ਮਜ਼ਾਕ ਬਣ ਕੇ ਰਹਿ ਗਈ ਪੰਜਾਬ ਦੀ ਸਿਆਸਤ !

ਪੰਜਾਬ ਦੀ ਧਰਤੀ ਉਹ ਧਰਤੀ ਹੈ ਜਿਸ ਨੇ ਗੁਰੂ ਪੀਰ,ਯੋਧੇ ਪੈਦਾ ਕੀਤੇ। ਮਹਾਰਾਜਾ ਰਣਜੀਤ ਸਿੰਘ ਵਰਗੇ ਅਜਿਹੇ ਰਾਜੇ ਸਿਆਸਤਦਾਨ, ਆਗੂ ਪੈਦਾ ਕੀਤੇ ਜਿੰਨਾ ਦੇ ਤੇਜ਼ ਅੱਗੇ ਦੁਸ਼ਮਣ ਦੀ ਬਹਾਦੁਰੀ ਹਨੇਰੇ ਵਾਂਗ ਉੱਡਦੀ ਰਹੀ ਹੈ। ਜਿਸਦੇ ਸਾਹਮਣੇ ਵੈਰੀ ਦੇ ਹਥਿਆਰ ਮਿਆਨੋ ਬਾਹਰ ਨਹੀਂ ਸਨ ਨਿਕਲਦੇ ਅਤੇ ਜਿੰਨਾ ਦੇ ਨਾਅਰਿਆਂ ਨਾਲ ਖੈਬਰ ਤੱਕ ਦੀਆਂ ਪਹਾੜੀਆਂ ਕੰਬ ਜਾਂਦੀਆਂ ਰਹੀਆਂ। ਪੰਜ ਦਰਿਆਵਾਂ ਦੀ ਧਰਤੀ ਉੱਪਰ ਘੋੜਿਆਂ ਦੀਆਂ ਟਾਪਾਂ ਸੁਣਾਈ ਦਿੰਦੀਆਂ ਸਨ ਅਤੇ ਆਗੂ ਧੌਣਾਂ ਅਕੜਾ ਕੇ ਚੱਲਦੇ ਹੁੰਦੇ ਸਨ। ਅਜਿਹੇ ਸਿਆਸਤਦਾਨ ਹੋਏ ਕਿ ਅੰਗਰੇਜ਼ ਵੀ ਉਹਨਾਂ ਦੀਆਂ ਨੀਤੀਆਂ ਤੋਂ ਹੈਰਾਨ ਸਨ। ਪਰ ਉਹ ਪੰਜਾਬ ਅੱਜ ਵਰਗਾ ਪੰਜਾਬ ਨਹੀ ਸੀ। ਸਿੱਖਾਂ ਨੇ ਆਪਣਾ ਲਹੂ ਡੋਲ੍ਹ ਕੇ ਆਪਣਾ ਰਾਜ ਕਾਇਮ ਕੀਤਾ ਸੀ ਅਤੇ ਹਿੰਦੂ ਮੁਸਲਮਾਨ ਸਿੱਖ ਸਭ ਨੂੰ ਸਾਂਝੀਵਾਲ ਬਣਾਇਆ ਸੀ। ਉਹ ਇੱਕ ਅਜਿਹਾ ਪੰਜਾਬ ਸੀ ਜਿੱਥੇ ਸਰਦਾਰ ਹਰੀ ਸਿੰਘ ਨਲੂਏ, ਸਰਦਾਰ ਜੱਸਾ ਸਿੰਘ ਆਹਲੂਵਾਲੀਆ , ਸਰਦਾਰ ਜੱਸਾ ਸਿੰਘ ਰਾਮਗੜ੍ਹੀਆ ਵਰਗੇ ਆਗੂ ਸਨ, ਜੋ ਦੀਨ ਈਮਾਨ ਦੇ ਪੱਕੇ ਅਤੇ ਕਹਿਣੀ ਤੇ ਕਰਨੀ ਦੇ ਪੂਰੇ ਸਨ।

