ਅਰਬਪਤੀ ਬਲਵਿੰਦਰ, ਜਿਸਨੂੰ ਅਬੂ ਸਬਾ ਵੀ ਕਿਹਾ ਜਾਂਦਾ ਹੈ, ਨੂੰ ਪੰਜ ਸਾਲ ਦੀ ਕੈਦ ਅਤੇ 500,000 ਦਿਰਹਮ (1,14,89,750 ਰੁਪਏ) ਦਾ ਜੁਰਮਾਨਾ ਲਗਾਇਆ ਗਿਆ ਹੈ। ਦੁਬਈ ਦੀ ਇੱਕ ਅਦਾਲਤ ਨੇ ਕਾਰੋਬਾਰੀ ਨੂੰ ਦੇਸ਼ ਤੋਂ ਡਿਪੋਰਟ ਕਰਨ ਤੋਂ ਪਹਿਲਾਂ ਉਸ ਤੋਂ 150 ਮਿਲੀਅਨ ਦਿਰਹਾਮ (3,446 ਮਿਲੀਅਨ ਰੁਪਏ) ਜ਼ਬਤ ਕਰਨ ਦਾ ਹੁਕਮ ਵੀ ਦਿੱਤਾ ਹੈ।
ਦੁਬਈ ਸਥਿਤ ਭਾਰਤੀ ਕਾਰੋਬਾਰੀ ਬਲਵਿੰਦਰ ਸਿੰਘ ਸਾਹਨੀ ਨੂੰ ਮਨੀ ਲਾਂਡਰਿੰਗ ਸਮੇਤ ਵਿੱਤੀ ਅਪਰਾਧਾਂ ਲਈ ਜੇਲ੍ਹ ਭੇਜਿਆ ਜਾਵੇਗਾ ਅਤੇ ਸਜ਼ਾ ਪੂਰੀ ਹੋਣ ਤੋਂ ਬਾਅਦ ਸੰਯੁਕਤ ਅਰਬ ਅਮੀਰਾਤ ਤੋਂ ਦੇਸ਼ ਨਿਕਾਲਾ ਦਿੱਤਾ ਜਾਵੇਗਾ। ਦੁਬਈ ਦੇ ਉੱਚ ਵਰਗ ਵਿੱਚ ਇੱਕ ਜਾਣਿਆ-ਪਛਾਣਿਆ ਨਾਮ, ਬਲਵਿੰਦਰ ਸਾਹਨੀ ਨੂੰ ਸ਼ੈੱਲ ਕੰਪਨੀਆਂ ਅਤੇ ਜਾਅਲੀ ਇਨਵੌਇਸਾਂ ਦੇ ਨੈੱਟਵਰਕ ਰਾਹੀਂ 150 ਮਿਲੀਅਨ ਦਿਰਹਮ ਦੀ ਮਨੀ ਲਾਂਡਰਿੰਗ ਦਾ ਦੋਸ਼ੀ ਠਹਿਰਾਇਆ ਗਿਆ ਹੈ। ਬਲਵਿੰਦਰ ਨੂੰ ਉਸਦੇ ਪੁੱਤਰ ਸਮੇਤ 33 ਹੋਰ ਲੋਕਾਂ ਦੇ ਨਾਲ ਦੋਸ਼ੀ ਠਹਿਰਾਇਆ ਗਿਆ ਹੈ।
53 ਸਾਲਾ ਕਾਰੋਬਾਰੀ ਬਲਵਿੰਦਰ ਰਾਜ ਸਾਹਨੀ ਗਰੁੱਪ ਪ੍ਰਾਪਰਟੀ ਡਿਵੈਲਪਮੈਂਟ ਫਰਮ ਦੇ ਸੰਸਥਾਪਕ ਅਤੇ ਚੇਅਰਮੈਨ ਹਨ। ਇਹ ਕੰਪਨੀ ਯੂਏਈ, ਅਮਰੀਕਾ, ਭਾਰਤ ਅਤੇ ਹੋਰ ਦੇਸ਼ਾਂ ਵਿੱਚ ਕੰਮ ਕਰਦੀ ਹੈ। ਮੀਡੀਆ ਰਿਪੋਰਟਾਂ ਦੇ ਅਨੁਸਾਰ, ਉਸਦੀ ਕੰਪਨੀ ਦੇ ਦੁਬਈ ਪ੍ਰਾਪਰਟੀ ਪੋਰਟਫੋਲੀਓ ਵਿੱਚ ਦੁਬਈ ਸਪੋਰਟਸ ਸਿਟੀ ਵਿੱਚ ਕਾਸਰ ਸਬਾਹ ਰਿਹਾਇਸ਼ੀ ਇਮਾਰਤਾਂ, ਜੁਮੇਰਾਹ ਵਿਲੇਜ ਸਰਕਲ ਵਿੱਚ 24 ਮੰਜ਼ਿਲਾ ਬੁਰਜ ਸਬਾਹ ਅਪਾਰਟਮੈਂਟ ਕੰਪਲੈਕਸ, ਬਿਜ਼ਨਸ ਬੇ ਵਿੱਚ ਬੇ ਸਕੁਏਅਰ ਵਿੱਚ ਵਪਾਰਕ ਜਾਇਦਾਦ ਅਤੇ ਸਬਾਹ ਦੁਬਈ ਨਾਮਕ ਇੱਕ ਪੰਜ-ਸਿਤਾਰਾ ਹੋਟਲ ਸ਼ਾਮਲ ਹਨ।