ਅਪ੍ਰੈਂਟਿਸਸ਼ਿਪ ਸੁਪੋਰਟ ਆਸਟ੍ਰੇਲੀਆ ਦੀ ਇੱਕ ਨਵੀਂ ਰਾਸ਼ਟਰੀ ਖੋਜ ਮੁਤਾਬਕ, ਆਸਟ੍ਰੇਲੀਆ ਦੇ ਜ਼ਿਆਦਾਤਰ ਅਪ੍ਰੈਂਟਿਸ ਅਤੇ ਟ੍ਰੇਨੀ ਆਪਣੀ ਸਿਖਲਾਈ ਜਾਰੀ ਰੱਖਣਾ ਚਾਹੁੰਦੇ ਹਨ। ਜ਼ਿਆਦਾਤਰ ਕੰਪਨੀਆਂ ਵਾਲੇ ਵੀ ਉਨ੍ਹਾਂ ਨੂੰ ਕੰਮ ਨਾਲ ਜੋੜ ਕੇ ਰੱਖਣ ਲਈ ਵਧੀਆ ਕੰਮ ਕਰ ਰਹੇ ਹਨ। ਪਰ ਮਾਨਸਿਕ ਸਿਹਤ ਨਾਲ ਜੁੜੀਆਂ ਸਮੱਸਿਆਵਾਂ ਅਤੇ ਕੰਮ ਵਾਲੀ ਥਾਂ ‘ਤੇ ਇੱਕੋ ਜਿਹਾ ਸਹਿਯੋਗ ਨਾ ਮਿਲਣਾ, ਇਹ ਤੈਅ ਕਰ ਸਕਦਾ ਹੈ ਕਿ ਉਹ ਆਪਣੀ ਸਿਖਲਾਈ ਪੂਰੀ ਕਰਦੇ ਹਨ ਜਾਂ ਵਿਚਕਾਰ ਹੀ ਛੱਡ ਦਿੰਦੇ ਹਨ। ਅਪ੍ਰੈਂਟਿਸਸ਼ਿਪ ਅਤੇ ਟ੍ਰੇਨੀਸ਼ਿਪ ਸ਼ੁਰੂ ਕਰਨ ਵਾਲਿਆਂ ਦੀ ਗਿਣਤੀ ਲਗਾਤਾਰ ਘੱਟ ਰਹੀ ਹੈ। ਇਸ ਲਈ ਹੁਣ ਇਹ ਜਾਣਨਾ ਹੋਰ ਵੀ ਜ਼ਰੂਰੀ ਹੋ ਗਿਆ ਹੈ ਕਿ ਲੋਕ ਸਿਖਲਾਈ ਕਿਉਂ ਛੱਡਦੇ ਹਨ ਅਤੇ ਇਸ ਨੂੰ ਕਿਵੇਂ ਰੋਕਿਆ ਜਾ ਸਕਦਾ ਹੈ।
“ਨੈਸ਼ਨਲ ਫਰਸਟ ਯੀਅਰ ਐਕਸਪੀਰੀਐਂਸ ਰਿਪੋਰਟ” ਅੱਜ 4 ਜੁਲਾਈ 2026 ਨੂੰ ਸਵੇਰੇ ਸਿਡਨੀ ਵਿੱਚ ਜਾਰੀ ਕੀਤੀ ਗਈ। ਇਸ ਮੌਕੇ ‘ਤੇ ਆਸਟ੍ਰੇਲੀਆ ਦੇ ਹੁਨਰ ਅਤੇ ਸਿਖਲਾਈ ਮੰਤਰੀ ਐਂਡਰੂ ਜਾਈਲਜ਼ ਵੀ ਮੌਜੂਦ ਸਨ। ਇਸ ਰਿਪੋਰਟ ਵਿੱਚ ਆਸਟ੍ਰੇਲੀਆ ਭਰ ਦੇ 12,000 ਤੋਂ ਵੱਧ ਮੌਜੂਦਾ ਅਤੇ ਸਾਬਕਾ ਅਪ੍ਰੈਂਟਿਸਾਂ ਅਤੇ ਟ੍ਰੇਨੀਆਂ ਦੇ ਤਜਰਬਿਆਂ ਨੂੰ ਸ਼ਾਮਲ ਕੀਤਾ ਗਿਆ ਹੈ।
