ਨਵੀਂ ਦਿੱਲੀ – ਭਾਰਤੀ ਖਿਡਾਰੀ 28 ਜੁਲਾਈ ਤੋਂ ਸ਼ੁਰੂ ਹੋਣ ਵਾਲੀਆਂ ਬਰਮਿੰਘਮ ਰਾਸ਼ਟਰਮੰਡਲ ਖੇਡਾਂ ਵਿਚ ਮੈਡਲ ਦੀ ਦਾਅਵੇਦਾਰੀ ਲਈ ਉਤਰਨਗੇ। ਪਹਿਲੇ ਦਿਨ ਵੀਰਵਾਰ ਨੂੰ ਇਨ੍ਹਾਂ ਖੇਡਾਂ ਦਾ ਉਦਘਾਟਨੀ ਸਮਾਗਮ ਹੋਵੇਗਾ ਜਦਕਿ ਮੁਕਾਬਲੇ ਭਾਰਤੀ ਸਮੇਂ ਮੁਤਾਬਕ 29 ਜੁਲਾਈ ਤੋਂ ਹੀ ਸ਼ੁਰੂ ਹੋਣਗੇ। ਮੁਕਾਬਲੇ ਦੇ ਪਹਿਲੇ ਦਿਨ ਭਾਰਤ ਵੱਲੋਂ ਤੈਰਾਕੀ, ਬੈਡਮਿੰਟਨ, ਮੁੱਕੇਬਾਜ਼ੀ, ਕ੍ਰਿਕਟ, ਸਾਈਕਲਿੰਗ, ਮਹਿਲਾ ਹਾਕੀ, ਲਾਅਨ ਬਾਲ, ਨੈੱਟਬਾਲ, ਰਗਬੀ, ਸਕੁਐਸ਼, ਟੇਬਲ ਟੈਨਿਸ ਤੇ ਟ੍ਰਾਇਥਲੋਨ ਦੇ ਖਿਡਾਰੀ ਆਪੋ-ਆਪਣੇ ਮੁਕਾਬਲਿਆਂ ਵਿਚ ਉਤਰਨਗੇ ਤੇ ਭਾਰਤੀ ਮੁਹਿੰਮ ਦੀ ਸ਼ੁਰੂਆਤ ਕਰਨਗੇ। ਇਸ ਖੇਡ ਵਿਚ ਪਹਿਲੀ ਵਾਰ ਮਹਿਲਾ ਕ੍ਰਿਕਟ ਨੂੰ ਸ਼ਾਮਲ ਕੀਤਾ ਗਿਆ ਹੈ ਤੇ ਟੀਮ ਆਸਟ੍ਰੇਲੀਆ ਖ਼ਿਲਾਫ਼ ਆਪਣਾ ਪਹਿਲਾ ਮੈਚ ਖੇਡੇਗੀ। ਇਵੇਂ ਹੀ ਹਾਕੀ ਵਿਚ ਮਹਿਲਾ ਟੀਮ ਦਾ ਮੁਕਾਬਲਾ ਗਰੁੱਪ ਮੈਚ ਵਿਚ ਘਾਨਾ ਨਾਲ ਹੋਵੇਗਾ ਜਦਕਿ ਮੁੱਕੇਬਾਜ਼ੀ ਵਿਚ ਮਰਦ ਤੇ ਮਹਿਲਾਵਾਂ ਦੇ ਰਾਊਂਡ-32 ਦੇ ਮੈਚ ਹੋਣਗੇ।
ਪੀਵੀ ਸਿੰਧੂ ਸਮੇਤ ਸਟਾਰ ਬੈਡਮਿੰਟਨ ਖਿਡਾਰੀ ਰਾਸ਼ਟਰਮੰਡਲ ਖੇਡਾਂ ਵਿਚ ਨਿੱਜੀ ਗੋਲਡ ਮੈਡਲ ਹਾਸਲ ਕਰਨ ਲਈ ਕੋਈ ਕਸਰ ਨਹੀਂ ਛੱਡਣਗੇ ਪਰ ਡਬਲਜ਼ ਖਿਡਾਰੀ ਵੀ ਸੁਰਖ਼ੀਆਂ ਵਿਚ ਰਹਿਣਗੇ ਕਿਉਂਕਿ ਭਾਰਤ ਦਾ ਟੀਚਾ ਮਿਕਸਡ ਟੀਮ ਖ਼ਿਤਾਬ ਕਾਇਮ ਰੱਖ ਕੇ ਇਨ੍ਹਾਂ ਖੇਡਾਂ ਵਿਚ ਆਪਣੇ ਪ੍ਰਦਰਸ਼ਨ ਵਿਚ ਨਿਰੰਤਰਤਾ ਬਣਾਈ ਰੱਖਣਾ ਹੋਵੇਗਾ। ਗੋਲਡ ਕੋਸਟ ਵਿਚ ਖੇਡੀਆਂ ਗਈਆਂ ਪਿਛਲੀਆਂ ਰਾਸ਼ਟਰਮੰਡਲ ਖੇਡਾਂ ਵਿਚ ਭਾਰਤੀ ਖਿਡਾਰੀਆਂ ਨੇ ਬਿਹਤਰੀਨ ਪ੍ਰਦਰਸ਼ਨ ਕੀਤਾ ਸੀ ਤੇ ਦੋ ਗੋਲਡ ਮੈਡਲਾਂ ਸਮੇਤ ਕੁੱਲ ਛੇ ਮੈਡਲ ਜਿੱਤੇ ਸਨ। ਨਿੱਜੀ ਮੁਕਾਬਲਿਆਂ ਵਿਚ ਸੋਨੇ ਦਾ ਤਗਮਾ ਜਿੱਤਣਾ ਮੁੜ ਭਾਰਤੀ ਖਿਡਾਰੀਆਂ ਦਾ ਟੀਚਾ ਹੋਵੇਗਾ। ਇਨ੍ਹਾਂ ਵਿਚ ਸਿਰਫ਼ ਸਿੰਧੂ ਹੀ ਨਹੀਂ ਬਲਕਿ ਵਿਸ਼ਵ ਚੈਂਪੀਅਨਸ਼ਿਪ ਦੇ ਸਿਲਵਰ ਤੇ ਕਾਂਸੇ ਦਾ ਮੈਡਲ ਜੇਤੂ ਕ੍ਰਮਵਾਰ ਕਿਦਾਂਬੀ ਸ਼੍ਰੀਕਾਂਤ ਤੇ ਲਕਸ਼ੇ ਸੇਨ ਵੀ ਸ਼ਾਮਲ ਹਨ। ਚਿਰਾਗ ਸ਼ੈੱਟੀ ਤੇ ਸਾਤਵਿਕਸਾਈਰਾਜ ਰੈਂਕੀਰੈੱਡੀ ਨੇ 2018 ਵਿਚ ਸਿਲਵਰ ਮੈਡਲ ਜਿੱਤਿਆ ਸੀ ਤੇ ਇਸ ਵਾਰ ਉਹ ਆਪਣੇ ਮੈਡਲ ਦਾ ਰੰਗ ਬਦਲਣਾ ਚਾਹੁਣਗੇ।
ਮੁੱਕੇਬਾਜ਼ੀ ਵਿਚ ਭਾਰਤ ਨੇ ਮਰਦ ਤੇ ਮਹਿਲਾ ਵਰਗ ਮਿਲਾ ਕੇ ਕੁੱਲ 12 ਮੁੱਕੇਬਾਜ਼ਾਂ ਨੂੰ ਰਾਸ਼ਟਰਮੰਡਲ ਖੇਡਾਂ ਦੀ ਚੁਣੌਤੀ ਵਿਚ ਉਤਾਰਿਆ ਹੈ ਪਰ ਦੇਸ਼ ਨੂੰ ਨਿਕਹਤ ਜ਼ਰੀਨ (50 ਕਿਲੋਗ੍ਰਾਮ), ਲਵਲੀਨਾ ਬੋਰਗੋਹਾਈ (70 ਕਿਲੋਗ੍ਰਾਮ) ਤੇ ਅਮਿਤ ਪੰਘਾਲ (51 ਕਿਲੋਗ੍ਰਾਮ) ਤੋਂ ਖ਼ਾਸ ਉਮੀਦਾਂ ਹੋਣਗੀਆਂ।