ਦੁਬਈ – ਦੁਬਈ ‘ਚ ਆਯੋਜਿਤ ਇਕ ਸ਼ਾਨਦਾਰ ਸਮਾਰੋਹ ‘ਚ ‘ਭਵਿੱਖ ਦਾ ਅਜਾਇਬ ਘਰ’, ਜਿਸ ਨੂੰ ‘ਦੁਨੀਆ ਦੀ ਸਭ ਤੋਂ ਖੂਬਸੂਰਤ ਇਮਾਰਤ’ ਕਿਹਾ ਜਾ ਰਿਹਾ ਹੈ, ਦਾ ਉਦਘਾਟਨ ਕੀਤਾ ਗਿਆ। ਇਸ ਇਮਾਰਤ ਨੂੰ ਬਣਾਉਣ ਵਿੱਚ 9 ਸਾਲ ਲੱਗੇ। ਇਹ ਸੱਤ ਮੰਜ਼ਿਲਾ ਇਮਾਰਤ 77 ਮੀਟਰ ਉੱਚੀ ਹੈ ਤੇ ਇਸ ਨੂੰ 30 ਹਜ਼ਾਰ ਵਰਗ ਮੀਟਰ ਵਿਚ ਬਣਾਇਆ ਗਿਆ ਹੈ। ਇਹ ਦੁਨੀਆ ਦੀ ਸਭ ਤੋਂ ਉੱਚੀ ਇਮਾਰਤ ਬੁਰਜ ਖਲੀਫਾ ਤੋਂ ਥੋੜ੍ਹੀ ਦੂਰੀ ‘ਤੇ ਸਥਿਤ ਹੈ। ‘ਭਵਿੱਖ ਦਾ ਅਜਾਇਬ ਘਰ’ ਦੁਬਈ ਵਿੱਚ ਬਣੇ ਆਰਕੀਟੈਕਚਰਲ ਨਮੂਨਿਆਂ ਵਿੱਚ ਨਵੀਨਤਮ ਜੋੜ ਹੈ। ਇੱਕ ਪ੍ਰੈਸ ਰਿਲੀਜ਼ ਵਿੱਚ ਕਿਹਾ ਗਿਆ ਹੈ ਕਿ ਅਜਾਇਬ ਘਰ ਮਨੁੱਖਤਾ ਦੇ ਭਵਿੱਖ ਦੀ ਰੂਪਰੇਖਾ ਪ੍ਰਦਰਸ਼ਿਤ ਕਰਦਾ ਹੈ।
ਇਸ ਦੇ ਨਾਲ ਇਹ ਅਜਾਇਬ ਘਰ ਮਨੁੱਖੀ ਵਿਕਾਸ ਵਿੱਚ ਚੁਣੌਤੀਆਂ ਅਤੇ ਮੌਕਿਆਂ ਦੇ ਨਵੀਨਤਾਕਾਰੀ ਹੱਲ ਲਈ ਪ੍ਰੇਰਿਤ ਕਰਦਾ ਹੈ। ਇਮਾਰਤ ਦਿੱਖ ਵਿੱਚ ਬਹੁਤ ਸੁੰਦਰ ਹੈ। ਦੁਨੀਆ ਭਰ ਦੇ ਲੋਕ ਇਸ ਦੀ ਖੂਬ ਤਾਰੀਫ ਕਰ ਰਹੇ ਹਨ। ਯੂਏਈ ਦੇ ਕੈਬਨਿਟ ਮਾਮਲਿਆਂ ਦੇ ਮੰਤਰੀ ਅਤੇ ਦੁਬਈ ਫਿਊਚਰ ਫਾਊਂਡੇਸ਼ਨ ਦੇ ਚੇਅਰਮੈਨ ਮੁਹੰਮਦ ਅਲ ਗਰਗਾਵੀ ਨੇ ਮੰਗਲਵਾਰ ਨੂੰ ਉਦਘਾਟਨੀ ਸਮਾਰੋਹ ‘ਚ ਕਿਹਾ ਕਿ ‘ਮਿਊਜ਼ੀਅਮ ਆਫ ਦਾ ਫਿਊਚਰ’ ਇਕ ਜੀਵਤ ਅਜਾਇਬ ਘਰ ਹੈ। ਇਮਾਰਤ ਨੂੰ ਕਿਲਾ ਡਿਜ਼ਾਈਨ ਦੇ ਆਰਕੀਟੈਕਟ, ਸੀਨ ਕਿਲਾ ਦੁਆਰਾ ਡਿਜ਼ਾਇਨ ਕੀਤਾ ਗਿਆ ਹੈ ਅਤੇ ਇਹ ਇੰਜੀਨੀਅਰਿੰਗ ਅਤੇ ਕੰਪਿਊਟਰ-ਸਹਾਇਤਾ ਵਾਲੇ ਡਿਜ਼ਾਈਨ ਦਾ ਇੱਕ ਮਾਸਟਰਪੀਸ ਹੈ। ਇਹ ਸਟੇਨਲੈਸ ਸਟੀਲ ਦਾ ਬਣਿਆ ਹੋਇਆ ਹੈ ਅਤੇ ਰੋਬੋਟ ਦੀ ਵਰਤੋਂ ਕਰਕੇ ਬਣਾਈਆਂ ਗਈਆਂ 1,024 ਕਲਾਕ੍ਰਿਤੀਆਂ ਹਨ। ਰਾਤ ਨੂੰ ਇਹ ਇਮਾਰਤ ਲਾਈਟਾਂ ਨਾਲ ਜਗਮਗਾਉਂਦੀ ਹੈ। ਜਿਸ ਕਾਰਨ ਇਸ ਦੀ ਖੂਬਸੂਰਤੀ ਹੋਰ ਵੀ ਵਧ ਜਾਂਦੀ ਹੈ।