ਕਰਾਚੀ – ਪਾਕਿਸਤਾਨ ‘ਚ ਚੱਲ ਰਹੇ ਸਿਆਸੀ ਸੰਕਟ ਵਿਚਾਲੇ ਕਾਰਜਕਾਰੀ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਨੂੰ ਵੱਡਾ ਝਟਕਾ ਲੱਗਾ ਹੈ। ਇਮਰਾਨ ਖਾਨ ਨੇ ਪਾਕਿਸਤਾਨ ਦੀ ਨੈਸ਼ਨਲ ਅਸੈਂਬਲੀ ‘ਚ ਵਿਰੋਧੀ ਧਿਰ ਵੱਲੋਂ ਪੇਸ਼ ਕੀਤੇ ਗਏ ਬੇਭਰੋਸਗੀ ਮਤੇ ਨੂੰ ਲੈ ਕੇ ਵਿਦੇਸ਼ੀ ਸਾਜ਼ਿਸ਼ ਖਾਸ ਕਰਕੇ ਅਮਰੀਕਾ ਦੀ ਸਾਜ਼ਿਸ਼ ਦਾ ਦੋਸ਼ ਲਾਇਆ ਸੀ। ਹਾਲਾਂਕਿ ਇਮਰਾਨ ਖਾਨ ਦੀ ਇਸ ਦਲੀਲ ਨੂੰ ਪਾਕਿਸਤਾਨੀ ਲੋਕਾਂ ਨੇ ਰੱਦ ਕਰ ਦਿੱਤਾ ਹੈ। ਇੱਕ ਗੈਲਪ ਪਾਕਿਸਤਾਨ ਪੋਲ ਵਿੱਚ ਪਾਇਆ ਗਿਆ ਹੈ ਕਿ ਲਗਭਗ 64 ਪ੍ਰਤੀਸ਼ਤ ਪਾਕਿਸਤਾਨੀ ਮਹਿਸੂਸ ਕਰਦੇ ਹਨ ਕਿ ਵਿਰੋਧੀ ਧਿਰ ਦੇ ਬੇਭਰੋਸਗੀ ਮਤੇ ਦਾ ਕਾਰਨ ਉੱਚੀ ਮਹਿੰਗਾਈ ਨੂੰ ਹੱਲ ਕਰਨ ਵਿੱਚ ਸਰਕਾਰ ਦੀ ਅਸਫਲਤਾ ਹੈ ਨਾ ਕਿ ਅਮਰੀਕਾ ਦੀ ਸਾਜ਼ਿਸ਼। ਇਸ ਦੇ ਨਾਲ ਹੀ 36 ਫੀਸਦੀ ਪਾਕਿਸਤਾਨੀਆਂ ਦਾ ਮੰਨਣਾ ਹੈ ਕਿ ਇਮਰਾਨ ਖਾਨ ਦੀ ਸਰਕਾਰ ਨੂੰ ਡੇਗਣ ਲਈ ਵਿਰੋਧੀ ਧਿਰ ਦੇ ਬੇਭਰੋਸਗੀ ਮਤੇ ਦੇ ਪਿੱਛੇ ਅਮਰੀਕਾ ਦੀ ਸਾਜ਼ਿਸ਼ ਹੈ।
ਗੈਲਪ ਸਰਵੇਖਣ ਨੇ 3-4 ਅਪ੍ਰੈਲ, 2022 ਨੂੰ 800 ਪਰਿਵਾਰਾਂ ਦੀ ਰਾਏ ਮੰਗੀ ਸੀ। ਸਰਵੇਖਣ ਮੁਤਾਬਕ 64 ਫੀਸਦੀ ਲੋਕਾਂ ਨੇ ਸਰਕਾਰ ਦੀ ਵਿਦੇਸ਼ੀ ਸਾਜ਼ਿਸ਼ ਦੀ ਦਲੀਲ ਨੂੰ ਰੱਦ ਕਰਦਿਆਂ ਵਿਰੋਧੀ ਧਿਰ ਦੇ ਇਸ ਕਦਮ ਦੀ ਆਲੋਚਨਾ ਕੀਤੀ। ਸਰਵੇਖਣ ਦੇ ਉੱਤਰਦਾਤਾਵਾਂ ਦਾ ਮੰਨਣਾ ਹੈ ਕਿ ਬੇਭਰੋਸਗੀ ਮਤੇ ਦੇ ਪਿੱਛੇ ਉੱਚ ਮਹਿੰਗਾਈ ਮੁੱਖ ਕਾਰਨ ਹੈ। ਹਾਲਾਂਕਿ 36 ਫੀਸਦੀ ਲੋਕਾਂ ਦਾ ਮੰਨਣਾ ਹੈ ਕਿ ਅਮਰੀਕਾ ਨੇ ਪੀਟੀਆਈ ਸਰਕਾਰ ਨੂੰ ਬੇਦਖਲ ਕਰਨ ਲਈ ਵਿਰੋਧੀ ਧਿਰ ਨਾਲ ਮਿਲ ਕੇ ਸਾਜ਼ਿਸ਼ ਰਚੀ। ਜਿਹੜੇ ਲੋਕ ਮਹਿਸੂਸ ਕਰਦੇ ਸਨ ਕਿ ਸਰਕਾਰ ਮਹਿੰਗਾਈ ਨੂੰ ਹੱਲ ਕਰਨ ਵਿੱਚ ਅਸਫਲ ਰਹੀ ਹੈ, ਉਹ ਸਿੰਧ ਤੋਂ 7 ਫੀਸਦੀ, ਪੰਜਾਬ ਤੋਂ 62 ਫੀਸਦੀ ਅਤੇ ਖੈਬਰ ਪਖਤੂਨਖਵਾ ਤੋਂ 59 ਫੀਸਦੀ ਸਨ।
ਇੱਕ ਹੋਰ ਗੈਲਪ ਸਰਵੇਖਣ ਵਿੱਚ ਪਾਇਆ ਗਿਆ ਕਿ 54 ਪ੍ਰਤੀਸ਼ਤ ਲੋਕਾਂ ਨੇ ਪੀਟੀਆਈ ਸਰਕਾਰ ਦੀ ਸਾਢੇ ਤਿੰਨ ਸਾਲਾਂ ਦੀ ਕਾਰਗੁਜ਼ਾਰੀ ‘ਤੇ ਨਿਰਾਸ਼ਾ ਜ਼ਾਹਰ ਕੀਤੀ, ਜਦੋਂ ਕਿ 46 ਪ੍ਰਤੀਸ਼ਤ ਨੇ ਇਸ ਵਿੱਚ ਕੋਈ ਨੁਕਸ ਨਹੀਂ ਪਾਇਆ। ਇਸ ਦੇ ਨਾਲ ਹੀ 68 ਫੀਸਦੀ ਲੋਕਾਂ ਨੇ ਪ੍ਰਧਾਨ ਮੰਤਰੀ ਵੱਲੋਂ ਨਵੀਆਂ ਚੋਣਾਂ ਕਰਵਾਉਣ ਦੇ ਸੱਦੇ ‘ਤੇ ਕੀਤੀ ਗਈ ਕਾਰਵਾਈ ਦੀ ਸ਼ਲਾਘਾ ਕੀਤੀ।
ਇਕ ਹੋਰ ਸਵਾਲ ‘ਤੇ ਅਮਰੀਕਾ ਦੀ ਧਾਰਨਾ ਦੇ ਸਬੰਧ ‘ਚ 72 ਫੀਸਦੀ ਲੋਕਾਂ ਨੇ ਇਸ ਨੂੰ ਦੇਸ਼ ਦਾ ਦੁਸ਼ਮਣ ਦੱਸਿਆ, ਜਦਕਿ 28 ਫੀਸਦੀ ਨੇ ਕਿਹਾ ਕਿ ਇਹ ਇਕ ਦੋਸਤ ਦੇਸ਼ ਹੈ। 54 ਫੀਸਦੀ ਇਮਰਾਨ ਖਾਨ ਦੇ ਸ਼ਾਸਨ ਤੋਂ ਨਿਰਾਸ਼ ਸਨ, ਜਦਕਿ 46 ਫੀਸਦੀ ਨੇ ਕੁਝ ਹੱਦ ਤੱਕ ਸੰਤੁਸ਼ਟੀ ਪ੍ਰਗਟਾਈ।