ਜਾਪਾਨ ਚੰਦਰਮਾ ਅਤੇ ਮੰਗਲ ਗ੍ਰਹਿ ‘ਤੇ ਧਰਤੀ ਵਰਗਾ ਰਹਿਣ ਯੋਗ ਵਾਤਾਵਰਣ ਬਣਾਉਣ ਜਾ ਰਿਹਾ ਹੈ। ਇਸ ਦੇ ਨਾਲ ਹੀ ਧਰਤੀ, ਚੰਦਰਮਾ ਅਤੇ ਮੰਗਲ ਨੂੰ ਜੋੜਨ ਲਈ ਅੰਤਰ-ਗ੍ਰਹਿ ਰੇਲ ਗੱਡੀਆਂ ਵੀ ਚਲਾਈਆਂ ਜਾਣਗੀਆਂ। ਇਹ ਸੁਣਨ ਦੇ ਵਿੱਚ ਬਹੁਤ ਹੀ ਅਜੀਬ ਲੱਗਦਾ ਹੈ, ਪਰ ਇਹ ਸੱਚ ਹੈ। ਇਸ ਪ੍ਰੋਜੈਕਟ ਦੇ ਲਈ ਜਾਪਾਨ ਦੀ ਕਯੋਟੋ ਯੂਨੀਵਰਸਿਟੀ ਦੇ ਖੋਜਕਰਤਾਵਾਂ ਨੇ ਕਾਜੀਮਾ ਕੰਸਟ੍ਰਕਸ਼ਨ ਕੰਪਨੀ ਨਾਲ ਸਹਿਯੋਗ ਕੀਤਾ ਹੈ।
ਟੀਮ ਨੇ ਜ਼ੀਰੋ ਅਤੇ ਘੱਟ ਗਰੈਵਿਟੀ ਵਾਲੇ ਵਾਤਾਵਰਨ ਵਿੱਚ ਮਨੁੱਖੀ ਮਾਸਪੇਸ਼ੀ ਪ੍ਰਣਾਲੀ ਦੇ ਕਮਜ਼ੋਰ ਹੋਣ ਤੋਂ ਰੋਕਣ ਦੇ ਲਈ ਧਰਤੀ ਵਰਗੀ ਵਿਸ਼ੇਸ਼ਤਾ ਦੇ ਨਾਲ ਇੱਕ ‘ਸ਼ੀਸ਼ੇ’ ਦੇ ਘਰ ਵਰਗਾ ਢਾਂਚਾ ਵਿਕਸਤ ਕਰਨ ਦੀਆਂ ਯੋਜਨਾਵਾਂ ਦਾ ਐਲਾਨ ਕੀਤਾ ਹੈ। ਸ਼ੀਸ਼ੇ ਵਿੱਚ ਧਰਤੀ ਵਰਗਾ ਵਾਤਾਵਰਨ ਅਤੇ ਗਰੈਵੀਟੇਸ਼ਨਲ ਬਲ ਵੀ ਹੋਣਗੇ। ਇਸ ਨਾਲ ਸਪੇਸ ਵਿੱਚ ਰਹਿਣਾ ਆਸਾਨ ਹੋ ਜਾਵੇਗਾ। ਇਸ ਯੋਜਨਾ ਦੇ ਤਹਿਤ ਸ਼ੀਸ਼ੇ ਅਤੇ ਅੰਤਰ-ਗ੍ਰਹਿ ਟਰੇਨਾਂ ਨੂੰ ਪ੍ਰੋਟੋਟਾਈਪ ਬਨਾਉਣ ਦੇ ਵਿੱਚ ਲਗਭਗ 30 ਸਾਲ ਲੱਗਣਗੇ।
ਚੰਦ ਅਤੇ ਮੰਗਲ ‘ਤੇ ਵੀ ਧਰਤੀ ਵਰਗੀਆਂ ਸਹੂਲਤਾਂ ਹੋਣਗੀਆਂ
ਕਯੋਟੋ ਯੂਨੀਵਰਸਿਟੀ ਅਤੇ ਕਾਜੀਮਾ ਕੰਸਟ੍ਰਕਸ਼ਨ ਕੰਪਨੀ ਨੇ ਮਿਲ ਕੇ ਪੁਲਾੜ ਵਿੱਚ ਰਹਿਣ ਯੋਗ ਢਾਂਚਾ ਬਣਾਉਣ ਦਾ ਟੀਚਾ ਰੱਖਿਆ ਹੈ। ਇਸ ਕੋਨਿਕਲ ਬਣਤਰ ਦਾ ਨਾਂ ‘ਗਲਾਸ’ ਹੈ। ਸ਼ੀਸ਼ੇ ਦੇ ਅੰਦਰ ਆਰਟੀਫੀਸ਼ੀਅਲ ਗਰੈਵਿਟੀ, ਟਰਾਂਸਪੋਰਟ ਸਿਸਟਮ, ਪੌਦੇ ਅਤੇ ਪਾਣੀ ਵੀ ਮਿਲੇਗਾ। ਇਸ ਦਾ ਟੀਚਾ ਧਰਤੀ ‘ਤੇ ਸਾਰੀਆਂ ਸਹੂਲਤਾਂ ਨੂੰ ਪੁਲਾੜ ‘ਚ ਬਣਾਉਣਾ ਹੈ। ਇਸ ਢਾਂਚੇ ਨੂੰ ਚੰਦਰਮਾ ‘ਤੇ ‘ਲੂਨਾਗਲਾਸ’ ਅਤੇ ਮੰਗਲ ‘ਤੇ ‘ਮਾਰਸਗਲਾਸ’ ਕਿਹਾ ਜਾਵੇਗਾ।
ਇਹ ਇੱਕ ਉਲਟਾ ਕੋਨ ਹੈ ਜੋ ਕਿ ਧਰਤੀ ਦੇ ਅਸਲ ਗੁਰੂਤਾਕਰਸ਼ਣ ਦੇ ਪ੍ਰਭਾਵ ਦੀ ਨਕਲ ਕਰਦੇ ਹੋਏ ਇੱਕ ਸੈਂਟਰੀਫਿਊਗਲ ਪੁਲ ਬਣਾਉਣ ਲਈ ਘੁੰਮੇਗਾ ਅਤੇ ਧਰਤੀ ਵਰਗਾ ਗੁਰੂਤਾਕਰਸ਼ਣ ਪੈਦਾ ਕਰੇਗਾ। ਇਸ ਸ਼ੀਸ਼ੇ ਦੀ ਉਚਾਈ ਲਗਭਗ 1300 ਫੁੱਟ ਅਤੇ ਘੇਰਾ 328 ਫੁੱਟ ਹੋਵੇਗਾ। ਇਸ ਨੂੰ ਸ਼ੁਰੂ ਹੋਣ ਵਿਚ ਲਗਭਗ 100 ਸਾਲ ਲੱਗਣਗੇ।
ਹੁਣ ਚੰਦ ਅਤੇ ਮੰਗਲ ਗ੍ਰਹਿ ‘ਤੇ ਜਾਣਾ ਆਸਾਨ ਹੋਵੇਗਾ
ਇਹ ਟੀਮ ਅੰਤਰ-ਗ੍ਰਹਿ ਆਵਾਜਾਈ ਪ੍ਰਣਾਲੀ ਬਣਾਉਣ ‘ਤੇ ਵੀ ਕੰਮ ਕਰੇਗੀ ਜਿਸ ਨੂੰ ‘ਹੈਕਸਾਟਰੈਕ’ ਕਿਹਾ ਜਾਵੇਗਾ। ਇਹ ਵਾਹਨ ਲੰਬੀ ਦੂਰੀ ਦੀ ਯਾਤਰਾ ਕਰਦੇ ਹੋਏ ਧਰਤੀ ਦੀ ਸਤ੍ਹਾ ਵਾਂਗ ਗੁਰੂਤਾਕਰਸ਼ਣ ਪੈਦਾ ਕਰੇਗਾ। ਘੱਟ ਗ੍ਰੈਵਿਟੀ ਵਿੱਚ ਸਫ਼ਰ ਕਰਦੇ ਹੋਏ ਮਨੁੱਖ ਨੂੰ ਕਈ ਤਰ੍ਹਾਂ ਦੀਆਂ ਸਮੱਸਿਆਵਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਟਰੇਨਾਂ ਵਿੱਚ ਹੈਕਸਾਗੋਨਲ ਆਕਾਰ ਦੇ ਕੈਪਸੂਲ ਵੀ ਹੋਣਗੇ ਜਿਨ੍ਹਾਂ ਨੂੰ ‘ਹੈਕਸਾਕੈਪਸੂਲ’ ਕਿਹਾ ਜਾਂਦਾ ਹੈ ਅਤੇ ਵਿਚਕਾਰ ਵਿੱਚ ਇੱਕ ਚੱਲਣ ਵਾਲਾ ਯੰਤਰ ਵੀ ਹੋਵੇਗਾ।
ਦੋ ਤਰ੍ਹਾਂ ਦੇ ਕੈਪਸੂਲ ਬਣਾਏ ਜਾਣਗੇ, ਇਕ ਧਰਤੀ ਤੋਂ ਚੰਦਰਮਾ ‘ਤੇ ਜਾਣ ਲਈ ਅਤੇ ਦੂਜਾ ਧਰਤੀ ਤੋਂ ਮੰਗਲ ‘ਤੇ ਜਾਣ ਲਈ। ਚੰਦਰਮਾ ‘ਤੇ ਜਾਣ ਵਾਲੇ ਕੈਪਸੂਲ ਦਾ ਘੇਰਾ 15 ਮੀਟਰ ਹੋਵੇਗਾ, ਜਦਕਿ ਮੰਗਲ ਗ੍ਰਹਿ ‘ਤੇ ਜਾਣ ਵਾਲੇ ਕੈਪਸੂਲ ਦਾ ਘੇਰਾ 30 ਮੀਟਰ ਹੋਵੇਗਾ। ਇਹ ਕੈਪਸੂਲ ਸਫ਼ਰ ਦੌਰਾਨ 1-ਜੀ ਗਰੈਵਿਟੀ ਬਰਕਰਾਰ ਰੱਖੇਗਾ।
ਚੰਦਰਮਾ ‘ਤੇ ਮੌਜੂਦ ਸਟੇਸ਼ਨ ਗੇਟਵੇ ਸੈਟੇਲਾਈਟ ਦੀ ਵਰਤੋਂ ਕਰੇਗਾ ਅਤੇ ਚੰਦਰ ਸਟੇਸ਼ਨ ਵਜੋਂ ਜਾਣਿਆ ਜਾਵੇਗਾ, ਜਦੋਂ ਕਿ ਮੰਗਲ ‘ਤੇ ਰੇਲਵੇ ਸਟੇਸ਼ਨ ਨੂੰ ਮੰਗਲ ਸਟੇਸ਼ਨ ਕਿਹਾ ਜਾਵੇਗਾ। ਇਹ ਮੰਗਲ ਗ੍ਰਹਿ ਦੇ ਉਪਗ੍ਰਹਿ ਫੋਬੋਸ ‘ਤੇ ਸਥਿਤ ਹੋਵੇਗਾ। ਹਿਊਮਨ ਸਪੇਸ ਸਾਇੰਸ ਸੈਂਟਰ ਮੁਤਾਬਕ ਧਰਤੀ ਸਟੇਸ਼ਨ ਨੂੰ ਟੈਰਾ ਸਟੇਸ਼ਨ ਕਿਹਾ ਜਾਵੇਗਾ।