ਚੰਡੀਗੜ੍ਹ – ਚੰਡੀਗੜ੍ਹ ਦੇ ਸ਼ਹੀਦ ਭਗਤ ਸਿੰਘ ਅੰਤਰਰਾਸ਼ਟਰੀ ਹਵਾਈ ਅੱਡੇ ਜਾਣ ਵਾਲੇ ਮੁਸਾਫ਼ਰਾਂ ਲਈ ਇੱਕ ਬਹੁਤ ਹੀ ਰਾਹਤ ਭਰੀ ਖ਼ਬਰ ਸਾਹਮਣੇ ਆਈ ਹੈ। ਹੁਣ ਲੋਕਾਂ ਨੂੰ ਏਅਰਪੋਰਟ ਪਹੁੰਚਣ ਲਈ ਐਰੋਸਿਟੀ ਦੇ ਲੰਬੇ ਅਤੇ ਟ੍ਰੈਫਿਕ ਵਾਲੇ ਰਸਤੇ ਰਾਹੀਂ ਸਫ਼ਰ ਨਹੀਂ ਕਰਨਾ ਪਵੇਗਾ। ਮੋਹਾਲੀ ਦੇ ਬਾਵਾ ਵ੍ਹਾਈਟ ਹਾਊਸ ਤੋਂ ਹਵਾਈ ਅੱਡੇ ਤੱਕ ਬਣ ਕੇ ਤਿਆਰ ਹੋਈ ਇੱਕ ਨਵੀਂ ਅਪ੍ਰੋਚ ਰੋਡ ਨੂੰ ਅੱਜ ਆਫੀਸ਼ੀਅਲੀ ਜਨਤਾ ਲਈ ਖੋਲ੍ਹ ਦਿੱਤਾ ਗਿਆ ਹੈ। ਇਹ ਨਵਾਂ ਰੂਟ ਸਿੱਧਾ ਮੁੱਖ ਏਅਰਪੋਰਟ ਰੋਡ ਨਾਲ ਕਨੈਕਟ ਹੋਵੇਗਾ ਜਿਸ ਨਾਲ ਯਾਤਰੀਆਂ ਨੂੰ ਰੂਟ ਵਿੱਚ ਵੱਡੀ ਬਚਤ ਹੋਵੇਗੀ। ਇਸ ਨਾਲ ਨਾ ਸਿਰਫ਼ ਸਫ਼ਰ ਸੁਖਾਲਾ ਹੋਵੇਗਾ ਬਲਕਿ ਹਵਾਈ ਅੱਡੇ ਵਾਲੀ ਸੜਕ ‘ਤੇ ਲੱਗਣ ਵਾਲੇ ਭਾਰੀ ਟ੍ਰੈਫਿਕ ਜਾਮ ਅਤੇ ਸੜਕ ਹਾਦਸਿਆਂ ਦੇ ਖ਼ਤਰੇ ਤੋਂ ਵੀ ਵੱਡੀ ਰਾਹਤ ਮਿਲੇਗੀ।
ਹਾਲਾਂਕਿ, ਇਸ ਨਵੇਂ ਲਿੰਕ ਰੋਡ ‘ਤੇ ਪਹਿਲਾਂ ਹੀ ਟ੍ਰਾਇਲ ਦੇ ਤੌਰ ‘ਤੇ ਸੀਮਤ ਵਾਹਨ ਚੱਲ ਰਹੇ ਸਨ ਪਰ ਅੱਜ ਇਸ ਦਾ ਉਦਘਾਟਨ ਕਰਕੇ ਇਸ ਨੂੰ ਰਸਮੀ ਤੌਰ ‘ਤੇ ਪਬਲਿਕ ਲਈ ਬਹਾਲ ਕਰ ਦਿੱਤਾ ਗਿਆ ਹੈ। ਮੌਜੂਦਾ ਸਮੇਂ ਪੰਜਾਬ, ਹਰਿਆਣਾ ਅਤੇ ਹਿਮਾਚਲ ਤੋਂ ਆਉਣ ਵਾਲੇ ਜ਼ਿਆਦਾਤਰ ਡਰਾਈਵਰ ਏਅਰਪੋਰਟ ਜਾਣ ਲਈ PR-7 ਰੂਟ ਦੀ ਵਰਤੋਂ ਕਰਦੇ ਹਨ ਜਿਸ ਕਾਰਨ ਉੱਥੇ ਵਾਹਨਾਂ ਦਾ ਦਬਾਅ ਬਹੁਤ ਜ਼ਿਆਦਾ ਰਹਿੰਦਾ ਹੈ। ਇਸ ਨਵੀਂ ਸੜਕ ਦੇ ਚਾਲੂ ਹੋਣ ਨਾਲ ਪੁਰਾਣੇ ਰੂਟਾਂ ‘ਤੇ ਵਹੀਕਲ ਲੋਡ ਕਾਫੀ ਘੱਟ ਜਾਵੇਗਾ ਜਿਸ ਨਾਲ ਮੁਸਾਫ਼ਰਾਂ ਦੇ ਕੀਮਤੀ ਸਮੇਂ ਅਤੇ ਬਾਲਣ ਦੋਵਾਂ ਦੀ ਵੱਡੀ ਬਚਤ ਹੋਵੇਗੀ।
ਗਰੇਟਰ ਮੋਹਾਲੀ ਏਰੀਆ ਡਿਵੈਲਪਮੈਂਟ ਅਥਾਰਟੀ ਵੱਲੋਂ ਇਸ 164 ਫੁੱਟ ਚੌੜੀ ਆਧੁਨਿਕ ਸੜਕ ਦਾ ਨਿਰਮਾਣ ਲਗਭਗ 125 ਕਰੋੜ ਰੁਪਏ ਦੀ ਲਾਗਤ ਨਾਲ ਕੀਤਾ ਗਿਆ ਹੈ। ਇਸ ਦੇ ਖੁੱਲ੍ਹਣ ਨਾਲ ਹਵਾਈ ਅੱਡੇ ਤੱਕ ਦੀ ਕੁੱਲ ਦੂਰੀ 11.6 ਕਿਲੋਮੀਟਰ ਤੋਂ ਘਟ ਕੇ ਹੁਣ ਮਹਿਜ਼ 8.5 ਕਿਲੋਮੀਟਰ ਰਹਿ ਜਾਵੇਗੀ। ਹੁਣ ਤੱਕ ਲੋਕਾਂ ਨੂੰ ਫੇਜ਼ 11 ਤੋਂ ਚੱਲ ਕੇ IISER ਲਾਈਟ ਪੁਆਇੰਟ ਅਤੇ ਏਅਰਪੋਰਟ ਚੌਕ ਰਾਹੀਂ ਇੱਕ ਲੰਬਾ ਚੱਕਰ ਕੱਟ ਕੇ ਜਾਣਾ ਪੈਂਦਾ ਸੀ ਜਿੱਥੇ ਰਸਤੇ ਵਿੱਚ ਕਈ ਲਾਈਟ ਪੁਆਇੰਟ ਹੋਣ ਕਾਰਨ ਅਕਸਰ ਜਾਮ ਦੀ ਸਥਿਤੀ ਬਣੀ ਰਹਿੰਦੀ ਸੀ। ਹੁਣ ਇਹ ਨਵੀਂ ਸੜਕ ਮੋਹਾਲੀ ਦੇ ਬਾਵਾ ਵ੍ਹਾਈਟ ਹਾਊਸ ਕਰਾਸਿੰਗ (ਸੈਕਟਰ 65-66 ਜੰਕਸ਼ਨ) ਤੋਂ ਸ਼ੁਰੂ ਹੋ ਕੇ ਸੈਕਟਰ 66-ਏ ਦੇ ਰਸਤੇ ਸਿੱਧੀ ਏਅਰਪੋਰਟ ਟਰਮੀਨਲ ਰੋਡ ‘ਤੇ ਜਾ ਕੇ ਮਿਲੇਗੀ, ਜਿਸ ਨਾਲ ਲੋਕਾਂ ਦਾ 15 ਤੋਂ 20 ਮਿੰਟ ਦਾ ਸਮਾਂ ਸਿੱਧਾ ਬਚੇਗਾ।
