ਨਵੀਂ ਦਿੱਲੀ – ਅਸਾਮ ਵਿੱਚ ਹੜ੍ਹ ਦਾ ਕਹਿਰ ਜਾਰੀ ਹੈ। ਹੜ੍ਹਾਂ ਦੀ ਸਥਿਤੀ ਦੇ ਮੱਦੇਨਜ਼ਰ, ਕੱਛਰ ਜ਼ਿਲ੍ਹਾ ਪ੍ਰਸ਼ਾਸਨ ਨੇ ਜ਼ਿਲ੍ਹੇ ਦੇ ਸਾਰੇ ਵਿਦਿਅਕ ਅਦਾਰੇ (ਸਰਕਾਰੀ ਅਤੇ ਨਿੱਜੀ) ਅਤੇ ਗੈਰ-ਜ਼ਰੂਰੀ ਨਿੱਜੀ ਅਦਾਰੇ 48 ਘੰਟਿਆਂ (19 ਅਤੇ 20 ਮਈ) ਲਈ ਬੰਦ ਕਰ ਦਿੱਤੇ ਹਨ।
ਅਸਾਮ ਵਿੱਚ ਬੁੱਧਵਾਰ ਨੂੰ ਹੜ੍ਹ ਦੀ ਸਥਿਤੀ ਹੋਰ ਵਿਗੜ ਗਈ। ਦਾਰੰਗ ਜ਼ਿਲ੍ਹੇ ਵਿੱਚ ਹੜ੍ਹ ਕਾਰਨ ਇੱਕ ਹੋਰ ਵਿਅਕਤੀ ਦੀ ਮੌਤ ਹੋ ਗਈ। ਇਸ ਤੋਂ ਬਾਅਦ ਅਸਾਮ ਵਿੱਚ ਚੱਲ ਰਹੇ ਪ੍ਰੀ ਮਾਨਸੂਨ ਹੜ੍ਹ ਅਤੇ ਜ਼ਮੀਨ ਖਿਸਕਣ ਵਿੱਚ ਮਰਨ ਵਾਲਿਆਂ ਦੀ ਗਿਣਤੀ ਹੁਣ ਨੌਂ ਹੋ ਗਈ ਹੈ। ਇਸ ਦੇ ਨਾਲ ਹੀ ਸੂਬੇ ਦੇ 34 ਵਿੱਚੋਂ 27 ਜ਼ਿਲ੍ਹਿਆਂ ਵਿੱਚ 6.62 ਲੱਖ ਤੋਂ ਵੱਧ ਲੋਕ ਪ੍ਰਭਾਵਿਤ ਹੋਏ ਹਨ।
ਅਸਾਮ ਰਾਜ ਆਫ਼ਤ ਪ੍ਰਬੰਧਨ ਅਥਾਰਟੀ ਦੇ ਅਧਿਕਾਰੀਆਂ ਅਨੁਸਾਰ, 1,25,491 ਬੱਚਿਆਂ ਅਤੇ 2,44,216 ਔਰਤਾਂ ਸਮੇਤ ਘੱਟੋ-ਘੱਟ 6,62,385 ਲੋਕ ਪ੍ਰਭਾਵਿਤ ਹੋਏ ਹਨ ਅਤੇ 27 ਜ਼ਿਲ੍ਹਿਆਂ ਦੇ 1,414 ਪਿੰਡਾਂ ਦੇ ਲਗਭਗ 8,260 ਘਰ ਅੰਸ਼ਕ ਤੌਰ ‘ਤੇ ਅਤੇ ਪੂਰੀ ਤਰ੍ਹਾਂ ਪ੍ਰਭਾਵਿਤ ਹੋਏ ਹਨ।
ਭਾਰੀ ਮੀਂਹ ਕਾਰਨ ਕਈ ਇਲਾਕਿਆਂ ਵਿੱਚ ਜ਼ਮੀਨ ਖਿਸਕਣ ਦੀਆਂ ਘਟਨਾਵਾਂ ਵੀ ਵਾਪਰੀਆਂ ਹਨ। ਨਿਊ ਕੁੰਜਾਂਗ, ਫਿਆਂਗਪੁਈ, ਮੌਲਹੋਈ, ਨਮਜੁਰੰਗ, ਦਕਸ਼ੀਨ ਬਗੇਤਾਰ, ਮਹਾਦੇਵ ਟੀਲਾ, ਕਾਲੀਬਾੜੀ, ਉੱਤਰੀ ਬਾਗੇਤਾਰ, ਜੀਓਨ ਅਤੇ ਲੋਡੀ ਪੰਗਮੌਲ ਪਿੰਡਾਂ ਤੋਂ ਜ਼ਮੀਨ ਖਿਸਕਣ ਦੀ ਸੂਚਨਾ ਮਿਲੀ ਹੈ। ਜ਼ਮੀਨ ਖਿਸਕਣ ਕਾਰਨ ਜਟਿੰਗਾ-ਹਰੰਗਾਜਾਓ ਅਤੇ ਮਾਹੂਰ-ਫਿਡਿੰਗ ਵਿਖੇ ਰੇਲਵੇ ਲਾਈਨਾਂ ਬੰਦ ਹੋ ਗਈਆਂ ਹਨ।
ਆਸਾਮ ‘ਚ ਹੜ੍ਹ ਕਾਰਨ ਹਾਲਾਤ ਵਿਗੜੇ, ਕਰੀਬ 7 ਲੱਖ ਲੋਕ ਪ੍ਰਭਾਵਿਤ, ਕਛਰ ‘ਚ ਦੋ ਦਿਨਾਂ ਲਈ ਸਕੂਲ-ਕਾਲਜ ਬੰਦ