ਪਿਛਲੇ ਇੱਕ ਦੋ ਦਿਨਾਂ ਤੋਂ ਜਦੋਂ ਦਾ ਪੰਜਾਬ ਦੇ ਮਾਣਯੋਗ ਸਾਬਕਾ ਮੁੱਖ ਮੰਤਰੀ ਸਾਹਬ ਨੇ ਆਪਣੇ ਪਦ ਤੋਂ ਅਸਤੀਫ਼ਾ ਦਿੱਤਾ ਹੈ ਤਾਂ ਇੱਕ ਨਵਾਂ ਹੀ ਨਾਟਕ ਪੰਜਾਬ ਦੀ ਸਿਆਸਤ ਵਿੱਚ ਵੇਖਣ ਨੂੰ ਮਿਲਿਆ। ਇੱਕ ਦਿਨ ਵਿੱਚ ਚਾਰ ਵਿਅਕਤੀਆਂ ਦਾ ਮੁੱਖ ਮੰਤਰੀ ਬਣਨ ਲਈ ਨਾਮਜ਼ਦ ਹੋਣਾ ਜਿੱਥੇ ਹਾਸੋਹੀਣੀ ਸਥਿਤੀ ਪੈਦਾ ਕਰ ਰਿਹਾ ਸੀ, ਉਥੇ ਨਾਲ ਹੀ ਹੈਰਾਨ ਵੀ ਕਰ ਰਿਹਾ ਸੀ, ਕੀ ਸਾਡੇ ਪੰਜਾਬ ਦੀ ਵਿਵਸਥਾ ਨੂੰ ਸੰਭਾਲਣ ਵਾਲੇ ਐਨੇ ਕਮਜ਼ੋਰ ਹਨ ਕਿ ਉਹਨਾਂ ਕੋਲੋਂ ਡਟ ਕੇ ਇੱਕ ਫੈਸਲਾ ਨਹੀਂ ਲਿਆ ਜਾ ਰਿਹਾ। ਇਸ ਘਟਨਾ ਨੇ ਇਹ ਤਾਂ ਸਿੱਧ ਕਰ ਦਿੱਤਾ ਕਿ ਸਾਡਾ ਪੰਜਾਬ ਕਿਸੇ ਸੁਰੱਖਿਅਤ ਹੱਥਾਂ ਵਿੱਚ ਨਹੀਂ ਹੈ। ਸਾਡੇ ਕੋਲ ਨਾ ਤਾਂ ਦ੍ਰਿੜ੍ਹ ਫੈਸਲਾ ਲੈਣ ਵਾਲੇ ਫੈਸਲਾਕੁੰਨ ਹਨ ਅਤੇ ਨਾ ਹੀ ਅਜਿਹੇ ਸਿਆਸਤਦਾਨ ਜਿੰਨਾ ਉੱਪਰ ਭਰੋਸਾ ਕਰਕੇ ਪੰਜਾਬ ਦੀ ਡੋਰ ਥਮਾਈ ਜਾ ਸਕੇ। ਚਲੋ ਵਿਚਾਰ ਹੋਇਆ ਅਤੇ ਸਰਦਾਰ ਚਰਨਜੀਤ ਸਿੰਘ ਚੰਨੀ ਹੋਰਾਂ ਨੂੰ ਪੰਜਾਬ ਦੇ ਮੌਜੂਦਾ ਮੁੱਖ ਮੰਤਰੀ ਘੋਸ਼ਿਤ ਕਰ ਦਿੱਤਾ ਗਿਆ। ਪਰ ਪੰਜਾਬ ਵਿਧਾਨ ਸਭਾ ਵਿੱਚ ਹੋਈ ਬੈਠਕ ਵਿੱਚ ਜਿਹੋ ਜਿਹਾ ਮਾਹੌਲ ਵੇਖਣ ਨੂੰ ਮਿਲਿਆ ਮੈ ਉਸ ਤੋਂ ਬਹੁਤ ਹੈਰਾਨ ਸੀ। ਸ਼ੋਸ਼ਲ ਮੀਡੀਆ ਉੱਪਰ ਸਰਦਾਰ ਸੁਖਬੀਰ ਸਿੰਘ ਬਾਦਲ ਜੀ ਅਤੇ ਸਰਦਾਰ ਚਰਨਜੀਤ ਸਿੰਘ ਚੰਨੀ ਦੇ ਹੋਏ ਆਪਸ ਵਿੱਚ ਸਵਾਲ ਜਵਾਬ ਉਨ੍ਹਾਂ ਹੈਰਾਨ ਨਹੀਂ ਸਨ ਕਰ ਰਹੇ ਜਿੰਨਾ ਇਹ ਵੇਖ ਕੇ ਅਚੰਭਿਤ ਸਾਂ ਕਿ ਪੰਜਾਬ ਦੇ ਸਭ ਤੋਂ ਵੱਡੇ ਸਰਕਾਰੀ ਅਦਾਰੇ ਵਿੱਚ ਅਨੁਸ਼ਾਸਨ ਦੀ ਕਿੰਨੀ ਕਮੀ ਹੈ। ਦੋਨਾਂ ਧਿਰਾਂ ਦੀ ਹੋ ਰਹੀ ਬਹਿਸਬਾਜ਼ੀ ਤੋਂ ਇਹ ਸਾਬਿਤ ਹੋ ਰਿਹਾ ਸੀ ਕਿ ਇਹ ਸਿਆਸਤਦਾਨਾਂ ਦੀ ਬੈਠਕ ਨਹੀਂ ਸਗੋਂ ਇੱਕ ਜੁਗਲਬੰਦੀ ਹੋ ਰਹੀ ਹੈ, ਜਿਸ ਵਿੱਚ ਇੱਕ ਦੂਸਰੇ ਨੂੰ ਟਿੱਚਰਾਂ ਕੀਤੀਆਂ ਜਾ ਰਹੀਆਂ ਹਨ। ਸਰਦਾਰ ਚਰਨਜੀਤ ਸਿੰਘ ਚੰਨੀ ਦੇ ਜਵਾਬਾਂ ਨੂੰ ਵੇਖ ਭਾਵੇਂ ਪੂਰਾ ਪੰਜਾਬ ਹੱਸ ਰਿਹਾ ਹੈ, ਪਰ ਮੈਨੂੰ ਲੱਗਦਾ ਹੈ ਕਿ ਹੱਸਣ ਵਾਲੀ ਨਹੀਂ ਬਲਕਿ ਚਿੰਤਾ ਕਰਨ ਵਾਲੀ ਗੱਲ ਹੈ ਕਿ ਸਾਡਾ ਪੰਜਾਬ ਕਿੰਨਾ ਹੱਥਾਂ ਵਿੱਚ ਜਾ ਰਿਹਾ ਹੈ ਅਤੇ ਉਸਤੋਂ ਵੀ ਵੱਡੀ ਗੱਲ ਕਿ ਸਾਡੇ ਸਿਆਸਤਦਾਨ ਕਿੰਨੇ ਗੈਰ ਜਿੰਮੇਵਾਰ ਹਨ। ਇਹ ਵੀ ਸੋਚਣ ਵਾਲੀ ਗੱਲ ਹੈਂ ਕਿ ਅਜਿਹੇ ਕਿਹੜੇ ਹਾਲਾਤ ਪੈਦਾ ਹੋਏ ਹੋਣਗੇ ਜਿੰਨਾ ਕਰਕੇ ਮੁੱਖ ਮੰਤਰੀ ਜੀ ਅਸਤੀਫ਼ਾ ਦੇਣ ਲਈ ਮਜ਼ਬੂਰ ਹੋ ਗਏ।