ਚੰਡੀਗੜ੍ਹ ਇੰਟਰਨੈਸ਼ਨਲ ਏਅਰਪੋਰਟ ‘ਤੇ ਆਮ ਦਿਨਾਂ ਦੌਰਾਨ ਰੋਜ਼ਾਨਾ ਲਗਭਗ 10,000 ਤੋਂ 12,000 ਯਾਤਰੀਆਂ ਦੀ ਆਮਦ ਹੁੰਦੀ ਹੈ। ਹਾਲਾਂਕਿ, ਪਿਛਲੇ ਕੁਝ ਸਮੇਂ ਵਿੱਚ ਵੱਖ-ਵੱਖ ਏਅਰਲਾਈਨਾਂ ਦੇ ਸ਼ਡਿਊਲ ਵਿੱਚ ਬਦਲਾਅ ਅਤੇ ਖ਼ਰਾਬ ਮੌਸਮ ਵਰਗੇ ਕਾਰਨਾਂ ਕਰਕੇ ਇਹ ਗਿਣਤੀ ਕਈ ਵਾਰ 4,500 ਤੋਂ 6,000 ਦੇ ਵਿਚਕਾਰ ਵੀ ਦਰਜ ਕੀਤੀ ਗਈ ਹੈ। ਇਹ ਹਵਾਈ ਅੱਡਾ ਰੋਜ਼ਾਨਾ ਔਸਤਨ 45 ਤੋਂ 85 ਉਡਾਣਾਂ ਦਾ ਸਫ਼ਲਤਾਪੂਰਵਕ ਸੰਚਾਲਨ ਕਰਦਾ ਹੈ ਜਿੱਥੋਂ ਦੇਸ਼ ਦੇ ਪ੍ਰਮੁੱਖ ਮਹਾਂਨਗਰਾਂ ਜਿਵੇਂ ਦਿੱਲੀ, ਮੁੰਬਈ, ਬੰਗਲੁਰੂ, ਹੈਦਰਾਬਾਦ, ਸ੍ਰੀਨਗਰ ਅਤੇ ਅਹਿਮਦਾਬਾਦ ਲਈ ਸਿੱਧੀਆਂ ਘਰੇਲੂ ਉਡਾਣਾਂ ਉਪਲਬਧ ਹਨ। ਇਸ ਤੋਂ ਇਲਾਵਾ ਇਹ ਹੱਬ ਖਾੜੀ ਦੇਸ਼ਾਂ ਜਿਵੇਂ ਡੁਬਈ ਅਤੇ ਅਬੂ ਧਾਬੀ ਵਰਗੇ ਅੰਤਰਰਾਸ਼ਟਰੀ ਰੂਟਾਂ ਨਾਲ ਵੀ ਸਿੱਧਾ ਜੁੜਿਆ ਹੋਇਆ ਹੈ।
ਏਅਰਪੋਰਟ ‘ਤੇ ਸਭ ਤੋਂ ਜ਼ਿਆਦਾ ਰਸ਼ ਸਵੇਰੇ 5 ਵਜੇ ਤੋਂ 8 ਵਜੇ ਤੱਕ ਅਤੇ ਸ਼ਾਮ ਨੂੰ 4 ਵਜੇ ਤੋਂ 7 ਵਜੇ ਦੇ ਵਿਚਕਾਰ ਦੇਖਣ ਨੂੰ ਮਿਲਦਾ ਹੈ ਜਦੋਂ ਫਲਾਈਟਸ ਦੀ ਮੂਵਮੈਂਟ ਸਭ ਤੋਂ ਵੱਧ ਹੁੰਦੀ ਹੈ। ਤਿੰਨਾਂ ਸੂਬਿਆਂ ਪੰਜਾਬ, ਹਰਿਆਣਾ ਅਤੇ ਹਿਮਾਚਲ ਪ੍ਰਦੇਸ਼ ਲਈ ਮੁੱਖ ਹਵਾਈ ਕੇਂਦਰ ਹੋਣ ਕਰਕੇ ਇਹ ਨਵਾਂ ਰੂਟ ਨਾ ਸਿਰਫ਼ ਟ੍ਰੈਫਿਕ ਪ੍ਰਬੰਧਨ ਨੂੰ ਸੁਧਾਰੇਗਾ, ਬਲਕਿ ਆਉਣ ਵਾਲੇ ਸਮੇਂ ਵਿੱਚ ਹਵਾਈ ਅੱਡੇ ਦੀ ਯਾਤਰੀ ਸਮਰੱਥਾ ਨੂੰ ਵਧਾਉਣ ਵਿੱਚ ਵੀ ਮੀਲ ਦਾ ਪੱਥਰ ਸਾਬਤ ਹੋਵੇਗਾ।