ਵਿਕਟੋਰੀਆ ਵਿੱਚ ਨੌਜਵਾਨ ਫਿਲਮਕਾਰਾਂ ਵੱਲੋਂ ਬਣਾਈਆਂ ਦੋ ਨਵੀਆਂ ਛੋਟੀਆਂ ਫਿਲਮਾਂ ਇਸ ਹਫ਼ਤੇ ਪ੍ਰੀਮੀਅਰ ਹੋਈਆਂ ਹਨ। ਇਹ ਫਿਲਮਾਂ Transport Accident Commission (TAC) ਦੀ Split Second Competition ਦਾ ਹਿੱਸਾ ਹਨ, ਜਿਸਦਾ ਮਕਸਦ ਨੌਜਵਾਨਾਂ ਨੂੰ ਖਤਰਨਾਕ ਡਰਾਈਵਿੰਗ ਬਾਰੇ ਸੋਚਣ ਲਈ ਪ੍ਰੇਰਿਤ ਕਰਨਾ ਹੈ।
ਇਹ ਮੁਕਾਬਲਾ ਹੁਣ ਆਪਣੇ ਸੱਤਵੇਂ ਸਾਲ ਵਿੱਚ ਹੈ। ਇਸ ਵਿੱਚ 18 ਤੋਂ 30 ਸਾਲ ਦੇ ਨੌਜਵਾਨ ਫਿਲਮਕਾਰ ਅਤੇ ਕੰਟੈਂਟ ਕ੍ਰੀਏਟਰ ਸੜਕ ਸੁਰੱਖਿਆ ਨਾਲ ਜੁੜੇ ਨਵੇਂ ਤੇ ਧਿਆਨ ਖਿੱਚਣ ਵਾਲੇ ਆਈਡੀਆ ਪੇਸ਼ ਕਰਦੇ ਹਨ। ਇਸ ਮੁਹਿੰਮ ਦਾ ਮੁੱਖ ਟੀਚਾ ਨੌਜਵਾਨ ਡਰਾਈਵਰ ਹਨ, ਕਿਉਂਕਿ ਸੜਕ ਹਾਦਸਿਆਂ ਵਿੱਚ ਇਸ ਉਮਰ ਦੇ ਲੋਕਾਂ ਦੀ ਸੰਖਿਆ ਹਾਲੇ ਵੀ ਜ਼ਿਆਦਾ ਹੈ।
2026 ਲਈ ਮੁਕਾਬਲੇ ਦੇ ਜੇਤੂ Stacey Park ਅਤੇ Shane Senanayake ਰਹੇ। ਦੋਵੇਂ ਹੀ ਵੱਖ–ਵੱਖ ਸੰਸਕ੍ਰਿਤਕ ਪਿਛੋਕੜ (CALD) ਨਾਲ ਸੰਬੰਧਿਤ ਹਨ। ਉਨ੍ਹਾਂ ਨੂੰ ਸੜਕ ਸੁਰੱਖਿਆ ਨਾਲ ਜੁੜੇ ਮੁੱਦਿਆਂ — ਜਿਵੇਂ ਕਿ ਹੌਲੀ ਸਪੀਡ ਲਿਮਿਟ ਤੋਂ ਉੱਪਰ ਡਰਾਈਵ ਕਰਨਾ ਅਤੇ ਸੀਟਬੈਲਟ ਨਾ ਪਹਿਨਣਾ — ਨੂੰ ਨਵੇਂ ਅਤੇ ਪ੍ਰਭਾਵਸ਼ਾਲੀ ਢੰਗ ਨਾਲ ਦਰਸਾਉਣ ਲਈ ਚੁਣਿਆ ਗਿਆ।
