ਬ੍ਰਿਟੇਨ ’ਚ ਲੰਬੇ ਸਮੇਂ ਲਈ ਛੁੱਟੀ ਲੈਣ ਵਾਲਿਆਂ ਦੀ ਵਧੇਗੀ ਮੁਸ਼ਕਿਲ, ਸੁਨਕ ਚੁੱਕਣਗੇ ਸਖ਼ਤ ਕਦਮ

ਲੰਡਨ – ਬ੍ਰਿਟੇਨ ’ਚ ਲੋਕ ਲੰਬੇ ਸਮੇਂ ਤਕ ‘ਸਿੱਕ ਲੀਵ’ ਮਤਲਬ ਬਿਮਾਰੀ ਕਾਰਨ ਛੁੱਟੀ ’ਤੇ ਰਹਿੰਦੇ ਹਨ, ਜਿਸ ਕਾਰਨ ਕੰਮ ਪ੍ਰਭਾਵਿਤ ਹੋ ਰਿਹਾ ਹੈ। ਅਜਿਹੇ ’ਚ ਹੁਣ ਪ੍ਰਧਾਨ ਮੰਤਰੀ ਰਿਸ਼ੀ ਸੁਨਕ ਲੰਬੀ ਮਿਆਦ ਦੀ ‘ਸਿੱਕ ਲੀਵ’ ਲਈ ਨਿਯਮਾਂ ਨੂੰ ਸਖ਼ਤ ਕਰਨ ’ਤੇ ਵਿੱਚਾਰ ਕਰਨਗੇ। ਸੁਨਕ ਇਹ ਕਦਮ ਇਸ ਲਈ ਚੁੱਕਣਗੇ ਤਾਂ ਜੋ ਪੱਕੇ ਤੌਰ ’ਤੇ ਕਾਰਜ ਬਲ ਤੋਂ ਬਾਹਰ ਹੋ ਜਾਣ ਵਾਲੇ ਲੋਕਾਂ ਦੀ ਗਿਣਤੀ ਵਿੱਚ ਵਾਧੇ ਨੂੰ ਰੋਕਿਆ ਜਾ ਸਕੇ।
ਅੰਕੜਿਆਂ ਮੁਤਾਬਕ ਲੇਬਰ ਫ਼ੋਰਸ ਦੀ ਭਾਗੀਦਾਰੀ 2015 ਤੋਂ ਬਾਅਦ ਸਭ ਤੋਂ ਘੱਟ ਹੈ ਕਿਉਂਕਿ ਬਿਮਾਰੀ ਕਾਰਨ ਲੰਬੇ ਸਮੇਂ ਤਕ ਛੁੱਟੀ ਅਤੇ ਵਿੱਦਿਆਰਥੀਆਂ ਦੀ ਗਿਣਤੀ ਵਿੱਚ ਵਾਧਾ ਹੋਇਆ ਹੈ, ਦੂਜੇ ਵੱਡੇ ਅਮੀਰ ਦੇਸ਼ਾਂ ਦੇ ਉਲਟ, ਜਿੱਥੇ 2020 ਤੋਂ ਬਾਅਦ ਭਾਗੀਦਾਰੀ ਵਿੱਚ ਵਾਧਾ ਦੇਖਿਆ ਹੈ। ਸੁਨਕ ਨੇ ਕਿਹਾ ਕਿ ਮਾਨਸਿਕ ਸਿਹਤ ਸਥਿਤੀਆਂ ਕਾਰਨ ਕੰਮ ਨਾ ਕਰਨ ਵਾਲੇ ਲੋਕਾਂ ਦੀ ਵੱਧ ਰਹੀ ਗਿਣਤੀ ਚਿੰਤਾ ਦਾ ਵਿਸ਼ਾ ਹੈ। ਉਸ ਨੇ ਕਿਹਾ ਕਿ ਸਾਨੂੰ ਲੋਕਾਂ ਨੂੰ ਕੰਮ ’ਤੇ ਵਾਪਸ ਜਾਣ ਵਿੱਚ ਮਦਦ ਕਰਨ ਲਈ ਵਧੇਰੇ ਉਤਸ਼ਾਹੀ ਹੋਣ ਦੀ ਲੋੜ ਹੈ ਅਤੇ ਜੀਵਨ ਦੀਆਂ ਰੋਜ਼ਾਨਾ ਚੁਣੌਤੀਆਂ ਨੂੰ ਓਵਰ-ਮੈਡੀਕਲੀਕਰਨ ਦੇ ਜ਼ੋਖ਼ਮ ਬਾਰੇ ਵਧੇਰੇ ਇਮਾਨਦਾਰ ਹੋਣ ਦੀ ਲੋੜ ਹੈ।
