਰ ਨਿਕਲਣ ਦੀ ਕੋਸ਼ਿਸ਼ ਕਰ ਰਹੇ ਹਨ।
ਦੱਸਣਯੋਗ ਹੈ ਕਿ ਉੱਤਰੀ ਪਾਕਿਸਤਾਨ ਦੇ ਸੈਲਾਨੀ ਸ਼ਹਿਰ ਮੁਰੀ ’ਚ ਰਿਕਾਰਡ ਬਰਫ਼ਬਾਰੀ ਵਿਚਾਲੇ ਵੱਡੀ ਗਿਣਤੀ ’ਚ ਸੈਲਾਨੀ ਪੁੱਜ ਗਏ ਸਨ। ਭਾਰੀ ਬਰਫ਼ਬਾਰੀ ਕਾਰਨ ਸੈਲਾਨੀਆਂ ਦੀਆਂ ਸੈਂਕੜੇ ਗੱਡੀਆਂ ਸੜਕ ’ਤੇ ਫਸ ਗਈਆਂ ਸਨ। ਇਸ ਵਿਚਾਲੇ ਵਾਹਨਾਂ ’ਚ ਫਸੇ ਸੈਲਾਨੀਆਂ ’ਚੋਂ 22 ਦੀ ਮੌਤ ਹੋ ਗਈ ਸੀ।ਪਾਕਿਸਤਾਨੀ ਅਧਿਕਾਰੀਆਂ ਨੇ ਮਰੀ ਹਾਦਸੇ ਤੋਂ ਬਾਅਦ ਤਿੰਨ ਹੋਰ ਸੈਲਾਨੀ ਥਾਵਾਂ ਸ਼ੋਗਰਾਨ, ਨਾਰਾਨ ਤੇ ਕਾਗਾਨ ’ਚ ਸੈਲਾਨੀਆਂ ਦੇ ਜਾਣ ’ਤੇ ਅਸਥਾਈ ਤੌਰ ’ਤੇ ਪਾਬੰਦੀ ਲਾ ਦਿੱਤੀ ਹੈ। ਸਮਾ ਟੀਵੀ ਦੀ ਰਿਪੋਰਟ ਮੁਤਾਬਕ ਮਨਸੇਹਰਾ ਦੇ ਕਮਿਸ਼ਨਰ ਕਾਸਿਮ ਖ਼ਾਨ ਵੱਲੋਂ ਜਾਰੀ ਹੁਕਮ ’ਚ ਕਿਹਾ ਗਿਆ ਹੈ ਕਿ ਖ਼ਤਰਨਾਕ ਮੌਸਮ ਕਾਰਨ ਤਿੰਨ ਸੈਲਾਨੀ ਥਾਵਾਂ ’ਚ ਹਰ ਤਰ੍ਹਾਂ ਦੇ ਵਾਹਨਾਂ ਦੀ ਐਂਟਰੀ ’ਤੇ ਅਸਥਾਈ ਤੌਰ ’ਤੇ ਰੋਕ ਲਾ ਦਿੱਤੀ ਗਈ ਹੈ।