ਟੈਨਿਸ ਦੇ ਮਹਾਨ ਖਿਡਾਰੀ ਰੋਜਰ ਫੈਡਰਰ ਆਪਣੀ ਰਿਟਾਇਰਮੈਂਟ ਤੋਂ ਬਾਅਦ ਵਾਪਸੀ ਕਰਦਿਆਂ ਅੱਜ ਸ਼ਨੀਵਾਰ ਦੇ ਪ੍ਰਦਰਸ਼ਨੀ ਮੈਚ ਵਿੱਚ ਆਂਦਰੇ ਅਗਾਸੀ ਵਰਗੇ ਮਹਾਨ ਖਿਡਾਰੀਆਂ ਦੇ ਨਾਲ ਕੋਰਟ ਸਾਂਝਾ ਕਰਨਗੇ। ਫੈਡਰਰ ਦੀ ਵਾਪਸੀ ਮੁੱਖ ਡਰਾਅ ਦੇ ਲਈ ਨਹੀਂ ਹੈ ਸਗੋਂ ਇੱਕ ਵਿਸ਼ੇਸ਼ ਪ੍ਰਦਰਸ਼ਨੀ ਮੈਚ ਲਈ ਹੈ, ਜੋ ਅੱਜ ਸ਼ਨੀਵਾਰ 17 ਜਨਵਰੀ ਨੂੰ ਮੁੱਖ ਟੂਰਨਾਮੈਂਟ ਸ਼ੁਰੂ ਹੋਣ ਤੋਂ ਸਿਰਫ਼ ਇੱਕ ਦਿਨ ਪਹਿਲਾਂ ਖੇਡਿਆ ਜਾਵੇਗਾ। ਫੈਡਰਰ ਇਸ ਵਿਸ਼ੇਸ਼ ਮੈਚ ਵਿੱਚ ਇਕੱਲਾ ਨਹੀਂ ਹੋਵੇਗਾ, ਜੋ ਕਿ ਉਦਘਾਟਨੀ ਸਮਾਰੋਹ ਦੇ ਹਿੱਸੇ ਵਜੋਂ ਆਯੋਜਿਤ ਕੀਤਾ ਜਾਵੇਗਾ। ਉਹ ਆਂਦਰੇ ਅਗਾਸੀ, ਲੇਟਨ ਹੇਵਿਟ ਅਤੇ ਪੈਟ ਰਾਫਟਰ ਵਰਗੇ ਮਹਾਨ ਖਿਡਾਰੀਆਂ ਨਾਲ ਕੋਰਟ ਵੀ ਸਾਂਝਾ ਕਰੇਗਾ। ਇਹ ਮੈਚ ਟੈਨਿਸ ਪ੍ਰਸ਼ੰਸਕਾਂ ਲਈ ਇੱਕ ਇਤਿਹਾਸਕ ਪਲ ਹੋਣ ਵਾਲਾ ਹੈ।
ਵਰਨਣਯੋਗ ਹੈ ਕਿ ਫੈਡਰਰ ਨੇ ਕੱਲ੍ਹ ਰਿਟਾਇਰਮੈਂਟ ਤੋਂ ਬਾਅਦ ਪਹਿਲੀ ਵਾਰ ਮੈਲਬੌਰਨ ਪਾਰਕ ਵਾਪਸ ਆਏ ਹਨ। ਉਨ੍ਹਾਂ ਨੇ ਕੱਲ੍ਹ ਕੈਸਪਰ ਰੂਡ ਨਾਲ ਅਭਿਆਸ ਮੈਚ ਖੇਡਿਆ। ਸਾਲ 2022 ਵਿੱਚ ਸੰਨਿਆਸ ਲੈਣ ਤੋਂ ਬਾਅਦ ਇਹ ਪਹਿਲੀ ਵਾਰ ਹੈ ਜਦੋਂ ਫੈਡਰਰ ਆਸਟ੍ਰੇਲੀਅਨ ਓਪਨ ਕੋਰਟ ‘ਤੇ ਨਜ਼ਰ ਆਏ ਹਨ। ਭਾਵੇਂ ਇਹ ਇੱਕ ਅਣਅਧਿਕਾਰਤ ਸੈਸ਼ਨ ਸੀ, 44 ਸਾਲਾ ਫੈਡਰਰ ਨੇ ਆਪਣਾ ਉਹੀ ਸੁਭਾਅ ਦਿਖਾਇਆ ਅਤੇ ਉਨ੍ਹਾਂ ਦੇ ਟ੍ਰੇਡਮਾਰਕ ਇੱਕ-ਹੱਥ ਵਾਲੇ ਬੈਕਹੈਂਡ ਨੇ ਦਰਸ਼ਕਾਂ ਨੂੰ ਮੋਹਿਤ ਕਰ ਦਿੱਤਾ। ਫੈਡਰਰ ਨੇ ਆਪਣੀ ਟ੍ਰੇਡਮਾਰਕ ਮੁਸਕਰਾਹਟ ਨਾਲ ਪ੍ਰਸ਼ੰਸਕਾਂ ਵੱਲ ਹੱਥ ਵੀ ਹਿਲਾਇਆ। ਰਾਡ ਲੇਵਰ ਅਰੇਨਾ ਵਿਖੇ ਉਨ੍ਹਾਂ ਨੇ ਨਾਰਵੇਈ ਸਟਾਰ ਕੈਸਪਰ ਰੂਡ ਨਾਲ ਅਭਿਆਸ ਮੈਚ ਖੇਡਿਆ ਜਿਸ ਨਾਲ ਸਟੇਡੀਅਮ ਵਿੱਚ ਪ੍ਰਸ਼ੰਸਕਾਂ ਦਾ ਮਨ ਮੋਹ ਲਿਆ।