ਸੰਯੁਕਤ ਰਾਸ਼ਟਰ ਮੁਖੀ ਨੇ ਸਮੁੰਦਰਾਂ ਦੇ ਵਧਦੇ ਜਲਪੱਧਰ ਨੂੰ ‘ਵਿਸ਼ਵ ਪੱਧਰੀ’ ਆਫਤ ਦੱਸਿਆ

ਨੁਕੂ ਅਲੋਫਾ (ਟੋਂਗਾ) – ਸੰਯੁਕਤ ਰਾਸ਼ਟਰ ਦੇ ਜਨਰਲ ਸਕੱਤਰ ਐਂਟੋਨੀਓ ਗੁਤਾਰੇਸ ਨੇ ਦੁਨੀਆ ਨੂੰ ਇੱਕ ਹੋਰ ਜਲਵਾਯੂ ਚਿਤਾਵਨੀ (ਐੱਸ.ਓ.ਐੱਸ.) ਜਾਰੀ ਕੀਤੀ ਹੈ ਜਿਸ ’ਚ ਉਨ੍ਹਾਂ ਨੇ ਸਮੁੰਦਰਾਂ ’ਚ ਤੇਜ਼ੀ ਨਾਲ ਵੱਧ ਰਹੇ ਪਾਣੀ ਦੇ ਪੱਧਰ, ਖਾਸ ਕਰ ਕੇ ਪ੍ਰਸ਼ਾਂਤ ਖੇਤਰ ਦੇ ਵੱਧ ਖ਼ਤਰੇ ਵਾਲੇ ਟਾਪੂ ਦੇਸ਼ਾਂ ਦਾ ਵਰਨਣ ਕੀਤਾ ਹੈ। ਉਨ੍ਹਾਂ ਨੇ ਕਿਹਾ ਕਿ ਸਾਡੇ ਸਮੁੰਦਰਾਂ ਨੂੰ ਬਚਾਓ। ਸੰਯੁਕਤ ਰਾਸ਼ਟਰ ਅਤੇ ਵਿਸ਼ਵ ਮੌਸਮ ਵਿਗਿਆਨ ਸੰਗਠਨ ਨੇ ਸੋਮਵਾਰ ਨੂੰ ਸਮੁੰਦਰ ਦੇ ਵਧਦੇ ਪਾਣੀ ਦੇ ਸਤਰ ‘ਤੇ ਰਿਪੋਰਟ ਜਾਰੀ ਕੀਤੀ। ਧਰਤੀ ਦੇ ਤਾਪਮਾਨ ’ਚ ਵਾਧਾ ਅਤੇ ਗਲੇਸ਼ੀਅਰਾਂ ਦੇ ਪਿਘਲਣ ਕਾਰਨ ਸਮੁੰਦਰ ਦਾ ਪਾਣੀ ਤੇਜ਼ੀ ਨਾਲ ਵੱਧ ਰਿਹਾ ਹੈ।ਉਨ੍ਹਾਂ ਨੇ ਦੱਖਣ-ਪੱਛਮੀ ਪ੍ਰਸ਼ਾਂਤ ਖੇਤਰ ’ਚ ਵਧਦੇ ਮਹਾਸਾਗਰਾਂ, ਸਮੁੰਦਰੀ ਅਮਲੀਕਰਨ ਅਤੇ ਸਮੁੰਦਰ ਦੀਆਂ ਗਰਮ ਲਹਿਰਾਂ ਅਤੇ ਹੋਰ ਪੌਣ-ਪਾਣੀ ਤਬਦੀਲੀ ਦੇ ਪ੍ਰਭਾਵਾਂ ‘ਤੇ ਵੀ ਰੋਸ਼ਨੀ ਪਾਈ। ਗੁਤਾਰੇਸ ਨੇ ਸਮੋਆ ਅਤੇ ਟੋਂਗਾ ਦਾ ਦੌਰਾ ਕੀਤਾ ਅਤੇ ਮੰਗਲਵਾਰ ਨੂੰ ਟੋਂਗਾ ਦੀ ਰਾਜਧਾਨੀ ਤੋਂ ਪ੍ਰਸ਼ਾਂਤ ਟਾਪੂ ਸਮੂਹ ਫੋਰਮ ਦੀ ਮੀਟਿੰਗ ’ਚ ਪੌਣ-ਪਾਣੀ ਤਬਦੀਲੀ ਨਾਲ ਸਬੰਧਤ ਅਪੀਲ ਕੀਤੀ। ਫੋਰਮ ਦੇ ਮੈਂਬਰ ਦੇਸ਼ਪੌਣ-ਪਾਣੀ ਤਬਦੀਲੀ ਤੋਂ ਸਭ ਤੋਂ ਵੱਧ ਪ੍ਰਭਾਵਿਤ ਹਨ। ਉਨ੍ਹਾਂ ਨੇ ਕਿਹਾ ਕਿ ਇਹ ਇਕ ਅਜੀਬ ਸਥਿਤੀ ਹੈ। ਉਨ੍ਹਾਂ ਨੇ ਕਿਹਾ ਕਿ ਸਮੁੰਦਰ ਦਾ ਵਧਦਾ ਪਾਣੀ ਦਾ ਪੱਧਰ ਪੂਰੀ ਤਰ੍ਹਾਂ ਮਨੁੱਖੀ-ਨਿਰਮਿਤ ਸੰਕਟ ਹੈ। ਇਹ ਸੰਕਟ ਜਲਦੀ ਹੀ ਅਚਾਨਕ ਪੱਧਰ ‘ਤੇ ਪਹੁੰਚ ਜਾਏਗਾ, ਜਦੋਂ ਸਾਡੇ ਕੋਲ ਸੁਰੱਖਿਅਤ ਵਾਪਸ ਜਾਣ ਲਈ ਕੁਝ ਨਹੀਂ ਬਚੇਗਾ। ਗੁਤੇਰੇਸ ਦੇ ਦਫ਼ਤਰ ਤੋਂ ਤਿਆਰ ਕੀਤੀ ਗਈ ਰਿਪੋਰਟ ’ਚ ਪਾਇਆ ਗਿਆ ਹੈ ਕਿ ਟੋਂਗਾ ਦੀ ਰਾਜਧਾਨੀ ਨੁਕੁ ਅਲੋਫਾ ਦੇ ਨੇੜੇ ਸਾਲ 1990 ਤੋਂ 2020 ਦੇ ਦੌਰਾਨ ਸਮੁੰਦਰ ਦਾ ਪਾਣੀ ਦਾ ਸਤਰ 21 ਸੈਂਟੀਮੀਟਰ ਵੱਧ ਗਿਆ ਹੈ, ਜੋ ਕਿ ਵਿਸ਼ਵ ਪੱਧਰੀ ਔਸਤਨ 10 ਸੈਂਟੀਮੀਟਰ ਤੋਂ ਲਗਭਗ ਦੋ ਗੁਣਾ ਹੈ। ਸਮੋਆ ਦੇ ਅਪੀਆ ’ਚ ਸਮੁੰਦਰ ਦਾ ਪਾਣੀ ਦਾ ਪੱਧਰ 31 ਸੈਂਟੀਮੀਟਰ ਵਧਿਆ ਹੈ, ਜਦਕਿ ਫਿਜੀ ਦੇ ਸੁਵਾ-ਬੀ ’ਚ 29 ਸੈਂਟੀਮੀਟਰ ਵੱਧਿਆ ਹੈ।