ਭਾਰਤੀ ਜੂਨੀਅਰ ਮਹਿਲਾ ਹਾਕੀ ਟੀਮ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ‘ਇੰਟਰਨੈਸ਼ਨਲ ਹਾਕੀ ਫੈਡਰੇਸ਼ਨ ਜੂਨੀਅਰ ਮਹਿਲਾ ਹਾਕੀ ਵਿਸ਼ਵ ਕੱਪ 2025’ ਲਈ 9ਵੇਂ/16ਵੇਂ ਸਥਾਨ ਦੇ ਕੁਆਲੀਫਾਈ ਮੈਚ ਵਿੱਚ ਵੇਲਜ਼ ਨੂੰ 3-1 ਨਾਲ ਹਰਾਇਆ। ਇਹ ਮੈਚ ਸੋਮਵਾਰ ਨੂੰ ਸੈਂਟੀਆਗੋ ਦੇ ਸੈਂਟਰੋ ਡਿਪੋਰਟੀਵੋ ਡੀ ਹਾਕੀ ਸੇਸਪੀਡਸ, ਐਸਟਾਡੀਓ ਨੈਸੀਓਨਲ ਵਿਖੇ ਖੇਡਿਆ ਗਿਆ।
ਭਾਰਤ ਲਈ ਹੀਨਾ ਬਾਨੋ (14ਵੇਂ ਮਿੰਟ), ਸੁਨੇਲਿਤਾ ਟੋਪੋ (24ਵੇਂ ਮਿੰਟ), ਅਤੇ ਇਸ਼ੀਕਾ (31ਵੇਂ ਮਿੰਟ) ਨੇ ਗੋਲ ਕੀਤੇ, ਜਦੋਂ ਕਿ ਵੇਲਜ਼ ਲਈ ਇੱਕੋ ਇੱਕ ਗੋਲ ਐਲੋਇਸ ਮੋਏਟ (52ਵੇਂ ਮਿੰਟ) ਨੇ ਕੀਤਾ। ਭਾਰਤੀ ਟੀਮ ਮੈਚ ਦੀ ਸ਼ੁਰੂਆਤ ਤੋਂ ਹੀ ਹਮਲਾਵਰ ਦਿਖਾਈ ਦਿੱਤੀ, ਪਹਿਲੇ 30 ਸਕਿੰਟਾਂ ਦੇ ਅੰਦਰ ਪੈਨਲਟੀ ਕਾਰਨਰ ਹਾਸਲ ਕੀਤਾ। ਭਾਰਤੀ ਖਿਡਾਰੀਆਂ ਨੇ ਲਗਾਤਾਰ ਦਬਾਅ ਬਣਾਈ ਰੱਖਿਆ ਅਤੇ ਮੌਕੇ ਬਣਾਏ, ਹਾਲਾਂਕਿ ਉਹ ਸ਼ੁਰੂਆਤੀ ਮਿੰਟਾਂ ਵਿੱਚ ਗੋਲ ਕਰਨ ਵਿੱਚ ਅਸਫਲ ਰਹੀਆਂ। ਇਸ ਦੌਰਾਨ ਵੇਲਜ਼ ਕੋਲ ਪੈਨਲਟੀ ਸਟ੍ਰੋਕ ਦਾ ਮੌਕਾ ਸੀ, ਪਰ ਭਾਰਤੀ ਗੋਲਕੀਪਰ ਨਿਧੀ ਨੇ ਸਕੋਰ ਨੂੰ ਬਰਾਬਰ ਰੱਖਣ ਲਈ ਸ਼ਾਨਦਾਰ ਬਚਾਅ ਕੀਤਾ।
ਪਹਿਲੇ ਕੁਆਰਟਰ ਦੇ ਆਖਰੀ ਪਲਾਂ ਵਿੱਚ, ਹਿਨਾ ਬਾਨੋ ਨੇ ਸਾਕਸ਼ੀ ਰਾਣਾ ਦੇ ਸ਼ਾਨਦਾਰ ਮੂਵ ਤੋਂ ਬਾਅਦ ਆਸਾਨ ਟੈਪ-ਇਨ ਨਾਲ ਭਾਰਤ ਨੂੰ ਲੀਡ ਦਿਵਾਈ। ਦੂਜੇ ਕੁਆਰਟਰ ਵਿੱਚ ਭਾਰਤ ਦਾ ਦਬਦਬਾ ਜਾਰੀ ਰਿਹਾ, ਅਤੇ ਸੁਨੇਲਿਤਾ ਟੋਪੋ ਨੇ ਸਾਕਸ਼ੀ ਰਾਣਾ ਦੇ ਸ਼ਾਟ ਦੇ ਰੀਬਾਉਂਡ ‘ਤੇ ਨੇੜਿਓਂ ਗੋਲ ਕਰਕੇ ਲੀਡ 2-0 ਕਰ ਦਿੱਤੀ। ਭਾਰਤ ਪਹਿਲੇ ਹਾਫ ਵਿੱਚ 14 ਸਰਕਲ ਐਂਟਰੀਜ਼ ਨਾਲ ਮਜ਼ਬੂਤ ਸਥਿਤੀ ਵਿੱਚ ਰਿਹਾ।
ਭਾਰਤ ਨੇ ਦੂਜੇ ਹਾਫ ਦੇ ਸ਼ੁਰੂ ਵਿੱਚ ਤੀਜਾ ਗੋਲ ਕੀਤਾ। ਇਸ਼ਿਕਾ ਨੇ ਵੈਲਸ਼ ਗੋਲਕੀਪਰ ਦੇ ਰੀਬਾਉਂਡ ‘ਤੇ ਗੇਂਦ ਨੂੰ ਗੋਲਪੋਸਟ ਵਿੱਚ ਭੇਜਿਆ। ਕੋਚ ਜੋਤੀ ਸਿੰਘ ਦੀ ਟੀਮ ਨੇ ਫਿਰ ਖੇਡ ‘ਤੇ ਪੂਰਾ ਕੰਟਰੋਲ ਬਣਾਈ ਰੱਖਿਆ ਅਤੇ ਲਗਾਤਾਰ ਉੱਚ ਦਬਾਅ ਨਾਲ ਵੈਲਸ਼ ਡਿਫੈਂਸ ਨੂੰ ਪਿੱਛੇ ਧੱਕਿਆ।
ਐਲੋਇਸ ਮੋਏਟ ਨੇ ਆਖਰੀ ਕੁਆਰਟਰ ਵਿੱਚ ਵੇਲਜ਼ ਲਈ ਇੱਕ ਗੋਲ ਕੀਤਾ, ਪਰ ਇਹ ਸਿਰਫ ਇੱਕ ਦਿਲਾਸਾ ਗੋਲ ਸਾਬਤ ਹੋਇਆ। ਭਾਰਤੀ ਟੀਮ ਨੇ ਮੈਚ ਦਾ ਅੰਤ ਮਜ਼ਬੂਤੀ ਨਾਲ ਕੀਤਾ, 3-1 ਨਾਲ ਜਿੱਤ ਪ੍ਰਾਪਤ ਕੀਤੀ।
ਭਾਰਤੀ ਟੀਮ ਆਪਣਾ ਅਗਲਾ ਮੈਚ 9 ਦਸੰਬਰ ਨੂੰ ਉਰੂਗਵੇ ਵਿਰੁੱਧ ਖੇਡੇਗੀ।