ਡੋਨਾਲਡ ਟਰੰਪ ਦੇ ਭਾਰਤ-ਪਾਕਿਸਤਾਨ ਜੰਗਬੰਦੀ ‘ਤੇ ਲਗਾਤਾਰ ਦਾਅਵਿਆਂ ਤੋਂ ਬਾਅਦ ਵਿਰੋਧੀ ਧਿਰ ਸੰਸਦ ਵਿੱਚ ਸਰਕਾਰ ਤੋਂ ਸਵਾਲ ਪੁੱਛ ਰਹੀ ਸੀ ਕਿ ਉਹ ਜਾਣਨਾ ਚਾਹੁੰਦੇ ਸਨ ਕਿ ਕੀ ਹੋਇਆ ਕਿ ਜਦੋਂ ਸਾਡੀ ਫੌਜ ਜਿੱਤ ਦੇ ਰਾਹ ‘ਤੇ ਸੀ, ਤਾਂ ਤੁਰੰਤ ਜੰਗਬੰਦੀ ਕੀਤੀ ਗਈ। ਵਿਦੇਸ਼ ਮੰਤਰੀ ਐਸ ਜੈਸ਼ੰਕਰ ਨੇ ਸੰਸਦ ਦੇ ਵਿੱਚ ਵਿਸਥਾਰ ਦੇ ਵਿੱਚ ਦੱਸਿਆ ਕਿ ਜੰਗਬੰਦੀ ਤੋਂ ਠੀਕ ਪਹਿਲਾਂ 24 ਘੰਟੇ ਕਿੰਨੇ ਤਣਾਅਪੂਰਨ ਸਨ ਅਤੇ ਭਾਰਤ ਨੇ ਸਥਿਤੀ ਨੂੰ ਕਿਵੇਂ ਸੰਭਾਲਿਆ। ਕਦੋਂ, ਕਿਸ ਨਾਲ ਅਤੇ ਕੀ ਚਰਚਾ ਹੋਈ?
ਜੈਸ਼ੰਕਰ ਨੇ ਦੱਸਿਆ ਕਿ, ‘9 ਮਈ ਦੀ ਸ਼ਾਮ ਨੂੰ, ਅਮਰੀਕੀ ਉਪ-ਰਾਸ਼ਟਰਪਤੀ ਜੇਡੀ ਵੈਂਸ ਨੇ ਪ੍ਰਧਾਨ ਮੰਤਰੀ ਮੋਦੀ ਨੂੰ ਫ਼ੋਨ ਕੀਤਾ ਅਤੇ ਕਿਹਾ ਕਿ ਪਾਕਿਸਤਾਨ ਵੱਡਾ ਹਮਲਾ ਕਰਨ ਦੀ ਤਿਆਰੀ ਕਰ ਰਿਹਾ ਹੈ। ਇਸ ‘ਤੇ ਪ੍ਰਧਾਨ ਮੰਤਰੀ ਮੋਦੀ ਨੇ ਉਨ੍ਹਾਂ ਨੂੰ ਸਪੱਸ਼ਟ ਤੌਰ ‘ਤੇ ਕਿਹਾ ਕਿ ਜੇਕਰ ਹਮਲਾ ਹੁੰਦਾ ਹੈ, ਤਾਂ ਜਵਾਬ ਵੀ ਜ਼ਬਰਦਸਤ ਹੋਵੇਗਾ। ਉਸੇ ਰਾਤ ਪਾਕਿਸਤਾਨ ਵੱਲੋਂ ਹਮਲਾ ਹੋਇਆ ਸੀ, ਪਰ ਸਾਡੀ ਫੌਜ ਨੇ ਇਸਨੂੰ ਨਾਕਾਮ ਕਰ ਦਿੱਤਾ।ਸਾਡਾ ਜਵਾਬ ਬਿਲਕੁਲ ਉਸੇ ਤਰ੍ਹਾਂ ਸੀ ਜਿਵੇਂ ਪ੍ਰਧਾਨ ਮੰਤਰੀ ਮੋਦੀ ਨੇ ਕਿਹਾ ਸੀ। ਅਤੇ ਇਹ ਜਵਾਬ ਇੰਨਾ ਜ਼ੋਰਦਾਰ ਸੀ ਕਿ ਪੂਰੀ ਦੁਨੀਆ ਨੇ ਤਬਾਹੀ ਦੀਆਂ ਤਸਵੀਰਾਂ ਦੇਖੀਆਂ। ਫਿਰ 10 ਮਈ ਨੂੰ ਕੁਝ ਦੇਸ਼ਾਂ ਤੋਂ ਫੋਨ ਆਏ ਕਿ ਪਾਕਿਸਤਾਨ ਹੁਣ ਗੋਲੀਬਾਰੀ ਬੰਦ ਕਰਨਾ ਚਾਹੁੰਦਾ ਹੈ। ਭਾਰਤ ਨੇ ਕਿਹਾ ਕਿ ਜੇਕਰ ਜੰਗਬੰਦੀ ਦੀ ਸੱਚਮੁੱਚ ਲੋੜ ਹੈ, ਤਾਂ ਪਾਕਿਸਤਾਨ ਨੂੰ ਡੀਜੀਐਮਓ ਚੈਨਲ ਰਾਹੀਂ ਰਸਮੀ ਪ੍ਰਸਤਾਵ ਭੇਜਣੇ ਚਾਹੀਦੇ ਹਨ ਅਤੇ ਫਿਰ ਇਹੀ ਹੋਇਆ।
ਜੈਸ਼ੰਕਰ ਨੇ ਵਿਰੋਧੀ ਧਿਰ ਨੂੰ ਜਵਾਬ ਦਿੰਦੇ ਹੋਏ ਇਹ ਵੀ ਸਪੱਸ਼ਟ ਕੀਤਾ ਕਿ ਅਮਰੀਕਾ ਨਾਲ ਗੱਲਬਾਤ ਦੌਰਾਨ ਕਿਤੇ ਵੀ ਵਪਾਰ ‘ਤੇ ਕੋਈ ਸੌਦੇਬਾਜ਼ੀ ਨਹੀਂ ਹੋਈ। ਅੰਤ ਵਿੱਚ, ਉਨ੍ਹਾਂ ਇਹ ਵੀ ਕਿਹਾ ਕਿ 22 ਅਪ੍ਰੈਲ ਤੋਂ 17 ਜੂਨ ਤੱਕ ਪ੍ਰਧਾਨ ਮੰਤਰੀ ਮੋਦੀ ਅਤੇ ਅਮਰੀਕੀ ਰਾਸ਼ਟਰਪਤੀ ਟਰੰਪ ਵਿਚਕਾਰ ਕੋਈ ਗੱਲਬਾਤ ਨਹੀਂ ਹੋਈ।
ਵਿਦੇਸ਼ ਮੰਤਰੀ ਨੇ ਕਿਹਾ, ਅਸੀਂ ਸਪੱਸ਼ਟ ਕਰ ਦਿੱਤਾ ਹੈ ਕਿ ਖੂਨ ਅਤੇ ਪਾਣੀ ਇਕੱਠੇ ਨਹੀਂ ਵਹਿ ਸਕਦੇ। ਇਹ ਭਾਰਤ ਦੀ ਨੀਤੀ ਅਤੇ ਪ੍ਰਭੂਸੱਤਾ ਦਾ ਮੂਲ ਸੰਦੇਸ਼ ਹੈ। ਉਨ੍ਹਾਂ ਦੱਸਿਆ ਕਿ ਆਪ੍ਰੇਸ਼ਨ ਸਿੰਦੂਰ ਤੋਂ ਬਾਅਦ, ਭਾਰਤ ਨੇ ਨਾ ਸਿਰਫ਼ ਫੌਜੀ ਪੱਧਰ ‘ਤੇ ਸਗੋਂ ਕੂਟਨੀਤਕ ਪੱਧਰ ‘ਤੇ ਵੀ ਫੈਸਲਾਕੁੰਨ ਕਦਮ ਚੁੱਕੇ। ਵੱਖ-ਵੱਖ ਦੇਸ਼ਾਂ ਵਿੱਚ ਸੰਸਦੀ ਵਫ਼ਦ ਭੇਜੇ ਗਏ ਤਾਂ ਜੋ ਭਾਰਤ ਦਾ ਸੁਨੇਹਾ ਪੂਰੀ ਦੁਨੀਆ ਤੱਕ ਸਪੱਸ਼ਟ ਤੌਰ ‘ਤੇ ਪਹੁੰਚ ਸਕੇ। ਜੈਸ਼ੰਕਰ ਨੇ ਕਿਹਾ ਕਿ ਇਨ੍ਹਾਂ ਸੰਸਦੀ ਵਫ਼ਦਾਂ ਨੂੰ ਵਿਦੇਸ਼ਾਂ ਵਿੱਚ ਬਹੁਤ ਸਤਿਕਾਰ ਨਾਲ ਸਵੀਕਾਰ ਕੀਤਾ ਗਿਆ ਅਤੇ ਹਰ ਕੋਈ ਭਾਰਤ ਦੇ ਸਟੈਂਡ ਨੂੰ ਸਮਝਦਾ ਅਤੇ ਸਮਰਥਨ ਦਿੰਦਾ ਹੈ।