ਅਪ੍ਰੈਂਟਿਸਸ਼ਿਪ ਸੁਪੋਰਟ ਆਸਟ੍ਰੇਲੀਆ ਦੀ ਨਵੀਂ ਰਾਸ਼ਟਰੀ ਖੋਜ ਦੀਆਂ ਮੁੱਖ ਗੱਲਾਂ:
- ਹਰ ਚਾਰ ਵਿੱਚੋਂ ਤਿੰਨ ਅਪ੍ਰੈਂਟਿਸ ਆਪਣੀ ਸਿਖਲਾਈ ਜਾਰੀ ਰੱਖਣਾ ਚਾਹੁੰਦੇ ਹਨ। ਲਗਭਗ 76 ਫੀਸਦੀ ਨੇ ਕਦੇ ਵੀ ਸਿਖਲਾਈ ਛੱਡਣ ਬਾਰੇ ਨਹੀਂ ਸੋਚਿਆ। ਇਸ ਤੋਂ ਪਤਾ ਲੱਗਦਾ ਹੈ ਕਿ ਜ਼ਿਆਦਾਤਰ ਲੋਕ ਆਪਣਾ ਕੋਰਸ ਪੂਰਾ ਕਰਨ ਲਈ ਪ੍ਰੇਰਿਤ ਹਨ।
- ਮਾਨਸਿਕ ਸਿਹਤ ਦੀਆਂ ਸਮੱਸਿਆਵਾਂ ਵੱਡਾ ਕਾਰਨ ਹਨ। ਜੋ ਅਪ੍ਰੈਂਟਿਸ ਉਦਾਸੀ, ਚਿੰਤਾ ਜਾਂ ਤਣਾਅ ਮਹਿਸੂਸ ਕਰਦੇ ਹਨ, ਉਨ੍ਹਾਂ ਦੇ ਸਿਖਲਾਈ ਛੱਡਣ ਬਾਰੇ ਸੋਚਣ ਦੀ ਸੰਭਾਵਨਾ 65 ਫੀਸਦੀ ਵੱਧ ਹੁੰਦੀ ਹੈ।
- ਵੱਧਦੀ ਮਹਿੰਗਾਈ ਦਾ ਅਸਰ ਵੀ ਸਾਫ਼ ਦਿਖਿਆ। 55 ਫੀਸਦੀ ਅਪ੍ਰੈਂਟਿਸਾਂ ਨੇ ਕਿਹਾ ਕਿ ਜੀਵਨ-ਯਾਪਨ ਦਾ ਵਧਦਾ ਖਰਚਾ ਉਨ੍ਹਾਂ ਨੂੰ ਕਾਫ਼ੀ ਪ੍ਰਭਾਵਿਤ ਕਰ ਰਿਹਾ ਹੈ। ਇਹ ਅੰਕੜਾ ਅਪਾਹਜ ਅਪ੍ਰੈਂਟਿਸਾਂ ਵਿੱਚ 58 ਫੀਸਦੀ ਅਤੇ ਫਰਸਟ ਨੇਸ਼ਨਜ਼ ਅਪ੍ਰੈਂਟਿਸਾਂ ਵਿੱਚ 60 ਫੀਸਦੀ ਹੈ।
- ਸਕੂਲਾਂ ਵਿੱਚ ਕਰੀਅਰ ਸਲਾਹ ਹਰ ਜਗ੍ਹਾ ਇੱਕੋ ਜਿਹੀ ਨਹੀਂ ਮਿਲਦੀ। ਸਿਰਫ਼ 49 ਫੀਸਦੀ ਲੋਕਾਂ ਨੇ ਕਿਹਾ ਕਿ ਉਨ੍ਹਾਂ ਨੂੰ ਸਕੂਲ ਵਿੱਚ ਕਰੀਅਰ ਦੇ ਸਾਰੇ ਵਿਕਲਪਾਂ ਬਾਰੇ ਚੰਗੀ ਜਾਣਕਾਰੀ ਮਿਲੀ ਸੀ। ਜਿਨ੍ਹਾਂ ਨੂੰ ਸਹੀ ਅਤੇ ਸੰਤੁਲਿਤ ਸਲਾਹ ਮਿਲੀ, ਉਨ੍ਹਾਂ ਦੀ ਮਾਨਸਿਕ ਸਿਹਤ ਵੀ ਬਿਹਤਰ ਰਹੀ।
