ਨਿਊਜ਼ੀਲੈਂਡ ਦੀ ਰਾਜਧਾਨੀ ਵੇਲਿੰਗਟਨ ਦੇ ਵਿੱਚ ਐਮਰਜੈਂਸੀ ਦਾ ਐਲਾਨ ਕੀਤਾ ਗਿਆ ਹੈ। ਖਰਾਬ ਮੌਸਮ ਕਾਰਣ ਹਾਲੇ ਵੀ ਹਾਲਾਤ ਖਰਾਬ ਹਨ ਅਤੇ ਅੱਜ 21 ਅਪ੍ਰੈਲ ਨੂੰ ਹੋਰ ਮੀਂਹ ਪੈਣ ਦੀ ਸੰਭਾਵਨਾ ਹੈ, ਇਸ ਲਈ ਲੋਕਾਂ ਨੂੰ ਬਹੁਤ ਸਾਵਧਾਨੀ ਵਰਤਣ ਦੇ ਲਈ ਕਿਹਾ ਗਿਆ ਹੈ। ਪ੍ਰਸ਼ਾਸਨ ਨੇ ਲੋਕਾਂ ਨੂੰ ਚਿਤਾਵਨੀ ਦਿੱਤੀ ਹੈ ਕਿ ਇਸ ਸਮੇਂ ਆਪਣੇ-ਆਪ ਸਫਾਈ ਜਾਂ ਮਦਦ ਲਈ ਨਾ ਜਾਓ, ਕਿਉਂਕਿ ਐਮਰਜੈਂਸੀ ਟੀਮਾਂ ਪਹਿਲਾਂ ਹੀ ਕੰਮ ਕਰ ਰਹੀਆਂ ਹਨ।
ਪਿਛਲੇ 3 ਦਿਨਾਂ ਤੋਂ ਨਿਊਜ਼ੀਲੈਂਡ ਦੀ ਰਾਜਧਾਨੀ ਰਾਜਧਾਨੀ ਵੇਲਿੰਗਟਨ ਦੇ ਵਿੱਚ ਇੰਨਾ ਜਿਆਦਾ ਮੀਂਹ ਪਿਆ ਹੈ ਜਿਸ ਨਾਲ ਵੱਡੀ ਤਬਾਹੀ ਹੋਈ ਹੈ। ਇਹ ਮੀਂਹ ਮਹੀਨਾਵਾਰ ਔਸਤਨ ਮੀਂਹ ਤੋਂ ਲਗਭਗ ਤਿੰਨ ਗੁਣਾ ਜਿਆਦਾ ਹੈ ਅਤੇ ਇਸਨੂੰ ਵੇਲਿੰਗਟਨ ਦੇ 1976 ਦੇ ਵਿਨਾਸ਼ਕਾਰੀ ਤੂਫਾਨ ਤੋਂ ਬਾਅਦ ਸਭ ਤੋਂ ਭਿਆਨਕ ਹੜ੍ਹ ਵਾਲੀ ਘਟਨਾ ਦੱਸਿਆ ਜਾ ਰਿਹਾ ਹੈ। ਨਿਊਜ਼ੀਲੈਂਡ ਦੇ ਮੌਸਮ ਵਿਭਾਗ ਨੇ ਰਿਪੋਰਟ ਦਿੱਤੀ ਹੈ ਕਿ ਸੋਮਵਾਰ 20 ਅਪ੍ਰੈਲ ਨੂੰ ਸਵੇਰੇ ਦੱਖਣੀ ਵੇਲਿੰਗਟਨ ਦੇ ਕੁੱਝ ਹਿੱਸਿਆਂ ਵਿੱਚ ਸਿਰਫ ਇੱਕ ਘੰਟੇ ਵਿੱਚ ਹੀ 70 ਮਿਲੀਮੀਟਰ ਤੋਂ ਵੱਧ ਮੀਂਹ ਪਿਆ। ਇਹ ਪੂਰੇ ਅਪ੍ਰੈਲ ਵਿੱਚ ਸ਼ਹਿਰ ਦੇ ਬੋਟੈਨੀਕਲ ਗਾਰਡਨ ਵਿੱਚ ਆਮ ਤੌਰ ‘ਤੇ ਦਰਜ ਕੀਤੀ ਗਈ ਕੁੱਲ ਬਾਰਿਸ਼ ਦੇ ਅੱਧੇ ਤੋਂ ਬਹੁਤ ਜਿਆਦਾ ਹੈ। ਹੜ੍ਹ ਕਾਰਣ ਸ਼ਹਿਰ ਦੇ ਕੇਂਦਰੀ ਵਪਾਰਕ ਜ਼ਿਲ੍ਹੇ ਅਤੇ ਦੱਖਣੀ ਉਪਨਗਰਾਂ ਵਿੱਚ ਪਾਣੀ ਭਰ ਗਿਆ, ਸੜਕਾਂ ਬੰਦ ਹੋ ਗਈਆਂ ਅਤੇ ਜ਼ਮੀਨ ਖਿਸਕਣ ਦੀਆਂ ਘਟਨਾਵਾਂ ਵਾਪਰੀਆਂ। ਸਭ ਤੋਂ ਵੱਧ ਪ੍ਰਭਾਵਿਤ ਇਲਾਕਿਆਂ ਵਿੱਚੋਂ ਇੱਕ, ਬੇਰਹਮਪੋਰ ਵਿੱਚ ਐਡੀਲੇਡ ਰੋਡ ‘ਤੇ ਖੜ੍ਹੀਆਂ ਕਾਰਾਂ ਹੜ੍ਹ ਵਾਲੇ ਪਾਣੀ ਵਿੱਚ ਡੁੱਬ ਗਈਆਂ ਸਨ। ਫਾਇਰ ਐਂਡ ਐਮਰਜੈਂਸੀ ਨਿਊਜ਼ੀਲੈਂਡ ਦੇ ਵਲੋਂ ਸਹਾਇਤਾ ਲਈ ਆ ਰਹੀਆਂ ਕਾਲਾਂ ਦਾ ਜਵਾਬ ਦਿੱਤਾ ਜਾ ਰਿਹਾ ਹੈ। ਵੇਲਿੰਗਟਨ ਦੇ ਐਮਰਜੈਂਸੀ ਪ੍ਰਬੰਧਨ ਦਫਤਰ ਨੇ ਹੜ੍ਹ ਪ੍ਰਭਾਵਿਤ ਥਾਵਾਂ ‘ਤੇ ਰਹਿਣ ਵਾਲੇ ਨਿਵਾਸੀਆਂ ਨੂੰ ਘੱਟੋ-ਘੱਟ ਅਗਲੇ 24 ਘੰਟਿਆਂ ਲਈ ਉੱਚੀ ਜ਼ਮੀਨ ‘ਤੇ ਜਾਣ ਦੀ ਸਲਾਹ ਦਿੱਤੀ ਹੈ।
ਵੇਲਿੰਗਟਨ, ਜਿਸਦੀ ਆਬਾਦੀ ਲਗਭਗ 521,000 ਹੈ, ਦੇ ਲਈ ਇੱਕ ਸਹਾਇਤਾ ਕੇਂਦਰ ਸਥਾਪਤ ਕੀਤਾ ਗਿਆ ਹੈ। ਸਰਕਾਰ ਅਤੇ ਪ੍ਰਸ਼ਾਸਨ ਦੇ ਵਲੋਂ ਲੋਕਾਂ ਨੂੰ ਲਾਪ੍ਰਵਾਹੀ ਨਾ ਵਰਤਣ ਅਤੇ ਸਾਵਧਾਨੀ ਨਾਲ ਹਦਾਇਤਾਂ ਦਾ ਪਾਲਣ ਕਰਨ ਦੀ ਅਪੀਲ ਕੀਤੀ ਗਈ ਹੈ।
ਖ਼ਤਰੇ ਵਾਲੀ ਸਥਿਤੀ:
- ਕਈ ਥਾਵਾਂ ‘ਤੇ ਪਾਣੀ ਭਰਿਆ ਹੋਇਆ ਹੈ
- ਮਿੱਟੀ ਖਿਸਕਣ ਦਾ ਖ਼ਤਰਾ ਹੈ
