ਜ਼ੇਲੈਂਸਕੀ ਨੂੰ ਪ੍ਰਮਾਣੂ ਹਮਲੇ ਦਾ ਡਰ, ਪੁਤਿਨ ਨੇ ਕੁਝ ਦਿਨ ਪਹਿਲਾਂ ਦਿੱਤੀ ਸੀ ਧਮਕੀ

ਕੀਵ – ਯੂਕਰੇਨ ਦੇ ਰਾਸ਼ਟਰਪਤੀ ਵਲੋਦੋਮੀਰ ਜ਼ੇਲੈਂਸਕੀ ਨੇ ਦੇਸ਼ ਵਿੱਚ ਪ੍ਰਮਾਣੂ ਹਮਲੇ ਦਾ ਖ਼ਦਸ਼ਾ ਪ੍ਰਗਟਾਇਆ ਹੈ। ਉਨ੍ਹਾਂ ਨੇ ਇਸ ਬਾਰੇ ਕਿਹਾ ਹੈ ਕਿ ਉਨ੍ਹਾਂ ਨੂੰ ਨਹੀਂ ਲੱਗਦਾ ਕਿ ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਪ੍ਰਮਾਣੂ ਹਮਲੇ ਨੂੰ ਲੈ ਕੇ ਬੁਖਲਾਹਟ ‘ਚ ਹਨ। ਜ਼ੇਲੈਂਸਕੀ ਨੇ ਕਿਹਾ ਕਿ ਜਦੋਂ ਪੁਤਿਨ ਕਹਿੰਦੇ ਹਨ ਕਿ ਉਹ ਰੂਸ ਨੂੰ ਬਚਾਉਣ ਲਈ ਪ੍ਰਮਾਣੂ ਹਮਲਾ ਕਰਨ ਲਈ ਤਿਆਰ ਹਨ ਤਾਂ ਉਹ ਇਸ ਨੂੰ ਧੋਖਾ ਨਹੀਂ ਸਮਝਦੇ। ਰੂਸੀ ਰਾਸ਼ਟਰਪਤੀ ਪੁਤਿਨ ਨੇ ਪਿਛਲੇ ਹਫ਼ਤੇ ਇੱਕ ਸਮਾਗਮ ਵਿੱਚ ਕਿਹਾ ਸੀ ਕਿ ਮਾਸਕੋ ਰੂਸ ਦੀ ਸੁਰੱਖਿਆ ਅਤੇ ਆਪਣੇ ਲੋਕਾਂ ਨੂੰ ਕਿਸੇ ਵੀ ਖ਼ਤਰੇ ਤੋਂ ਬਚਾਉਣ ਲਈ ਸਾਰੇ ਉਪਾਅ ਕਰਨ ਦੀ ਕੋਸ਼ਿਸ਼ ਕਰੇਗਾ।
ਜ਼ੇਲੈਂਸਕੀ ਨੇ ਕਿਹਾ, ‘ਦੇਖੋ, ਉਸ ਨੇ ਜੋ ਕਿਹਾ ਉਹ ਸ਼ਾਇਦ ਧੋਖਾ ਸੀ ਪਰ ਹੁਣ ਇਹ ਸੱਚ ਹੈ।’ ਕਿਉਂਕਿ ਇਸ ਤੋਂ ਪਹਿਲਾਂ ਉਹ ਕਈ ਵਾਰ ਪ੍ਰਮਾਣੂ ਹਮਲੇ ਦੀ ਧਮਕੀ ਦੇ ਚੁੱਕੇ ਹਨ। ਇਸ ਲਈ ਮੈਨੂੰ ਨਹੀਂ ਲੱਗਦਾ ਕਿ ਇਹ ਇੱਕ ਧੋਖਾ ਹੈ। ਯੂਕਰੇਨ ਦੇ ਰਾਸ਼ਟਰਪਤੀ ਨੇ ਕਿਹਾ ਕਿ ਦੇਸ਼ ਦੇ ਦੋ ਪ੍ਰਮਾਣੂ ਪਲਾਂਟਾਂ ‘ਤੇ ਜਾਂ ਨੇੜੇ ਰੂਸੀ ਹਮਲਿਆਂ ਨੂੰ ਖ਼ਤਰੇ ਵਜੋਂ ਜਾਂ ਪ੍ਰਮਾਣੂ ਹਮਲਿਆਂ ਦੇ ਸੰਕੇਤ ਵਜੋਂ ਦੇਖਿਆ ਜਾ ਸਕਦਾ ਹੈ।
ਜ਼ਿਕਰਯੋਗ ਹੈ ਕਿ ਕੀਵ ਦਾ ਇਲਜ਼ਾਮ ਹੈ ਕਿ ਮਾਸਕੋ ਰੂਸ ਦੇ ਕਬਜ਼ੇ ਵਾਲੇ ਖੇਤਰ ਵਿੱਚ ਜ਼ਾਪੋਰਿਝਿਆ ਪਰਮਾਣੂ ਪਲਾਂਟ ਨੂੰ ਲਗਾਤਾਰ ਨਸ਼ਟ ਕਰ ਰਿਹਾ ਹੈ। ਉਸ ਨੇ ਕਿਹਾ ਕਿ ਯੁੱਧ ਦੇ ਦੌਰਾਨ, ਅਤੇ ਹਾਲ ਹੀ ਵਿੱਚ ਰੂਸ ਨੇ Pivdennoukrainska ਪ੍ਰਮਾਣੂ ਪਲਾਂਟ ‘ਤੇ ਕਈ ਮਿਜ਼ਾਈਲ ਹਮਲੇ ਕੀਤੇ ਹਨ। ਹਾਲਾਂਕਿ, ਮਾਸਕੋ ਨੇ ਜ਼ਪੋਰਿਝਜ਼ਿਆ ਦੇ ਆਲੇ-ਦੁਆਲੇ ਹਮਲਿਆਂ ਦੇ ਦੋਸ਼ਾਂ ਤੋਂ ਇਨਕਾਰ ਕੀਤਾ ਹੈ। ਜਦੋਂ ਕਿ ਰੂਸ ਨੇ ਪਿਵਡੇਨੋਉਕ੍ਰੇਨਸਕਾ ਪਰਮਾਣੂ ਪਲਾਂਟ ‘ਤੇ ਹਮਲੇ ‘ਤੇ ਟਿੱਪਣੀ ਕਰਨ ਤੋਂ ਇਨਕਾਰ ਕਰ ਦਿੱਤਾ ਹੈ।
ਯੂਕਰੇਨ ਦੇ ਸ਼ਹਿਰ ਇਜੀਅਮ ਵਿੱਚ ਇੱਕ ਸਮੂਹਿਕ ਕਬਰ ਵਿੱਚੋਂ ਮਿਲੀਆਂ 440 ਲਾਸ਼ਾਂ ਵਿੱਚੋਂ 30 ਲਾਸ਼ਾਂ ਵਿੱਚ ਤਸ਼ੱਦਦ ਦੇ ਨਿਸ਼ਾਨ ਸਨ। ਇਨ੍ਹਾਂ ਲਾਸ਼ਾਂ ਦੇ ਪੋਸਟਮਾਰਟਮ ‘ਚ ਪਤਾ ਲੱਗਾ ਹੈ ਕਿ 30 ਲੋਕਾਂ ਦੀ ਮੌਤ ਤਸ਼ੱਦਦ ਨਾਲ ਹੋਈ ਸੀ ਅਤੇ ਉਸ ਤੋਂ ਬਾਅਦ ਉਨ੍ਹਾਂ ਨੂੰ ਦਫ਼ਨਾਇਆ ਗਿਆ ਸੀ। ਯੂਕਰੇਨ ਦੀ ਫ਼ੌਜ ਨੇ ਇਸ ਮਹੀਨੇ ਰੂਸੀ ਫ਼ੌਜ ਤੋਂ ਇਜ਼ੀਅਮ ਸ਼ਹਿਰ ਨੂੰ ਖੋਹ ਲਿਆ ਸੀ।