ਪਾਈਟੋਂਗਤਾਰਨ ਸਿ਼ਨਾਵਾਤਰਾ ਬਣੇ ਥਾਈਲੈਂਡ ਦੇ ਪ੍ਰਧਾਨ ਮੰਤਰੀ

ਬੈਂਗਕੌਕ – ਥਾਈਲੈਂਡ ਵਿੱਚ ਸੰਸਦ ਨੇ ਪ੍ਰਧਾਨ ਮੰਤਰੀ ਦੇ ਅਹੁਦੇ ਲਈ ਪਾਈਟੋਂਗਤਾਰਨ ਸਿ਼ਨਾਵਾਤਰਾ ਨੂੰ ਚੁਣਿਆ ਹੈ। ਉਹ ਸਾਬਕਾ ਪ੍ਰਧਾਨ ਮੰਤਰੀ ਥਾਕਸਿਨ ਸਿ਼ਨਾਵਾਤਰਾ ਦੀ ਬੇਟੀ ਹੈ। 37 ਸਾਲਾ ਪਾਈਟੋਂਗਤਾਰਨ ਦੇਸ਼ ਦੇ 31ਵੇਂ ਪ੍ਰਧਾਨ ਮੰਤਰੀ ਬਣ ਗਏ ਹਨ। ਉਹ ਥਾਈਲੈਂਡ ਦੇ ਇਤਿਹਾਸ ਵਿੱਚ ਸਭ ਤੋਂ ਘੱਟ ਉਮਰ ਦੀ ਪ੍ਰਧਾਨ ਮੰਤਰੀ ਹੋਣ ਦੇ ਨਾਲ-ਨਾਲ ਇਹ ਅਹੁਦਾ ਸੰਭਾਲਣ ਵਾਲੀ ਦੇਸ਼ ਦੀ ਦੂਜੀ ਮਹਿਲਾ ਵੀ ਹਨ।ਯਿੰਗਲਕ ਥਾਈਲੈਂਡ ਦੀ ਪ੍ਰਧਾਨ ਮੰਤਰੀ ਬਣਨ ਵਾਲੀ ਦੇਸ਼ ਦੀ ਪਹਿਲੀ ਔਰਤ ਸੀ। ਉਹ ਪਾਈਟੋਂਗਤਾਰਨ ਦੀ ਮਾਸੀ ਹੈ। ਪਾਈਟੋਂਗਤਾਰਨ ਪ੍ਰਧਾਨ ਮੰਤਰੀ ਬਣਨ ਵਾਲੇ ਸਿ਼ਨਾਵਾਤਰਾ ਪਰਿਵਾਰ ਦੇ ਤੀਜੇ ਨੇਤਾ ਹਨ। ਥਾਕਸੀਨ ਦੇ ਜੀਜਾ ਸੋਮਚਾਈ ਵੋਂਗਸਾਵਤ ਨੇ ਵੀ 2008 ਵਿੱਚ ਥਾਈਲੈਂਡ ਦੇ ਪ੍ਰਧਾਨ ਮੰਤਰੀ ਵਜੋਂ ਸੇਵਾ ਨਿਭਾਈ।2001 ਵਿੱਚ ਥਾਕਸੀਨ ਥਾਈਲੈਂਡ ਦੇ ਪ੍ਰਧਾਨ ਮੰਤਰੀ ਬਣੇ ਸਨ। ਥਾਕਸਿਨ ਸਿ਼ਨਾਵਾਤਰਾ ਨੂੰ ਤਖਤਾਪਲਟ ਰਾਹੀਂ ਸੱਤਾ ਤੋਂ ਲਾਂਭੇ ਕਰ ਦਿੱਤਾ ਗਿਆ ਸੀ। ਪਾਈਟੋਂਗਤਾਰਨ ਸੱਤਾਧਾਰੀ ਪਾਰਟੀ ‘ਫੂ ਥਾਈ’ ਦੀ ਆਗੂ ਹਨ। ਹਾਲਾਂਕਿ, ਪਾਈਟੋਂਗਤਾਰਨ ਅਜੇ ਸੰਸਦ ਮੈਂਬਰ ਨਹੀਂ ਹਨ।