ਸਟੇਸੀ ਪਾਰਕ ਦੀ ਫਿਲਮ Keep the Tempo ਕੋਰੀਆਈ ਡਰੱਮਿੰਗ ਦੀ ਲੈਅ ਅਤੇ ਤਾਲ ਨੂੰ ਵਰਤ ਕੇ ਇੱਕ ਤਾਕਤਵਰ ਮੈਟਾਫਰ ਬਣਾਉਂਦੀ ਹੈ। ਫਿਲਮ ਦਿਖਾਉਂਦੀ ਹੈ ਕਿ ਗੱਡੀ ਦੀ ਸਪੀਡ ਵਿੱਚ ਥੋੜ੍ਹਾ ਜਿਹਾ ਵਾਧਾ ਵੀ ਕਿੰਨਾ ਖਤਰਨਾਕ ਹੋ ਸਕਦਾ ਹੈ।
ਦੂਜੇ ਪਾਸੇ, ਸ਼ੇਨ ਸੈਨਾਨਾਇਕੇ ਦੀ ਫਿਲਮ Unusual Behaviours ਹਾਸੇ ਅਤੇ ਅਜੀਬ ਤੁਲਨਾ ਦੀ ਵਰਤੋਂ ਕਰਦੀ ਹੈ। ਇਸ ਵਿੱਚ ਸੀਟਬੈਲਟ ਨਾ ਪਹਿਨਣ ਦੀ ਤੁਲਨਾ ਉਸ ਸ਼ਹਿਰ ਨਾਲ ਕੀਤੀ ਗਈ ਹੈ ਜਿੱਥੇ ਕੋਈ ਵੀ ਪੈਂਟ ਨਹੀਂ ਪਹਿਨਦਾ। ਇਸ ਰਾਹੀਂ ਇਹ ਦੱਸਿਆ ਗਿਆ ਹੈ ਕਿ ਸੀਟਬੈਲਟ ਪਹਿਨਣਾ ਕੋਈ ਚੋਣ ਨਹੀਂ, ਬਲਕਿ ਜ਼ਰੂਰੀ ਹੈ।
ਹਰ ਜੇਤੂ ਨੂੰ 5,000 ਡਾਲਰ ਦਾ ਨਕਦ ਇਨਾਮ ਮਿਲਿਆ। ਨਾਲ ਹੀ ਆਪਣੀ ਫਿਲਮ ਬਣਾਉਣ ਲਈ 45,000 ਡਾਲਰ ਦਾ ਪ੍ਰੋਡਕਸ਼ਨ ਬਜਟ ਵੀ ਦਿੱਤਾ ਗਿਆ।ਫਿਲਮਾਂ ਦੀ ਸਕ੍ਰਿਪਟ ਅਤੇ ਪ੍ਰੋਡਕਸ਼ਨ ਲਈ The Taboo Group ਅਤੇ Truce Films ਵੱਲੋਂ ਮੈਨਟਰਸ਼ਿਪ ਵੀ ਦਿੱਤੀ ਗਈ।
Split Second ਮੁਕਾਬਲਾ ਨੌਜਵਾਨਾਂ ਨੂੰ ਸੜਕ ਸੁਰੱਖਿਆ ਦੇ ਹੱਲ ਦਾ ਹਿੱਸਾ ਬਣਾਉਣ ਦੀ ਕੋਸ਼ਿਸ਼ ਕਰਦਾ ਹੈ। ਜਦੋਂ ਨੌਜਵਾਨ ਆਪਣੇ ਹੀ ਸਾਥੀਆਂ ਲਈ ਸੰਦੇਸ਼ ਬਣਾਉਂਦੇ ਹਨ, ਤਾਂ ਇਹ ਗੱਲਬਾਤ ਸ਼ੁਰੂ ਕਰਨ, ਸੋਚ ਬਦਲਣ ਅਤੇ ਡਰਾਈਵ ਕਰਦੇ ਸਮੇਂ ਹੋਰ ਸੁਰੱਖਿਅਤ ਫੈਸਲੇ ਕਰਨ ਲਈ ਪ੍ਰੇਰਿਤ ਕਰਦਾ ਹੈ।