ਵਿਕਟੋਰੀਆ ਦੇ ਲੋਕਾਂ ਨੂੰ ਜਲਦੀ ਹੀ ਹਰ ਦਿਨ ਦੁਪਹਿਰ ਦੇ ਸਮੇਂ 3 ਘੰਟੇ ਮੁਫ਼ਤ ਬਿਜਲੀ ਮਿਲ ਸਕੇਗੀ। ਇਸ ਨਾਲ ਪਰਿਵਾਰ ਹਰ ਸਾਲ ਲਗਭਗ 300 ਡਾਲਰ ਤੱਕ ਬਚਤ ਕਰ ਸਕਦੇ ਹਨ। ਜੇ ਘਰ ਵਿੱਚ ਸੋਲਰ ਪੈਨਲ ਅਤੇ ਬੈਟਰੀ ਹੋਣ, ਤਾਂ ਬੱਚਤ 1,070 ਡਾਲਰ ਤੱਕ ਹੋ ਸਕਦੀ ਹੈ।
ਇਹ ਨਵੀਂ ਯੋਜਨਾ 1 ਅਕਤੂਬਰ 2026 ਤੋਂ ਸ਼ੁਰੂ ਹੋਵੇਗੀ। ਇਹ ਯੋਜਨਾ ਉਹਨਾਂ ਲੋਕਾਂ ਲਈ ਫਾਇਦੇਮੰਦ ਹੈ ਜੋ ਦਿਨ ਵਿੱਚ ਘਰ ਰਹਿੰਦੇ ਹਨ ਜਾਂ ਘਰੋਂ ਕੰਮ ਕਰਦੇ ਹਨ। ਇਸ ਨਾਲ ਬਿਜਲੀ ਦੀ ਵੱਧ ਮੰਗ ਘਟੇਗੀ, ਜਿਸ ਨਾਲ ਸਿਸਟਮ ਹੋਰ ਸੁਰੱਖਿਅਤ ਅਤੇ ਭਰੋਸੇਯੋਗ ਬਣੇਗਾ। ਇਸ ਯੋਜਨਾ ਅਧੀਨ ਬਿਜਲੀ ਕੰਪਨੀਆਂ ਨੂੰ ਦੁਪਹਿਰ ਦੇ ਸਮੇਂ ਸਸਤੀ ਬਿਜਲੀ ਦੇਣੀ ਪਵੇਗੀ। ਲਗਭਗ 2.6 ਮਿਲੀਅਨ ਪਰਿਵਾਰ ਇਸ ਯੋਜਨਾ ਦਾ ਲਾਭ ਲੈ ਸਕਦੇ ਹਨ।
ਇਸ ਸਬੰਧੀ ਹੋਰ ਜਾਣਕਾਰੀ ਜਿਵੇਂ ਸਮਾਂ ਅਤੇ ਕੀਮਤ ਮਈ ਵਿੱਚ ਦੱਸੀ ਜਾਵੇਗੀ। ਇਹ ਸਭ ਨਵਿਆਉਣਯੋਗ ਊਰਜਾ (ਜਿਵੇਂ ਸੂਰਜੀ ਊਰਜਾ) ਕਰਕੇ ਸੰਭਵ ਹੋਇਆ ਹੈ, ਕਿਉਂਕਿ ਦਿਨ ਵਿੱਚ ਵੱਧ ਬਿਜਲੀ ਬਣਦੀ ਹੈ। 850,000 ਤੋਂ ਵੱਧ ਲੋਕ ਪਹਿਲਾਂ ਹੀ ਸੋਲਰ ਊਰਜਾ ਵਰਤ ਰਹੇ ਹਨ ਅਤੇ ਸਸਤੀ ਜਾਂ ਮੁਫ਼ਤ ਬਿਜਲੀ ਲੈ ਰਹੇ ਹਨ। ਸਰਕਾਰ ਦਾ ਮੰਨਣਾ ਹੈ ਕਿ ਇਹ ਯੋਜਨਾ ਹੋਰ ਲੋਕਾਂ ਨੂੰ ਵੀ ਸਸਤੀ ਬਿਜਲੀ ਦੇਵੇਗੀ। ਵਿਕਟੋਰੀਆ ਨਵਿਆਉਣਯੋਗ ਊਰਜਾ ਵਿੱਚ ਅੱਗੇ ਹੈ, ਜਿੱਥੇ ਲਗਭਗ 100 ਪ੍ਰੋਜੈਕਟ ਚੱਲ ਰਹੇ ਹਨ।
ਵਿਕਟੋਰੀਆ ਦੀ ਪ੍ਰੀਮੀਅਰ ਜੈਸਿੰਟਾ ਐਲਨ ਨੇ ਕਿਹਾ ਹੈ ਕਿ, “ਇਹ ਪਰਿਵਾਰਾਂ ਨੂੰ ਉਨ੍ਹਾਂ ਦੇ ਊਰਜਾ ਬਿੱਲਾਂ ‘ਤੇ ਪ੍ਰਤੀ ਸਾਲ 300 ਤੱਕ ਦੀ ਬੱਚਤ ਕਰ ਸਕਦਾ ਹੈ, ਜੇ ਉਨ੍ਹਾਂ ਕੋਲ ਸੂਰਜੀ ਊਰਜਾ ਅਤੇ ਬੈਟਰੀਆਂ ਹਨ ਤਾਂ ਹੋਰ ਵੀ ਜ਼ਿਆਦਾ। ਇਹ ਇੱਕ ਹੋਰ ਕਾਰਨ ਹੈ ਕਿ ਘਰ ਤੋਂ ਕੰਮ ਕਰਨਾ ਤੁਹਾਡਾ ਸਮਾਂ ਅਤੇ ਪੈਸਾ ਬਚਾ ਸਕਦਾ ਹੈ।”
ਵਿਕਟੋਰੀਆ ਦੀ ਊਰਜਾ ਅਤੇ ਸਰੋਤ ਮੰਤਰੀ ਲਿਲੀ ਡੀ’ਐਂਬਰੋਸੀਓ ਨੇ ਕਿਹਾ ਹੈ ਕਿ, “ਭਾਵੇਂ ਤੁਸੀਂ ਘਰੋਂ ਕੰਮ ਕਰਦੇ ਹੋ ਜਾਂ ਸਮਾਰਟ ਉਪਕਰਣ ਰੱਖਦੇ ਹੋ, ਮਿਡਡੇਅ ਪਾਵਰ ਸੇਵਰ ਵਿਕਟੋਰੀਆ ਦੇ ਲੋਕਾਂ ਦੇ ਪੈਸੇ ਬਚਾਏਗਾ, ਜਦਕਿ ਲਿਬਰਲ ਨਵਿਆਉਣਯੋਗ ਊਰਜਾ ਨੂੰ ਰੋਕ ਦੇਣਗੇ ਅਤੇ ਬਿਜਲੀ ਦੇ ਬਿੱਲਾਂ ਵਿੱਚ ਵਾਧਾ ਕਰਨਗੇ।”