ਮੈਲਬੌਰਨ – ਔਨਲਾਈਨ ਧੋਖਾਧੜੀ ਦੇ ਵਧ ਰਹੇ ਮਾਮਲਿਆਂ ਵਿਚਕਾਰ ਵਿਕਟੋਰੀਆ ਪੁਲਿਸ ਨੇ ਇੱਕ ਅਜਿਹੇ ਮਾਮਲੇ ਵਿੱਚ ਵੱਡੀ ਕਾਮਯਾਬੀ ਹਾਸਲ ਕੀਤੀ ਹੈ, ਜਿਸ ਵਿੱਚ ਧੋਖੇਬਾਜ਼ਾਂ ਨੇ ਇੱਕ ਪਰਿਵਾਰਕ ਕਾਰੋਬਾਰ ਤੋਂ 1 ਲੱਖ 18 ਹਜ਼ਾਰ ਆਸਟ੍ਰੇਲੀਅਨ ਡਾਲਰ ਦੀ ਰਕਮ ਆਪਣੇ ਖਾਤਿਆਂ ਵਿੱਚ ਟਰਾਂਸਫਰ ਕਰਵਾ ਲਈ ਸੀ। ਪੁਲਿਸ ਦੀ ਸਾਈਬਰ ਅਪਰਾਧ ਟੀਮ ਅਤੇ ਆਸਟ੍ਰੇਲੀਅਨ ਫੈਡਰਲ ਪੁਲਿਸ ਨਾਲ ਜੁੜੇ ਸਹਿਯੋਗ ਕੇਂਦਰ ਦੀ ਮਦਦ ਨਾਲ ਪੀੜਤ ਮਹਿਲਾ ਕੇਟ ਨੂੰ ਉਸ ਦੀ ਪੂਰੀ ਰਕਮ ਵਾਪਸ ਦਿਵਾਉਣ ਵਿੱਚ ਸਫਲਤਾ ਮਿਲੀ।
ਇਹ ਮਾਮਲਾ ਮੈਲਬੌਰਨ ਦੇ ਬੇਸਾਈਡ ਇਲਾਕੇ ਵਿੱਚ ਫਰਨੀਚਰ ਵੇਚਣ ਵਾਲੇ ਇੱਕ ਪਰਿਵਾਰਕ ਕਾਰੋਬਾਰ ਨਾਲ ਸਬੰਧਤ ਹੈ। ਕੇਟ ਇਸ ਕਾਰੋਬਾਰ ਵਿੱਚ ਕੰਮ ਕਰਦੀ ਹੈ। ਉਹ ਇੱਕ ਅਜਿਹੇ ਔਨਲਾਈਨ ਘੁਟਾਲੇ ਦਾ ਸ਼ਿਕਾਰ ਹੋਈ, ਜਿਸ ਵਿੱਚ ਧੋਖੇਬਾਜ਼ ਕਿਸੇ ਅਸਲੀ ਕੰਪਨੀ ਜਾਂ ਸਪਲਾਇਰ ਦੀ ਨਕਲ ਕਰਕੇ ਈਮੇਲ ਭੇਜਦੇ ਹਨ ਅਤੇ ਕਾਰੋਬਾਰੀਆਂ ਨੂੰ ਉਨ੍ਹਾਂ ਦੇ ਪੈਸੇ ਕਿਸੇ ਹੋਰ ਬੈਂਕ ਖਾਤੇ ਵਿੱਚ ਭੇਜਣ ਲਈ ਕਹਿੰਦੇ ਹਨ।
ਪੁਲਿਸ ਨੇ ਦੱਸਿਆ ਕਿ ਇਸ ਤਰ੍ਹਾਂ ਦਾ ਘੁਟਾਲਾ ਆਸਟ੍ਰੇਲੀਆ ਭਰ ਵਿੱਚ ਕਾਰੋਬਾਰੀਆਂ ਅਤੇ ਸਪਲਾਇਰਾਂ ਨੂੰ ਨਿਸ਼ਾਨਾ ਬਣਾ ਰਿਹਾ ਹੈ। ਵਿਕਟੋਰੀਆ ਪੁਲਿਸ ਦੀ ਸਾਈਬਰ ਅਪਰਾਧ ਟੀਮ ਨੂੰ ਇਸ ਸਾਲ ਜੁਲਾਈ ਤੋਂ ਲੈ ਕੇ ਹੁਣ ਤੱਕ ਇਸ ਘੁਟਾਲੇ ਨਾਲ ਸਬੰਧਤ 107 ਸ਼ਿਕਾਇਤਾਂ ਮਿਲ ਚੁੱਕੀਆਂ ਹਨ।
ਪੁਲਿਸ ਵੱਲੋਂ ਦਿੱਤੀ ਜਾਣਕਾਰੀ ਅਨੁਸਾਰ, 25 ਅਗਸਤ ਤੋਂ 5 ਸਤੰਬਰ ਦੇ ਵਿਚਕਾਰ ਕੇਟ ਨੂੰ ਇੱਕ ਅਸਲੀ ਸਪਲਾਇਰ ਵੱਲੋਂ ਕਈ ਈਮੇਲ ਮਿਲੀਆਂ ਸਨ। ਇਨ੍ਹਾਂ ਈਮੇਲਾਂ ਰਾਹੀਂ ਬਾਹਰ ਵਰਤੇ ਜਾਣ ਵਾਲੇ ਫਰਨੀਚਰ ਦੀ ਖੇਪ ਭੇਜਣ ਬਾਰੇ ਗੱਲਬਾਤ ਹੋ ਰਹੀ ਸੀ। ਇਸ ਆਰਡਰ ਦੀ ਕੀਮਤ 1 ਲੱਖ 18 ਹਜ਼ਾਰ ਡਾਲਰ ਸੀ। ਸ਼ੁਰੂ ਵਿੱਚ ਸਾਰਾ ਕੰਮ ਆਮ ਕਾਰੋਬਾਰੀ ਪ੍ਰਕਿਰਿਆ ਅਨੁਸਾਰ ਚੱਲ ਰਿਹਾ ਸੀ। ਕੇਟ ਨੂੰ ਇਹ ਪੂਰਾ ਭਰੋਸਾ ਸੀ ਕਿ ਉਹ ਆਪਣੇ ਅਸਲੀ ਸਪਲਾਇਰ ਨਾਲ ਹੀ ਗੱਲ ਕਰ ਰਹੀ ਹੈ। ਪਰ 7 ਸਤੰਬਰ ਤੋਂ 25 ਸਤੰਬਰ ਦੇ ਵਿਚਕਾਰ ਸਾਈਬਰ ਅਪਰਾਧੀਆਂ ਨੇ ਇਸੇ ਈਮੇਲ ਗੱਲਬਾਤ ਵਿੱਚ ਦਖ਼ਲ ਦੇ ਦਿੱਤਾ। ਉਨ੍ਹਾਂ ਨੇ ਸਪਲਾਇਰ ਦੀ ਪਛਾਣ ਅਪਣਾ ਕੇ ਕੇਟ ਨੂੰ ਹੋਰ ਈਮੇਲ ਭੇਜਣੀਆਂ ਸ਼ੁਰੂ ਕਰ ਦਿੱਤੀਆਂ। ਇਨ੍ਹਾਂ ਸੁਨੇਹਿਆਂ ਵਿੱਚ ਦੱਸਿਆ ਗਿਆ ਕਿ ਸਪਲਾਇਰ ਦੇ ਬੈਂਕ ਖਾਤੇ ਦੀ ਜਾਣਕਾਰੀ ਬਦਲ ਗਈ ਹੈ ਅਤੇ ਹੁਣ ਭੁਗਤਾਨ ਨਵੇਂ ਖਾਤੇ ਵਿੱਚ ਕੀਤਾ ਜਾਣਾ ਚਾਹੀਦਾ ਹੈ। ਧੋਖੇਬਾਜ਼ਾਂ ਨੇ ਕੇਟ ਉੱਤੇ ਇਹ ਕਹਿ ਕੇ ਦਬਾਅ ਪਾਇਆ ਕਿ ਭੁਗਤਾਨ ਤੁਰੰਤ ਕਰਨਾ ਜ਼ਰੂਰੀ ਹੈ। ਈਮੇਲਾਂ ਅਸਲੀ ਗੱਲਬਾਤ ਦਾ ਹੀ ਹਿੱਸਾ ਲੱਗਦੀਆਂ ਸਨ, ਇਸ ਲਈ ਕੇਟ ਨੂੰ ਧੋਖੇ ਦਾ ਸ਼ੱਕ ਨਹੀਂ ਹੋਇਆ। ਉਸ ਨੇ ਦੱਸੇ ਗਏ ਨਵੇਂ ਬੈਂਕ ਖਾਤੇ ਵਿੱਚ 1 ਲੱਖ 18 ਹਜ਼ਾਰ ਡਾਲਰ ਦੀ ਰਕਮ ਭੇਜ ਦਿੱਤੀ। ਇਸ ਤਰ੍ਹਾਂ ਕਾਰੋਬਾਰ ਲਈ ਕੀਤਾ ਜਾਣ ਵਾਲਾ ਅਸਲੀ ਭੁਗਤਾਨ ਧੋਖੇਬਾਜ਼ਾਂ ਦੇ ਕਬਜ਼ੇ ਵਾਲੇ ਖਾਤੇ ਵਿੱਚ ਪਹੁੰਚ ਗਿਆ।
ਜਦੋਂ ਕੇਟ ਦੇ ਬੈਂਕ ਨੇ ਉਸ ਨੂੰ ਸੰਭਾਵੀ ਧੋਖਾਧੜੀ ਬਾਰੇ ਸੁਚੇਤ ਕੀਤਾ, ਤਾਂ ਉਸ ਨੂੰ ਸ਼ੱਕ ਹੋਇਆ ਕਿ ਕੁਝ ਗਲਤ ਹੋ ਸਕਦਾ ਹੈ। ਇਸ ਤੋਂ ਬਾਅਦ ਉਸ ਨੇ ਈਮੇਲ ਰਾਹੀਂ ਸੰਪਰਕ ਕਰਨ ਦੀ ਬਜਾਏ ਆਪਣੇ ਅਸਲੀ ਸਪਲਾਇਰ ਨਾਲ ਫ਼ੋਨ ਉੱਤੇ ਸਿੱਧੀ ਗੱਲ ਕੀਤੀ। ਫ਼ੋਨ ਉੱਤੇ ਗੱਲ ਕਰਨ ਤੋਂ ਬਾਅਦ ਪਤਾ ਲੱਗਾ ਕਿ ਸਪਲਾਇਰ ਨੇ ਬੈਂਕ ਖਾਤੇ ਦੀ ਜਾਣਕਾਰੀ ਬਦਲਣ ਵਾਲੀ ਕੋਈ ਈਮੇਲ ਨਹੀਂ ਭੇਜੀ ਸੀ। ਇਸ ਤੋਂ ਸਪੱਸ਼ਟ ਹੋ ਗਿਆ ਕਿ ਕਿਸੇ ਨੇ ਸਪਲਾਇਰ ਦੀ ਨਕਲ ਕਰਕੇ ਈਮੇਲਾਂ ਰਾਹੀਂ ਧੋਖਾਧੜੀ ਕੀਤੀ ਸੀ।
ਕੇਟ ਨੇ ਤੁਰੰਤ ਪੁਲਿਸ ਨੂੰ ਮਾਮਲੇ ਦੀ ਰਿਪੋਰਟ ਦਿੱਤੀ ਅਤੇ ਆਸਟ੍ਰੇਲੀਆ ਦੇ ਔਨਲਾਈਨ ਸਾਈਬਰ ਅਪਰਾਧ ਰਿਪੋਰਟਿੰਗ ਪੋਰਟਲ ReportCyber ਰਾਹੀਂ ਵੀ ਸ਼ਿਕਾਇਤ ਦਰਜ ਕਰਵਾਈ। ਉਸ ਨੇ ਆਪਣੇ ਬੈਂਕ ਨਾਲ ਵੀ ਸੰਪਰਕ ਕੀਤਾ, ਪਰ ਬੈਂਕ ਉਸ ਸਮੇਂ ਭੇਜੀ ਗਈ ਰਕਮ ਵਾਪਸ ਨਹੀਂ ਮੰਗਵਾ ਸਕਿਆ।
