ਮੈਲਬੌਰਨ – ਆਫ਼ਤਾਂ ਦੌਰਾਨ ਮੋਬਾਈਲ ਨੈੱਟਵਰਕ ਫੇਲ੍ਹ ਹੋਣ ਦੀ ਸਥਿਤੀ ਵਿੱਚ ਲੋਕਾਂ ਦੀ ਮਦਦ ਲਈ Temporary Disaster Roaming ਸੇਵਾ ਸ਼ੁਰੂ ਹੋ ਗਈ ਹੈ। ਕੋਅਲੀਸ਼ਨ ਨੇ ਇਸ ਕਦਮ ਦਾ ਸਵਾਗਤ ਕੀਤਾ ਹੈ, ਪਰ ਨਾਲ ਹੀ ਸਰਕਾਰ ’ਤੇ ਇਸ ਸੇਵਾ ਨੂੰ ਲਾਗੂ ਕਰਨ ਵਿੱਚ ਲੰਮੀ ਦੇਰੀ ਕਰਨ ਦਾ ਦੋਸ਼ ਲਾਇਆ ਹੈ।
ਕੋਅਲੀਸ਼ਨ ਮੁਤਾਬਕ ਖੇਤਰੀ ਇਲਾਕਿਆਂ ਵਿੱਚ ਰਹਿਣ ਵਾਲੇ ਲੋਕਾਂ ਨੂੰ ਆਫ਼ਤ ਦੇ ਸਮੇਂ ਭਰੋਸੇਯੋਗ ਸੰਚਾਰ ਦੀ ਲੋੜ ਹੁੰਦੀ ਹੈ। ਇਸ ਸੇਵਾ ਦੀ ਸਿਫਾਰਸ਼ ਹੋਣ ਤੋਂ ਬਾਅਦ ਤਤਕਾਲੀ ਕੋਅਲੀਸ਼ਨ ਸਰਕਾਰ ਨੇ ਮਾਰਚ 2022 ਵਿੱਚ ਆਸਟ੍ਰੇਲੀਅਨ ਕੰਪੀਟੀਸ਼ਨ ਐਂਡ ਕੰਜ਼ਿਊਮਰ ਕਮਿਸ਼ਨ (ACCC) ਨੂੰ ਇਸ ਦੀ ਤਕਨੀਕੀ ਸੰਭਾਵਨਾ ਦੀ ਜਾਂਚ ਕਰਨ ਲਈ ਕਿਹਾ ਸੀ। ACCC ਨੇ ਇਸ ਨੂੰ ਤਕਨੀਕੀ ਤੌਰ ’ਤੇ ਸੰਭਵ ਦੱਸਿਆ ਸੀ। ਕੋਅਲੀਸ਼ਨ ਦਾ ਕਹਿਣਾ ਹੈ ਕਿ ਲੇਬਰ ਸਰਕਾਰ ਨੇ ਇਹ ਸੇਵਾ 2024 ਦੇ ਅੰਤ ਤੱਕ ਸ਼ੁਰੂ ਕਰਨ ਦਾ ਵਾਅਦਾ ਕੀਤਾ ਸੀ, ਪਰ ਇਹ ਹੁਣ ਜਾ ਕੇ ਲਾਗੂ ਹੋਈ ਹੈ।
ਕਮਿਊਨੀਕੇਸ਼ਨਜ਼ ਅਤੇ ਡਿਜੀਟਲ ਸੇਫਟੀ ਦੀ ਸ਼ੈਡੋ ਮੰਤਰੀ ਸਾਰਾਹ ਹੈਂਡਰਸਨ ਨੇ ਕਿਹਾ ਕਿ ਆਫ਼ਤ ਦੇ ਸਮੇਂ ਖੇਤਰੀ ਆਸਟ੍ਰੇਲੀਆ ਵਾਸੀਆਂ ਲਈ ਸੰਚਾਰ “ਜ਼ਿੰਦਗੀ ਅਤੇ ਮੌਤ ਦਾ ਮਾਮਲਾ” ਹੋ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਜਦੋਂ ਕਿਸੇ ਮੋਬਾਈਲ ਨੈੱਟਵਰਕ ਦੀ ਸੇਵਾ ਬੰਦ ਹੋ ਜਾਂਦੀ ਹੈ ਤਾਂ Temporary Disaster Roaming ਰਾਹੀਂ ਗਾਹਕ ਦੂਜੇ ਮੋਬਾਈਲ ਨੈੱਟਵਰਕ ’ਤੇ ਜਾ ਸਕਣਗੇ। ਇਸ ਨਾਲ ਉਹ ਫੋਨ ਕਾਲਾਂ ਕਰ ਸਕਣਗੇ, ਮੈਸੇਜ ਭੇਜ ਸਕਣਗੇ ਅਤੇ ਐਮਰਜੈਂਸੀ ਐਪਾਂ ਜਾਂ ਵੈੱਬਸਾਈਟਾਂ ਵਰਗੀਆਂ ਬੁਨਿਆਦੀ ਡਾਟਾ ਸੇਵਾਵਾਂ ਵਰਤ ਸਕਣਗੇ। ਹੈਂਡਰਸਨ ਨੇ ਕਿਹਾ ਕਿ ਮੌਜੂਦਾ ਪ੍ਰਣਾਲੀ ਕੰਪਨੀਆਂ ਦੀ ਆਪਣੀ ਮਰਜ਼ੀ ’ਤੇ ਆਧਾਰਿਤ ਹੈ। ਕੋਅਲੀਸ਼ਨ ਦਾ ਕਹਿਣਾ ਹੈ ਕਿ ਐਮਰਜੈਂਸੀ ਦੌਰਾਨ Temporary Disaster Roaming ਨੂੰ ਲਾਜ਼ਮੀ ਬਣਾਉਣ ਲਈ ਉਹ Outdoor Universal Mobile Obligation Bill ਵਿੱਚ ਸੋਧ ਲਿਆਏਗਾ।
ਖੇਤਰੀ ਇਲਾਕਿਆਂ ਵਿੱਚ ਹੋਰ ਟਾਵਰਾਂ ਦੀ ਲੋੜ
ਰੀਜਨਲ ਕਮਿਊਨੀਕੇਸ਼ਨਜ਼ ਦੀ ਸ਼ੈਡੋ ਮੰਤਰੀ ਐਨ ਵੈੱਬਸਟਰ ਨੇ ਕਿਹਾ ਕਿ ਸਿਰਫ਼ ਰੋਮਿੰਗ ਨਾਲ ਉਹਨਾਂ ਇਲਾਕਿਆਂ ਦੀ ਸਮੱਸਿਆ ਹੱਲ ਨਹੀਂ ਹੋਵੇਗੀ ਜਿੱਥੇ ਮੋਬਾਈਲ ਟਾਵਰ ਹੀ ਨਹੀਂ ਹਨ। ਉਨ੍ਹਾਂ ਕਿਹਾ ਕਿ ਖੇਤਰੀ ਆਸਟ੍ਰੇਲੀਆ ਵਿੱਚ ਅਜੇ ਵੀ ਕਈ ਬਲੈਕ ਸਪਾਟ ਹਨ, ਜਿੱਥੇ ਮੋਬਾਈਲ ਕਵਰੇਜ ਬਹੁਤ ਘੱਟ ਜਾਂ ਬਿਲਕੁਲ ਨਹੀਂ ਹੈ। ਉਨ੍ਹਾਂ ਮੁਤਾਬਕ ਅਜਿਹੇ ਇਲਾਕਿਆਂ ਵਿੱਚ ਹੋਰ ਮੋਬਾਈਲ ਟਾਵਰਾਂ ਅਤੇ ਭਰੋਸੇਯੋਗ ਬਿਜਲੀ ਸਪਲਾਈ ਦੀ ਲੋੜ ਹੈ। ਵੈੱਬਸਟਰ ਨੇ 3G ਨੈੱਟਵਰਕ ਬੰਦ ਹੋਣ ਤੋਂ ਬਾਅਦ ਪੈਦਾ ਹੋਈਆਂ ਕਨੈਕਟੀਵਿਟੀ ਸਮੱਸਿਆਵਾਂ ਅਤੇ ਖੇਤਰੀ ਕਨੈਕਟੀਵਿਟੀ ਲਈ ਫੰਡਾਂ ਵਿੱਚ ਕਟੌਤੀ ਦਾ ਵੀ ਹਵਾਲਾ ਦਿੱਤਾ। ਉਨ੍ਹਾਂ ਕਿਹਾ ਕਿ ਸਰਕਾਰ ਵੱਲੋਂ Universal Outdoor Mobile Obligation ਲਈ ਸੈਟੇਲਾਈਟ ਤਕਨਾਲੋਜੀ ’ਤੇ ਧਿਆਨ ਦਿੱਤਾ ਜਾ ਰਿਹਾ ਹੈ, ਪਰ ਇਸ ਨਾਲ ਫੋਨ ਕਾਲਾਂ ਦੀ ਸਹੂਲਤ ਕਦੋਂ ਮਿਲੇਗੀ, ਇਸ ਦੀ ਗਾਰੰਟੀ ਨਹੀਂ ਹੈ।
‘ਇਹ ਸਿਰਫ਼ ਸ਼ੁਰੂਆਤ ਹੋਣੀ ਚਾਹੀਦੀ ਹੈ’
ਡਾ. ਵੈੱਬਸਟਰ ਨੇ Temporary Disaster Roaming ਨੂੰ ਖੇਤਰੀ ਆਸਟ੍ਰੇਲੀਆ ਵਾਸੀਆਂ ਲਈ ਮਹੱਤਵਪੂਰਨ ਕਦਮ ਦੱਸਿਆ, ਪਰ ਕਿਹਾ ਕਿ ਦੂਰ-ਦਰਾਜ਼ ਇਲਾਕਿਆਂ ਵਿੱਚ ਰੋਜ਼ਾਨਾ ਭਰੋਸੇਯੋਗ ਮੋਬਾਈਲ ਕਵਰੇਜ ਵੀ ਜ਼ਰੂਰੀ ਹੈ। ਉਨ੍ਹਾਂ ਕਿਹਾ ਕਿ ਹਾਲ ਹੀ ਵਿੱਚ Telstra ਅਤੇ Optus ਨਾਲ ਜੁੜੀਆਂ Triple Zero ਸੇਵਾ ਦੀਆਂ ਰੁਕਾਵਟਾਂ ਤੋਂ ਬਾਅਦ ਹੁਣ ਇਹ ਦੇਖਣਾ ਮਹੱਤਵਪੂਰਨ ਹੋਵੇਗਾ ਕਿ Temporary Disaster Roaming ਅਸਲ ਐਮਰਜੈਂਸੀ ਵਿੱਚ ਠੀਕ ਤਰੀਕੇ ਨਾਲ ਕੰਮ ਕਰਦੀ ਹੈ ਜਾਂ ਨਹੀਂ। ਕੋਅਲੀਸ਼ਨ ਨੇ ਕਿਹਾ ਹੈ ਕਿ ਸਰਕਾਰ ਨੂੰ ਇਸ ਪ੍ਰਣਾਲੀ ਦੀ ਕਾਰਗੁਜ਼ਾਰੀ ਲਈ ਜਵਾਬਦੇਹ ਰਹਿਣਾ ਚਾਹੀਦਾ ਹੈ ਅਤੇ ਲੋੜ ਅਨੁਸਾਰ ਇਸ ਵਿੱਚ ਲਗਾਤਾਰ ਸੁਧਾਰ ਕੀਤੇ ਜਾਣੇ ਚਾਹੀਦੇ ਹਨ।