ਸਾਡੀ ਤਰਾਸਦੀ ਹੈ ਕਿ ਸੜਕਾਂ ਉੱਪਰ ਕਿਸਾਨ ਰੁੱਲ ਰਹੇ ਹਨ ਪਰ ਇੱਕ ਵੀ ਅਜਿਹਾ ਸਿਆਸਤਦਾਨ ਸਾਡੇ ਕੋਲ ਨਹੀਂ ਹੈ ਜੋ ਇਹ ਕਹਿ ਸਕੇ ਕਿ ਮੈਂ ਕਿਸਾਨਾਂ ਨਾਲ ਹਿੱਕ ਤਾਣ ਕੇ ਖੜਾ ਹਾਂ। ਜਿੰਨੀ ਦੇਰ ਸਾਡੇ ਕੋਲ ਜਿੰਮੇਵਾਰ ਨੁਮਾਇਂਦੇ ਨਹੀ ਹੋਣਗੇ, ਅਸੀਂ ਕਿਸੇ ਵੀ ਤਬਦੀਲੀ ਦੀ ਆਸ ਨਹੀਂ ਰੱਖ ਸਕਦੇ। ਮੇਰਾ ਮੰਨਣਾ ਹੈ ਕਿ ਜਦੋਂ ਅਜਿਹੀਆਂ ਸਥਿਤੀਆਂ ਬਣਦੀਆਂ ਹਨ ਤਾਂ ਸਾਨੂੰ ਹੱਸਣ ਦੀ ਬਜਾਇ ਚਿੰਤਤ ਹੋਣਾ ਚਾਹੀਦਾ ਹੈ। ਕਿੰਨੀ ਹੈਰਾਨਗੀ ਭਰੀ ਗੱਲ ਹੈ ਕਿ ਸਾਡੇ ਪੰਜਾਬੀ ਕਨੈਡਾ, ਅਮਰੀਕਾ, ਇੰਗਲੈਂਡ ਵਰਗੇ ਦੇਸ਼ਾਂ ਦੀ ਵਿਵਸਥਾ ਨੂੰ ਚਲਾ ਰਹੇ ਹਨ, ਕਨੈਡਾ ਵਿੱਚ ਜਗਮੀਤ ਸਿੰਘ ਪ੍ਰਧਾਨ ਮੰਤਰੀ ਦੇ ਪਦ ਲਈ ਚੋਣ ਲੜ ਰਹੇ ਹਨ, ਪਰ ਇੱਕ ਸਾਡੇ ਪੰਜਾਬੀ ਸਿਆਸਤਦਾਨ ਹਨ ਜਿੰਨਾ ਨੂੰ ਹਾਸੋਹੀਣੀਆਂ ਗੱਲਾਂ ਕਰਨ ਤੋਂ ਵਿਹਲ ਨਹੀਂ।

ਇਹ ਬਹੁਤ ਵੱਡਾ ਚਿੰਤਾ ਦਾ ਵਿਸ਼ਾ ਹੈ, ਜਿੰਨਾ ਕੌਮਾਂ ਦੇ ਆਗੂ ਚੰਗੇ, ਸੂਝਵਾਨ ਅਤੇ ਜਿੰਮੇਵਾਰ ਨਾ ਹੋਣ ਉਹ ਆਪ ਤਾਂ ਡੁੱਬਦੇ ਹਨ ਕੌਮਾਂ ਨੂੰ ਵੀ ਲੈ ਡੁੱਬਦੇ ਹਨ। ਸੋ ਜਰੂਰਤ ਸਾਨੂੰ ਸਾਰਿਆਂ ਨੂੰ ਜਾਗਰੂਕ ਹੋਣ ਦੀ, ਥੋੜੀ ਸਿਆਣਪ ਤੋਂ ਕੰਮ ਲੈਣ ਦੀ, ਥੋੜੇ ਗੰਭੀਰ ਹੋਣ ਦੀ ਕਿਉਂਕਿ ਅੱਜ ਪੰਜਾਬ ਦੀ ਉਸ ਸਿਆਸਤ ਦਾ ਮਜ਼ਾਕ ਬਣ ਰਿਹਾ ਹੈ, ਜਿਸ ਦੇ ਪੁਰਖੇ ਮਹਾਰਾਜਾ ਰਣਜੀਤ ਸਿੰਘ ਜੀ ਸਨ।