ਹਾਲਾਂਕਿ, ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦਿਆਂ ਵਿਕਟੋਰੀਆ ਪੁਲਿਸ ਦੀ ਸਾਈਬਰ ਅਪਰਾਧ ਟੀਮ ਨੇ ਤੁਰੰਤ ਕਾਰਵਾਈ ਕੀਤੀ। ਇਸ ਕੰਮ ਵਿੱਚ ਆਸਟ੍ਰੇਲੀਅਨ ਫੈਡਰਲ ਪੁਲਿਸ ਦੇ ਅਧੀਨ ਕੰਮ ਕਰਨ ਵਾਲੇ ਜੁਆਇੰਟ ਪੁਲਿਸਿੰਗ ਸਾਈਬਰਕ੍ਰਾਈਮ ਕੋਆਰਡੀਨੇਸ਼ਨ ਸੈਂਟਰ (JPC3) ਨੇ ਵੀ ਸਹਿਯੋਗ ਦਿੱਤਾ। ਦੋਵਾਂ ਟੀਮਾਂ ਦੇ ਯਤਨਾਂ ਨਾਲ ਧੋਖਾਧੜੀ ਰਾਹੀਂ ਭੇਜੀ ਗਈ ਰਕਮ ਨੂੰ ਰੋਕਣ ਵਿੱਚ ਸਫਲਤਾ ਮਿਲੀ ਅਤੇ ਪੈਸੇ ਕੇਟ ਨੂੰ ਵਾਪਸ ਕਰ ਦਿੱਤੇ ਗਏ।
ਧੋਖਾਧੜੀ ਦਾ ਸ਼ਿਕਾਰ ਹੋਈ ਕੇਟ ਨੇ ਆਪਣੇ ਤਜਰਬੇ ਬਾਰੇ ਦੱਸਦਿਆਂ ਕਿਹਾ ਕਿ ਜਦੋਂ ਉਸ ਨੂੰ ਪਤਾ ਲੱਗਾ ਕਿ ਉਸ ਨਾਲ ਧੋਖਾ ਹੋਇਆ ਹੈ, ਤਾਂ ਉਹ ਬਹੁਤ ਘਬਰਾ ਗਈ ਸੀ। ਕੇਟ ਨੇ ਕਿਹਾ, “ਜਦੋਂ ਮੈਨੂੰ ਅਹਿਸਾਸ ਹੋਇਆ ਕਿ ਮੇਰੇ ਨਾਲ ਧੋਖਾਧੜੀ ਹੋਈ ਹੈ, ਤਾਂ ਮੇਰੀ ਹਾਲਤ ਬਹੁਤ ਖ਼ਰਾਬ ਹੋ ਗਈ ਸੀ। ਮੇਰੇ ਨਾਲ ਪਹਿਲਾਂ ਕਦੇ ਅਜਿਹਾ ਨਹੀਂ ਹੋਇਆ ਸੀ। ਮੈਨੂੰ ਲੱਗਿਆ ਸੀ ਕਿ ਮੇਰੇ ਪੈਸੇ ਹਮੇਸ਼ਾ ਲਈ ਗੁਆਚ ਗਏ ਹਨ। ਇਸ ਨਾਲ ਸਾਡੇ ਛੋਟੇ ਕਾਰੋਬਾਰ ਨੂੰ ਬਹੁਤ ਵੱਡਾ ਨੁਕਸਾਨ ਹੋ ਸਕਦਾ ਸੀ। ਪੁਲਿਸ ਦੀ ਮਦਦ ਨਾਲ ਪੈਸੇ ਵਾਪਸ ਮਿਲਣ ’ਤੇ ਮੈਨੂੰ ਬਹੁਤ ਵੱਡੀ ਰਾਹਤ ਮਿਲੀ। ਕੇਟ ਨੇ ਇਹ ਵੀ ਕਿਹਾ ਕਿ ਇਸ ਤਰ੍ਹਾਂ ਦੇ ਘੁਟਾਲਿਆਂ ਦਾ ਮੌਜੂਦ ਹੋਣਾ ਚਿੰਤਾ ਵਾਲੀ ਗੱਲ ਹੈ ਅਤੇ ਹੋਰ ਵੀ ਕਈ ਲੋਕ ਇਸ ਦਾ ਸ਼ਿਕਾਰ ਹੋ ਸਕਦੇ ਹਨ। ਉਸ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਜੇਕਰ ਕਿਸੇ ਨਾਲ ਧੋਖਾਧੜੀ ਹੁੰਦੀ ਹੈ, ਤਾਂ ਉਹ ਬਿਨਾਂ ਦੇਰੀ ਕੀਤੇ ਪੁਲਿਸ ਨੂੰ ਸੂਚਿਤ ਕਰਨ। ਕੇਟ ਨੇ ਕਿਹਾ, “ਮੈਂ ਪੁਲਿਸ ਦੀ ਕਾਰਵਾਈ ਲਈ ਬਹੁਤ ਧੰਨਵਾਦੀ ਹਾਂ। ਮੈਂ ਉਨ੍ਹਾਂ ਦਾ ਜਿੰਨਾ ਧੰਨਵਾਦ ਕਰਾਂ, ਥੋੜ੍ਹਾ ਹੈ। ਇਹ ਮਾਮਲਾ ਦਿਖਾਉਂਦਾ ਹੈ ਕਿ ਜੇਕਰ ਤੁਸੀਂ ਸਮੇਂ ਸਿਰ ਸ਼ਿਕਾਇਤ ਕਰਦੇ ਹੋ, ਤਾਂ ਪੁਲਿਸ ਤੁਹਾਡੀ ਮਦਦ ਕਰ ਸਕਦੀ ਹੈ।”
ਵਿਕਟੋਰੀਆ ਪੁਲਿਸ ਦੀ ਸਾਈਬਰ ਅਪਰਾਧ ਟੀਮ ਦੇ ਡਿਟੈਕਟਿਵ ਸਰਜੈਂਟ ਡੀਨ ਵਾਟਰਜ਼ ਨੇ ਕਿਹਾ ਕਿ ਇਸ ਤਰ੍ਹਾਂ ਦੇ ਘੁਟਾਲੇ ਪੂਰੇ ਵਿਕਟੋਰੀਆ ਰਾਜ ਵਿੱਚ ਕਾਰੋਬਾਰੀਆਂ ਅਤੇ ਸਪਲਾਇਰਾਂ ਨੂੰ ਨਿਸ਼ਾਨਾ ਬਣਾ ਰਹੇ ਹਨ। ਇਨ੍ਹਾਂ ਕਾਰਨ ਲੋਕਾਂ ਨੂੰ ਹਜ਼ਾਰਾਂ ਡਾਲਰਾਂ ਦਾ ਨੁਕਸਾਨ ਹੋ ਰਿਹਾ ਹੈ। ਉਨ੍ਹਾਂ ਦੱਸਿਆ ਕਿ ਧੋਖੇਬਾਜ਼ ਅਸਲੀ ਕੰਪਨੀਆਂ ਅਤੇ ਸਪਲਾਇਰਾਂ ਦੀ ਪਛਾਣ ਦੀ ਨਕਲ ਕਰਦੇ ਹਨ। ਉਹ ਗਾਹਕਾਂ ਨੂੰ ਈਮੇਲ ਭੇਜ ਕੇ ਉਨ੍ਹਾਂ ਨੂੰ ਅਸਲੀ ਭੁਗਤਾਨ ਕਿਸੇ ਧੋਖਾਧੜੀ ਵਾਲੇ ਬੈਂਕ ਖਾਤੇ ਵਿੱਚ ਭੇਜਣ ਲਈ ਮਨਾਉਂਦੇ ਹਨ। ਵਾਟਰਜ਼ ਅਨੁਸਾਰ, ਧੋਖੇਬਾਜ਼ ਅਕਸਰ ਭੁਗਤਾਨ ਨੂੰ ਬਹੁਤ ਜ਼ਰੂਰੀ ਦੱਸਦੇ ਹਨ ਅਤੇ ਲੋਕਾਂ ਉੱਤੇ ਤੁਰੰਤ ਪੈਸੇ ਭੇਜਣ ਦਾ ਦਬਾਅ ਬਣਾਉਂਦੇ ਹਨ। ਇਸ ਤਰ੍ਹਾਂ ਲੋਕਾਂ ਨੂੰ ਸੋਚਣ ਅਤੇ ਜਾਣਕਾਰੀ ਦੀ ਜਾਂਚ ਕਰਨ ਦਾ ਮੌਕਾ ਨਹੀਂ ਮਿਲਦਾ। ਉਨ੍ਹਾਂ ਕਿਹਾ, “ਕਿਸੇ ਧੋਖੇਬਾਜ਼ ਨੂੰ ਤੁਹਾਡੇ ਉੱਤੇ ਜਲਦਬਾਜ਼ੀ ਵਿੱਚ ਗਲਤ ਫ਼ੈਸਲਾ ਲੈਣ ਲਈ ਦਬਾਅ ਨਾ ਪਾਉਣ ਦਿਓ। ਜੇਕਰ ਕਿਸੇ ਕਾਰੋਬਾਰ ਜਾਂ ਸਪਲਾਇਰ ਨਾਲ ਗੱਲਬਾਤ ਕਰਨ ਤੋਂ ਬਾਅਦ ਤੁਹਾਨੂੰ ਭੁਗਤਾਨ ਲਈ ਨਵਾਂ ਬੈਂਕ ਖਾਤਾ ਦਿੱਤਾ ਜਾਂਦਾ ਹੈ, ਤਾਂ ਪੈਸੇ ਭੇਜਣ ਤੋਂ ਪਹਿਲਾਂ ਰੁਕੋ ਅਤੇ ਸਾਰੀ ਜਾਣਕਾਰੀ ਦੀ ਜਾਂਚ ਕਰੋ।” ਉਨ੍ਹਾਂ ਨੇ ਸਲਾਹ ਦਿੱਤੀ ਕਿ ਈਮੇਲ ਵਿੱਚ ਦਿੱਤੇ ਫ਼ੋਨ ਨੰਬਰ ਉੱਤੇ ਭਰੋਸਾ ਕਰਨ ਦੀ ਬਜਾਏ ਕੰਪਨੀ ਜਾਂ ਸਪਲਾਇਰ ਦੇ ਪਹਿਲਾਂ ਤੋਂ ਪਤਾ ਅਤੇ ਭਰੋਸੇਯੋਗ ਫ਼ੋਨ ਨੰਬਰ ਉੱਤੇ ਸਿੱਧਾ ਸੰਪਰਕ ਕਰਕੇ ਪੁਸ਼ਟੀ ਕੀਤੀ ਜਾਵੇ। ਜੇਕਰ ਕਿਸੇ ਨੇ ਧੋਖੇਬਾਜ਼ ਨੂੰ ਪੈਸੇ ਜਾਂ ਬੈਂਕ ਦੀ ਜਾਣਕਾਰੀ ਦੇ ਦਿੱਤੀ ਹੈ, ਤਾਂ ਤੁਰੰਤ ਆਪਣੇ ਬੈਂਕ ਨਾਲ ਸੰਪਰਕ ਕਰਨਾ ਚਾਹੀਦਾ ਹੈ। ਇਸ ਦੇ ਨਾਲ ਹੀ ਪੁਲਿਸ ਕੋਲ ਸ਼ਿਕਾਇਤ ਦਰਜ ਕਰਵਾਉਣੀ ਵੀ ਜ਼ਰੂਰੀ ਹੈ। ਵਾਟਰਜ਼ ਨੇ ਕਿਹਾ ਕਿ ਲੋਕਾਂ ਵੱਲੋਂ ਦਿੱਤੀ ਗਈ ਜਾਣਕਾਰੀ ਪੁਲਿਸ ਨੂੰ ਦੋਸ਼ੀਆਂ ਦੀ ਪਛਾਣ ਕਰਨ, ਉਨ੍ਹਾਂ ਦੀਆਂ ਗਤੀਵਿਧੀਆਂ ਨੂੰ ਰੋਕਣ ਅਤੇ ਹੋਰ ਲੋਕਾਂ ਨੂੰ ਇਸ ਤਰ੍ਹਾਂ ਦੇ ਘੁਟਾਲਿਆਂ ਤੋਂ ਬਚਾਉਣ ਵਿੱਚ ਮਦਦ ਕਰ ਸਕਦੀ ਹੈ।
ਪੁਲਿਸ ਨੇ ਵਿਅਕਤੀਆਂ, ਕਾਰੋਬਾਰੀਆਂ ਅਤੇ ਸਪਲਾਇਰਾਂ ਨੂੰ ਅਜਿਹੇ ਘੁਟਾਲਿਆਂ ਤੋਂ ਬਚਣ ਲਈ ਕੁਝ ਜ਼ਰੂਰੀ ਸਾਵਧਾਨੀਆਂ ਵਰਤਣ ਦੀ ਸਲਾਹ ਦਿੱਤੀ ਹੈ।
