ਨਵੀਂ ਦਿੱਲੀ – ਕੇਂਦਰ ਸਰਕਾਰ ਨੇ ਕਿਹਾ ਹੈ ਕਿ ਦੁਨੀਆ ਦੇ ਸਭ ਤੋਂ ਵੱਡੇ ਮੁਲਕਾਂ ਦੇ ਮੁਕਾਬਲੇ ਭਾਰਤ ‘ਚ ਪੈਟਰੋਲ-ਡੀਜ਼ਲ ਦੀਆਂ ਕੀਮਤਾਂ ਕਾਫ਼ੀ ਘੱਟ ਵਧੀਆਂ ਹਨ। ਪੈਟਰੋਲੀਅਮ ਤੇ ਕੁਦਰਤੀ ਗੈਸ ਮੰਤਰੀ ਹਰਦੀਪ ਸਿੰਘ ਪੁਰੀ ਨੇ ਕਿਹਾ ਹੈ ਕਿ ਵਿਕਸਿਤ ਦੇਸ਼ਾਂ ‘ਚ ਪਿਛਲੇ ਇਕ ਸਾਲ ‘ਚ 50 ਫ਼ੀਸਦੀ ਪੈਟਰੋਲੀਅਮ ਉਤਪਾਦ ਮਹਿੰਗੇ ਹੋਏ ਹਨ ਜਦਕਿ ਜੇਕਰ ਭਾਰਤ ‘ਚ ਕੀਮਤਾਂ ਨੂੰ ਦੇਖਿਆ ਜਾਵੇ ਤਾਂ ਇਹ ਵਾਧਾ ਸਿਰਫ਼ ਪੰਜ ਫ਼ੀਸਦੀ ਦਾ ਹੈ। ਇਹ ਗੱਲ ਪੁਰੀ ਨੇ ਲੋਕ ਸਭਾ ‘ਚ ਯੂਕਰੇਨ ਦੀ ਸਥਿਤੀ ‘ਤੇ ਜਾਰੀ ਬਹਿਸ ‘ਚ ਹਿੱਸਾ ਲੈਂਦਿਆਂ ਕਹੀ। ਉਨ੍ਹਾਂ ਵਿਰੋਧੀ ਦਲਾਂ ਦੇ ਇਸ ਦੋਸ਼ ਦਾ ਕਰਾਰਾ ਜਵਾਬ ਦਿੱਤਾ ਕਿ ਆਪਰੇਸ਼ਨ ਗੰਗਾ ਪੂਰੀ ਤਰ੍ਹਾਂ ਨਾਲ ਸਫਲ ਰਿਹਾ। ਉਨ੍ਹਾਂ ਆਪਰੇਸ਼ਨ ਗੰਗਾ ਨੂੰ ਦੁਨੀਆ ‘ਚ ਕਿਸੇ ਵੀ ਦੇਸ਼ ਵੱਲੋਂ ਆਪਣੇ ਨਾਗਰਿਕਾਂ ਨੂੰ ਸੁਰੱਖਿਅਤ ਬਾਹਰ ਕੱਢਣ ਲਈ ਸ਼ੁਰੂ ਕੀਤੀ ਗਈ ਸਭ ਤੋਂ ਸਫਲ ਯੋਜਨਾ ਦੱਸਿਆ।
ਰੂਸ-ਯੂਕਰੇਨ ਜੰਗ ਤੇ ਇਸ ਕਾਰਨ ਪੈਟਰੋ ਉਤਪਾਦਾਂ ਦੀਆਂ ਕੀਮਤਾਂ ‘ਚ ਹੋ ਰਹੇ ਵਾਧੇ ‘ਤੇ ਪੁਰੀ ਨੇ ਕਿਹਾ ਕਿ ਭਾਰਤ ਹੀ ਇੱਕੋ ਇਕ ਦੇਸ਼ ਨਹੀਂ ਹੈ ਜਿੱਥੇ ਇਸ ਦਾ ਅਸਰ ਦਿਸ ਰਿਹਾ ਹੈ। ਅਪ੍ਰਰੈਲ, 2021 ਤੋਂ ਲੈ ਕੇ ਹੁਣ ਤਕ ਅਮਰੀਕਾ ‘ਚ 51 ਫ਼ੀਸਦੀ, ਬਿ੍ਟੇਨ ‘ਚ 55 ਫ਼ੀਸਦੀ, ਕੈਨੇਡਾ ‘ਚ 52 ਫ਼ੀਸਦੀ, ਜਰਮਨੀ ‘ਚ 55 ਫ਼ੀਸਦੀ, ਫਰਾਂਸ ‘ਚ 50 ਫ਼ੀਸਦੀ, ਸਪੇਨ ‘ਚ 58 ਫ਼ੀਸਦੀ ਤਕ ਪੈਟਰੋਲੀਅਮ ਉਤਪਾਦ ਮਹਿੰਗੇ ਹੋਏ ਹਨ। ਖ਼ਾਸ ਗੱਲ ਇਹ ਹੈ ਕਿ ਭਾਰਤ ‘ਚ ਇਨ੍ਹਾਂ ਉਤਪਾਦਾਂ ਦੀਆਂ ਪ੍ਰਚੂਨ ਕੀਮਤਾਂ ‘ਚ ਪੰਜ ਫ਼ੀਸਦੀ ਦਾ ਹੀ ਇਜ਼ਾਫ਼ਾ ਹੋਇਆ ਹੈ। ਇਸੇ ਤਰ੍ਹਾਂ ਨਾਲ ਜੰਗ ਦੀ ਵਜ੍ਹਾ ਨਾਲ ਕੌਮਾਂਤਰੀ ਬਾਜ਼ਾਰ ‘ਚ ਗੈਸ ਦੀਆਂ ਕੀਮਤਾਂ ‘ਚ ਵੀ ਕਾਫ਼ੀ ਵਾਧਾ ਹੋਇਆ ਹੈ ਜਿਸ ਦਾ ਅਸਰ ਦੂਜੇ ਦੇਸ਼ਾਂ ‘ਤੇ ਵੀ ਹੋ ਰਿਹਾ ਹੈ। ਇਸ ਤੋਂ ਪਹਿਲਾਂ ਵੀ 24 ਮਾਰਚ, 2022 ਨੂੰ ਪੈਟਰੋਲੀਅਮ ਮੰਤਰੀ ਨੇ ਦੇਸ਼ ‘ਚ ਪੈਟਰੋ ਮੁੱਲ ਵਾਧੇ ਦੇ ਫ਼ੈਸਲੇ ਨੂੰ ਜ਼ਰੂਰੀ ਦੱਸਿਆ ਸੀ ਤੇ ਇਹੀ ਤਰਕ ਦਿੱਤਾ ਸੀ ਕਿ ਸਰਕਾਰ ਜਨਤਾ ‘ਤੇ ਘੱਟ ਤੋਂ ਘੱਟ ਬੋਝ ਪਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ।