ਪੰਜਾਬ ਦੇ ਸੱਭ ਤੋਂ ਹਾਈਟੈੱਕ ਸ਼ਹਿਰਾਂ ਵਿਚ ਸ਼ੁਮਾਰ ਜ਼ਿਲ੍ਹਾ ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ (ਮੁਹਾਲੀ) ਦੇ ਕਈ ਇਲਾਕਿਆਂ ਦੇ ਵਿੱਚ ਪੀਣਯੋਗ ਪਾਣੀ ਵੀ ਨਹੀਂ ਹੈ। ਸਿਹਤ ਵਿਭਾਗ ਮੋਹਾਲੀ ਦੀ ਇਕ ਰਿਪੋਰਟ ਵਿਚ ਅਜਿਹਾ ਪ੍ਰਗਟਾਵਾ ਹੋਇਆ ਹੈ, ਜਿਸ ਵਿਚ ਇਹ ਪਤਾ ਚੱਲਦਾ ਹੈ ਕਿ ਜ਼ਿਲ੍ਹੇ ਦੇ ਵੱਖ-ਵੱਖ 8 ਸਿਹਤ ਬਲਾਕਾਂ ਵਿਚੋਂ ਪ੍ਰਾਪਤ ਕੀਤੇ ਗਏ ਨਮੂਨਿਆਂ ਦੇ 42.5 ਫ਼ੀ ਸਦੀ ਨਮੂਨੇ ਪੀਣ ਦੇ ਮਿਆਰ ’ਤੇ ਖਰੇ ਨਹੀਂ ਉਤਰੇ।
ਸਿਹਤ ਵਿਭਾਗ ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ (ਮੁਹਾਲੀ) ਦੀ ਇਕ ਰਿਪੋਰਟ ਅਨੁਸਾਰ ਜਨਵਰੀ 2025 ਤੋਂ 31 ਮਈ ਤੱਕ ਕੁੱਲ 459 ਪਾਣੀ ਦੇ ਨੂਮਨੇ ਇਕੱਠੇ ਕੀਤੇ ਗਏ ਸਨ, ਜਿਨ੍ਹਾਂ ਵਿਚੋਂ 195 ਦਾ ਮਿਆਰ ਨਾ-ਪੀਣਯੋਗ ਸੀ। ਇਹਨਾਂ ਥਾਵਾਂ ਦੇ ਪਾਣੀ ਵਿਚ ਬੈਕਟੀਰੀਅਲ ਇਨਫ਼ੈਕਸ਼ਨ ਪਾਈ ਗਈ ਸੀ ਅਤੇ ਉਨ੍ਹਾਂ ਵਿਚੋਂ 7 ਤੋਂ ਨਮੂਨੇ ਦੁਬਾਰਾ ਪ੍ਰਾਪਤ ਕਰਨ ਲਈ ਕਿਹਾ ਗਿਆ ਹੈ। ਇਨ੍ਹਾਂ ਵਿਚੋਂ ਕੁਰਾਲੀ ਤੇ ਘੜੂੰਆਂ ਦੇ 2-2 ਅਤੇ ਬੂਥਗੜ੍ਹ ਦੇ ਅਲੱਗ-ਅਲੱਗ ਥਾਵਾਂ ਦੇ 3 ਨਮੂਨੇ ਲਏ ਹਨ। ਇਨ੍ਹਾਂ ਨਮੂਨਿਆਂ ਵਿਚ ਬੈਕਟੀਰੀਅਲ ਇਨਫ਼ੈਕਸ਼ਨ ਸੀ, ਜਿਸ ਕਰਕੇ ਇਨ੍ਹਾਂ ਨੂੰ ਪੀਕੇ ਸਿਹਤ ਖ਼ਰਾਬ ਹੋਣ ਦਾ ਡਰ ਹੈ। ਸਭ ਤੋਂ ਜ਼ਿਆਦਾ ਮਾੜਾ ਹਾਲ ਘੜੂੰਆਂ ਤੇ ਡੇਰਾਬੱਸੀ ਬਲਾਕ ਦਾ ਹੈ। ਘੜੂੰਆਂ ਪ੍ਰਾਇਮਰੀ ਹੈਲਥ ਸੈਂਟਰ ਦੇ ਅਧੀਨ ਖੇਤਰਾਂ ਵਿਚੋਂ ਵੱਖ-ਵੱਖ ਪਾਣੀ ਦੇ ਸਰੋਤਾਂ ਤੋਂ 161 ਪਾਣੀ ਦੇ ਨਮੂਨੇ ਇਕੱਤਰ ਕੀਤੇ ਗਏ ਸਨ, ਜਿਨ੍ਹਾਂ ਵਿਚੋਂ 61 ਨਾ-ਪੀਣਯੋਗ ਸਨ। ਇਸੇ ਤਰ੍ਹਾਂ ਡੇਰਾਬੱਸੀ ਐਸ.ਡੀ.ਐਸ ਅਧੀਨ ਖੇਤਰਾਂ ਵਿਚੋਂ ਵੀ ਪੀਣ ਵਾਲੇ ਪਾਣੀ ਦੇ 122 ਨਮੂਨੇ ਪ੍ਰਾਪਤ ਕੀਤੇ ਗਏ ਸਨ, ਜਿਨ੍ਹਾਂ ਵਿਚੋਂ 46 ਫੇਲ੍ਹ ਹੋ ਗਏ। ਸਿਰਫ਼ ਢਕੌਲੀ ਤੇ ਬਨੂੜ ਹੀ ਅਜਿਹੀਆਂ ਥਾਵਾਂ ਰਹੀਆਂ, ਜਿਥੋਂ ਪ੍ਰਾਪਤ ਕੀਤੇ ਗਏ 7 ਦੇ 7 ਨਮੂਨੇ ਪੀਣਯੋਗ ਪਾਏ ਗਏ।
ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ (ਮੁਹਾਲੀ) ਜਿਲ੍ਹੇ ਦੀ ਇਕ ਰਿਪੋਰਟ ਅਨੁਸਾਰ ਇਸ ਜਿਲ੍ਹੇ ਦੇ ਵਿੱਚੋਂ ਜਨਵਰੀ ਤੋਂ 31 ਮਈ 2025 ਦੇ ਦੌਰਾਨ ਕੁੱਲ 459 ਪਾਣੀ ਦੇ ਨੂਮਨੇ ਇਕੱਠੇ ਕੀਤੇ ਗਏ ਸਨ। ਇਹਨਾਂ ਦੇ ਵਿਚੋਂ 195 ਦਾ ਮਿਆਰ ਨਾਪੀਣਯੋਗ ਅਤੇ ਸਿਰਫ਼ 257 ਹੀ ਪੀਣ ਵਾਲੇ ਸਹੀ ਪਾਏ ਗਏ। ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ (ਮੁਹਾਲੀ) ਦੇ ਇਕੱਠੇ ਕੀਤੇ ਗਏ 31 ਨਮੂਨਿਆਂ ਦੇ ਵਿੱਚੋਂ ਸਿਰਫ਼ 13 ਪੀਣਯੋਗ ਤੇ 18 ਪੀਣ ਵਾਲੇ ਨਹੀਂ ਸਨ। ਡੇਰਾਬੱਸੀ ਦੇ 122 ਵਿਚੋਂ ਸਿਰਫ਼ 76 ਪੀਣਯੋਗ ਤੇ 46 ਪੀਣ ਵਾਲੇ ਨਹੀਂ ਸਨ, ਖਰੜ ਦੇ 13 ਵਿਚੋਂ ਸਿਰਫ 4 ਪੀਣਯੋਗ ਤੇ 9 ਪੀਣ ਵਾਲੇ ਨਹੀਂ ਸਨ, ਕੁਰਾਲੀ ਦੇ 18 ਵਿਚੋਂ ਸਿਰਫ 5 ਪੀਣਯੋਗ ਤੇ 11 ਪੀਣ ਵਾਲੇ ਨਹੀਂ ਸਨ, ਬਨੂੜ ਦੇ 2 ਵਿਚੋਂ ਸਾਰੇ ਹੀ 2 ਸਹੀ ਪਾਏ ਗਏ, ਢਕੌਲੀ ਦੇ 5 ਵਿਚੋਂ ਸਾਰੇ 5 ਸਹੀ ਪਾਏ ਗਏ, ਘੜੂੰਆਂ ਦੇ 161 ਵਿਚੋਂ ਸਿਰਫ 98 ਪੀਣਯੋਗ ਤੇ 61 ਪੀਣ ਵਾਲੇ ਨਹੀਂ ਸਨ ਅਤੇ ਬੂਥਗੜ੍ਹ ਦੇ 107 ਵਿਚੋਂ ਸਿਰਫ 54 ਪੀਣਯੋਗ ਅਤੇ 50 ਪੀਣ ਵਾਲੇ ਨਹੀਂ।
ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ (ਮੁਹਾਲੀ) ਵਿਚ ਨਾ-ਪੀਣਯੋਗ ਪਾਣੀ ਮਾਮਲਾ ਪੁਰਾਣਾ ਹੈ। ਇਸ ਤੋਂ ਪਹਿਲਾਂ ਵੀ ਸਾਲ 2024 ਵਿੱਚ ਵੀ ਇਸ ਜਿਲ੍ਹੇ ਦੇ 538 ਥਾਵਾਂ ਤੋਂ ਪਾਣੀ ਦੇ ਨਮੂਨੇ ਪ੍ਰਾਪਤ ਕੀਤੇ ਗਏ ਸਨ ਜਿਨ੍ਹਾਂ ਵਿਚੋਂ 243 ਨਮੂਨੇ ਪੀਣ ਵਾਲੇ ਨਹੀਂ ਪਾਏ ਗਏ ਸਨ। ਖਾਸ ਤੌਰ ‘ਤੇ ਇਨ੍ਹਾਂ ਵਿਚੋਂ 100 ਨਮੂਨੇ ਸਰਕਾਰੀ ਸਕੂਲਾਂ ਦੇ ਸਨ। ਇਸ ਰਿਪੋਰਟ ਦੇ ਆਉਣ ਤੋਂ ਬਾਅਦ ਸਿੱਖਿਆ ਵਿਭਾਗ ਤੇ ਜਲ ਸਪਲਾਈ ਤੇ ਸੈਨੀਟੇਸ਼ਨ ਵਿਭਾਗ ਵਿਚ ਵੱਡਾ ਹੰਗਾਮਾ ਹੋਇਆ ਸੀ।