ਵਿਕਟੋਰੀਆ ਸਰਕਾਰ ਇਸ ਸਾਲ ADHD ਨਾਲ ਜੁੜੇ ਨਵੇਂ ਨਿਯਮ ਲਿਆ ਰਹੀ ਹੈ। ਇਸ ਤਹਿਤ ਹੁਣ ਖ਼ਾਸ ਤੌਰ ‘ਤੇ ਤਿਆਰ ਕੀਤੇ GP ਡਾਕਟਰ ਬੱਚਿਆਂ ਅਤੇ ਵੱਡਿਆਂ ਦੋਹਾਂ ਵਿੱਚ ADHD ਦੀ ਪਛਾਣ ਅਤੇ ਇਲਾਜ ਵੀ ਕਰ ਸਕਣਗੇ। ਇਸ ਨਾਲ ਮਰੀਜ਼ਾਂ ਨੂੰ ਲੰਬਾ ਇੰਤਜ਼ਾਰ ਨਹੀਂ ਕਰਨਾ ਪਵੇਗਾ ਅਤੇ ਇਲਾਜ ਦਾ ਖਰਚਾ ਵੀ ਘੱਟ ਹੋਵੇਗਾ। ਪਹਿਲਾਂ ਲੋਕਾਂ ਨੂੰ ਮਹਿੰਗੇ ਸਪੈਸ਼ਲਿਸਟ ਡਾਕਟਰਾਂ ਕੋਲ ਜਾਣਾ ਪੈਂਦਾ ਸੀ ਅਤੇ ਕਈ ਵਾਰ ਮਹੀਨਿਆਂ ਤੱਕ ਉਡੀਕ ਕਰਨੀ ਪੈਂਦੀ ਸੀ।
ਰਾਇਲ ਆਸਟ੍ਰੇਲੀਆਨ ਕਾਲਜ ਆਫ਼ GPਜ਼ (RACGP) ਨੇ ਇਸ ਫੈਸਲੇ ਦਾ ਖੁੱਲ੍ਹ ਕੇ ਸਵਾਗਤ ਕੀਤਾ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਸ ਨਾਲ ਸ਼ਹਿਰਾਂ ਦੇ ਨਾਲ-ਨਾਲ ਪਿੰਡਾਂ ਵਿੱਚ ਰਹਿਣ ਵਾਲੇ ਲੋਕਾਂ ਨੂੰ ਵੀ ਆਪਣੇ ਹੀ ਇਲਾਕੇ ਵਿੱਚ ਇਲਾਜ ਮਿਲੇਗਾ। RACGP ਮੁਤਾਬਕ, ਵਿਕਟੋਰੀਆ ਵਿੱਚ ਲਗਭਗ 1 ਲੱਖ 63 ਹਜ਼ਾਰ ਬੱਚੇ ਅਤੇ 3 ਲੱਖ 20 ਹਜ਼ਾਰ ਵੱਡੇ ADHD ਨਾਲ ਜੀਅ ਰਹੇ ਹੋ ਸਕਦੇ ਹਨ।
ਨਵੇਂ ਨਿਯਮਾਂ ਹੇਠ ਸਰਕਾਰ 7 ਲੱਖ 50 ਹਜ਼ਾਰ ਡਾਲਰ ਟ੍ਰੇਨਿੰਗ ‘ਤੇ ਖਰਚ ਕਰੇਗੀ, ਤਾਂ ਜੋ 150 GP ਡਾਕਟਰਾਂ ਨੂੰ ADHD ਦੀ ਪਛਾਣ ਕਰਨ ਲਈ ਤਿਆਰ ਕੀਤਾ ਜਾ ਸਕੇ। ਸਤੰਬਰ ਤੱਕ ਇਹ ਡਾਕਟਰ ਮਰੀਜ਼ਾਂ ਦੀ ਮਦਦ ਕਰਨ ਦੇ ਯੋਗ ਹੋਣਗੇ। ਹੁਣ GP ਡਾਕਟਰ ਦਵਾਈ ਦੇ ਨਾਲ-ਨਾਲ ਜੀਵਨਸ਼ੈਲੀ, ਨੀਂਦ, ਸਕ੍ਰੀਨ ਟਾਈਮ ਅਤੇ ਕੌਂਸਲਿੰਗ ਵਰਗੀ ਪੂਰੀ ਦੇਖਭਾਲ ਦੇ ਸਕਣਗੇ। ਇਹ ਬਦਲਾਅ ਮਰੀਜ਼ਾਂ ਲਈ ਵਾਕਈ ਇੱਕ ਵੱਡੀ ਰਾਹਤ ਹੈ।
ਡਾਕਟਰਾਂ ਦਾ ਕਹਿਣਾ ਹੈ ਕਿ ਬੱਚਿਆਂ ਲਈ ਜਲਦੀ ਇਲਾਜ ਬਹੁਤ ਜ਼ਰੂਰੀ ਹੈ, ਤਾਂ ਜੋ ਉਹ ਸਕੂਲ ਅਤੇ ਘਰ ਦੋਹਾਂ ਥਾਵਾਂ ਚੰਗੀ ਤਰ੍ਹਾਂ ਅੱਗੇ ਵਧ ਸਕਣ। ਵੱਡਿਆਂ ਲਈ ਵੀ ADHD ਦੀ ਪਛਾਣ ਅਤੇ ਇਲਾਜ ਜ਼ਿੰਦਗੀ ਬਦਲਣ ਵਾਲਾ ਸਾਬਤ ਹੋ ਸਕਦਾ ਹੈ।