- ਸ਼ੱਕੀ ਈਮੇਲ ਦਾ ਜਵਾਬ ਨਾ ਦਿਓ: ਜੇਕਰ ਤੁਹਾਨੂੰ ਲੱਗਦਾ ਹੈ ਕਿ ਕੋਈ ਵਿਅਕਤੀ ਧੋਖਾਧੜੀ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਹੈ, ਤਾਂ ਉਸ ਨਾਲ ਗੱਲਬਾਤ ਜਾਰੀ ਨਾ ਰੱਖੋ।
- ਬੈਂਕ ਦੀ ਜਾਣਕਾਰੀ ਸਾਂਝੀ ਨਾ ਕਰੋ: ਆਪਣਾ ਪਤਾ, ਬੈਂਕ ਖਾਤੇ ਦੀ ਜਾਣਕਾਰੀ, ਵਿੱਤੀ ਵੇਰਵੇ ਜਾਂ ਹੋਰ ਨਿੱਜੀ ਸੰਪਰਕ ਜਾਣਕਾਰੀ ਕਿਸੇ ਸ਼ੱਕੀ ਵਿਅਕਤੀ ਨੂੰ ਨਾ ਦਿਓ।
- ਸਪਲਾਇਰ ਨਾਲ ਸਿੱਧਾ ਸੰਪਰਕ ਕਰੋ: ਜੇਕਰ ਕਿਸੇ ਈਮੇਲ ਵਿੱਚ ਬੈਂਕ ਖਾਤਾ ਬਦਲਣ ਜਾਂ ਨਵੇਂ ਖਾਤੇ ਵਿੱਚ ਪੈਸੇ ਭੇਜਣ ਲਈ ਕਿਹਾ ਜਾਂਦਾ ਹੈ, ਤਾਂ ਪਹਿਲਾਂ ਭਰੋਸੇਯੋਗ ਫ਼ੋਨ ਨੰਬਰ ਰਾਹੀਂ ਇਸ ਦੀ ਪੁਸ਼ਟੀ ਕਰੋ।
- ਜਲਦਬਾਜ਼ੀ ਵਿੱਚ ਭੁਗਤਾਨ ਨਾ ਕਰੋ: ਭਾਵੇਂ ਈਮੇਲ ਵਿੱਚ ਭੁਗਤਾਨ ਨੂੰ ਬਹੁਤ ਜ਼ਰੂਰੀ ਦੱਸਿਆ ਗਿਆ ਹੋਵੇ, ਫਿਰ ਵੀ ਪੂਰੀ ਜਾਂਚ ਤੋਂ ਬਿਨਾਂ ਪੈਸੇ ਨਾ ਭੇਜੋ।
- ਧੋਖਾਧੜੀ ਹੋਣ ’ਤੇ ਤੁਰੰਤ ਬੈਂਕ ਨੂੰ ਦੱਸੋ: ਜੇਕਰ ਤੁਸੀਂ ਗਲਤੀ ਨਾਲ ਪੈਸੇ ਭੇਜ ਦਿੱਤੇ ਹਨ ਜਾਂ ਬੈਂਕ ਦੀ ਜਾਣਕਾਰੀ ਸਾਂਝੀ ਕਰ ਦਿੱਤੀ ਹੈ, ਤਾਂ ਤੁਰੰਤ ਬੈਂਕ ਨਾਲ ਸੰਪਰਕ ਕਰੋ।
- ਈਮੇਲਾਂ ਅਤੇ ਸੁਨੇਹਿਆਂ ਦਾ ਰਿਕਾਰਡ ਸੰਭਾਲੋ: ਸ਼ੱਕੀ ਈਮੇਲਾਂ ਨੂੰ ਮਿਟਾਉਣ ਦੀ ਬਜਾਏ ਸੰਭਾਲ ਕੇ ਰੱਖੋ ਅਤੇ ਸੁਨੇਹਿਆਂ ਦੇ ਸਕ੍ਰੀਨਸ਼ਾਟ ਲਓ। ਇਹ ਪੁਲਿਸ ਦੀ ਜਾਂਚ ਵਿੱਚ ਮਦਦਗਾਰ ਹੋ ਸਕਦੇ ਹਨ।
