ਬੀਜਿੰਗ – ਚੀਨ ਨੇ ਸ਼ੁੱਕਰਵਾਰ ਨੂੰ ਤੀਜਾ ਏਅਰਕ੍ਰਾਫਟ ਕੈਰੀਅਰ ਫੁਜਿਆਨ ਲਾਂਚ ਕੀਤਾ। ਸਰਕਾਰੀ ਮੀਡੀਆ ਰਿਪੋਰਟ ‘ਚ ਇਹ ਖੁਲਾਸਾ ਹੋਇਆ ਹੈ। ਸ਼ੰਘਾਈ ਵਿੱਚ ਕੋਰੋਨਾ ਸੰਕ੍ਰਮਣ ਕਾਰਨ ਲਗਾਏ ਗਏ ਲੌਕਡਾਊਨ ਕਾਰਨ ਇਸਦੀ ਲਾਂਚਿੰਗ ਵਿੱਚ ਦੇਰੀ ਹੋਈ ਸੀ। ਇਸ ਨੂੰ 23 ਅਪ੍ਰੈਲ ਨੂੰ ਪੀਪਲਜ਼ ਲਿਬਰੇਸ਼ਨ ਆਰਮੀ ਨੇਵੀ (PLAN) ਦੀ 73ਵੀਂ ਵਰ੍ਹੇਗੰਢ ਦੇ ਆਸ-ਪਾਸ ਲਾਂਚ ਕੀਤਾ ਜਾਣਾ ਸੀ।
ਚੀਨ ਨੇ ਅੱਜ ਪੂਰਬੀ ਤੱਟੀ ਸੂਬੇ ਫੁਜਿਆਨ ਤੋਂ ਆਪਣਾ ਤੀਜਾ ਏਅਰਕ੍ਰਾਫਟ ਕੈਰੀਅਰ ਲਾਂਚ ਕੀਤਾ ਹੈ। ਚੀਨ ਦਾ ਪਹਿਲਾ ਏਅਰਕ੍ਰਾਫਟ ਕੈਰੀਅਰ ਲਿਓਨਿੰਗ ਸੀ ਜਿਸ ਨੂੰ 2012 ਵਿੱਚ ਵਿਕਸਤ ਕੀਤਾ ਗਿਆ ਸੀ। ਇਸ ਤੋਂ ਬਾਅਦ ਦੂਜਾ ਏਅਰਕ੍ਰਾਫਟ ਕੈਰੀਅਰ ਸ਼ੈਨਡੋਂਗ 2019 ਵਿੱਚ ਵਿਕਸਤ ਕੀਤਾ ਗਿਆ ਸੀ।
ਚੀਨ ਨੇ ਚਾਰ ਏਅਰਕ੍ਰਾਫਟ ਕੈਰੀਅਰਜ਼ ਬਣਾ ਕੇ 2030 ਤੱਕ ਅਮਰੀਕਾ ਤੋਂ ਬਾਅਦ ਦੁਨੀਆ ਦੀ ਦੂਜੀ ਸਭ ਤੋਂ ਵੱਡੀ ਆਧੁਨਿਕ ਜਲ ਸੈਨਾ ਬਣਨ ਦਾ ਟੀਚਾ ਰੱਖਿਆ ਹੈ। ਲਿਓਨਿੰਗ ਅਤੇ ਸ਼ੈਨਡੋਂਗ ਵਾਂਗ, ਟਾਈਪ 003 ਏਅਰਕ੍ਰਾਫਟ ਕੈਰੀਅਰ ਵੀ ਇੱਕ ਰਵਾਇਤੀ ਡੀਜ਼ਲ-ਸੰਚਾਲਿਤ ਪਲੇਟਫਾਰਮ ਹੈ, ਜਦੋਂ ਕਿ ਚੀਨ ਦੇ ਚੌਥੇ ਏਅਰਕ੍ਰਾਫਟ ਕੈਰੀਅਰ ਦੇ ਪ੍ਰਮਾਣੂ ਰਿਐਕਟਰਾਂ ਨਾਲ ਲੈਸ ਹੋਣ ਦੀ ਉਮੀਦ ਹੈ।
ਸਾਲ 2018 ‘ਚ ਹੀ ਚੀਨ ਨੇ ਅਧਿਕਾਰਤ ਤੌਰ ‘ਤੇ ਪੁਸ਼ਟੀ ਕੀਤੀ ਸੀ ਕਿ ਉਸ ਨੇ ਤੀਜਾ ਏਅਰਕ੍ਰਾਫਟ ਕੈਰੀਅਰ ਬਣਾਉਣਾ ਸ਼ੁਰੂ ਕਰ ਦਿੱਤਾ ਹੈ। ਇਹ ਵੀ ਦੱਸਿਆ ਗਿਆ ਸੀ ਕਿ ਇਹ ਘਰੇਲੂ ਪੱਧਰ ‘ਤੇ ਬਣਾਏ ਗਏ ਪਹਿਲੇ ਏਅਰਕ੍ਰਾਫਟ ਕੈਰੀਅਰ ਤੋਂ ਵੀ ਵੱਡਾ ਅਤੇ ਜ਼ਿਆਦਾ ਸ਼ਕਤੀਸ਼ਾਲੀ ਹੋਵੇਗਾ।