ਅੰਮ੍ਰਿਤਸਰ – ਖ਼ਾਲਸਾ ਕਾਲਜ ਆਫ਼ ਵੈਟਰਨਰੀ ਐਂਡ ਐਨੀਮਲ ਸਾਇੰਸਸ ਦੀ ਫ਼ੈਕਲਟੀ ਨੇ ਪ੍ਰੋਗਰੈਸਿਵ ਲਾਈਵਸਟਾਕ ਫਾਰਮਰਜ਼ ਐਸੋਸੀਏਸ਼ਨ (ਪੀ. ਐੱਲ. ਐੱਫ. ਏ.), ਪੰਜਾਬ ਨੇ ਉੱਚਾ ਪਿੰਡ, ਖਮਾਣੋਂ (ਫਤਿਹਗੜ੍ਹ ਸਾਹਿਬ) ਵਿਖੇ ਵਾਰ-ਵਾਰ ਪ੍ਰਜਨਨ, ਮਾਸਟਾਈਟਸ ਅਤੇ ਪ੍ਰੋਟੋਜੋਆਨ ਬਿਮਾਰੀਆਂ ’ਤੇ ਕਰਵਾਏ ਗਏ ਇਕ ਰੋਜ਼ਾ ਸੈਮੀਨਾਰ ’ਚ ਸ਼ਿਰਕਤ ਕਰਕੇ ਆਪਣੇ ਮਹੱਤਵਪੂਰਨ ਸੁਝਾਵਾਂ ਨੂੰ ਸਾਂਝਾ ਕੀਤਾ।
ਇਸ ਸੈਮੀਨਾਰ ’ਚ ਕਾਲਜ ਪ੍ਰਿੰਸੀਪਲ ਡਾ. ਹਰੀਸ਼ ਕੁਮਾਰ ਵਰਮਾ ਨੇ ਮਾਹਿਰ ਅਤੇ ਸਰੋਤ ਵਿਅਕਤੀ ਵਜੋਂ ਹਿੱਸਾ ਲੈਂਦਿਆਂ ਡੇਅਰੀ ਜਾਨਵਰਾਂ ’ਚ ਵਾਰ-ਵਾਰ ਪ੍ਰਜਨਨ ਅਤੇ ਮਾਸਟਾਈਟਸ ਦਾ ਪ੍ਰਬੰਧਨ’ ’ਤੇ ਵਿਸਥਾਰਪੂਰਵਕ ਭਾਸ਼ਣ ਦਿੱਤਾ। ਉਨ੍ਹਾਂ ਕਿਹਾ ਕਿ ਵਾਰ-ਵਾਰ ਪ੍ਰਜਨਨ ਇਕ ਪ੍ਰਮੁੱਖ ਪ੍ਰਜਨਨ ਸਮੱਸਿਆ ਹੈ ਜਿਸ ਨਾਲ ਵੱਛੇ, ਦੁੱਧ ਦੇ ਸਬੰਧ ’ਚ ਭਾਰੀ ਆਰਥਿਕ ਨੁਕਸਾਨ ਹੁੰਦਾ ਹੈ ਅਤੇ ਡੇਅਰੀ ਕਿਸਾਨਾਂ ਦੇ ਵਿਕਾਸ ਲਈ ਇੱਕ ਵੱਡੀ ਰੁਕਾਵਟ ਹੈ।
ਉਨ੍ਹਾਂ ਕਿਹਾ ਕਿ ਇਹ ਇੱਕ ਪੁਰਾਣੀ ਸਮੱਸਿਆ ਹੈ ਜਿਸ ਨਾਲ ਸੜਕਾਂ ’ਤੇ ਅਵਾਰਾ ਜਾਨਵਰਾਂ ਦੀ ਗਿਣਤੀ ’ਚ ਵਾਧਾ ਹੁੰਦਾ ਹੈ, ਜਦੋਂ ਕਿ ਮਾਸਟਾਈਟਸ ਵੀ ਆਰਥਿਕ ਤੌਰ ’ਤੇ ਸਬੰਧਿਤ ਸਮੱਸਿਆ ਹੈ ਜਿਸ ਨਾਲ ਕਿਸਾਨਾਂ ਨੂੰ ਦੁੱਧ ਅਤੇ ਬੱਕਰੀਆਂ ਦੇ ਮਾਮਲੇ ’ਚ ਭਾਰੀ ਨੁਕਸਾਨ ਹੁੰਦਾ ਹੈ। ਉਨ੍ਹਾਂ ਕਿਹਾ ਕਿ ਇਸ ਮੌਕੇ ਸਵਾਲ ਜਵਾਬ ਸੈਸ਼ਨ ਵੀ ਆਯੋਜਿਤ ਕੀਤਾ ਗਿਆ, ਜਿਸ ’ਚ ਕਿਸਾਨਾਂ ਦੇ ਸਵਾਲਾਂ ਦੇ ਜਵਾਬ ਦਿੱਤੇ ਗਏ ਅਤੇ ਮੌਕੇ ’ਤੇ ਹੀ ਉਨ੍ਹਾਂ ਦੇ ਹੱਲ ਸਾਂਝੇ ਕੀਤੇ ਗਏ।
ਸੈਮੀਨਾਰ ਦੌਰਾਨ ਇਕ ਆਕਰਸ਼ਕ ਪ੍ਰਦਰਸ਼ਨੀ ਵੀ ਲਗਾਈ ਗਈ। ਸੈਮੀਨਾਰ ’ਚ ਪੀ. ਐੱਲ. ਐੱਫ. ਏ., ਪੰਜਾਬ ਨਾਲ ਰਜਿਸਟਰਡ ਲਗਭਗ 120 ਡੇਅਰੀ ਕਿਸਾਨਾਂ ਨੇ ਭਾਗ ਲਿਆ। ਇਸ ਮੌਕੇ ਪੀ. ਐੱਲ. ਐੱਫ. ਏ. ਦੇ ਪ੍ਰਧਾਨ ਸ: ਸੰਦੀਪ ਸਿੰਘ ਰੰਧਾਵਾ ਨੇ ਡਾ. ਵਰਮਾ ਦਾ ਸੈਮੀਨਾਰ ’ਚ ਹਿੱਸਾ ਲੈਣ ਲਈ ਧੰਨਵਾਦ ਕੀਤਾ।
ਡਾ. ਵਰਮਾ ਨੇ ਕਿਹਾ ਕਿ ਸੈਮੀਨਾਰ ਨੂੰ ਕਾਰਸ ਲੈਬਾਰਟਰੀਜ਼ ਪ੍ਰਾਈਵੇਟ ਲਿਮਟਿਡ, ਕਰਨਾਲ ਦੁਆਰਾ ਸਪਾਂਸਰ ਕੀਤਾ ਗਿਆ ਸੀ। ਇਸ ਸੈਮੀਨਾਰ ਮੌਕੇ ਕਿਸਾਨਾਂ ਨੇ ਜ਼ੋਰ ਦਿੰਦਿਆਂ ਕਿਹਾ ਕਿ ਕਿਸਾਨ ਭਾਈਚਾਰੇ ਲਈ ਅਜਿਹੇ ਸੈਮੀਨਾਰ ਨਿਯਮਿਤ ਤੌਰ ’ਤੇ ਮਹੀਨਾਵਾਰ ਆਯੋਜਿਤ ਕੀਤੇ ਜਾਣੇ ਚਾਹੀਦੇ ਹਨ, ਜਿਸ ਤਹਿਤ ਇਸ ਦਾ ਅਗਲਾ ਸੈਮੀਨਾਰ ਜਲਦ ਹੀ ਅੰਮ੍ਰਿਤਸਰ ਵਿਖੇ ਆਯੋਜਿਤ ਕੀਤਾ ਜਾਵੇਗਾ।