ਜੇਕਰ ਤੁਹਾਨੂੰ ਸ਼ੱਕ ਹੈ ਕਿ ਤੁਸੀਂ ਕਿਸੇ ਘੁਟਾਲੇ ਦਾ ਨਿਸ਼ਾਨਾ ਬਣੇ ਹੋ, ਤਾਂ ਵਿਕਟੋਰੀਆ ਪੁਲਿਸ ਜਾਂ ReportCyber ਰਾਹੀਂ ਰਿਪੋਰਟ ਕਰੋ। ਜੇਕਰ ਤੁਹਾਨੂੰ ਸਮਝ ਨਹੀਂ ਆ ਰਿਹਾ ਕਿ ਕੀ ਕਰਨਾ ਚਾਹੀਦਾ ਹੈ, ਤਾਂ ਆਪਣੇ ਭਰੋਸੇਯੋਗ ਦੋਸਤਾਂ ਅਤੇ ਪਰਿਵਾਰਕ ਮੈਂਬਰਾਂ ਨਾਲ ਗੱਲ ਕਰੋ। ਖ਼ਾਸ ਤੌਰ ’ਤੇ ਪਰਿਵਾਰ ਦੇ ਬਜ਼ੁਰਗ ਮੈਂਬਰਾਂ ਨੂੰ ਵੀ ਅਜਿਹੇ ਘੁਟਾਲਿਆਂ ਬਾਰੇ ਜਾਣਕਾਰੀ ਦੇਣਾ ਜ਼ਰੂਰੀ ਹੈ।
ਜੇਕਰ ਤੁਹਾਨੂੰ ਤੁਰੰਤ ਪੁਲਿਸ ਦੀ ਮਦਦ ਦੀ ਲੋੜ ਹੈ ਅਤੇ ਤੁਹਾਡੀ ਜਾਨ ਜਾਂ ਸੁਰੱਖਿਆ ਨੂੰ ਖ਼ਤਰਾ ਹੈ, ਤਾਂ ਆਸਟ੍ਰੇਲੀਆ ਵਿੱਚ 000 ’ਤੇ ਫ਼ੋਨ ਕਰੋ।
ਇਸ ਘੁਟਾਲੇ ਬਾਰੇ ਹੋਰ ਜਾਣਕਾਰੀ ਅਤੇ ਬਚਾਅ ਦੇ ਤਰੀਕੇ ਆਸਟ੍ਰੇਲੀਆ ਦੀ ਸਰਕਾਰੀ ਖਪਤਕਾਰ ਘੁਟਾਲਾ ਜਾਣਕਾਰੀ ਵੈੱਬਸਾਈਟ Scamwatch ਤੋਂ ਪ੍ਰਾਪਤ ਕੀਤੇ ਜਾ ਸਕਦੇ ਹਨ।
ਜੇਕਰ ਤੁਹਾਡੇ ਕੋਲ ਇਸ ਘੁਟਾਲੇ ਬਾਰੇ ਕੋਈ ਹੋਰ ਜਾਣਕਾਰੀ ਹੈ ਅਤੇ ਤੁਸੀਂ ਆਪਣੀ ਪਛਾਣ ਗੁਪਤ ਰੱਖਣਾ ਚਾਹੁੰਦੇ ਹੋ, ਤਾਂ ਤੁਸੀਂ Crime Stoppers ਨੂੰ 1800 333 000 ’ਤੇ ਫ਼ੋਨ ਕਰ ਸਕਦੇ ਹੋ ਜਾਂ www.crimestoppersvic.com.au ’ਤੇ ਗੁਪਤ ਆਨਲਾਈਨ ਰਿਪੋਰਟ ਦੇ ਸਕਦੇ ਹੋ।