ਅਧਿਕਾਰਤ ਅੰਕੜਿਆਂ ਅਨੁਸਾਰ 16 ਤੋਂ 64 ਸਾਲ ਦੀ ਉਮਰ ਦੇ ਲੱਗਭਗ 9.4 ਮਿਲੀਅਨ ਲੋਕ, ਜਾਂ 22 ਪ੍ਰਤੀਸ਼ਤ ਨਾ ਤਾਂ ਕੰਮ ਕਰ ਰਹੇ ਹਨ ਅਤੇ ਨਾ ਹੀ ਬੇਰੁਜ਼ਗਾਰ ਹਨ, ਜੋ ਕਿ ਮਹਂਮਾਰੀ ਤੋਂ ਠੀਕ ਪਹਿਲਾਂ 8.55 ਮਿਲੀਅਨ ਸੀ। ਇਨ੍ਹਾਂ ਵਿੱਚੋਂ 2.8 ਮਿਲੀਅਨ ਲੰਬੇ ਸਮੇਂ ਤੋਂ ਬਿਮਾਰ ਹਨ ਅਤੇ 206,000 ਅਸਥਾਈ ਤੌਰ ’ਤੇ ਬਿਮਾਰ ਹਨ। ਪਿਛਲੇ ਸਾਲ ਬ੍ਰਿਟੇਨ ਦੇ ਬਜਟ ਵਾਚਡੌਗ ਨੇ ਕਿਹਾ ਸੀ ਕਿ ਲੰਬੇ ਸਮੇਂ ਦੀ ਬਿਮਾਰੀ ਕਾਰਨ ਕੰਮ ਤੋਂ ਦੂਰ ਰਹਿਣ ਵਾਲੇ ਇੱਕ ਚੌਥਾਈ ਲੋਕ ਡਾਕਟਰੀ ਇਲਾਜ ਦੀ ਉਡੀਕ ਕਰ ਰਹੇ ਸਨ, ਹਾਲਾਂਕਿ ਇਹ ਵੀ ਕਿਹਾ ਗਿਆ ਸੀ ਕਿ ਜੇਕਰ 2015 ਤਕ ਉਡੀਕ ਸੂਚੀ ਖ਼ਤਮ ਹੋ ਜਾਂਦੀ ਹੈ ਤਾਂ ਸਿਰਫ਼ 25,000 ਲੋਕ ਹੀ ਆ ਸਕਦੇ ਹਨ ਕੰਮ ’ਤੇ ਵਾਪਸ ਆ ਸਕਦੇ ਹਨ। ਰਿਪੋਰਟ ਅਨੁਸਾਰ ਲੰਬੇ ਸਮੇਂ ਤੋਂ ਬਿਮਾਰ ਲੋਕਾਂ ਵਿੱਚੋਂ ਅੱਧੇ ਤੋਂ ਵੱਧ ਨੇ ‘ਡਿਪਰੈਸ਼ਨ, ਖਰਾਬ ਨਸਾਂ ਜਾਂ ਚਿੰਤਾ’ ਤੋਂ ਪੀੜਤ ਹੋਣ ਦੀ ਰਿਪੋਰਟ ਕੀਤੀ, ਹਾਲਾਂਕਿ ਕਈਆਂ ਨੇ ਕਿਹਾ ਕਿ ਇਹ ਉਨ੍ਹਾਂ ਦੀ ਮੁੱਖ ਸਿਹਤ ਸਮੱਸਿਆ ਦੇ ਨਾਲ ਇੱਕ ਸੈਕੰਡਰੀ ਸਥਿਤੀ ਹੈ।
ਡਾਕਟਰ ਬਿਮਾਰੀ ਦੀ ਛੁੱਟੀ ਲੈਣ ਦੀ ਦੇ ਰਹੇ ਸਲਾਹ
ਸੁਨਕ ਦੇ ਦਫ਼ਤਰ ਨੇ ਕਿਹਾ ਕਿ ਡਾਕਟਰ ਲੋਕਾਂ ਨੂੰ ਕੰਮ ’ਤੇ ਪਰਤਣ ਦੀ ਬਜਾਏ ਬਿਮਾਰ ਛੁੱਟੀ ਲੈਣ ਦੀ ਸਲਾਹ ਦੇ ਰਹੇ ਹਨ। ਸੁਨਕ ਨੇ ਕਿਹਾ, ‘ਇਸ ਲਈ ਸਾਨੂੰ ਲੋਕਾਂ ਨੂੰ ਕੰਮ ’ਤੇ ਵਾਪਸ ਲਿਆਉਣ ਲਈ ਇਸ ਰਵੱਈਏ ਨੂੰ ਬਦਲਣ ਦੀ ਲੋੜ ਹੈ। ਸਾਨੂੰ ਇਹ ਦੇਖਣਾ ਹੋਵੇਗਾ ਕਿ ਛੁੱਟੀ ਲੈਣ ਵਾਲਾ ਵਿਅਕਤੀ ਕੀ ਕੰਮ ਕਰ ਸਕਦਾ ਹੈ ਅਤੇ ਉਸ ਨੂੰ ਉਸ ਅਨੁਸਾਰ ਕੰਮ ਕਰਨਾ ਚਾਹੀਦਾ ਹੈ।