ਸਾਊਦੀ ਅਰਬ ਨੇ ਤਬਲੀਗੀ ਜਮਾਤ ‘ਤੇ ਲਾਈ ਪਾਬੰਦੀ

ਅਰਬ – ਸਾਊਦੀ ਅਰਬ ਨੇ ਤਬਲੀਗੀ ਜਮਾਤ ‘ਤੇ ਪਾਬੰਦੀ ਲਗਾ ਦਿੱਤੀ ਹੈ। ਉਸ ਨੇ ਇਸ ਨੂੰ ਅੱਤਵਾਦ ਦਾ ਦਰਵਾਜ਼ਾ ਕਿਹਾ ਹੈ। ਸਾਊਦੀ ਅਰਬ ਦੇ ਇਸਲਾਮਿਕ ਮਾਮਲਿਆਂ ਦੇ ਮੰਤਰਾਲੇ ਨੇ ਇਸ ਮਾਮਲੇ ‘ਤੇ ਟਵੀਟ ਕੀਤਾ ਹੈ। ਕਿਹਾ- ਮਸਜਿਦ ‘ਚ ਪ੍ਰਚਾਰਕਾਂ ਨੂੰ ਨਿਰਦੇਸ਼ ਦਿੱਤਾ ਗਿਆ ਹੈ ਕਿ ਉਹ ਅਗਲੇ ਸ਼ੁੱਕਰਵਾਰ ਨੂੰ ਲੋਕਾਂ ਨੂੰ ਤਬਲੀਗੀ ਜਮਾਤ ਤੋਂ ਸੁਚੇਤ ਕਰਨ ਲਈ ਉਪਦੇਸ਼ ਦੇਣ। ਮੰਤਰਾਲੇ ਨੇ ਕਿਹਾ ਕਿ ਇਸ ਸੰਗਠਨ ਨੇ ਲੋਕਾਂ ਨੂੰ ਆਪਣੇ ਰਸਤੇ ਤੋਂ ਭਟਕਾਇਆ ਹੈ। ਇਹ ਇਕ ਖ਼ਤਰੇ ਦਾ ਐਲਾਨ ਹੈ। ਇਹ ਅੱਤਵਾਦ ਦੇ ਦਰਵਾਜ਼ਿਆਂ ‘ਚੋਂ ਇੱਕ ਹੈ। ਉਹ ਚਾਹੇ ਜੋ ਵੀ ਦਾਅਵਾ ਕਰਨ ਪਰ ਲੋਕਾਂ ਨੂੰ ਉਨ੍ਹਾਂ ਦੀਆਂ ਗਲਤੀਆਂ ਬਾਰੇ ਦੱਸੋ। ਸਰਕਾਰ ਨੇ ਧਾਰਮਿਕ ਖੇਤਰ ਦੇ ਲੋਕਾਂ ਨੂੰ ਸਮਝਾਉਣ ਲਈ ਕਿਹਾ ਹੈ। ਉਨ੍ਹਾਂ ਨੂੰ ਦੱਸਿਆ ਜਾਣਾ ਚਾਹੀਦਾ ਹੈ ਕਿ ਤਬਲੀਗੀ ਭਾਈਚਾਰਾ ਸਮਾਜ ਲਈ ਖ਼ਤਰਾ ਹੈ। ਤੁਹਾਨੂੰ ਦੱਸ ਦੇਈਏ ਕਿ ਸਾਊਦੀ ਸਰਕਾਰ ਇਸ ਮਾਮਲੇ ਨੂੰ ਬਹੁਤ ਗੰਭੀਰਤਾ ਨਾਲ ਲੈ ਰਹੀ ਹੈ। ਦੇਸ਼ ਦੇ ਇਸਲਾਮਿਕ ਮਾਮਲਿਆਂ ਦੇ ਮੰਤਰਾਲੇ ਨੇ ਇਸ ਸਬੰਧ ‘ਚ ਕਈ ਟਵੀਟ ਕੀਤੇ ਹਨ। ਮਹੱਤਵਪੂਰਨ ਗੱਲ ਇਹ ਹੈ ਕਿ ਤਬਲੀਗੀ ਜਮਾਤ ਭਾਰਤ ‘ਚ 1926 ਵਿਚ ਹੋਂਦ ‘ਚ ਆਈ ਸੀ। ਇਹ ਇਕ ਸੁੰਨੀ ਇਸਲਾਮੀ ਮਿਸ਼ਨਰੀ ਲਹਿਰ ਹੈ ਜੋ ਮੁਸਲਮਾਨਾਂ ਨੂੰ ਸੁੰਨੀ ਇਸਲਾਮ ਵੱਲ ਮੁੜਨ ਤੇ ਧਾਰਮਿਕ ਉਪਦੇਸ਼ ਦੇਣ ਦਾ ਕੰਮ ਕਰਦੀ ਹੈ। ਦੁਨੀਆ ਭਰ ‘ਚ ਇਸ ਦੇ ਲਗਪਗ 400 ਮਿਲੀਅਨ ਮੈਂਬਰ ਹਨ। ਇਸ ਸੰਸਥਾ ਦਾ ਦਾਅਵਾ ਹੈ ਕਿ ਉਸ ਦਾ ਧਿਆਨ ਸਿਰਫ਼ ਧਰਮ ‘ਤੇ ਹੈ। ਉਹ ਸਿਆਸੀ ਗਤੀਵਿਧੀਆਂ ਅਤੇ ਬਹਿਸਾਂ ਤੋਂ ਸਖ਼ਤੀ ਨਾਲ ਬਚਦੀ ਹੈ।