ਆਈ. ਸੀ. ਸੀ. ਟੈਸਟ ਰੈਂਕਿੰਗ ’ਚ ਵਿਰਾਟ ਕੋਹਲੀ ਚੋਟੀ ਦੇ 10 ’ਚ ਵਾਪਸ ਪਰਤੇ

ਦੁਬਈ – ਭਾਰਤ ਦੇ ਸਟਾਰ ਬੱਲੇਬਾਜ਼ ਵਿਰਾਟ ਕੋਹਲੀ ਦੱਖਣੀ ਅਫਰੀਕਾ ਖ਼ਿਲਾਫ਼ ਸੈਂਚੁਰੀਅਨ ਟੈਸਟ ਵਿਚ ਆਪਣੇ ਚੰਗੇ ਪ੍ਰਦਰਸ਼ਨ ਤੋਂ ਬਾਅਦ ਜਾਰੀ ਆਈਸੀਸੀ ਦੀ ਤਾਜ਼ਾ ਟੈਸਟ ਰੈਂਕਿੰਗ ਵਿਚ ਚਾਰ ਪਾਇਦਾਨ ਅੱਗੇ ਨੌਵੇਂ ਸਥਾਨ ‘’ਤੇ ਪਹੁੰਚ ਗਏ ਹਨ। ਕੋਹਲੀ 2022 ਵਿੱਚ ਸਿਖਰਲੇ 10 ਵਿੱਚੋਂ ਬਾਹਰ ਹੋ ਗਏ ਸਨ ਪਰ ਪਿਛਲੇ ਹਫ਼ਤੇ ਦੱਖਣੀ ਅਫਰੀਕਾ ਖ਼ਿਲਾਫ਼ ਪਹਿਲੇ ਟੈਸਟ ਵਿੱਚ 38 ਅਤੇ 76 ਦੌੜਾਂ ਦੀ ਪਾਰੀ ਬਣਾ ਕੇ ਵਾਪਸੀ ਕਰਨ ਵਿੱਚ ਕਾਮਯਾਬ ਰਿਹਾ। ਅੰਤਰਰਾਸ਼ਟਰੀ ਕ੍ਰਿਕਟ ਪਰਿਸ਼ਦ (ਆਈਸੀਸੀ) ਦੇ ਅਨੁਸਾਰ, ਉਹ ਕੇਨ ਵਿਲੀਅਮਸਨ ਤੋਂ 103 ਰੇਟਿੰਗ ਅੰਕ ਹੇਠਾਂ ਹੈ ਜਦੋਂ ਕਿ ਜੋ ਰੂਟ ਅਤੇ ਸਟੀਵ ਸਮਿਥ ਕ੍ਰਮਵਾਰ ਦੂਜੇ ਅਤੇ ਤੀਜੇ ਸਥਾਨ ‘’ਤੇ ਹਨ।ਭਾਰਤੀ ਕਪਤਾਨ ਰੋਹਿਤ ਸ਼ਰਮਾ 14ਵੇਂ ਸਥਾਨ ‘’ਤੇ ਖਿਸਕ ਗਿਆ, ਜਿਸ ਨੇ ਸੈਂਚੁਰੀਅਨ ‘’ਚ ਪੰਜ ਦੌੜਾਂ ਬਣਾਈਆਂ ਅਤੇ ਇਕ ਪਾਰੀ ‘’ਚ ਖਾਤਾ ਵੀ ਨਹੀਂ ਖੋਲ੍ਹ ਸਕਿਆ। ਕੇਐੱਲ ਰਾਹੁਲ ਵੀ 11 ਸਥਾਨਾਂ ਦੀ ਛਲਾਂਗ ਲਗਾ ਕੇ 51ਵੇਂ ਸਥਾਨ ‘’ਤੇ ਪਹੁੰਚ ਗਏ ਹਨ। ਉਨ੍ਹਾਂ ਨੇ ਲੜੀ ਦੇ ਸ਼ੁਰੂਆਤੀ ਮੈਚ ਵਿੱਚ 101 ਅਤੇ ਚਾਰ ਦੌੜਾਂ ਬਣਾਈਆਂ।ਰਵੀਚੰਦਰਨ ਅਸ਼ਵਿਨ ਗੇਂਦਬਾਜ਼ਾਂ ‘’ਚ ਸਿਖਰਲੇ ਸਥਾਨ ‘ਤੇ ਬਰਕਰਾਰ ਹਨ ਭਾਵੇਂ ਉਹ ਸੈਂਚੁਰੀਅਨ ‘’ਚ 41 ਦੌੜਾਂ ‘ਤੇ ਸਿਰਫ ਇਕ ਵਿਕਟ ਲੈ ਸਕੇ। ਰਵਿੰਦਰ ਜਡੇਜਾ ਅਤੇ ਜਸਪ੍ਰੀਤ ਬੁਮਰਾਹ ਕ੍ਰਮਵਾਰ ਚੌਥੇ ਅਤੇ ਪੰਜਵੇਂ ਸਥਾਨ ‘ਤੇ ਬਰਕਰਾਰ ਹਨ। ਜਡੇਜਾ ਆਲਰਾਊਂਡਰਾਂ ਦੀ ਸੂਚੀ ਵਿਚ ਸਿਖਰ ‘’ਤੇ ਬਰਕਰਾਰ ਹੈ, ਅਸ਼ਵਿਨ ਦੂਜੇ ਸਥਾਨ ‘’ਤੇ ਹੈ ਜਦਕਿ ਸ਼ਾਰਦੁਲ ਠਾਕੁਰ 34ਵੇਂ ਸਥਾਨ ‘’ਤੇ ਖਿਸਕ ਗਏ ਹਨ । ਟੀਮ ਰੈਂਕਿੰਗ ‘’ਚ ਭਾਰਤ 118 ਅੰਕ ਲੈ ਕੇ ਆਸਟ੍ਰੇਲੀਆ ਅਤੇ ਇੰਗਲੈਂਡ ਤੋਂ ਉੱਪਰ ਚੋਟੀ ‘’ਤੇ ਕਾਬਜ਼ ਹਨ।