ਲਾ ਟਰੋਬ ਯੂਨੀਵਰਸਿਟੀ ਨੇ ਇੱਕ ਨਵੀਂ ਪਹਿਲ AI ਬਿਜ਼ਨਸ ਸਟੂਡੀਓ ਸ਼ੁਰੂ ਕੀਤੀ ਹੈ। ਇਸ ਦਾ ਮਕਸਦ ਸ਼ਹਿਰੀ ਅਤੇ ਖੇਤਰੀ ਇਲਾਕਿਆਂ ਦੇ 1,000 ਛੋਟੇ ਅਤੇ ਦਰਮਿਆਨੇ ਕਾਰੋਬਾਰਾਂ (SMEs) ਨੂੰ ਆਰਟੀਫ਼ੀਸ਼ਲ ਇੰਟੈਲੀਜੈਂਸ (AI) ਨੂੰ ਸੁਰੱਖਿਅਤ ਅਤੇ ਜ਼ਿੰਮੇਵਾਰੀ ਨਾਲ ਵਰਤਣਾ ਸਿਖਾਉਣਾ ਹੈ। ਇਸ ਨਾਲ ਕਾਰੋਬਾਰ ਆਪਣੀ ਉਤਪਾਦਕਤਾ ਵਧਾ ਸਕਣਗੇ, ਨਵੇਂ ਵਿਚਾਰਾਂ ਨੂੰ ਅਪਣਾ ਸਕਣਗੇ ਅਤੇ ਆਪਣੇ ਕਰਮਚਾਰੀਆਂ ਦੇ ਹੁਨਰ ਵੀ ਵਧਾ ਸਕਣਗੇ। ਇਹ ਯੋਜਨਾ ਆਸਟ੍ਰੇਲੀਆ ਸਰਕਾਰ ਦੇ ਨੈਸ਼ਨਲ AI ਪਲਾਨ ਨੂੰ ਵੀ ਸਮਰਥਨ ਦਿੰਦੀ ਹੈ ਅਤੇ ਵਿਦਿਆਰਥੀਆਂ ਨੂੰ ਨੌਕਰੀ ਲਈ ਤਿਆਰ ਕਰਨ ਵਿੱਚ ਮਦਦ ਕਰੇਗੀ।
ਇਹ ਪਾਇਲਟ ਪ੍ਰੋਗਰਾਮ ਲਾ ਟਰੋਬ ਯੂਨੀਵਰਸਿਟੀ ਦੀ AI ਅਤੇ ਕਾਰੋਬਾਰ ਨਾਲ ਸੰਬੰਧਿਤ ਮੁਹਾਰਤ ਨੂੰ ਇਕੱਠਾ ਕਰਦਾ ਹੈ, ਤਾਂ ਜੋ ਛੋਟੇ ਅਤੇ ਦਰਮਿਆਨੇ ਕਾਰੋਬਾਰ AI ਦੀ ਵਰਤੋਂ ਦੇ ਸਹੀ ਅਤੇ ਅਮਲੀ ਤਰੀਕੇ ਸਮਝ ਸਕਣ ਅਤੇ ਉਹਨਾਂ ਨੂੰ ਆਪਣੇ ਕੰਮ ਵਿੱਚ ਲਾਗੂ ਕਰ ਸਕਣ। ਇਸ ਪ੍ਰੋਗਰਾਮ ਨੂੰ ਲਾ ਟਰੋਬ AI ਇੰਸਟੀਚਿਊਟ ਨੇ ਤਿਆਰ ਕੀਤਾ ਹੈ ਅਤੇ ਇਸ ਦੀ ਅਗਵਾਈ ਲਾ ਟਰੋਬ ਬਿਜ਼ਨਸ ਸਕੂਲ ਕਰ ਰਿਹਾ ਹੈ। ਇਹ ਕਾਰੋਬਾਰਾਂ ਲਈ AI ਸਿੱਖਣ ਅਤੇ ਵਰਤਣ ਦਾ ਇੱਕ ਆਸਾਨ ਰਸਤਾ ਮੁਹੱਈਆ ਕਰਦਾ ਹੈ। AI ਬਿਜ਼ਨਸ ਸਟੂਡੀਓ ਕਾਰੋਬਾਰਾਂ ਦੀ ਇਹ ਜਾਂਚ ਕਰਨ ਵਿੱਚ ਮਦਦ ਕਰੇਗਾ ਕਿ ਉਹਨਾਂ ਦਾ ਡਾਟਾ, ਤਕਨਾਲੋਜੀ ਅਤੇ ਕਰਮਚਾਰੀ AI ਲਈ ਕਿੰਨੇ ਤਿਆਰ ਹਨ। ਇਸ ਤੋਂ ਇਲਾਵਾ, ਇਹ ਕੰਮਾਂ ਨੂੰ ਆਟੋਮੈਟਿਕ ਬਣਾਉਣ, ਕੰਮ ਕਰਨ ਦੇ ਤਰੀਕਿਆਂ ਨੂੰ ਬਿਹਤਰ ਕਰਨ ਅਤੇ ਉਤਪਾਦਕਤਾ ਤੇ ਗਾਹਕ ਸੇਵਾ ਸੁਧਾਰਨ ਲਈ ਅਮਲੀ ਸਲਾਹ ਵੀ ਦੇਵੇਗਾ।
ਲਾ ਟਰੋਬ ਯੂਨੀਵਰਸਿਟੀ ਦੇ ਵਾਈਸ-ਚਾਂਸਲਰ ਪ੍ਰੋਫੈਸਰ ਥਿਓ ਫੈਰਲ ਨੇ ਕਿਹਾ ਕਿ, “ਕਈ ਛੋਟੇ ਕਾਰੋਬਾਰਾਂ ਨੇ ਦੱਸਿਆ ਹੈ ਕਿ ਉਹ AI ਦੀ ਵਰਤੋਂ ਕਰਨਾ ਤਾਂ ਚਾਹੁੰਦੇ ਹਨ, ਪਰ ਇਸ ਲਈ ਉਨ੍ਹਾਂ ਨੂੰ ਸਹਾਇਤਾ ਦੀ ਲੋੜ ਹੈ। ਸਾਡੇ ਮੈਲਬੌਰਨ ਤੋਂ ਮਿਲਡੂਰਾ ਤੱਕ ਦੇ ਕੈਂਪਸਾਂ ਨਾਲ ਜੁੜੇ ਛੋਟੇ ਕਾਰੋਬਾਰਾਂ ਨੇ ਸਾਨੂੰ ਦੱਸਿਆ ਹੈ ਕਿ ਉਹ AI ਨਾਲ ਮਿਲਣ ਵਾਲੇ ਮੌਕਿਆਂ ਨੂੰ ਸਮਝਦੇ ਹਨ, ਪਰ ਉਨ੍ਹਾਂ ਨੂੰ ਇਸ ਦੀ ਸ਼ੁਰੂਆਤ ਕਰਨ ਲਈ ਮਦਦ ਚਾਹੀਦੀ ਹੈ। ਸਾਡੇ ਨਵੇਂ AI ਬਿਜ਼ਨਸ ਸਟੂਡੀਓ ਦਾ ਟੀਚਾ 2027 ਅਤੇ 2028 ਦੌਰਾਨ 1,000 ਤੋਂ ਵੱਧ ਛੋਟੇ ਅਤੇ ਦਰਮਿਆਨੇ ਕਾਰੋਬਾਰਾਂ ਨੂੰ AI ਅਪਣਾਉਣ ਵਿੱਚ ਮਦਦ ਕਰਨਾ ਹੈ। ਅਸੀਂ ਉਨ੍ਹਾਂ ਦੀ ਡਾਟਾ, ਤਕਨਾਲੋਜੀ ਅਤੇ ਕਰਮਚਾਰੀਆਂ ਦੀ ਤਿਆਰੀ ਦਾ ਮੁਲਾਂਕਣ ਕਰਾਂਗੇ, ਕੰਮਾਂ ਨੂੰ ਆਟੋਮੈਟਿਕ ਬਣਾਉਣ ਦੇ ਮੌਕੇ ਲੱਭਾਂਗੇ ਅਤੇ ਉਤਪਾਦਕਤਾ ਅਤੇ ਗਾਹਕਾਂ ਲਈ ਬਿਹਤਰ ਨਤੀਜੇ ਪ੍ਰਾਪਤ ਕਰਨ ਵਾਸਤੇ ਅਮਲੀ ਸਿਫ਼ਾਰਸ਼ਾਂ ਦੇਵਾਂਗੇ।”
ਲਾ ਟਰੋਬ ਦਾ ਨਵਾਂ AI ਬਿਜ਼ਨਸ ਸਟੂਡੀਓ ਸਰਕਾਰ ਦੀ AI ਯੋਜਨਾ ਨੂੰ ਦੇਵੇਗਾ ਮਜ਼ਬੂਤੀ
