ਕੋਲਕਾਤਾ – ਈਡੀ ਨੇ ਮੋਬਾਈਲ ਗੇਮਿੰਗ ਰਾਹੀਂ ਵਿੱਤੀ ਧੋਖਾਧੜੀ ਦੇ ਮਾਮਲੇ ਵਿੱਚ ਗ੍ਰਿਫ਼ਤਾਰ ਆਮਿਰ ਖ਼ਾਨ ਦੀ ਦੇਸ਼-ਵਿਦੇਸ਼ ਵਿੱਚ ਮੌਜੂਦ ਜਾਇਦਾਦ ਨੂੰ ਜ਼ਬਤ ਕਰਨ ਦੀ ਪ੍ਰਕਿਰਿਆ ਸ਼ੁਰੂ ਕਰ ਦਿੱਤੀ ਹੈ। ਈਡੀ ਦਾ ਦਾਅਵਾ ਹੈ ਕਿ ਇਹ ਸਾਰੀਆਂ ਜਾਇਦਾਦਾਂ ਧੋਖੇ ਨਾਲ ਖਰੀਦੀਆਂ ਗਈਆਂ ਸਨ। ਕੇਂਦਰੀ ਜਾਂਚ ਏਜੰਸੀ ਨੂੰ ਉਨ੍ਹਾਂ ਲੋਕਾਂ ਬਾਰੇ ਵੀ ਠੋਸ ਜਾਣਕਾਰੀ ਮਿਲੀ ਹੈ, ਜਿਨ੍ਹਾਂ ਰਾਹੀਂ ਇਹ ਜਾਇਦਾਦਾਂ ਖਰੀਦੀਆਂ ਗਈਆਂ ਸਨ।
ਈਡੀ ਮੁਤਾਬਕ ਆਮਿਰ ਖਾਨ ਦੀ ਕੋਲਕਾਤਾ ਅਤੇ ਦੁਬਈ ਤੋਂ ਇਲਾਵਾ ਵੱਖ-ਵੱਖ ਸੂਬਿਆਂ ’ਚ ਜਾਇਦਾਦ ਹੈ। ਧਿਆਨ ਯੋਗ ਹੈ ਕਿ ਆਮਿਰ ਖਾਨ ਨੇ ਈ-ਨਗੇਟਸ ਨਾਮ ਦੀ ਇੱਕ ਮੋਬਾਈਲ ਗੇਮਿੰਗ ਐਪ ਲਾਂਚ ਕੀਤੀ ਸੀ, ਜਿਸ ਨੂੰ ਲੋਕਾਂ ਨੂੰ ਧੋਖਾ ਦੇਣ ਦੇ ਉਦੇਸ਼ ਨਾਲ ਤਿਆਰ ਕੀਤਾ ਗਿਆ ਸੀ। ਸ਼ੁਰੂਆਤ ਵਿੱਚ ਖਪਤਕਾਰਾਂ ਨੂੰ ਕਈ ਇਨਾਮ ਦਿੱਤੇ ਗਏ ਅਤੇ ਵਾਲੇਟ ਵਿੱਚ ਬਕਾਇਆ ਰਕਮ ਨੂੰ ਆਸਾਨ ਤਰੀਕੇ ਨਾਲ ਕਢਵਾਉਣ ਦੀ ਸਹੂਲਤ ਦਿੱਤੀ ਜਾਂਦੀ ਸੀ। ਜਨਤਾ ਤੋਂ ਮੋਟੀ ਰਕਮ ਇਕੱਠੀ ਕਰਨ ਤੋਂ ਬਾਅਦ, ਐਪ ਤੋਂ ਫੰਡ ਕਢਵਾਉਣ ’ਤੇ ਪਾਬੰਦੀ ਲਗਾ ਦਿੱਤੀ ਗਈ ਸੀ। ਪ੍ਰੋਫਾਈਲ ਜਾਣਕਾਰੀ ਸਮੇਤ ਸਾਰਾ ਡਾਟਾ ਫਿਰ ਐਪ ਦੇ ਸਰਵਰਾਂ ਤੋਂ ਮਿਟਾ ਦਿੱਤਾ ਗਿਆ ਸੀ। ਇਸੇ ਮਾਮਲੇ ’ਚ 10 ਸਤੰਬਰ ਨੂੰ ਈਡੀ ਨੇ ਕੋਲਕਾਤਾ ਦੇ ਮਟੀਆਬੁਰਜ ਇਲਾਕੇ ’ਚ ਸਥਿਤ ਆਮਿਰ ਦੇ ਘਰ ’ਤੇ ਛਾਪਾ ਮਾਰ ਕੇ 17.32 ਕਰੋੜ ਰੁਪਏ ਬਰਾਮਦ ਕੀਤੇ ਸਨ। ਛਾਪੇਮਾਰੀ ਦੇ ਸਮੇਂ ਤੋਂ ਹੀ ਉਹ ਫਰਾਰ ਸੀ। ਉਸ ਨੂੰ ਹਾਲ ਹੀ ਵਿੱਚ ਉੱਤਰ ਪ੍ਰਦੇਸ਼ ਦੇ ਗਾਜ਼ੀਆਬਾਦ ਤੋਂ ਕੋਲਕਾਤਾ ਪੁਲਿਸ ਨੇ ਗ੍ਰਿਫ਼ਤਾਰ ਕੀਤਾ ਸੀ। ਫਿਲਹਾਲ ਉਹ 14 ਦਿਨਾਂ ਦੀ ਪੁਲਿਸ ਹਿਰਾਸਤ ਵਿੱਚ ਹੈ।