ਭਾਰਤ ਦੇ ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਅੱਜ ਸ਼ੁੱਕਰਵਾਰ ਨੂੰ ਦਿੱਲੀ ਦੇ ਨੌਰਥ ਬਲਾਕ ਵਿੱਚ ਨਵੇਂ ਬਣੇ ਮਲਟੀ-ਏਜੰਸੀ ਸੈਂਟਰ (MAC) ਦਾ ਉਦਘਾਟਨ ਕੀਤਾ। ਇਸ ਮੌਕੇ ਬੋਲਦਿਆਂ, ਉਨ੍ਹਾਂ ਕਿਹਾ ਕਿ ‘ਆਪ੍ਰੇਸ਼ਨ ਸਿੰਦੂਰ’ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਮਜ਼ਬੂਤ ਰਾਜਨੀਤਿਕ ਇੱਛਾ ਸ਼ਕਤੀ, ਖੁਫੀਆ ਏਜੰਸੀਆਂ ਦੇ ਸਟੀਕ ਇਨਪੁਟਸ ਅਤੇ ਭਾਰਤੀ ਹਥਿਆਰਬੰਦ ਸੈਨਾਵਾਂ ਦੀ ਅਦੁੱਤੀ ਸਮਰੱਥਾ ਦਾ ਪ੍ਰਤੀਕ ਹੈ। ਉਦਘਾਟਨੀ ਸਮਾਰੋਹ ਵਿੱਚ, ਗ੍ਰਹਿ ਮੰਤਰੀ ਨੇ ਭਾਰਤ-ਤਿੱਬਤੀ ਸਰਹੱਦੀ ਪੁਲਿਸ (ITBP) ਦੇ ਜਵਾਨਾਂ ਨੂੰ 19 ਅਪ੍ਰੈਲ ਨੂੰ ਦੁਨੀਆ ਦੀ ਪੰਜਵੀਂ ਸਭ ਤੋਂ ਉੱਚੀ ਚੋਟੀ, ਮਾਊਂਟ ਮਕਾਲੂ (8,485 ਮੀਟਰ) ਨੂੰ ਸਫਲਤਾਪੂਰਵਕ ਸਰ ਕਰਨ ਲਈ ਵਧਾਈ ਦਿੱਤੀ। ਇਹ ਪਹਿਲੀ ਵਾਰ ਹੈ ਜਦੋਂ ਕੇਂਦਰੀ ਹਥਿਆਰਬੰਦ ਪੁਲਿਸ ਬਲ (CAPF) ਨੇ ਇਸ ਚੋਟੀ ‘ਤੇ ਚੜ੍ਹਾਈ ਕੀਤੀ ਹੈ।
ਅਮਿਤ ਸ਼ਾਹ ਨੇ ਆਪਣੀ ਸੋਸ਼ਲ ਮੀਡੀਆ ਪੋਸਟ ਵਿੱਚ ਲਿਖਿਆ, “ਦੁਨੀਆ ਦੀ ਪੰਜਵੀਂ ਸਭ ਤੋਂ ਉੱਚੀ ਚੋਟੀ ਮਾਊਂਟ ਮਕਾਲੂ ਨੂੰ ਫਤਿਹ ਕਰਨ ਲਈ ਬਹਾਦਰ ਆਈਟੀਬੀਪੀ ਸੈਨਿਕਾਂ ਨੂੰ ਹਾਰਦਿਕ ਵਧਾਈਆਂ। ਉਨ੍ਹਾਂ ਨੇ ਬਹੁਤ ਮੁਸ਼ਕਲ ਮੌਸਮ ਵਿੱਚ ਤਿਰੰਗਾ ਲਹਿਰਾਇਆ ਅਤੇ ਪ੍ਰਧਾਨ ਮੰਤਰੀ ਮੋਦੀ ਦੇ ਸਵੱਛ ਭਾਰਤ ਅਭਿਆਨ ਤੋਂ ਪ੍ਰੇਰਿਤ ਹੋ ਕੇ 150 ਕਿਲੋਗ੍ਰਾਮ ਕੂੜਾ ਵੀ ਹਟਾਇਆ।” ਇਹ ਮੁਹਿੰਮ ਆਈਟੀਬੀਪੀ ਦੇ ਇਤਿਹਾਸਕ ਅੰਤਰਰਾਸ਼ਟਰੀ ਪਰਬਤਾਰੋਹਣ ਮੁਹਿੰਮ ਦਾ ਹਿੱਸਾ ਸੀ ਜਿਸਦਾ ਉਦੇਸ਼ ਮਾਊਂਟ ਮਕਾਲੂ ਅਤੇ ਮਾਊਂਟ ਅੰਨਪੂਰਨਾ (8,091 ਮੀਟਰ) ਦੋਵਾਂ ਨੂੰ ਸਰ ਕਰਨਾ ਸੀ। ਇਸ ਮਿਸ਼ਨ ਨੂੰ 21 ਮਾਰਚ ਨੂੰ ਦਿੱਲੀ ਸਥਿਤ ਮੁੱਖ ਦਫ਼ਤਰ ਤੋਂ ਹਰੀ ਝੰਡੀ ਦੇ ਕੇ ਰਵਾਨਾ ਕੀਤਾ ਗਿਆ ਸੀ। ਇਸ ਲਈ 12 ਮੈਂਬਰੀ ਟੀਮ ਨੂੰ ਦੋ ਹਿੱਸਿਆਂ ਵਿੱਚ ਵੰਡਿਆ ਗਿਆ ਸੀ ਜਿਸ ਵਿੱਚ ਮਕਾਲੂ ਗਰੁੱਪ ਦੀ ਅਗਵਾਈ ਡਿਪਟੀ ਕਮਾਂਡੈਂਟ ਅਨੂਪ ਕੁਮਾਰ ਨੇਗੀ ਨੇ ਕੀਤੀ ਅਤੇ ਡਿਪਟੀ ਕਮਾਂਡੈਂਟ ਨਿਹਾਸ ਸੁਰੇਸ਼ ਨੂੰ ਡਿਪਟੀ ਲੀਡਰ ਵਜੋਂ ਸ਼ਾਮਲ ਕੀਤਾ ਗਿਆ। 19 ਅਪ੍ਰੈਲ ਦੀ ਸਵੇਰ ਨੂੰ ਲਗਭਗ 08:15 ਵਜੇ, ਪੰਜ ਮੈਂਬਰ ਸਹਾਇਕ ਕਮਾਂਡੈਂਟ ਸੰਜੇ ਕੁਮਾਰ, ਹੈੱਡ ਕਾਂਸਟੇਬਲ ਸੋਨਮ ਸਟੋਬਦਾਨ, ਪ੍ਰਦੀਪ ਪੰਵਾਰ, ਬਹਾਦਰ ਚੰਦ ਅਤੇ ਕਾਂਸਟੇਬਲ ਵਿਮਲ ਕੁਮਾਰ ਨੇ ਮਕਾਲੂ ਦੀ ਚੋਟੀ ਨੂੰ ਸਫਲਤਾਪੂਰਵਕ ਚੜ੍ਹਾਇਆ।
ਇਸ ਪ੍ਰਾਪਤੀ ਨੇ ਉੱਚ ਹਿਮਾਲਿਆਈ ਕਾਰਜਾਂ ਵਿੱਚ ਆਈਟੀਬੀਪੀ ਦੀ ਸਮਰੱਥਾ ਅਤੇ ਵਚਨਬੱਧਤਾ ਨੂੰ ਹੋਰ ਮਜ਼ਬੂਤ ਕੀਤਾ ਹੈ। ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਆਈਟੀਬੀਪੀ ਦੀ ਬਹਾਦਰੀ ਅਤੇ ਦੇਸ਼ ਭਗਤੀ ਦੀ ਭਾਵਨਾ ਦੀ ਪ੍ਰਸ਼ੰਸਾ ਕੀਤੀ ਅਤੇ ਭਾਰਤ ਦੀ ਸੁਰੱਖਿਆ ਵਿੱਚ ਉਨ੍ਹਾਂ ਦੇ ਯੋਗਦਾਨ ਲਈ ਉਨ੍ਹਾਂ ਨੂੰ ਸਲਾਮ ਕੀਤਾ।