ਪੈਰਿਸ – ਫ਼ਰਾਂਸ ਅਤੇ ਸਪੇਨ ਵਿੱਚ ਭਿਆਨਕ ਜੰਗਲੀ ਅੱਗ ਦਾ ਕਹਿਰ ਜਾਰੀ ਹੈ। ਫ਼ਰਾਂਸ ਦੇ ਐਟਲਾਂਟਿਕ ਤੱਟ ‘ਤੇ ਸਥਿਤ ਕਈ ਟੂਰਿਸਟ ਇਲਾਕਿਆਂ ਤੋਂ ਕਰੀਬ 4 ਹਜ਼ਾਰ ਲੋਕਾਂ ਨੂੰ ਸੁਰੱਖਿਆ ਦੇ ਮੱਦੇਨਜ਼ਰ ਇਲਾਕਾ ਖਾਲ੍ਹੀ ਕਰਨ ਦੇ ਹੁਕਮ ਦਿੱਤੇ ਗਏ। ਬੋਰਦੋ ਸ਼ਹਿਰ ਦੇ ਪੱਛਮ ਵੱਲ ਲੱਗੀ ਅੱਗ ‘ਤੇ ਅੱਗ ਬੁਝਾਊ ਟੀਮਾਂ ਨੇ ਕਾਫ਼ੀ ਹੱਦ ਤੱਕ ਕਾਬੂ ਪਾ ਲਿਆ ਹੈ, ਪਰ ਵਧਦੇ ਤਾਪਮਾਨ ਅਤੇ ਘਟਦੀ ਨਮੀ ਕਾਰਨ ਅੱਗ ਦੇ ਮੁੜ ਭੜਕਣ ਦਾ ਖ਼ਤਰਾ ਅਜੇ ਵੀ ਬਣਿਆ ਹੋਇਆ ਹੈ।
ਦੱਖਣ-ਪੱਛਮੀ ਯੂਰਪ ਵਿੱਚ ਜੰਗਲੀ ਅੱਗ ਦੀ ਸਥਿਤੀ ਲਗਾਤਾਰ ਗੰਭੀਰ ਹੋ ਰਹੀ ਹੈ। ਫ਼ਰਾਂਸ ਅਤੇ ਸਪੇਨ ਵਿੱਚ ਹੁਣ ਤੱਕ ਲਗਭਗ 3 ਲੱਖ 30 ਹਜ਼ਾਰ ਲੋਕਾਂ ਨੂੰ ਆਪਣੇ ਘਰਾਂ, ਕੈਂਪ ਸਾਈਟਾਂ ਅਤੇ ਸੈਰ-ਸਪਾਟਾ ਸਥਾਨਾਂ ਤੋਂ ਸੁਰੱਖਿਅਤ ਥਾਵਾਂ ‘ਤੇ ਭੇਜਿਆ ਜਾ ਚੁੱਕਾ ਹੈ। ਇਸੇ ਦੌਰਾਨ ਸਪੇਨ ਵਿੱਚ ਇਸ ਗਰਮੀ ਦੀ ਚੌਥੀ ਹੀਟਵੇਵ ਸ਼ੁਰੂ ਹੋ ਗਈ ਹੈ ਅਤੇ ਕਈ ਇਲਾਕਿਆਂ ਵਿੱਚ ਅੱਗ ਅਜੇ ਵੀ ਕਾਬੂ ਤੋਂ ਬਾਹਰ ਹੈ। ਇਨ੍ਹਾਂ ਵਿੱਚ ਦੇਸ਼ ਦੇ ਇਤਿਹਾਸ ਦੀ ਸਭ ਤੋਂ ਵੱਡੀ ਜੰਗਲੀ ਅੱਗ ਵੀ ਸ਼ਾਮਲ ਹੈ।
ਫ਼ਰਾਂਸ ਵਿੱਚ ਰਾਤ ਭਰ ਚੱਲੇ ਬਚਾਅ ਕਾਰਜਾਂ ਦੌਰਾਨ ਅੱਗ ਨੂੰ ਹੋਰ ਫੈਲਣ ਤੋਂ ਰੋਕਿਆ ਗਿਆ। ਸਮੁੰਦਰੀ ਤੱਟ ਦੇ ਰੇਤਲੇ ਟਿੱਬਿਆਂ ਨੇੜੇ ਲੱਗੀ ਅੱਗ ਨੂੰ ਕਾਬੂ ਵਿੱਚ ਲਿਆ ਗਿਆ ਅਤੇ ਸੜਿਆ ਹੋਇਆ ਖੇਤਰ 420 ਵਰਗ ਕਿਲੋਮੀਟਰ ‘ਤੇ ਹੀ ਸਥਿਰ ਰਿਹਾ। ਹਾਲਾਂਕਿ ਅਧਿਕਾਰੀਆਂ ਨੇ ਸਪੱਸ਼ਟ ਕੀਤਾ ਹੈ ਕਿ ਅੱਗ ਪੂਰੀ ਤਰ੍ਹਾਂ ਨਹੀਂ ਬੁਝੀ ਅਤੇ ਮੌਸਮ ਬਦਲਣ ਨਾਲ ਇਹ ਮੁੜ ਫੈਲ ਸਕਦੀ ਹੈ। ਸਾਵਧਾਨੀ ਵਜੋਂ ਜੁਰਾਂਡ ਖੇਤਰ ਦੇ ਲਾਕਾਨੋ ਟੂਰਿਸਟ ਇਲਾਕੇ ਵਿੱਚ ਕੈਂਪ ਸਾਈਟਾਂ, ਹੌਲੀਡੇ ਵਿਲੇਜਾਂ, ਸੈਲਾਨੀਆਂ ਦੇ ਰਿਹਾਇਸ਼ੀ ਕੰਪਲੈਕਸਾਂ ਅਤੇ ਮਨੋਰੰਜਨ ਪਾਰਕਾਂ ਨੂੰ ਖਾਲ੍ਹੀ ਕਰਵਾ ਦਿੱਤਾ ਗਿਆ ਹੈ। ਫ਼ਰਾਂਸ ਦੀ ਰਾਸ਼ਟਰੀ ਅੱਗ ਬੁਝਾਊ ਫੈਡਰੇਸ਼ਨ ਦੇ ਬੁਲਾਰੇ ਐਰਿਕ ਬਰੋਕਾਰਡੀ ਨੇ ਕਿਹਾ ਕਿ ਹਾਲਾਤ ਬੇਹੱਦ ਨਾਜ਼ੁਕ ਹਨ ਅਤੇ ਤਾਪਮਾਨ ਵਧਣ ਨਾਲ ਚੁਣੌਤੀਆਂ ਹੋਰ ਵੱਧ ਸਕਦੀਆਂ ਹਨ। ਪਿਛਲੇ ਹਫ਼ਤੇ ਤੋਂ ਭੜਕ ਰਹੀ ਇਸ ਅੱਗ ਨੇ ਹੁਣ ਤੱਕ ਪੈਰਿਸ ਦੇ ਖੇਤਰਫਲ ਨਾਲੋਂ ਲਗਭਗ ਚਾਰ ਗੁਣਾ ਵੱਡਾ ਇਲਾਕਾ ਸਾੜ ਦਿੱਤਾ ਹੈ। ਕਰੀਬ 2 ਲੱਖ 20 ਹਜ਼ਾਰ ਲੋਕਾਂ ਨੂੰ ਆਪਣੇ ਘਰਾਂ ਅਤੇ ਛੁੱਟੀਆਂ ਮਨਾਉਣ ਵਾਲੀਆਂ ਥਾਵਾਂ ਤੋਂ ਕੱਢਣਾ ਪਿਆ, ਜਦਕਿ 93 ਅੱਗ ਬੁਝਾਊ ਕਰਮਚਾਰੀ ਜ਼ਖ਼ਮੀ ਹੋਏ ਹਨ। ਬੋਰਦੋ ਦੇ ਪੱਛਮ ਵਿੱਚ ਸਥਿਤ ਲੇ ਪੋਰਜ ਸ਼ਹਿਰ ਵਿੱਚ ਕਰੀਬ 150 ਘਰ ਤਬਾਹ ਹੋ ਗਏ ਹਨ। ਦੂਜੇ ਪਾਸੇ, ਲਾਂਡੇ ਖੇਤਰ ਵਿੱਚ ਇੱਕ ਹੋਰ ਜੰਗਲੀ ਅੱਗ ‘ਤੇ ਪੂਰੀ ਤਰ੍ਹਾਂ ਕਾਬੂ ਪਾ ਲਿਆ ਗਿਆ ਹੈ, ਜਿਸ ਤੋਂ ਬਾਅਦ ਹਜ਼ਾਰਾਂ ਲੋਕਾਂ ਨੂੰ ਆਪਣੇ ਘਰਾਂ ਵਿੱਚ ਵਾਪਸ ਜਾਣ ਦੀ ਇਜਾਜ਼ਤ ਮਿਲ ਗਈ ਹੈ। ਉੱਥੇ ਪਹਿਲਾਂ 30 ਹਜ਼ਾਰ ਤੋਂ ਵੱਧ ਲੋਕਾਂ ਨੂੰ ਸੁਰੱਖਿਆ ਲਈ ਇਲਾਕਾ ਛੱਡਣਾ ਪਿਆ ਸੀ।
ਫ਼ਰਾਂਸ ਦੇ ਮੌਸਮ ਵਿਭਾਗ ਨੇ ਜੁਰਾਂਡ ਖੇਤਰ ਲਈ ਹੀਟ ਵਾਰਨਿੰਗ ਜਾਰੀ ਕਰਦਿਆਂ ਦੱਸਿਆ ਹੈ ਕਿ ਤਾਪਮਾਨ 35 ਡਿਗਰੀ ਸੈਲਸੀਅਸ ਤੱਕ ਪਹੁੰਚ ਸਕਦਾ ਹੈ। ਗ੍ਰਹਿ ਮੰਤਰਾਲੇ ਮੁਤਾਬਕ ਇਸ ਸਾਲ ਦੇਸ਼ ਵਿੱਚ ਹੁਣ ਤੱਕ 1 ਲੱਖ 16 ਹਜ਼ਾਰ ਹੈਕਟੇਅਰ ਤੋਂ ਵੱਧ ਜੰਗਲ ਸੜ ਚੁੱਕੇ ਹਨ। ਯੂਰਪੀ ਸੰਘ ਦੀ ਕੋਪਰਨਿਕਸ ਕਲਾਈਮੇਟ ਸਰਵਿਸ ਨੇ ਕਿਹਾ ਹੈ ਕਿ ਪੱਛਮੀ ਯੂਰਪ ਵਿੱਚ ਇਸ ਸਾਲ ਇਤਿਹਾਸ ਦਾ ਸਭ ਤੋਂ ਗਰਮ ਜੂਨ ਮਹੀਨਾ ਦਰਜ ਕੀਤਾ ਗਿਆ। ਅਸਾਧਾਰਣ ਗਰਮੀ ਅਤੇ ਲੰਬੇ ਖੁਸ਼ਕ ਮੌਸਮ ਕਾਰਨ ਜੰਗਲੀ ਅੱਗਾਂ ਤੇਜ਼ੀ ਨਾਲ ਫੈਲ ਰਹੀਆਂ ਹਨ। ਸਪੇਨ ਵਿੱਚ ਹੁਣ ਤੱਕ 79 ਹਜ਼ਾਰ ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ ‘ਤੇ ਭੇਜਿਆ ਜਾ ਚੁੱਕਾ ਹੈ, ਜਦਕਿ 30 ਹਜ਼ਾਰ ਹੋਰ ਲੋਕਾਂ ਨੂੰ ਘਰਾਂ ਦੇ ਅੰਦਰ ਹੀ ਰਹਿਣ ਦੇ ਨਿਰਦੇਸ਼ ਦਿੱਤੇ ਗਏ ਹਨ। ਹਾਲਾਤਾਂ ਨੂੰ ਦੇਖਦਿਆਂ ਸਪੇਨ ਸਰਕਾਰ ਨੇ ਆਪਣੇ ਇਤਿਹਾਸ ਵਿੱਚ ਪਹਿਲੀ ਵਾਰ ਜੰਗਲੀ ਅੱਗ ਕਾਰਨ ਰਾਸ਼ਟਰੀ ਐਮਰਜੈਂਸੀ ਐਲਾਨੀ ਹੈ।