ਮੁੰਬਈ – ਹਾਲ ਹੀ ‘ਚ ਹਿਜਾਬ ਨੂੰ ਲੈ ਕੇ ਦਿੱਤੇ ਬਿਆਨ ਤੋਂ ਬਾਅਦ ਸੁਰਖੀਆਂ ‘ਚ ਆਈ ਬਾਲੀਵੁੱਡ ਅਦਾਕਾਰਾ ਸੋਨਮ ਕਪੂਰ ਇਕ ਵਾਰ ਫਿਰ ਸੁਰਖੀਆਂ ‘ਚ ਹੈ। ਅਦਾਕਾਰਾ ਦੇ ਪਤੀ ਕਾਰੋਬਾਰੀ ਆਨੰਦ ਆਹੂਜਾ ‘ਤੇ ਇੱਕ ਅੰਤਰਰਾਸ਼ਟਰੀ ਸ਼ਿਪਿੰਗ ਕੰਪਨੀ ਨੇ ਧੋਖਾਧੜੀ ਦਾ ਇਲਜ਼ਾਮ ਲਗਾਇਆ ਹੈ।ਆਨੰਦ ਆਹੂਜਾ ‘ਤੇ ਟੈਕਸ ਅਤੇ ਕਸਟਮ ਡਿਊਟੀ ਤੋਂ ਬਚਣ ਲਈ ਦਸਤਾਵੇਜ਼ਾਂ ਨਾਲ ਛੇੜਛਾੜ ਕਰਨ ਦਾ ਦੋਸ਼ ਹੈ।
ਇਸ ਤੋਂ ਪਹਿਲਾਂ ਜਨਵਰੀ ਵਿੱਚ, ਆਨੰਦ ਆਹੂਜਾ ਨੇ ਸ਼ਿਪਿੰਗ ਕੰਪਨੀ ਨੂੰ ਸਵਾਲ ਕੀਤਾ ਸੀ ਕਿ ਕੀ ਕਿਸੇ ਦਾ ਅੰਤਰਰਾਸ਼ਟਰੀ ਕੰਪਨੀ ਮਾਈਯੂਐਸ ਨਾਲ ਕੋਈ ਸੰਪਰਕ ਹੈ ਕਿਉਂਕਿ ਉਨ੍ਹਾਂ ਦੀ ਸ਼ਿਪਮੈਂਟ ਵਿੱਚ ਦੇਰੀ ਹੋ ਰਹੀ ਹੈ। ਇਸ ਸਬੰਧ ‘ਚ ਟਵੀਟ ਕਰਦੇ ਹੋਏ ਉਨ੍ਹਾਂ ਲਿਖਿਆ ਕਿ ਕੀ My US Shopaholic ‘ਤੇ ਕੋਈ ਕਿਸੇ ਨੂੰ ਜਾਣਦਾ ਹੈ। ਮੈਨੂੰ ਹਾਲ ਹੀ ਵਿੱਚ ਇੱਕ ਭਿਆਨਕ ਅਨੁਭਵ ਹੋਇਆ ਹੈ। ਕੰਪਨੀ ਗਲਤ ਢੰਗ ਨਾਲ ਸਮਾਨ ਨੂੰ ਸੰਭਾਲ ਰਹੀ ਹੈ ਅਤੇ ਰਸਮੀ ਕਾਗਜ਼ੀ ਕਾਰਵਾਈ ਨੂੰ ਟਾਲ ਰਹੀ ਹੈ। ਆਹੂਜਾ ਦੇ ਟਵੀਟ ਦਾ ਜਵਾਬ ਦਿੰਦੇ ਹੋਏ, ਸ਼ਿਪਿੰਗ ਕੰਪਨੀ ਨੇ ਉਨ੍ਹਾਂ ਨੂੰ ਸੋਸ਼ਲ ਮੀਡੀਆ ‘ਤੇ ਸੀਮਤ ਸਰੋਤਾਂ ਕਾਰਨ ਈਮੇਲ ਜਾਂ ਚੈਟ ਰਾਹੀਂ ਗਾਹਕ ਸੇਵਾ ਨਾਲ ਜੁੜਨ ਦੀ ਸਲਾਹ ਦਿੱਤੀ ਸੀ। ਹਾਲਾਂਕਿ ਇਸ ‘ਤੇ ਆਨੰਦ ਆਹੂਜਾ ਨੇ ਸਪੱਸ਼ਟ ਕੀਤਾ ਕਿ ਉਨ੍ਹਾਂ ਨੇ ਲਗਭਗ 7 ਦਿਨਾਂ ਤੋਂ ਇਹ ਸਭ ਕੁਝ ਅਜ਼ਮਾਇਆ ਹੈ। ਇਸ ਦੌਰਾਨ ਉਨ੍ਹਾਂ ਨੇ ਕੰਪਨੀ ਦੀਆਂ ਨਵੀਆਂ ਨੀਤੀਆਂ ਨੂੰ ਖੋਖਲਾ ਅਤੇ ਘਪਲਾ ਕਰਾਰ ਦਿੱਤਾ ਸੀ।
