ਜਾਪਾਨ ਦੇ ਆਈਚੀ ਪ੍ਰੀਫੈਕਚਰ ਵਿੱਚ ਟੋਯੋਕੀ ਸ਼ਹਿਰ ਨੇ ਇੱਕ ਆਰਡੀਨੈਂਸ ਜਾਰੀ ਕੀਤਾ ਹੈ ਜਿਸ ਵਿੱਚ ਸਾਰੇ ਨਿਵਾਸੀਆਂ ਨੂੰ ਸਮਾਰਟਫੋਨ ਦੀ ਵਰਤੋਂ ਨੂੰ 2 ਘੰਟੇ ਤੱਕ ਸੀਮਤ ਕਰਨ ਦੀ ਅਪੀਲ ਕੀਤੀ ਗਈ ਹੈ। ਜਾਪਾਨ ਦੇ ਲੋਕਲ ਮੀਡੀਆ ਦੇ ਵਿੱਚ ਮੰਗਲਵਾਰ ਨੂੰ ਚਰਚਾ ਦੇ ਵਿੱਚ ਰਹੀ ਇੱਕ ਰਿਪੋਰਟ ਦੇ ਅਨੁਸਾਰ ਟੋਯੋਕੀ ਨਗਰਪਾਲਿਕਾ ਅਸੈਂਬਲੀ ਨੇ ਸਾਰੇ ਨਿਵਾਸੀਆਂ ਲਈ ਰੋਜ਼ਾਨਾ ਮਨੋਰੰਜਨ ਨਾਲ ਸਬੰਧਤ ਸਕ੍ਰੀਨ ਸਮਾਂ ਦੋ ਘੰਟੇ ਤੱਕ ਸੀਮਤ ਕਰਨ ਵਾਲਾ ਇੱਕ ਆਰਡੀਨੈਂਸ ਪਾਸ ਕੀਤਾ ਹੈ। ਇਸ ਆਰਡੀਨੈਂਸ ਦਾ ਉਦੇਸ਼ ਸਮਾਰਟਫੋਨ, ਨਿੱਜੀ ਕੰਪਿਊਟਰ ਅਤੇ ਟੈਬਲੇਟ ਡਿਵਾਈਸਾਂ ਦੀ ਬਹੁਤ ਜ਼ਿਆਦਾ ਵਰਤੋਂ ਨੂੰ ਰੋਕਣਾ ਹੈ। ਇਸਨੂੰ ਅਸੈਂਬਲੀ ਦੇ ਪਲੈਨਰੀ ਸੈਸ਼ਨ ਵਿੱਚ ਬਹੁਮਤ ਵੋਟ ਨਾਲ ਪਾਸ ਕੀਤਾ ਗਿਆ ਸੀ। ਇਹ ਕਾਨੂੰਨ 1 ਅਕਤੂਬਰ ਤੋਂ ਲਾਗੂ ਹੋਣ ਜਾ ਰਿਹਾ ਹੈ ਜੋ ਪੂ੍ਰੀ ਦੁਨੀਆਂ ਦੇ ਲਈ ਇੱਕ ਮਾਰਗਦਰਸ਼ਨ ਵਜੋਂ ਕੰਮ ਕਰੇਗਾ। ਇਹ ਵਿਦਿਆਰਥੀਆਂ, ਦਫਤਰੀ ਕਰਮਚਾਰੀਆਂ ਜਾਂ ਘਰੇਲੂ ਕਰਮਚਾਰੀਆਂ ‘ਤੇ ਲਾਗੂ ਨਹੀਂ ਹੁੰਦਾ। ਇਸ ਆਰਡੀਨੈਂਸ ਦੀ ਉਲੰਘਣਾ ਕਰਨ ਵਾਲਿਆਂ ਲਈ ਕੋਈ ਜੁਰਮਾਨਾ ਵੀ ਨਹੀਂ ਹੈ।
ਜਾਪਾਨ ਟਾਈਮਜ਼ ਨਾਲ ਗੱਲਬਾਤ ਕਰਦਿਆਂ ਟੋਯੋਕੀ ਦੇ ਮੇਅਰ ਮਾਸਾਫੁਮੀ ਕੌਕੀ ਨੇ ਕਿਹਾ ਹੈ ਕਿ, “ਇਹ ਆਰਡੀਨੈਂਸ ਸ਼ਹਿਰ ਦੇ ਵਸਨੀਕਾਂ ਲਈ ਸਿਹਤ ਉਪਾਵਾਂ ਦਾ ਸਿਰਫ਼ ਇੱਕ ਹਿੱਸਾ ਹੈ। ਇਸਦਾ ਉਦੇਸ਼ ਵਸਨੀਕਾਂ ਨੂੰ ਜਾਗਰੂਕ ਕਰਨਾ ਹੈ ਕਿ ਸਮਾਰਟਫੋਨ ਦੀ ਬਹੁਤ ਜ਼ਿਆਦਾ ਵਰਤੋਂ ਉਨ੍ਹਾਂ ਦੀ ਨੀਂਦ ਵਿੱਚ ਵੀ ਵਿਘਨ ਪਾ ਰਹੀ ਹੈ। ਅਸੀਂ ਸਮਾਰਟਫੋਨ ਨੂੰ ਰੱਦ ਨਹੀਂ ਕਰ ਰਹੇ ਹਾਂ। ਇਹ ਆਰਡੀਨੈਂਸ ਪਰਿਵਾਰਕ ਆਪਸੀ ਤਾਲਮੇਲ ਨੂੰ ਉਤਸ਼ਾਹਿਤ ਕਰਨ ਲਈ ਵੀ ਤਿਆਰ ਕੀਤਾ ਗਿਆ ਹੈ ਅਤੇ ਐਲੀਮੈਂਟਰੀ ਸਕੂਲ ਦੇ ਵਿਦਿਆਰਥੀਆਂ ਅਤੇ ਛੋਟੇ ਬੱਚਿਆਂ ਲਈ ਰਾਤ 9 ਵਜੇ ਤੋਂ ਬਾਅਦ ਅਤੇ ਜੂਨੀਅਰ ਹਾਈ ਸਕੂਲ ਦੇ ਵਿਦਿਆਰਥੀਆਂ ਅਤੇ 18 ਸਾਲ ਤੋਂ ਘੱਟ ਉਮਰ ਦੇ ਹੋਰ ਬੱਚਿਆਂ ਲਈ ਰਾਤ 10 ਵਜੇ ਤੋਂ ਬਾਅਦ ਸਮਾਰਟਫੋਨ ਅਤੇ ਹੋਰ ਉਪਕਰਨਾਂ ਦੀ ਵਰਤੋਂ ਕਰਨ ਤੋਂ ਪਰਹੇਜ਼ ਕਰਨ ਦੀ ਮੰਗ ਕਰਦਾ ਹੈ।
ਜਾਪਾਨੀ ਮੀਡੀਆ ਰਿਪੋਰਟਾਂ ਦੇ ਅਨੁਸਾਰ ਕੁੱਝ ਨਿਵਾਸੀਆਂ ਨੇ ਦਲੀਲ ਦਿੱਤੀ ਹੈ ਕਿ ਨਗਰਪਾਲਿਕਾ ਨੂੰ ਪਰਿਵਾਰਕ ਮਾਮਲਿਆਂ ਵਿੱਚ ਦਖਲ ਨਹੀਂ ਦੇਣਾ ਚਾਹੀਦਾ ਜਦੋਂ ਕਿ ਦੂਜਿਆਂ ਨੇ ਇਸ ਕਦਮ ਨੂੰ ਪਰਿਵਾਰਕ ਮੈਂਬਰਾਂ ਨਾਲ ਚਰਚਾ ਕਰਨ ਦੇ ਮੌਕੇ ਵਜੋਂ ਲਿਆ ਹੈ। ਟੋਯੋਕੀ ਨਗਰਪਾਲਿਕਾ ਅਸੈਂਬਲੀ ਨੇ ਇੱਕ ਪੂਰਕ ਮਤਾ ਵੀ ਪਾਸ ਕੀਤਾ ਜਿਸ ਵਿੱਚ ਸ਼ਹਿਰ ਨੂੰ ਆਰਡੀਨੈਂਸ ਦੀ ਸਮੀਖਿਆ ਕਰਨ ਲਈ ਕਿਹਾ ਗਿਆ ਹੈ। ਜੇਕਰ ਜ਼ਰੂਰੀ ਹੋਵੇ ਤਾਂ ਇਸਦੇ ਪ੍ਰਭਾਵਾਂ ਅਤੇ ਨਿਵਾਸੀਆਂ ਦੇ ਵਿਚਾਰਾਂ ਦੀ ਨਿਯਮਿਤ ਤੌਰ ‘ਤੇ ਜਾਂਚ ਕਰਨ ਤੋਂ ਬਾਅਦ।
ਨਿਪੋਨ ਟੈਲੀਵਿਜ਼ਨ ਨੈੱਟਵਰਕ (ਐਨਟੀਵੀ) ਦੇ ਅਨੁਸਾਰ ਪਿਛਲੀਆਂ ਚਰਚਾਵਾਂ ਦੌਰਾਨ ਆਰਡੀਨੈਂਸ ਦਾ ਸਮਰਥਨ ਕਰਨ ਵਾਲੇ ਕੌਂਸਲ ਮੈਂਬਰਾਂ ਨੇ ਵੀ ਵਾਰ-ਵਾਰ ਕਿਹਾ ਸੀ ਕਿ ਸ਼ਹਿਰੀ ਨਿਵਾਸੀਆਂ ਨੂੰ ਦਿੱਤੇ ਗਏ ਸਪੱਸ਼ਟੀਕਰਨ ਨਾਕਾਫ਼ੀ ਸਨ। ਐਨਟੀਵੀ ਦੇ ਅਨੁਸਾਰ ਸ਼ਹਿਰ ਕੌਂਸਲ ਨੇ ਇੱਕ ਪੂਰਕ ਮਤਾ ਵੀ ਪਾਸ ਕੀਤਾ ਜਿਸ ਵਿੱਚ ਨਿਵਾਸੀਆਂ ਦੀ ਜੀਵਨ ਸ਼ੈਲੀ ਅਤੇ ਘਰੇਲੂ ਵਾਤਾਵਰਣ ਦੀ ਵਿਭਿੰਨਤਾ ਦਾ ਸਤਿਕਾਰ ਕਰਨ ਅਤੇ ਗਲਤਫਹਿਮੀਆਂ ਤੋਂ ਬਚਣ ਲਈ ਸਪੱਸ਼ਟ ਅਤੇ ਸੰਖੇਪ ਜਾਣਕਾਰੀ ਪ੍ਰਦਾਨ ਕਰਨ ਦੇ ਉਪਾਅ ਵੀ ਸ਼ਾਮਲ ਹਨ।