- ਕੰਪਨੀ ਦਾ ਆਕਾਰ ਵੀ ਅਸਰ ਪਾਉਂਦਾ ਹੈ। ਛੋਟੀਆਂ ਕੰਪਨੀਆਂ ਵਿੱਚ ਅਪ੍ਰੈਂਟਿਸਾਂ ਨੂੰ ਨਿੱਜੀ ਧਿਆਨ ਅਤੇ ਨਿਗਰਾਨੀ ਵੱਧ ਮਿਲਦੀ ਹੈ, ਪਰ ਜੇ ਨਿਯੋਗਕਰਤਾ ਕੋਲ ਸਮਾਂ ਜਾਂ ਮਾਰਗਦਰਸ਼ਨ ਦੇਣ ਦੀ ਸਮਰੱਥਾ ਘੱਟ ਹੋਵੇ ਤਾਂ ਸਿਖਲਾਈ ਛੱਡਣ ਦਾ ਖਤਰਾ ਵੱਧ ਜਾਂਦਾ ਹੈ।
- ਸਹਿਯੋਗੀ ਕੰਮ ਵਾਲੀ ਥਾਂ ਸਭ ਤੋਂ ਵੱਡੀ ਤਾਕਤ ਹੈ। ਜਿਨ੍ਹਾਂ ਅਪ੍ਰੈਂਟਿਸਾਂ ਨੂੰ ਲੱਗਿਆ ਕਿ ਕੰਮ ਵਾਲੀ ਥਾਂ ‘ਤੇ ਉਨ੍ਹਾਂ ਦੀ ਪਰਵਾਹ ਕੀਤੀ ਜਾਂਦੀ ਹੈ ਅਤੇ ਉਨ੍ਹਾਂ ਨੂੰ ਸਹਿਯੋਗ ਮਿਲਦਾ ਹੈ, ਉਨ੍ਹਾਂ ਦੇ ਸਿਖਲਾਈ ਛੱਡਣ ਬਾਰੇ ਸੋਚਣ ਦੀ ਸੰਭਾਵਨਾ 28 ਫੀਸਦੀ ਘੱਟ ਸੀ।
ਅਪ੍ਰੈਂਟਿਸਸ਼ਿਪ ਸੁਪੋਰਟ ਆਸਟ੍ਰੇਲੀਆ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਲੀ ਜੇਵੀਅਰ ਨੇ ਇਸ ਵਾਰੇ ਆਖਿਆ ਹੈ ਕਿ, “ਅਪ੍ਰੈਂਟਿਸਾਂ ਅਤੇ ਟ੍ਰੇਨੀਆਂ ਦਾ ਸੰਦੇਸ਼ ਸਾਫ਼ ਹੈ। ਜ਼ਿਆਦਾਤਰ ਲੋਕ ਸਫ਼ਲ ਹੋਣਾ ਚਾਹੁੰਦੇ ਹਨ, ਪਰ ਸ਼ੁਰੂਆਤੀ ਤਜਰਬਾ ਬਹੁਤ ਮਹੱਤਵਪੂਰਨ ਹੁੰਦਾ ਹੈ। ਇਹ ਰਿਪੋਰਟ ਦੱਸਦੀ ਹੈ ਕਿ ਕਿੱਥੇ ਸਹਿਯੋਗ ਵਧੀਆ ਮਿਲ ਰਿਹਾ ਹੈ, ਕਿੱਥੇ ਘਾਟ ਹੈ ਅਤੇ ਕੀ ਸੁਧਾਰ ਕਰਨ ਦੀ ਲੋੜ ਹੈ। ਇਹ ਸੋਚ ਗਲਤ ਹੈ ਕਿ ਅਪ੍ਰੈਂਟਿਸ ਸਿਰਫ਼ ਦਿਲਚਸਪੀ ਦੀ ਘਾਟ ਕਾਰਨ ਸਿਖਲਾਈ ਛੱਡ ਦਿੰਦੇ ਹਨ। ਜ਼ਿਆਦਾਤਰ ਲੋਕ ਸਿੱਖਣਾ ਅਤੇ ਆਪਣਾ ਕਰੀਅਰ ਬਣਾਉਣਾ ਚਾਹੁੰਦੇ ਹਨ। ਸਭ ਤੋਂ ਵੱਡੀ ਲੋੜ ਇਹ ਹੈ ਕਿ ਪਹਿਲੇ ਸਾਲ ਦੌਰਾਨ ਉਨ੍ਹਾਂ ਨੂੰ ਸਹੀ ਮਦਦ ਅਤੇ ਮਾਰਗਦਰਸ਼ਨ ਮਿਲੇ, ਤਾਂ ਜੋ ਉਹ ਆਪਣੀ ਸਿਖਲਾਈ ਸਫ਼ਲਤਾਪੂਰਵਕ ਪੂਰੀ ਕਰ ਸਕਣ। ਖੋਜ ਤੋਂ ਸਪੱਸ਼ਟ ਹੁੰਦਾ ਹੈ ਕਿ ਪਹਿਲੇ ਸਾਲ ਵਿੱਚ ਮਾਰਗਦਰਸ਼ਨ ਮਜ਼ਬੂਤ ਕਰਨਾ, ਕੰਮ ਅਤੇ ਪੜ੍ਹਾਈ ਵਿੱਚ ਚੰਗਾ ਤਾਲਮੇਲ ਬਣਾਉਣਾ, ਸਮੇਂ ਸਿਰ ਮਾਨਸਿਕ ਸਿਹਤ ਨਾਲ ਸਬੰਧਤ ਮਦਦ ਦੇਣਾ ਅਤੇ ਸਕੂਲ ਵਿੱਚ ਹੀ ਕਰੀਅਰ ਬਾਰੇ ਸਹੀ ਜਾਣਕਾਰੀ ਦੇਣਾ, ਇਹ ਸਾਰੇ ਕਦਮ ਅਪ੍ਰੈਂਟਿਸਾਂ ਨੂੰ ਸਿਖਲਾਈ ਵਿੱਚ ਬਣਾਈ ਰੱਖਣ ਲਈ ਬਹੁਤ ਮਹੱਤਵਪੂਰਨ ਹਨ। ਰੋਜ਼ਗਾਰਦਾਤਾ ਦੀ ਭੂਮਿਕਾ ਬਹੁਤ ਅਹਿਮ ਹੈ। ਜ਼ਿਆਦਾਤਰ ਰੋਜ਼ਗਾਰਦਾਤਾ ਚੰਗਾ ਕੰਮ ਕਰ ਰਹੇ ਹਨ, ਪਰ ਹੋਰ ਸੁਧਾਰ ਦੀ ਗੁੰਜਾਇਸ਼ ਹੈ। ਨਿਯਮਿਤ ਤੌਰ ‘ਤੇ ਗੱਲਬਾਤ ਕਰਨਾ, ਸਪੱਸ਼ਟ ਉਮੀਦਾਂ ਦੱਸਣਾ, ਢੰਗ ਨਾਲ ਮਾਰਗਦਰਸ਼ਨ ਦੇਣਾ ਅਤੇ ਅਜਿਹਾ ਮਾਹੌਲ ਬਣਾਉਣਾ ਜਿੱਥੇ ਅਪ੍ਰੈਂਟਿਸ ਬਿਨਾਂ ਡਰ ਆਪਣੀਆਂ ਸਮੱਸਿਆਵਾਂ ਸਾਂਝੀਆਂ ਕਰ ਸਕਣ, ਇਹ ਛੋਟੇ-ਛੋਟੇ ਕਦਮ ਵੀ ਵੱਡਾ ਫ਼ਰਕ ਪਾ ਸਕਦੇ ਹਨ।”