ਸੇਖੜੀ ਤੇ ਬਾਜਵਾ ਨੂੰ ਝਟਕਾ, ਬਟਾਲਾ ‘ਚ ਨਵੇਂ ਹਿੰਦੂ ਚਿਹਰੇ ‘ਤੇ ਕਾਂਗਰਸ ਖੇਡ ਸਕਦੀ ਹੈ ਸੱਟਾ

ਚੰਡੀਗੜ੍ਹ – ਬਟਾਲਾ ਹਾਟ ਸੀਟ ਮਾਝੇ ਦੀ ਸਿਆਸਤ ‘ਚ ਬਣੀ ਹੋਈ ਹੈ, ਕਿਉਂਕਿ ਇਸ ਸੀਟ ‘ਤੇ ਕੈਬਨਿਟ ਮੰਤਰੀ ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ ਆਪਣੀ ਦਾਅਵੇਦਾਰੀ ਜਤਾ ਰਹੇ ਹਨ, ਉਥੇ ਹੀ ਪਾਰਟੀ ਦੇ ਸੂਬਾ ਪ੍ਰਧਾਨ ਨਵਜੋਤ ਸਿੰਘ ਸਿੱਧੂ ਨੇ ਅਸ਼ਵਨੀ ਸੇਖੜੀ ਨੂੰ ਥਾਪੜਾ ਦੇ ਕੇ ਕੇ ਉਨ੍ਹਾਂ ਦੇ ਸਮਰਥਨ ‘ਚ ਰੈਲੀ ਵੀ ਕੀਤੀ ਸੀ। ਮਾਝੇ ਦੀ ਬਟਾਲਾ ਸੀਟ ‘ਤੇ ਕਾਂਗਰਸ ‘ਚ ਸਭ ਤੋਂ ਵੱਧ ਹੰਗਾਮਾ ਦੇਖਣ ਨੂੰ ਮਿਲ ਰਿਹਾ ਹੈ। ਬਾਜਵਾ ਅਤੇ ਸੇਖੜੀ ਦੀ ਲੜਾਈ ‘ਚ ਹੁਣ ਪਾਰਟੀ ਨੇ ਇਸ ਸੀਟ ‘ਤੇ ਨਵੇਂ ਚਿਹਰੇ ਨੂੰ ਮੈਦਾਨ ‘ਚ ਉਤਾਰਨ ਦਾ ਫੈਸਲਾ ਕੀਤਾ ਹੈ। ਕਾਂਗਰਸ ਇਸ ਸੀਟ ‘ਤੇ ਨਵੇਂ ਹਿੰਦੂ ਚਿਹਰੇ ‘ਤੇ ਹੀ ਸੱਟਾ ਖੇਡੇਗੀ। ਕਾਂਗਰਸ ਨੇ ਭਾਵੇਂ ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ ਨੂੰ ਫਤਿਹਗੜ੍ਹ ਚੂੜੀਆਂ ਤੋਂ ਮੁੜ ਉਮੀਦਵਾਰ ਬਣਾਇਆ ਹੋਵੇ ਪਰ ਬਾਜਵਾ ਵੀ ਬਟਾਲਾ ਵਿਚ ਤਾਕਤ ਦਿਖਾ ਰਹੇ ਹਨ। ਬਾਜਵਾ ਪਾਰਟੀ ਤੋਂ ਦੋ ਟਿਕਟਾਂ ਦੀ ਮੰਗ ਕਰ ਰਹੇ ਹਨ। ਇੱਕ ਆਪਣੇ ਲਈ ਅਤੇ ਇੱਕ ਆਪਣੇ ਪੁੱਤਰ ਲਈ ਜਦਕਿ ਪਾਰਟੀ ਨੇ ਪ੍ਰਤੀ ਪਰਿਵਾਰ ਸਿਰਫ਼ ਇੱਕ ਟਿਕਟ ਦੇਣ ਦਾ ਫੈਸਲਾ ਕੀਤਾ ਹੈ। ਬਾਜਵਾ ਅਤੇ ਅਸ਼ਵਨੀ ਸੇਖੜੀ ਦੀ ਲੜਾਈ ਕਾਰਨ ਕਾਂਗਰਸ ਦੋਵਾਂ ਵਿੱਚੋਂ ਕਿਸੇ ਨੂੰ ਵੀ ਟਿਕਟ ਦੇਣ ਦੇ ਹੱਕ ਵਿੱਚ ਨਹੀਂ ਹੈ।ਪਾਰਟੀ ਇਹ ਮਹਿਸੂਸ ਕਰ ਰਹੀ ਹੈ ਕਿ ਜੇਕਰ ਇਨ੍ਹਾਂ ਦੋਵਾਂ ਵਿੱਚੋਂ ਇੱਕ ਟਿਕਟ ਦਿੱਤੀ ਜਾਂਦੀ ਹੈ ਤਾਂ ਦੂਸਰੀ ਵਿਰੋਧ ਵਿੱਚ ਉਲਝ ਜਾਵੇਗੀ, ਜਿਸ ਕਾਰਨ ਇਹ ਸੀਟ ਪਾਰਟੀ ਦੇ ਹੱਥੋਂ ਖੁੱਸ ਸਕਦੀ ਹੈ। ਹਾਲਾਂਕਿ 2017 ਵਿੱਚ ਅਸ਼ਵਨੀ ਸੇਖੜੀ ਇਸ ਸੀਟ ਤੋਂ ਅਕਾਲੀ ਦਲ ਦੇ ਲਖਬੀਰ ਸਿੰਘ ਲੋਧੀਨੰਗਲ ਤੋਂ ਚੋਣ ਹਾਰ ਗਏ ਸਨ। ਇਸ ਸੀਟ ਨੂੰ ਲੈ ਕੇ ਕਾਂਗਰਸ ਵਿਚ ਕਾਫੀ ਸਮੇਂ ਤੋਂ ਬਹਿਸ ਚੱਲ ਰਹੀ ਸੀ ਕਿ ਇਹ ਸੀਟ ਹਿੰਦੂਆਂ ਨੂੰ ਦਿੱਤੀ ਜਾਵੇ ਜਾਂ ਕਿਸੇ ਸਿੱਖ ਨੂੰ, ਕਿਉਂਕਿ ਅਸ਼ਵਨੀ ਸੇਖੜੀ ਇਸ ਨੂੰ ਹਿੰਦੂ ਸੀਟ ਦੱਸ ਕੇ ਦਾਅਵਾ ਕਰ ਰਹੇ ਸਨ। ਜਦਕਿ ਬਾਜਵਾ ਕਾਫੀ ਸਮੇਂ ਤੋਂ ਆਪਣੇ ਬੇਟੇ ਲਈ ਪਾਰਟੀ ‘ਚ ਲਾਬਿੰਗ ਕਰਦੇ ਰਹੇ। ਇੱਕ ਸਮੇਂ ਅਸ਼ਵਨੀ ਸੇਖੜੀ ਅਕਾਲੀ ਦਲ ਵਿੱਚ ਸ਼ਾਮਲ ਹੋਣ ਵਾਲੇ ਸਨ ਪਰ ਉਸ ਵੇਲੇ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਉਨ੍ਹਾਂ ਨੂੰ ਕਾਂਗਰਸ ਵਿੱਚ ਹੀ ਰੋਕ ਲਿਆ ਸੀ। ਉਸ ਸਮੇਂ ਕੈਪਟਨ ਨੇ ਉਨ੍ਹਾਂ ਨੂੰ ਬਟਾਲਾ ਤੋਂ ਹੀ ਟਿਕਟ ਦੇਣ ਦਾ ਵਾਅਦਾ ਕੀਤਾ ਸੀ। ਉਂਜ, ਨਵੇਂ ਸਮੀਕਰਨ ਵਿੱਚ ਨਵਜੋਤ ਸਿੰਘ ਸਿੱਧੂ ਵੀ ਸੇਖੜੀ ਦੇ ਹੱਕ ਵਿੱਚ ਖੜ੍ਹੇ ਹੋ ਗਏ। ਉਨ੍ਹਾਂ ਆਪਣੇ ਪੱਧਰ ’ਤੇ ਸੇਖੜੀ ਨੂੰ ਉਮੀਦਵਾਰ ਵੀ ਦੱਸਿਆ ਸੀ ਪਰ ਪਾਰਟੀ ਨੇ ਹੁਣ ਦੋਵਾਂ ਦੀ ਲੜਾਈ ਨੂੰ ਦੇਖਦਿਆਂ ਉਨ੍ਹਾਂ ਵਿੱਚੋਂ ਕਿਸੇ ਨੂੰ ਵੀ ਟਿਕਟ ਨਾ ਦੇਣ ਦਾ ਫੈਸਲਾ ਕੀਤਾ ਹੈ। ਜੇਕਰ ਪਾਰਟੀ ਸੇਖੜੀ ਨੂੰ ਟਿਕਟ ਨਹੀਂ ਦਿੰਦੀ ਤਾਂ ਇਸ ਦਾ ਨੁਕਸਾਨ ਨਵਜੋਤ ਸਿੰਘ ਸਿੱਧੂ ਨੂੰ ਹੋਵੇਗਾ।