ਸਿਡਨੀ – ਪੱਛਮੀ ਸਿਡਨੀ ਦੇ ਕਾਰੋਬਾਰੀ ਭਾਈਚਾਰੇ ਨੇ ਇਲਾਕੇ ਦੇ ਭਵਿੱਖੀ ਵਿਕਾਸ ਲਈ ਨਵੀਆਂ ਮੈਟਰੋ ਅਤੇ ਰੇਲ ਲਾਈਨਾਂ ਨੂੰ ਬੇਹੱਦ ਜ਼ਰੂਰੀ ਦੱਸਿਆ ਹੈ।
ਬਿਜ਼ਨਸ ਵੈਸਟਰਨ ਸਿਡਨੀ ਅਤੇ KPMG ਵੱਲੋਂ ਜਾਰੀ ਕੀਤੀ ਗਈ 25 ਸਾਲਾ ਯੋਜਨਾ ਮੁਤਾਬਕ ਸਰਵੇਖਣ ਵਿੱਚ ਸ਼ਾਮਲ 90 ਫ਼ੀਸਦੀ ਤੋਂ ਵੱਧ ਕਾਰੋਬਾਰਾਂ ਦਾ ਮੰਨਣਾ ਹੈ ਕਿ ਨਵੀਆਂ ਮੈਟਰੋ ਅਤੇ ਰੇਲ ਲਾਈਨਾਂ ਪੱਛਮੀ ਸਿਡਨੀ ਦੇ ਵਿਕਾਸ ਲਈ ਬਹੁਤ ਮਹੱਤਵਪੂਰਨ ਹਨ। ਇਸ ਤੋਂ ਇਲਾਵਾ 86 ਫ਼ੀਸਦੀ ਕਾਰੋਬਾਰਾਂ ਨੇ ਸਰਕਾਰ ਨੂੰ ਅਪੀਲ ਕੀਤੀ ਹੈ ਕਿ ਇਨ੍ਹਾਂ ਪ੍ਰੋਜੈਕਟਾਂ ਨੂੰ ਪਹਿਲ ਦੇ ਆਧਾਰ ਉੱਤੇ ਲਿਆ ਜਾਵੇ। ਰਿਪੋਰਟ ਮੁਤਾਬਕ ਜੇਕਰ ਨਵੇਂ ਰੇਲ ਸੰਪਰਕਾਂ ਦੀ ਸਪੱਸ਼ਟ ਯੋਜਨਾ ਨਾ ਬਣਾਈ ਗਈ ਤਾਂ 14 ਅਰਬ ਡਾਲਰ ਦੇ ਅਨੁਮਾਨਿਤ ਆਰਥਿਕ ਵਿਕਾਸ ਨੂੰ ਖ਼ਤਰਾ ਹੋ ਸਕਦਾ ਹੈ।
ਇਸ ਮਾਮਲੇ ਉੱਤੇ NSW ਲਿਬਰਲ ਪਾਰਟੀ ਨੇ ਪ੍ਰਧਾਨ ਮੰਤਰੀ ਐਂਥਨੀ ਅਲਬਨੀਜ਼ ਅਤੇ ਪ੍ਰੀਮੀਅਰ ਕ੍ਰਿਸ ਮਿੰਸ ਦੀ ਲੇਬਰ ਸਰਕਾਰ ਤੋਂ ਪੱਛਮੀ ਸਿਡਨੀ ਲਈ ਨਵੇਂ ਰੇਲ ਪ੍ਰੋਜੈਕਟਾਂ ਬਾਰੇ ਸਪੱਸ਼ਟ ਯੋਜਨਾ ਪੇਸ਼ ਕਰਨ ਦੀ ਮੰਗ ਕੀਤੀ ਹੈ। ਲਿਬਰਲ ਪਾਰਟੀ ਨੇ ਪੱਛਮੀ ਸਿਡਨੀ ਲਈ ਤਿੰਨ ਮੁੱਖ ਯੋਜਨਾਵਾਂ ਪੇਸ਼ ਕੀਤੀਆਂ ਹਨ:
- 2028 ਤੱਕ ਨਵਾਂ ਵੈਸਟਰਨ ਸਿਡਨੀ ਸਿਟੀ ਡੀਲ, ਜਿਸ ਰਾਹੀਂ ਇਲਾਕੇ ਦੀਆਂ ਅੱਠ ਕੌਂਸਲਾਂ ਨਾਲ ਮਿਲ ਕੇ ਘਰਾਂ ਅਤੇ ਬੁਨਿਆਦੀ ਢਾਂਚੇ ਦਾ ਵਿਕਾਸ ਕੀਤਾ ਜਾਵੇਗਾ।
- ਬ੍ਰੈਡਫੀਲਡ ਤੋਂ ਦੱਖਣ-ਪੱਛਮੀ ਸਿਡਨੀ ਤੱਕ ਨਵੀਂ ਮੈਟਰੋ ਲਾਈਨ ਬਣਾਉਣ ਦੀ ਯੋਜਨਾ।
- ਭਵਿੱਖ ਦੇ ਮੈਟਰੋ ਪ੍ਰੋਜੈਕਟਾਂ ਲਈ ਨਿਵੇਸ਼ਕਾਂ ਅਤੇ ਸੁਪਰਐਨੂਏਸ਼ਨ ਫੰਡਾਂ ਦੀ ਮਦਦ ਨਾਲ ਇੱਕ ਨਵਾਂ ਸਿਡਨੀ ਮੈਟਰੋ ਇਨਵੈਸਟਮੈਂਟ ਫੰਡ ਬਣਾਉਣਾ।
ਵਿਰੋਧੀ ਧਿਰ ਦੀ ਆਗੂ ਕੈਲੀ ਸਲੋਨ ਨੇ ਕਿਹਾ ਕਿ ਪੱਛਮੀ ਸਿਡਨੀ ਦੀ ਆਰਥਿਕਤਾ ਨੂੰ ਮਜ਼ਬੂਤ ਕਰਨ ਲਈ ਨਵੀਆਂ ਰੇਲ ਲਾਈਨਾਂ ਵਿੱਚ ਨਿਵੇਸ਼ ਕਰਨਾ ਜ਼ਰੂਰੀ ਹੈ। ਉਨ੍ਹਾਂ ਕਿਹਾ ਕਿ ਨਵੇਂ ਹਵਾਈ ਅੱਡੇ, ਮੈਟਰੋ ਅਤੇ ਪੈਰਾਮਾਟਾ ਵਿੱਚ ਪਾਵਰਹਾਊਸ ਪ੍ਰੋਜੈਕਟ ਨੇ ਇਲਾਕੇ ਦੀਆਂ ਸੰਭਾਵਨਾਵਾਂ ਨੂੰ ਉਜਾਗਰ ਕੀਤਾ ਹੈ। ਪਰ ਹੁਣ ਵਿਕਾਸ ਦੀ ਰਫ਼ਤਾਰ ਰੁਕਣੀ ਨਹੀਂ ਚਾਹੀਦੀ।
ਟਰਾਂਸਪੋਰਟ ਦੀ ਸ਼ੈਡੋ ਮੰਤਰੀ ਨੈਟਲੀ ਵਾਰਡ ਨੇ ਕਿਹਾ ਕਿ ਪੱਛਮੀ ਸਿਡਨੀ ਦੇ ਭਵਿੱਖ ਲਈ ਸਰਕਾਰਾਂ ਨੂੰ ਕੌਂਸਲਾਂ ਨਾਲ ਮਿਲ ਕੇ ਕੰਮ ਕਰਨਾ ਚਾਹੀਦਾ ਹੈ ਅਤੇ ਨਿਵੇਸ਼ ਲਈ ਲੰਬੇ ਸਮੇਂ ਦੀ ਯੋਜਨਾ ਤਿਆਰ ਕਰਨੀ ਚਾਹੀਦੀ ਹੈ। ਉਨ੍ਹਾਂ ਦਾਅਵਾ ਕੀਤਾ ਕਿ ਲਿਬਰਲ ਅਤੇ ਨੈਸ਼ਨਲ ਪਾਰਟੀਆਂ ਨੇ ਪਹਿਲਾਂ ਵੈਸਟਰਨ ਸਿਡਨੀ ਸਿਟੀ ਡੀਲ ਅਤੇ ਏਅਰਪੋਰਟ ਮੈਟਰੋ ਲਈ ਕੰਮ ਕੀਤਾ ਸੀ ਅਤੇ ਉਹ ਅੱਗੇ ਵੀ ਅਜਿਹਾ ਕਰਨ ਲਈ ਤਿਆਰ ਹਨ।