ਚੀਨ ਤੋਂ ਖ਼ਰੀਦਦਾਰੀ ਰੁਕੀ, ਸੋਨਾ ਹੋਇਆ 3300 ਰੁਪਏ ਸਸਤਾ, ਗੋਲਡ ਈ.ਟੀ.ਐਫ. ’ਚ ਵਧਿਆ ਨਿਵੇਸ਼

ਨਵੀਂ ਦਿੱਲੀ – ਵਿਆਜ ਦਰਾਂ ’ਚ ਕਟੌਤੀ ’ਚ ਦੇਰੀ, ਅਮਰੀਕਾ ’ਚ ਉਮੀਦ ਤੋਂ ਜ਼ਿਆਦਾ ਰੁਜ਼ਗਾਰ ਸਿਰਜਣ ਅਤੇ ਚੀਨ ’ਚ ਸੋਨੇ ਦੀ ਮੰਗ ਘਟਣ ਕਾਰਨ ਪਿਛਲੇ ਤਿੰਨ ਦਿਨਾਂ ’ਚ ਅੰਤਰਰਾਸ਼ਟਰੀ ਬਾਜ਼ਾਰ ਦੇ ਨਾਲ-ਨਾਲ ਭਾਰਤ ’ਚ ਸੋਨੇ ਦੀਆਂ ਕੀਮਤਾਂ ’ਚ ਵੱਡੀ ਗਿਰਾਵਟ ਆਈ ਹੈ। ਸੋਨਾ ਆਪਣੇ ਹੁਣ ਤੱਕ ਦੇ ਉੱਚ ਪੱਧਰ ਤੋਂ 6% ਯਾਨੀ 3300 ਰੁਪਏ ਤੋਂ ਵੱਧ ਡਿੱਗ ਗਿਆ ਹੈ ਅਤੇ ਮਾਹਰਾਂ ਦਾ ਕਹਿਣਾ ਹੈ ਕਿ ਜੇਕਰ ਚੀਨ ਦਾ ਕੇਂਦਰੀ ਬੈਂਕ ਜੂਨ ਵਿੱਚ ਵੀ ਸੋਨਾ ਨਹੀਂ ਖਰੀਦਦਾ ਹੈ ਤਾਂ ਇਸ ਦੀਆਂ ਕੀਮਤਾਂ ਹੋਰ ਡਿੱਗ ਸਕਦੀਆਂ ਹਨ।
ਪਿਛਲੇ ਤਿੰਨ ਦਿਨਾਂ ’ਚ ਐਮ.ਸੀ.ਐਕਸ ਅਤੇ ਘਰੇਲੂ ਸਰਾਫਾ ਬਾਜ਼ਾਰ ’ਚ 10 ਗ੍ਰਾਮ 24 ਕੈਰੇਟ ਸੋਨੇ ਦੀ ਕੀਮਤ ’ਚ 2200 ਰੁਪਏ ਤੋਂ ਜ਼ਿਆਦਾ ਦੀ ਗਿਰਾਵਟ ਆਈ ਹੈ। 22 ਮਈ ਨੂੰ ਗਲੋਬਲ ਬਾਜ਼ਾਰ ’ਚ ਸਪਾਟ ਸੋਨਾ 2,449.89 ਡਾਲਰ ਪ੍ਰਤੀ ਔਂਸ ਦੇ ਰਿਕਾਰਡ ਪੱਧਰ ’ਤੇ ਪਹੁੰਚ ਗਿਆ ਸੀ, ਜੋ ਹੁਣ 2300 ਡਾਲਰ ਤੋਂ ਹੇਠਾਂ ਹੈ। ਇਸੇ ਤਰ੍ਹਾਂ, ਐਮ.ਸੀ.ਐਕਸ ’ਤੇ ਕੀਮਤ 74,442 ਰੁਪਏ ਦੇ ਰਿਕਾਰਡ ਉੱਚ ਪੱਧਰ ’ਤੇ ਸੀ, ਜੋ ਹੁਣ 71,000 ਰੁਪਏ ਤੋਂ ਹੇਠਾਂ ਹੈ।
ਹਾਲਾਂਕਿ, ਮਈ ਵਿੱਚ ਵਿਸ਼ਵ ਪੱਧਰ ’ਤੇ ਪਹਿਲੀ ਵਾਰ ਗੋਲਡ ਈਟੀਐਫ ਵਿੱਚ ਨਿਵੇਸ਼ ਵਧਿਆ ਹੈ। ਏ.ਐਮ.ਐਫ.ਆਈ. ਅਨੁਸਾਰ, ਭਾਰਤ ਵਿੱਚ ਗੋਲਡ ਈ.ਟੀ.ਐਫ. ਵਿੱਚ ਨਿਵੇਸ਼ ਵੀ ਮਈ ਵਿੱਚ 4 ਮਹੀਨਿਆਂ ਵਿੱਚ ਆਪਣੇ ਉੱਚ ਪੱਧਰ ’ਤੇ ਪਹੁੰਚ ਗਿਆ ਹੈ। ਮਈ ਦੌਰਾਨ ਦੇਸ਼ ਦੇ ਕੁੱਲ 17 ਗੋਲਡ ਈਟੀਐਫ ਵਿੱਚ 827.43 ਕਰੋੜ ਰੁਪਏ ਦਾ ਸ਼ੁੱਧ ਨਿਵੇਸ਼ ਹੋਇਆ।
ਸੈਂਟਰਲ ਬੈਂਕ ਆਫ ਚਾਈਨਾ ਵੱਲੋਂ ਸੋਨੇ ਦੀ ਖਰੀਦ ’ਤੇ ਲਗਾਏ ਗਏ ਬ੍ਰੇਕ ਦਾ ਅਸਰ ਕੀਮਤਾਂ ’ਤੇ ਦੇਖਣ ਨੂੰ ਮਿਲ ਰਿਹਾ ਹੈ। ਪੀਪਲਜ਼ ਬੈਂਕ ਆਫ ਚਾਈਨਾ ਦੇ ਅੰਕੜਿਆਂ ਮੁਤਾਬਕ ਇਸ ਸਾਲ ਮਈ ’ਚ ਚੀਨ ਦੇ ਸੋਨੇ ਦੇ ਭੰਡਾਰ ’ਚ ਕੋਈ ਬਦਲਾਅ ਨਹੀਂ ਆਇਆ। ਜਦਕਿ ਇਸ ਤੋਂ ਪਹਿਲਾਂ ਚੀਨ ਦੇ ਸੋਨੇ ਦੇ ਭੰਡਾਰ ਵਿੱਚ ਲਗਾਤਾਰ 18 ਮਹੀਨਿਆਂ ਤੱਕ ਵਾਧਾ ਹੋਇਆ ਸੀ। ਚੀਨ ਦਾ ਸੋਨਾ ਭੰਡਾਰ ਅਪ੍ਰੈਲ ’ਚ 2 ਟਨ ਵਧ ਕੇ 2,264 ਟਨ ਹੋ ਗਿਆ।
ਹਾਲਾਂਕਿ ਚੀਨ ਦੇ ਸੋਨੇ ਦੇ ਭੰਡਾਰ ’ਚ ਇਹ 18 ਮਹੀਨਿਆਂ ’ਚ ਸਭ ਤੋਂ ਘੱਟ ਵਾਧਾ ਸੀ। ਅਕਤੂਬਰ 2022 ਦੀ ਤੁਲਨਾ ਵਿੱਚ, ਇਹ ਲਗਭਗ 319 ਟਨ ਯਾਨੀ 16.5% ਜ਼ਿਆਦਾ ਹੈ।