93 ਸਾਲਾ ਰੁਪਰਟ ਮਰਡੋਕ 5ਵੀਂ ਵਾਰ ਬਣਿਆ ਲਾੜਾ, ਇੱਕ ਰੂਸੀ ਪ੍ਰੇਮਿਕਾ ਨਾਲ ਕੀਤਾ ਵਿਆਹ

ਨਿਊਯਾਰਕ – 93 ਸਾਲਾ ਮੀਡੀਆ ਦਿੱਗਜ਼ ਰੂਪਰਟ ਮਰਡੋਕ ਨੇ ਆਪਣੀ ਰੂਸੀ ਪ੍ਰੇਮਿਕਾ ਐਲੇਨਾ ਜੂਕੋਵਾ ਨਾਲ ਵਿਆਹ ਕਰਵਾ ਲਿਆ ਹੈ। ‘ਦ ਨਿਊ ਯੌਰਕ ਟਾਈਮਜ਼’ ਮੁਤਾਬਕ ਉਹ 5ਵੀਂ ਵਾਰ ਲਾੜਾ ਬਣਿਆ ਹੈ। ਇਹ ਵਿਆਹ ਸ਼ਨੀਵਾਰ ਨੂੰ ਮਰਡੋਕ ਦੇ ਵਾਈਨਯਾਰਡ ਵਿੱਚ ਹੋਇਆ। ਇਹ ਜੋੜਾ ਪਿਛਲੇ ਸਾਲ ਤੋਂ ਇੱਕ -ਦੂਜੇ ਨੂੰ ਡੇਟ ਕਰ ਰਿਹਾ ਸੀ। ਮਰਡੋਕ ਆਪਣੀ ਤੀਜੀ ਪਤਨੀ ਵੈਂਡੀ ਡੇਂਗ ਰਾਹੀਂ ਐਲੇਨਾ ਨੂੰ ਮਿਲਿਆ।
93 ਸਾਲਾ ਮਰਡੋਕ ਅਤੇ 67 ਸਾਲਾ ਏਲੇਨਾ ਨੇ ਸ਼ਨੀਵਾਰ ਨੂੰ ਵਿਆਹ ਦੀਆਂ ਸਹੁੰ ਚੁੱਕੀਆਂ, ਜਿਸ ਦੀਆਂ ਤਸਵੀਰਾਂ ਸੋਸ਼ਲ ਮੀਡੀਆ ’ਤੇ ਵਾਇਰਲ ਹੋ ਰਹੀਆਂ ਹਨ। ਐਲੀਨਾ ਆਪਣੇ ਸਾਨਦਾਰ ਚਿੱਟੇ ਗਾਊਨ ਵਿੱਚ ਆਪਣੇ ਹੱਥਾਂ ਵਿੱਚ ਚਿੱਟੇ ਫ਼ੁੱਲਾਂ ਦਾ ਗੁਲਦਸਤਾ ਲੈ ਕੇ ਦਿਖਾਈ ਦੇ ਰਹੀ ਹੈ। ਇਸ ਦੌਰਾਨ ਮਰਡੋਕ ਨੇ ਸਨੀਕਰਸ ਦੇ ਨਾਲ ਡਾਰਕ ਸੂਟ ਪਾਇਆ ਸੀ।
ਵਿਆਹ ਸਮਾਗਮ ਵਿੱਚ ਨਿਊ ਇੰਗਲੈਂਡ ਪੈਟ੍ਰੀਅਟਸ ਦੇ ਮਾਲਕ ਰੌਬਰਟ ਕੇ ਕ੍ਰਾਫ਼ਟ ਅਤੇ ਨਿਊਜ ਕਾਰਪੋਰੇਸਨ ਦੇ ਸੀਈਓ ਰੌਬਰਟ ਥਾਮਸਨ ਵੀ ਮੌਜੂਦ ਸਨ। ਦੇ ਅਨੁਸਾਰ, ਏਲੇਨਾ ਇੱਕ ਸੇਵਾ ਮੁਕਤ ਅਣੂ ਜੀਵ ਵਿਗਿਆਨੀ ਹੈ ਜੋ 1991 ਵਿੱਚ ਮਾਸਕੋ ਤੋਂ ਅਮਰੀਕਾ ਵਿੱਚ ਆਵਾਸ ਕਰ ਗਈ ਸੀ। ਇਸ ਤੋਂ ਪਹਿਲਾਂ ਉਸ ਦਾ ਵਿਆਹ ਅਰਬਪਤੀ ਊਰਜਾ ਨਿਵੇਸ਼ਕ ਅਲੈਗਜ਼ੈਂਡਰ ਜੂਕੋਵ ਨਾਲ ਹੋਇਆ ਸੀ।
ਰੁਪਰਟ ਮਰਡੋਕ ਨੇ ਪਹਿਲਾ ਵਿਆਹ 1956 ਵਿੱਚ ਪੈਟਰੀਸੀਆ ਬੁਕਰ ਨਾਲ ਕੀਤਾ ਸੀ। ਵਿਆਹ ਸਫ਼ਲ ਨਹੀਂ ਹੋਇਆ ਅਤੇ ਜੋੜਾ 11 ਸਾਲਾਂ ਬਾਅਦ 1967 ਵਿੱਚ ਵੱਖ ਹੋ ਗਿਆ। ਉਨ੍ਹਾਂ ਦਾ ਇੱਕ ਬੱਚਾ ਹੈ। ਉਸੇ ਸਾਲ, ਮਰਡੋਕ ਨੇ ਆਪਣੀ ਦੂਜੀ ਪਤਨੀ ਅੰਨਾ ਮਾਰੀਆ ਟੋਰਵ ਨਾਲ ਵਿਆਹ ਕਰਵਾ ਲਿਆ। ਦੋਵਾਂ ਦੇ Ç3 ਬੱਚੇ ਸਨ। ਤਿੰਨ ਦਹਾਕਿਆਂ ਤੋਂ ਵੱਧ ਦੇ ਵਿਆਹ ਤੋਂ ਬਾਅਦ 1999 ਵਿੱਚ ਉਨ੍ਹਾਂ ਦਾ ਤਲਾਕ ਹੋ ਗਿਆ। ਉਸਨੇ ਉਸੇ ਸਾਲ ਡੇਂਗ ਨਾਲ ਵਿਆਹ ਕਰਵਾ ਲਿਆ ਪਰ 2013 ਵਿੱਚ ਉਨ੍ਹਾਂ ਦਾ ਤਲਾਕ ਹੋ ਗਿਆ। ਉਸ ਦੇ ਦੋ ਬੱਚੇ ਵੀ ਹਨ।
ਰਾਇਟਰਜ਼ ਦੀ ਰਿਪੋਰਟ ਅਨੁਸਾਰ ਮਰਡੋਕ ਦਾ ਚੌਥਾ ਵਿਆਹ, ਅਭਿਨੇਤਰੀ ਅਤੇ ਮਾਡਲ ਜੈਰੀ ਹਾਲ ਨਾਲ, 4 ਸਾਲਾਂ ਬਾਅਦ 2022 ਵਿੱਚ ਤਲਾਕ ਨਾਲ ਖਤਮ ਹੋ ਗਿਆ।