ਲਾ ਟਰੋਬ ਯੂਨੀਵਰਸਿਟੀ ਦਾ ਨਵਾਂ AI ਬਿਜ਼ਨਸ ਸਟੂਡੀਓ ਆਸਟ੍ਰੇਲੀਆ ਸਰਕਾਰ ਦੀ ਨੈਸ਼ਨਲ AI ਪਲਾਨ ਦੇ ਇੱਕ ਮਹੱਤਵਪੂਰਨ ਟੀਚੇ ਨੂੰ ਪੂਰਾ ਕਰਨ ਵਿੱਚ ਮਦਦ ਕਰੇਗਾ। ਇਸ ਦਾ ਮਕਸਦ ਇਹ ਹੈ ਕਿ ਵੱਧ ਤੋਂ ਵੱਧ ਆਸਟ੍ਰੇਲੀਅਨ ਕਾਰੋਬਾਰ, ਖ਼ਾਸ ਕਰਕੇ ਛੋਟੇ, ਦਰਮਿਆਨੇ ਅਤੇ ਖੇਤਰੀ ਕਾਰੋਬਾਰ, AI ਦੀ ਵਰਤੋਂ ਕਰਕੇ ਹੋਰ ਮੁਕਾਬਲੇਯੋਗ, ਪ੍ਰਭਾਵਸ਼ਾਲੀ ਅਤੇ ਨਵੀਂ ਤਕਨਾਲੋਜੀ ਦਾ ਲਾਭ ਲੈ ਸਕਣ। ਸਰਕਾਰ ਦੀ ਯੋਜਨਾ ਮੁਤਾਬਕ, AI ਨੂੰ ਜ਼ਿੰਮੇਵਾਰੀ ਨਾਲ ਅਪਣਾਉਣਾ ਅਤੇ ਕਰਮਚਾਰੀਆਂ ਨੂੰ ਇਸ ਲਈ ਤਿਆਰ ਕਰਨਾ ਦੇਸ਼ ਦੀ ਆਰਥਿਕਤਾ ਨੂੰ ਹੋਰ ਮਜ਼ਬੂਤ ਅਤੇ ਉਤਪਾਦਕ ਬਣਾਉਣ ਲਈ ਬਹੁਤ ਜ਼ਰੂਰੀ ਹੈ। ਕਾਰੋਬਾਰਾਂ ਦੇ ਨਾਲ-ਨਾਲ, ਲਾ ਟਰੋਬ ਯੂਨੀਵਰਸਿਟੀ ਦੇ ਵਿਦਿਆਰਥੀਆਂ ਨੂੰ ਵੀ ਇਸ ਪ੍ਰੋਗਰਾਮ ਦਾ ਵੱਡਾ ਫਾਇਦਾ ਮਿਲੇਗਾ। ਉਨ੍ਹਾਂ ਨੂੰ ਅਸਲ ਛੋਟੇ ਅਤੇ ਦਰਮਿਆਨੇ ਸ਼ਹਿਰੀ ਅਤੇ ਖੇਤਰੀ ਕਾਰੋਬਾਰਾਂ ਨਾਲ ਕੰਮ ਕਰਕੇ AI ਦੀ ਵਰਤੋਂ ਦਾ ਹੱਥੋਂ-ਹੱਥ ਤਜਰਬਾ ਮਿਲੇਗਾ। ਇਸ ਨਾਲ ਵਿਦਿਆਰਥੀ ਨੌਕਰੀ ਵਿੱਚ ਜਾਣ ਤੋਂ ਪਹਿਲਾਂ ਹੀ AI ਲਈ ਤਿਆਰ ਹੋਣਗੇ।
ਇਸ ਨਵੇਂ ਪ੍ਰੋਗਰਾਮ ਦੀ ਸ਼ੁਰੂਆਤ ਜੁਲਾਈ ਵਿੱਚ 21 ਬਿਜ਼ਨਸ ਸਕੂਲ ਦੇ ਵਿਦਿਆਰਥੀਆਂ ਨਾਲ ਪਾਇਲਟ ਪ੍ਰਾਜੈਕਟ ਵਜੋਂ ਕੀਤੀ ਗਈ ਹੈ। ਬਾਅਦ ਵਿੱਚ ਇਸ ਨੂੰ ਪੂਰੀ ਯੂਨੀਵਰਸਿਟੀ ਵਿੱਚ ਲਾਗੂ ਕੀਤਾ ਜਾਵੇਗਾ। ਵਿਦਿਆਰਥੀ ਅਧਿਆਪਕਾਂ ਦੀ ਨਿਗਰਾਨੀ ਹੇਠ ਟੀਮਾਂ ਵਿੱਚ ਕੰਮ ਕਰਨਗੇ ਅਤੇ ਕਾਰੋਬਾਰਾਂ ਦੀਆਂ ਅਸਲ ਸਮੱਸਿਆਵਾਂ ਲਈ ਅਮਲੀ ਹੱਲ ਅਤੇ ਸਿਫ਼ਾਰਸ਼ਾਂ ਤਿਆਰ ਕਰਨਗੇ। ਇਸ ਨਾਲ ਉਨ੍ਹਾਂ ਨੂੰ ਕੀਮਤੀ ਵਿਹਾਰਕ ਤਜਰਬਾ ਅਤੇ AI ਦੀਆਂ ਲਾਗੂ ਕਰਨ ਵਾਲੀਆਂ ਕਾਬਲੀਆਂ ਹਾਸਲ ਹੋਣਗੀਆਂ। ਇਸ ਪ੍ਰੋਗਰਾਮ ਵਿੱਚ ਇੱਕ “AI ਬੂਟ ਕੈਂਪ” ਵੀ ਹੋਵੇਗਾ, ਜਿਸ ਰਾਹੀਂ ਵਿਦਿਆਰਥੀਆਂ ਨੂੰ ਤੇਜ਼ੀ ਨਾਲ AI ਦੀ ਟ੍ਰੇਨਿੰਗ ਦਿੱਤੀ ਜਾਵੇਗੀ। ਇਸ ਤੋਂ ਬਾਅਦ ਉਹ 10 ਹਫ਼ਤਿਆਂ ਲਈ ਇੱਕ ਸਾਂਝੇਦਾਰ ਸੰਸਥਾ ਵਿੱਚ ਪ੍ਰਾਜੈਕਟ ਕਰਨਗੇ, ਜਿੱਥੇ ਉਹ ਛੋਟੇ ਅਤੇ ਦਰਮਿਆਨੇ ਕਾਰੋਬਾਰਾਂ ਨੂੰ AI ਨਾਲ ਜੁੜੀਆਂ ਸੇਵਾਵਾਂ ਅਤੇ ਸਲਾਹ ਮੁਹੱਈਆ ਕਰਵਾਉਣਗੇ। ਪਾਇਲਟ ਪ੍ਰੋਗਰਾਮ ਵਿੱਚ ਸ਼ਾਮਲ ਵਿਦਿਆਰਥੀ ਤਿੰਨ ਕਾਰੋਬਾਰਾਂ ਵਿੱਚੋਂ ਕਿਸੇ ਇੱਕ ਨਾਲ ਕੰਮ ਕਰਨਗੇ। ਇਨ੍ਹਾਂ ਵਿੱਚ ਮੈਲਬੌਰਨ ਦੀ ਕੰਪਨੀ ਇਨਸਰਜੈਂਸ (Insurgence) ਵੀ ਸ਼ਾਮਲ ਹੈ, ਜੋ ਸੰਸਥਾਵਾਂ ਨੂੰ AI ਵਿੱਚ ਨਿਵੇਸ਼ ਕਰਨ ਅਤੇ ਇਸ ਦੀ ਜ਼ਿੰਮੇਵਾਰੀ ਨਾਲ ਵਰਤੋਂ ਕਰਕੇ ਅਸਲ ਕਾਰੋਬਾਰੀ ਸਮੱਸਿਆਵਾਂ ਦਾ ਹੱਲ ਲੱਭਣ ਵਿੱਚ ਮਦਦ ਕਰਦੀ ਹੈ।
ਤੀਜੇ ਸਾਲ ਦੀ ਬਿਜ਼ਨਸ ਵਿਦਿਆਰਥਣ ਅੰਨਾ ਸਕੂਗ ਆਲਕਵਿਸਟ (Anna Skoog Ahlqvist) ਵੀ ਇਸ ਪ੍ਰੋਗਰਾਮ ਤਹਿਤ ਇਨਸਰਜੈਂਸ ਨਾਲ ਕੰਮ ਕਰੇਗੀ। ਉਹ ਅਸਲ ਕਾਰੋਬਾਰੀ ਤਜਰਬਾ ਹਾਸਲ ਕਰਨ ਅਤੇ ਆਪਣੀ ਸਮੱਸਿਆ ਹੱਲ ਕਰਨ ਦੀ ਯੋਗਤਾ ਨੂੰ ਹੋਰ ਮਜ਼ਬੂਤ ਬਣਾਉਣ ਲਈ ਬਹੁਤ ਉਤਸ਼ਾਹਿਤ ਹੈ। ਅੰਨਾ ਨੇ ਕਿਹਾ, “ਮੈਨੂੰ AI ਵਿੱਚ ਇਸ ਲਈ ਦਿਲਚਸਪੀ ਹੈ ਕਿਉਂਕਿ ਇਸ ਵਿੱਚ ਬੇਅੰਤ ਸੰਭਾਵਨਾਵਾਂ ਹਨ। ਮੈਂ AI ਨਾਲ ਅਤੇ AI ਤੋਂ ਬਿਨਾਂ ਵੀ ਪੜ੍ਹਾਈ ਕੀਤੀ ਹੈ, ਇਸ ਲਈ ਮੈਂ ਦੇਖਿਆ ਹੈ ਕਿ ਇਹ ਕੰਮ ਨੂੰ ਤੇਜ਼ ਅਤੇ ਆਸਾਨ ਬਣਾਉਂਦਾ ਹੈ, ਖੋਜ ਵਿੱਚ ਮਦਦ ਕਰਦਾ ਹੈ ਅਤੇ ਨਵੇਂ ਵਿਚਾਰ ਲੱਭਣ ਵਿੱਚ ਸਹਾਇਕ ਹੁੰਦਾ ਹੈ। ਪਰ ਇਸ ਦੇ ਨਾਲ-ਨਾਲ ਆਪਣੀ ਸੋਚ ਅਤੇ ਸਮਝ ਵੀ ਬਹੁਤ ਜ਼ਰੂਰੀ ਹੈ। ਮੈਂ ਚਾਹੁੰਦੀ ਹਾਂ ਕਿ ਮੈਂ AI ਦੇ ਵਿਹਾਰਕ ਹੁਨਰ ਸਿੱਖਾਂ ਅਤੇ ਜਾਣਾਂ ਕਿ ਕਾਰੋਬਾਰ ਵਿੱਚ ਇਸ ਦੀ ਸਹੀ ਵਰਤੋਂ ਕਿਵੇਂ ਕੀਤੀ ਜਾਵੇ।”
ਇਨਸਰਜੈਂਸ (Insurgence) ਦੇ ਮੈਨੇਜਿੰਗ ਡਾਇਰੈਕਟਰ ਮੈਟਿਓ ਕਾਸਟੀਐਲੋ ਨੇ ਕਿਹਾ ਕਿ, “ਉਨ੍ਹਾਂ ਦੀ ਕੰਪਨੀ ਦਾ ਮਕਸਦ ਸੰਸਥਾਵਾਂ ਨੂੰ AI ਅਪਣਾਉਣ ਵਿੱਚ ਮਦਦ ਕਰਨਾ ਹੈ ਤਾਂ ਜੋ ਉਹ ਹੋਰ ਸਮਝਦਾਰੀ ਨਾਲ ਕੰਮ ਕਰ ਸਕਣ। ਉਨ੍ਹਾਂ ਕਿਹਾ ਕਿ ਇਸ ਬਦਲਾਅ ਦੀ ਅਗਵਾਈ ਕਰਨ ਲਈ ਨਵੀਂ ਪੀੜ੍ਹੀ ਦੇ ਵਿਦਿਆਰਥੀਆਂ ਦਾ ਸਾਥ ਦੇਣਾ ਸਭ ਤੋਂ ਵਧੀਆ ਤਰੀਕਾ ਹੈ। ਵਿਦਿਆਰਥੀ ਹੀ ਉਹ ਲੋਕ ਹਨ ਜੋ ਛੋਟੇ ਅਤੇ ਦਰਮਿਆਨੇ ਕਾਰੋਬਾਰਾਂ ਨੂੰ AI ਵੱਲ ਬਦਲਾਅ ਕਰਨ ਵਿੱਚ ਸਭ ਤੋਂ ਵਧੀਆ ਮਦਦ ਕਰ ਸਕਦੇ ਹਨ। ਅੱਜ ਦੇ ਵਿਦਿਆਰਥੀ AI ਨਾਲ ਜਾਣੂ ਹਨ, ਨਵੀਆਂ ਚੀਜ਼ਾਂ ਸਿੱਖਣ ਲਈ ਉਤਸੁਕ ਹਨ ਅਤੇ AI ਬਿਜ਼ਨਸ ਸਟੂਡੀਓ ਰਾਹੀਂ ਉਹ ਸਿਰਫ਼ ਤਕਨਾਲੋਜੀ ਹੀ ਨਹੀਂ, ਸਗੋਂ ਇਹ ਵੀ ਸਿੱਖਣਗੇ ਕਿ ਇੱਕ ਕਾਰੋਬਾਰ ਅਸਲ ਵਿੱਚ ਕਿਵੇਂ ਚੱਲਦਾ ਹੈ, ਗਾਹਕਾਂ ਅਤੇ ਹੋਰ ਲੋਕਾਂ ਨਾਲ ਕਿਵੇਂ ਗੱਲਬਾਤ ਕਰਨੀ ਹੈ ਅਤੇ ਆਪਣੀ ਜਾਣਕਾਰੀ ਨੂੰ ਅਜਿਹੇ ਹੱਲਾਂ ਵਿੱਚ ਕਿਵੇਂ ਬਦਲਣਾ ਹੈ ਜੋ ਅਸਲ ਲਾਭ ਦੇਣ। ਬਹੁਤ ਸਾਰੇ ਕਾਰੋਬਾਰ AI ਨੂੰ ਲੈ ਕੇ ਚਿੰਤਤ ਹਨ ਕਿ ਇਸ ਦਾ ਉਨ੍ਹਾਂ ਦੇ ਕਰਮਚਾਰੀਆਂ ‘ਤੇ ਕੀ ਅਸਰ ਪਵੇਗਾ। ਪਰ ਅਸੀਂ ਵਿਦਿਆਰਥੀਆਂ ਨੂੰ ਉਹ ਨਵੀਂ ਪੀੜ੍ਹੀ ਮੰਨਦੇ ਹਾਂ ਜੋ ਕਾਰੋਬਾਰਾਂ ਦੇ ਕੰਮ ਕਰਨ ਦੇ ਤਰੀਕੇ ਨੂੰ ਨਵਾਂ ਰੂਪ ਦੇਵੇਗੀ। ਇਸ ਲਈ ਅਸੀਂ AI ਬਿਜ਼ਨਸ ਸਟੂਡੀਓ ਦਾ ਹਿੱਸਾ ਬਣਨ ਅਤੇ ਇਸ ਨੂੰ ਸਫਲ ਬਣਾਉਣ ਦਾ ਮੌਕਾ ਤੁਰੰਤ ਸਵੀਕਾਰ ਕੀਤਾ।”
ਲਾ ਟਰੋਬ ਬਿਜ਼ਨਸ ਸਕੂਲ ਦੇ ਡੀਨ ਪ੍ਰੋਫੈਸਰ ਕੋਲਿਨ ਹਿਗਿਨਜ਼ ਨੇ ਕਿਹਾ ਕਿ, “ਯੂਨੀਵਰਸਿਟੀ ਕਾਰੋਬਾਰੀ ਸਿੱਖਿਆ ਵਿੱਚ ਇੱਕ ਨਵਾਂ ਅਤੇ ਵਿਹਾਰਕ ਸਿੱਖਣ ਦਾ ਤਜਰਬਾ ਦੇਣ ਲਈ ਵਚਨਬੱਧ ਹੈ। ਭਵਿੱਖ ਦੀਆਂ ਨੌਕਰੀਆਂ ਅਤੇ AI ਨਾਲ ਜੁੜੇ ਮੌਕਿਆਂ ਲਈ ਵਿਦਿਆਰਥੀਆਂ ਕੋਲ ਅਸਲ ਕਾਰੋਬਾਰਾਂ ਨਾਲ ਕੰਮ ਕਰਨ ਦਾ ਹੱਥੋਂ-ਹੱਥ ਤਜਰਬਾ ਹੋਣਾ ਬਹੁਤ ਜ਼ਰੂਰੀ ਹੈ। AI ਬਿਜ਼ਨਸ ਸਟੂਡੀਓ ਵਿਦਿਆਰਥੀਆਂ ਨੂੰ ਨਾ ਸਿਰਫ਼ ਭਵਿੱਖ ਦੀਆਂ ਨੌਕਰੀਆਂ ਲਈ ਲੋੜੀਂਦੇ ਹੁਨਰ ਅਤੇ ਤਜਰਬਾ ਦੇਵੇਗਾ, ਸਗੋਂ ਉਨ੍ਹਾਂ ਨੂੰ ਕਾਰੋਬਾਰਾਂ ਨਾਲ ਸੰਪਰਕ ਬਣਾਉਣ ਅਤੇ ਪੜ੍ਹਾਈ ਪੂਰੀ ਹੋਣ ਤੋਂ ਪਹਿਲਾਂ ਹੀ ਰੁਜ਼ਗਾਰਦਾਤਿਆਂ ਨਾਲ ਕੰਮ ਕਰਨ ਦਾ ਭਰੋਸਾ ਵੀ ਮਿਲੇਗਾ।”
AI ਇੰਸਟੀਚਿਊਟ ਦੀ ਡਾਇਰੈਕਟਰ ਅਤੇ AI ਬਿਜ਼ਨਸ ਸਟੂਡੀਓ ਦੀ ਮੁਖੀ ਪੈਟ੍ਰਿਸੀਆ ਹਾਊਇਸ ਨੇ ਕਿਹਾ ਕਿ, “ਉਨ੍ਹਾਂ ਦਾ ਟੀਚਾ ਇਸ ਪ੍ਰੋਗਰਾਮ ਨੂੰ ਪੂਰੀ ਯੂਨੀਵਰਸਿਟੀ ਵਿੱਚ ਫੈਲਾਉਣਾ ਹੈ, ਤਾਂ ਜੋ ਹਜ਼ਾਰਾਂ ਵਿਦਿਆਰਥੀ ਅਸਲ ਉਦਯੋਗਿਕ ਤਜਰਬਾ ਹਾਸਲ ਕਰ ਸਕਣ ਅਤੇ ਕਾਰੋਬਾਰਾਂ ਨੂੰ AI ਅਪਣਾਉਣ ਲਈ ਇੱਕ ਆਸਾਨ ਮੌਕਾ ਮਿਲ ਸਕੇ। ਜਿਵੇਂ-ਜਿਵੇਂ AI ਵੱਖ-ਵੱਖ ਪੇਸ਼ਿਆਂ ਅਤੇ ਉਦਯੋਗਾਂ ਨੂੰ ਬਦਲ ਰਿਹਾ ਹੈ, ਯੂਨੀਵਰਸਿਟੀਆਂ ਦੀ ਜ਼ਿੰਮੇਵਾਰੀ ਵੀ ਪਹਿਲਾਂ ਨਾਲੋਂ ਵੱਧ ਮਹੱਤਵਪੂਰਨ ਹੋ ਗਈ ਹੈ। ਸਾਡੀ ਜ਼ਿੰਮੇਵਾਰੀ ਸਿਰਫ਼ ਨਵੀਂ ਤਕਨਾਲੋਜੀ ਅਪਣਾਉਣ ਦੀ ਨਹੀਂ ਹੈ, ਸਗੋਂ ਇਹ ਯਕੀਨੀ ਬਣਾਉਣ ਦੀ ਵੀ ਹੈ ਕਿ AI ਦੀ ਵਰਤੋਂ ਨੈਤਿਕਤਾ, ਜ਼ਿੰਮੇਵਾਰੀ ਅਤੇ ਅਜਿਹੇ ਤਰੀਕੇ ਨਾਲ ਹੋਵੇ ਜਿਸ ਨਾਲ ਲੋਕਾਂ, ਉਦਯੋਗਾਂ ਅਤੇ ਭਾਈਚਾਰਿਆਂ ਨੂੰ ਅਸਲ ਲਾਭ ਮਿਲੇ। AI ਇੰਸਟੀਚਿਊਟ ਸਾਨੂੰ ਭਵਿੱਖ ਲਈ ਲੋੜੀਂਦੇ ਹੁਨਰ, ਸਾਂਝੇਦਾਰੀਆਂ ਅਤੇ ਸਾਂਝੀ ਸਮਝ ਵਿਕਸਿਤ ਕਰਨ ਵਿੱਚ ਮਦਦ ਕਰੇਗਾ। ਇਹ ਵਿਦਿਆਰਥੀਆਂ ਨੂੰ AI ਵਾਲੇ ਭਵਿੱਖ ਦੇ ਰੁਜ਼ਗਾਰ ਲਈ ਤਿਆਰ ਕਰੇਗਾ, ਖੋਜਕਰਤਾਵਾਂ ਨੂੰ ਆਪਣੀਆਂ ਖੋਜਾਂ ਨੂੰ ਅਸਲ ਜੀਵਨ ਵਿੱਚ ਲਾਗੂ ਕਰਨ ਵਿੱਚ ਸਹਾਇਤਾ ਦੇਵੇਗਾ ਅਤੇ ਯੂਨੀਵਰਸਿਟੀ ਦੇ ਕਰਮਚਾਰੀਆਂ ਅਤੇ ਭਾਈਵਾਲਾਂ ਲਈ ਮਿਲ ਕੇ ਕੰਮ ਕਰਨ ਦੇ ਨਵੇਂ ਮੌਕੇ ਪੈਦਾ ਕਰੇਗਾ।”
ਲਾ ਟਰੋਬ ਯੂਨੀਵਰਸਿਟੀ ਵਿੱਚ AI
ਲਾ ਟਰੋਬ ਯੂਨੀਵਰਸਿਟੀ ਆਸਟ੍ਰੇਲੀਆ ਦੀਆਂ ਪ੍ਰਮੁੱਖ AI-ਫਸਟ ਯੂਨੀਵਰਸਿਟੀਆਂ ਵਿੱਚੋਂ ਇੱਕ ਹੈ। ਯੂਨੀਵਰਸਿਟੀ ਪੜ੍ਹਾਈ, ਖੋਜ, ਉਦਯੋਗਾਂ ਨਾਲ ਸਾਂਝੇਦਾਰੀ ਅਤੇ ਆਪਣੇ ਰੋਜ਼ਾਨਾ ਕੰਮਕਾਜ ਵਿੱਚ AI ਦੀ ਜ਼ਿੰਮੇਵਾਰੀ ਨਾਲ ਅਤੇ ਵੱਡੇ ਪੱਧਰ ‘ਤੇ ਵਰਤੋਂ ਕਰ ਰਹੀ ਹੈ। ਯੂਨੀਵਰਸਿਟੀ ਦੀ AI ਨੀਤੀ ਦਾ ਕੇਂਦਰ ਲੋਕ ਹਨ। ਇਸ ਦਾ ਮਕਸਦ ਇਹ ਯਕੀਨੀ ਬਣਾਉਣਾ ਹੈ ਕਿ ਹਰ ਵਿਦਿਆਰਥੀ, ਭਾਵੇਂ ਉਹ ਕਿਸੇ ਵੀ ਪਿਛੋਕੜ ਜਾਂ ਇਲਾਕੇ ਤੋਂ ਹੋਵੇ, AI ਵਾਲੇ ਭਵਿੱਖ ਲਈ ਤਿਆਰ ਹੋ ਸਕੇ। ਇਸ ਦੇ ਨਾਲ ਹੀ, ਹਰ ਕਰਮਚਾਰੀ ਨੂੰ ਵੀ AI ਟੂਲ ਉਪਲਬਧ ਕਰਵਾਏ ਜਾ ਰਹੇ ਹਨ ਤਾਂ ਜੋ ਉਹ ਆਪਣਾ ਕੰਮ ਹੋਰ ਆਸਾਨੀ ਅਤੇ ਪ੍ਰਭਾਵਸ਼ਾਲੀ ਢੰਗ ਨਾਲ ਕਰ ਸਕਣ। ਓਪਨਏਆਈ (OpenAI) ਨਾਲ ਸਾਂਝੇਦਾਰੀ ਦੇ ਤਹਿਤ, 2027 ਤੱਕ ਲਾ ਟਰੋਬ ਯੂਨੀਵਰਸਿਟੀ ਦੇ 40,000 ਵਿਦਿਆਰਥੀਆਂ ਅਤੇ ਕਰਮਚਾਰੀਆਂ ਨੂੰ ChatGPT Edu ਦੀ ਸਹੂਲਤ ਮਿਲੇਗੀ। ਇਨ੍ਹਾਂ ਵਿੱਚੋਂ 5,000 ਲਾਇਸੈਂਸ ਇਸ ਸਾਲ ਹੀ ਜਾਰੀ ਕੀਤੇ ਜਾ ਚੁੱਕੇ ਹਨ। ਯੂਨੀਵਰਸਿਟੀ ਆਪਣੇ ਖੋਜਕਰਤਾਵਾਂ ਅਤੇ ਉਦਯੋਗਿਕ ਭਾਈਵਾਲਾਂ ਨਾਲ ਮਿਲ ਕੇ AI ਦੀ ਵਰਤੋਂ ਦੁਨੀਆ ਦੀਆਂ ਕਈ ਵੱਡੀਆਂ ਚੁਣੌਤੀਆਂ ਦਾ ਹੱਲ ਲੱਭਣ ਲਈ ਕਰ ਰਹੀ ਹੈ। ਇਸ ਵਿੱਚ ਕੈਂਸਰ ਦੇ ਇਲਾਜ, ਟੀਕੇ, ਡਿਜ਼ੀਟਲ ਸਿਹਤ, ਵਾਤਾਵਰਣ ਦੀ ਸੁਰੱਖਿਆ, ਸਮਾਰਟ ਖੇਤੀਬਾੜੀ, ਊਰਜਾ ਦੀ ਬਚਤ ਅਤੇ ਬਾਇਓਟੈਕਨੋਲੋਜੀ ਵਰਗੇ ਖੇਤਰ ਸ਼ਾਮਲ ਹਨ।
ਇਸ ਸਮੇਂ ਯੂਨੀਵਰਸਿਟੀ ਕਈ ਨਵੇਂ AI ਕੋਰਸ ਸ਼ੁਰੂ ਕਰ ਰਹੀ ਹੈ। ਇਨ੍ਹਾਂ ਵਿੱਚ AI MBA, ਬੈਚਲਰ ਆਫ AI ਇੰਜੀਨੀਅਰਿੰਗ ਅਤੇ AI ਇਨੋਵੇਸ਼ਨ ਵੈਂਚਰਜ਼ ਵਰਗੇ ਨਵੇਂ ਪ੍ਰੋਗਰਾਮ ਸ਼ਾਮਲ ਹਨ। ਇਹ ਪਹਿਲਾਂ ਤੋਂ ਚੱਲ ਰਹੇ AI-ਕੇਂਦਰਿਤ ਅੰਡਰਗ੍ਰੈਜੂਏਟ ਅਤੇ ਪੋਸਟਗ੍ਰੈਜੂਏਟ ਕੋਰਸਾਂ, ਜਿਵੇਂ ਕਿ ਮਾਸਟਰ ਆਫ ਆਰਟੀਫ਼ੀਸ਼ਲ ਇੰਟੈਲੀਜੈਂਸ, ਦੇ ਨਾਲ ਮਿਲ ਕੇ ਵਿਦਿਆਰਥੀਆਂ ਨੂੰ AI ਖੇਤਰ ਵਿੱਚ ਮਜ਼ਬੂਤ ਸਿੱਖਿਆ ਪ੍ਰਦਾਨ ਕਰਨਗੇ।