ਇਸ ਮਹੀਨੇ ਦੇ ਸ਼ੁਰੂ ਵਿੱਚ, ਟਵਿੱਟਰ ‘ਤੇ ਆਨੰਦ ਆਹੂਜਾ ਦੀ ਸ਼ਿਕਾਇਤ ਦੇ ਜਵਾਬ ਵਿੱਚ, ਕੰਪਨੀ ਨੇ ਸਪੱਸ਼ਟ ਕੀਤਾ ਕਿ ਸਮੱਸਿਆ ਉਨ੍ਹਾਂ ਦੀਆਂ ਸੇਵਾਵਾਂ ਵਿੱਚ ਨਹੀਂ ਸੀ, ਪਰ ਅਭਿਨੇਤਰੀ ਦੇ ਪਤੀ, ਆਨੰਦ ਆਹੂਜਾ ਦੁਆਰਾ ਪ੍ਰਦਾਨ ਕੀਤੇ ਗਏ ਦਸਤਾਵੇਜ਼ਾਂ ਵਿੱਚ ਸੀ। ਇਸ ਤੋਂ ਇਲਾਵਾ, ਕੰਪਨੀ ਨੇ ਦਾਅਵਾ ਕੀਤਾ ਸੀ ਕਿ ਮਾਲ ਦੇ ਨਾਲ ਦਿੱਤੇ ਇਨਵੌਇਸ ਵਿੱਚ ਮਾਲ ਲਈ ਭੁਗਤਾਨ ਕੀਤੀ ਗਈ ਰਕਮ ਤੋਂ 90% ਘੱਟ ਮੁੱਲ ਦਾ ਜ਼ਿਕਰ ਕੀਤਾ ਗਿਆ ਸੀ। ਹਾਲਾਂਕਿ, ਬਾਅਦ ਵਿੱਚ 12 ਫਰਵਰੀ ਨੂੰ, ਸ਼ਿਪਿੰਗ ਕੰਪਨੀ ਦੇ ਟਵੀਟ ਵਾਇਰਲ ਹੋਣ ਤੋਂ ਬਾਅਦ, ਆਨੰਦ ਆਹੂਜਾ ਨੇ ਦੋਸ਼ ਲਾਇਆ ਕਿ MyUS ਨੇ PDF ਰਸੀਦਾਂ ਅਤੇ ਬੈਂਕ ਸਟੇਟਮੈਂਟਾਂ ਨੂੰ ਪ੍ਰਮਾਣਿਤ ਕਰਨ ਤੋਂ ਇਨਕਾਰ ਕਰ ਦਿੱਤਾ। ਉਸ ਨੇ ਇਹ ਵੀ ਦੋਸ਼ ਲਾਇਆ ਕਿ ਉਨ੍ਹਾਂ ਤੋਂ ਵੱਧ ਵਸੂਲੀ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ ਅਤੇ ਉਨ੍ਹਾਂ ਦਾ ਸਾਮਾਨ ਜ਼ਿਆਦਾ ਸਮੇਂ ਲਈ ਰੱਖਿਆ ਗਿਆ। ਇਸ ਦੇ ਨਾਲ ਹੀ ਇਸ ਪੂਰੇ ਮਾਮਲੇ ‘ਚ ਅਦਾਕਾਰਾ ਸੋਨਮ ਕਪੂਰ ਜਨਵਰੀ 2022 ‘ਚ ਸ਼ਿਪਿੰਗ ਕੰਪਨੀ ਦੇ ਖਿਲਾਫ ਆਪਣੇ ਪਤੀ ਦੇ ਸਮਰਥਨ ‘ਚ ਸਾਹਮਣੇ ਆਈ ਸੀ।