- ਸੜਕਾਂ ‘ਤੇ ਮਲਬਾ ਅਤੇ ਟੁੱਟੀਆਂ ਚੀਜ਼ਾਂ ਪਈਆਂ ਹਨ
- ਕੁੱਝ ਇਮਾਰਤਾਂ ਅਸਥਿਰ ਹਨ
ਲੋਕਾਂ ਲਈ ਹਦਾਇਤਾਂ:
- ਨੀਵੇਂ ਅਤੇ ਹੜ ਵਾਲੇ ਇਲਾਕਿਆਂ ਤੋਂ ਦੂਰ ਜਾਓ
- ਜੇ ਘਰ ਸੁਰੱਖਿਅਤ ਹੈ ਤਾਂ ਘਰ ਵਿੱਚ ਹੀ ਰਹੋ
- ਜਰੂਰੀ ਨਾ ਹੋਵੇ ਤਾਂ ਯਾਤਰਾ ਨਾ ਕਰੋ
- ਕਦੇ ਵੀ ਹੜ ਦੇ ਪਾਣੀ ਵਿੱਚ ਨਾ ਚੱਲੋ ਜਾਂ ਗੱਡੀ ਨਾ ਚਲਾਓ
- ਜੇ ਪਾਣੀ ਵੱਧਦਾ ਲੱਗੇ ਤਾਂ ਤੁਰੰਤ ਉੱਚੀ ਥਾਂ ‘ਤੇ ਜਾਓ
ਮੱਦਦ ਲਈ ਸੈਂਟਰ:
- ਸਾਲਵੇਸ਼ਨ ਆਰਮੀ ਦਾ ਸੈਂਟਰ ਖੁੱਲ੍ਹਾ ਹੈ
- ਲੋਕਾਂ ਨੂੰ ਰਹਿਣ ਲਈ ਸਹਾਇਤਾ ਦਿੱਤੀ ਜਾ ਰਹੀ ਹੈ
ਪ੍ਰਭਾਵਿਤ ਇਲਾਕੇ:
ਇਨ੍ਹਾਂ ਇਲਾਕਿਆਂ ਵਿੱਚ ਹੜ ਅਤੇ ਲੈਂਡਸਲਾਈਡ ਦਾ ਜ਼ਿਆਦਾ ਅਸਰ ਹੈ।
- ਆਈਲੈਂਡ ਵੇਅ
- ਬੇਰਹਮਪੋਰ
- ਨਿਊਟਨ
- ਬਰੁੱਕਲਿਨ
- ਮੌਰਿੰਗਟਨ
ਹੋਰ ਜਾਣਕਾਰੀ
- ਐਮਰਜੈਂਸੀ ਸੈਂਟਰ ਚਾਲੂ ਹੈ
- ਸੜਕਾਂ ‘ਤੇ ਦਰੱਖਤ ਡਿੱਗੇ ਹੋ ਸਕਦੇ ਹਨ, ਇਸ ਲਈ ਧਿਆਨ ਨਾਲ ਚਲੋ
- ਪਾਰਕ ਅਤੇ ਜੰਗਲ ਵਾਲੀਆਂ ਥਾਵਾਂ ਤੋਂ ਦੂਰ ਰਹੋ
ਸਰਕਾਰ ਨੇ ਕਿਹਾ ਹੈ ਕਿ ਜਦੋਂ ਹਾਲਾਤ ਸੁਰੱਖਿਅਤ ਹੋ ਜਾਣਗੇ ਤਾਂ ਲੋਕਾਂ ਨੂੰ ਮੱਦਦ ਕਰਨ ਦੇ ਮੌਕੇ ਦਿੱਤੇ ਜਾਣਗੇ।
ਨਿਊਜ਼ੀਲੈਂਡ ਵਿੱਚ ਐਮਰਜੈਂਸੀ ਪੁਲਿਸ, ਫਾਇਰ ਬ੍ਰਿਗੇਡ, ਜਾਂ ਐਂਬੂਲੈਂਸ ਸੇਵਾਵਾਂ ਦੇ ਲਈ ਤੁਰੰਤ 111 ‘ਤੇ ਕਾਲ ਕਰੋ।