ਅਮਰੀਕਾ ਦਾ ਵਪਾਰਕ ਵਫ਼ਦ ਕਰੇਗਾ ਭਾਰਤ ਦਾ ਦੌਰਾ

ਵਾਸ਼ਿੰਗਟਨ – ਅਮਰੀਕਾ ਦਾ ਇਕ ਉੱਚ ਪੱਧਰੀ ਵਪਾਰਕ ਵਫਦ ਇਸ ਮਹੀਨੇ ਦੇ ਅੰਤ ਵਿਚ ਭਾਰਤ ਦਾ ਦੌਰਾ ਕਰੇਗਾ ਤਾਂ ਜੋ ਭਾਰਤ ਦੇ ਖੇਤੀ ਕਾਰੋਬਾਰੀ ਖੇਤਰ ਵਿਚ ਵੱਖ-ਵੱਖ ਮੌਕਿਆਂ ਦਾ ਪਤਾ ਲਗਾਇਆ ਜਾ ਸਕੇ ਅਤੇ ਭਾਰਤ ਦੇ ਵਧ ਰਹੇ ਮੱਧ ਵਰਗ ਵਿਚ ਅਮਰੀਕੀ ਉਤਪਾਦਾਂ ਨੂੰ ਹੋਰ ਉਤਸ਼ਾਹਿਤ ਕੀਤਾ ਜਾ ਸਕੇ।
ਖੇਤੀਬਾੜੀ ਵਪਾਰ ਅਤੇ ਵਿਦੇਸ਼ੀ ਖੇਤੀਬਾੜੀ ਮਾਮਲਿਆਂ ਦੇ ਅੰਡਰ ਸੈਕਟਰੀ ਐਲੇਕਸਿਸ ਟੇਲਰ ਨੇ ਕਿਹਾ “ਦੁਨੀਆ ਦੀ ਪੰਜਵੀਂ ਵੱਡੀ ਅਰਥਵਿਵਸਥਾ ਵਿਚ ਘਰੇਲੂ ਭੋਜਨ ਖ਼ਰੀਦ ਵਿਚ ਵਧਦੀ ਹਿੱਸੇਦਾਰੀ ਹਾਸਲ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਅਮਰੀਕਾ ਦੇ ਖੇਤੀਬਾੜੀ ਕਾਰੋਬਾਰਾਂ ਲਈ ਭਾਰਤ ਦੀ ਵਿਕਸਿਤ ਅਰਥਵਿਵਸਥਾ ਇੱਕ ਵਧੀਆ ਮੌਕਾ ਹੈ। ਟੇਲਰ ਦਿੱਲੀ ਵਿੱਚ 20 ਤੋਂ 25 ਅਪ੍ਰੈਲ ਤੱਕ ਯੂਐਸ ਡਿਪਾਰਟਮੈਂਟ ਆਫ਼ ਐਗਰੀਕਲਚਰ (ਯੂਐਸਡੀਏ) ਦਾ ਖੇਤੀ ਕਾਰੋਬਾਰ ਵਪਾਰ ਮਿਸ਼ਨ ਦੀ ਅਗਵਾਈ ਕਰਨਗੇ।
ਟੇਲਰ ਨੇ ਕਿਹਾ, ’’ਭਾਰਤ ਦੇ ਮੱਧ-ਵਰਗ ਦੇ ਖਪਤਕਾਰਾਂ ਦੀ ਅਮਰੀਕੀ ਖੁਰਾਕ ਉਤਪਾਦਾਂ ਪ੍ਰਤੀ ਵਧਦੀ ਜਾਗਰੂਕਤਾ ਅਤੇ ਵਧਦੀ ਖਰੀਦ ਸ਼ਕਤੀ ਅਮਰੀਕੀ ਉਤਪਾਦਕਾਂ ਲਈ ਇਕ ਮੌਕਾ ਹੈ।’’ ਭਾਰਤ ਦੀ ਯਾਤਰਾ ਦੌਰਾਨ ਅਮਰੀਕੀ ਵਫਦ ਦੇਸ਼ ਨਾਲ ਨਵੇਂ ਵਪਾਰਕ ਸਬੰਧ ਬਣਾਉਣ, ਮੌਜੂਦਾ ਸਾਂਝੇਦਾਰੀ ਨੂੰ ਮਜ਼ਬੂਤ ??ਕਰਨ, ਬਜ਼ਾਰ ਵਿੱਚ ਅਮਰੀਕੀ ਉਤਪਾਦਾਂ ਦਾ ਨਿਰੀਖਣ ਕਰਨ ਅਤੇ ਭਾਰਤੀ ਬਾਜ਼ਾਰਾਂ ਵਿੱਚ ਭੋਜਨ ਦੇ ਨਵੇਂ ਵਿਕਲਪਾਂ ਬਾਰੇ ਜਾਣਨ ਲਈ ਮੀਟਿੰਗਾਂ ਕਰਨਗੇ। ਇੱਕ ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਵਪਾਰ ਮਿਸ਼ਨ ਅਮਰੀਕੀ ਕਿਸਾਨਾਂ, ਪਸ਼ੂ ਪਾਲਕਾਂ ਅਤੇ ਉਤਪਾਦਕਾਂ ਲਈ ਨਵੇਂ ਖਰੀਦ ਸਮਝੌਤੇ ਨੂੰ ਲਾਗੂ ਕਰੇਗਾ।