ਮੈਲਬੌਰਨ – ਵਿਕਟੋਰੀਆ ਦੀ ਪ੍ਰੀਮੀਅਰ ਜੈਸਿੰਟਾ ਐਲਨ ਪ੍ਰੀਮੀਅਰ ਵਲੋ ਇਸੇ ਸਾਲ ਸਤੰਬਰ ਦੇ ਵਿੱਚ ਕੀਤੀ ਗਈ ਭਾਰਤ ਫੇਰੀ ਤੋਂ ਬਾਅਦ, ਸੂਬੇ ਦੀ ਸਰਕਾਰ ਭਾਰਤੀ ਸੈਰ-ਸਪਾਟਾ ਅਤੇ ਕਾਰੋਬਾਰੀ ਨੇਤਾਵਾਂ ਦੇ ਇੱਕ ਵਫ਼ਦ ਦਾ ਵਿਕਟੋਰੀਆ ਵਿੱਚ ਟੂਰ ਕਰਾਉਣ ਜਾ ਰਹੀ ਹੈ ਤਾਂ ਜੋ ਉਹ ਵਿਕਟੋਰੀਆ ਦੇ ਵਿੱਚ ਸੈਰ-ਸਪਾਟਾ ਅਜੂਬਿਆਂ ਦਾ ਖੁਦ ਅਨੁਭਵ ਕਰ ਸਕਣ।
ਵਿਕਟੋਰੀਆ ਦੇ ਸੈਰ-ਸਪਾਟਾ, ਖੇਡ ਅਤੇ ਪ੍ਰਮੁੱਖ ਸਮਾਗਮਾਂ ਬਾਰੇ ਮੰਤਰੀ ਸਟੀਵ ਡਿਮਪੋਲੋਸ ਨੇ ਅੱਜ ਇਹ ਜਾਣਕਾਰੀ ਦਿੰਦਿਆਂ ਦੱਸਿਆ ਹੈ ਕਿ ਵਿਜ਼ਿਟ ਵਿਕਟੋਰੀਆ ਸੂਬੇ ਦੇ ਵਿੱਚ 30 ਭਾਰਤੀ ਸੈਰ-ਸਪਾਟਾ ਅਤੇ ਕਾਰੋਬਾਰੀ ਨੇਤਾ ਦੌਰਾ ਕਰਨਗੇ ਅਤੇ ਜਦੋਂ ਉਹ ਆਪਣੇ ਗ੍ਰਾਹਕਾਂ ਲਈ ਘਰ ਵਾਪਸੀ ਲਈ ਯਾਤਰਾ ਪ੍ਰੋਗਰਾਮਾਂ ਅਤੇ ਕਾਨਫਰੰਸਾਂ ਦੀ ਯੋਜਨਾ ਬਣਾ ਰਹੇ ਹਨ ਤਾਂ ਉਹਨਾਂ ਵਲੋਂ ਵਿਕਟੋਰੀਆ ਨੂੰ ਸਭ ਤੋਂ ਵੱਧ ਧਿਆਨ ਵਿੱਚ ਰੱਖਿਆ ਜਾਵੇਗਾ। ਵਿਕਟੋਰੀਆ ਸੂਬੇ ਦੇ ਵਿੱਚ 30 ਭਾਰਤੀ ਸੈਰ-ਸਪਾਟਾ ਅਤੇ ਕਾਰੋਬਾਰੀ ਨੇਤਾਵਾਂ ਦਾ ਇਹ ਟੂਰ ਵਿਕਟੋਰੀਆ ਨੂੰ ਭਾਰਤ ਦੇ ਕੁੱਝ ਸਭ ਤੋਂ ਪ੍ਰਭਾਵਸ਼ਾਲੀ ਸੈਰ-ਸਪਾਟਾ ਫੈਸਲੇ ਲੈਣ ਵਾਲਿਆਂ ਲਈ ਅਵਿਸ਼ਵਾਸ਼ਯੋਗ ਵਿਭਿੰਨਤਾ, ਜਨੂੰਨ ਅਤੇ ਰਚਨਾਤਮਕਤਾ ਦੇ ਸਥਾਨ ਵਜੋਂ ਪ੍ਰਦਰਸ਼ਿਤ ਕਰੇਗਾ।
ਵਿਕਟੋਰੀਆ ਵਰਤਮਾਨ ਵਿੱਚ ਭਾਰਤ ਤੋਂ ਆਉਣ ਵਾਲਿਆਂ ਅਤੇ ਖਰਚੇ ਲਈ ਆਸਟ੍ਰੇਲੀਆ ਦੇ ਵਿੱਚ ਚੋਟੀ ਦਾ ਰਾਜ ਹੈ। ਜੂਨ 2024 ਨੂੰ ਖਤਮ ਹੋਏ ਸਾਲ ਵਿੱਚ, ਵਿਕਟੋਰੀਆ ਵਿੱਚ 187,000 ਤੋਂ ਵੱਧ ਭਾਰਤੀ ਸੈਲਾਨੀ ਆਏ ਜਿਨ੍ਹਾਂ ਨੇ ਰਾਜ ਵਿੱਚ $480 ਮਿਲੀਅਨ ਡਾਲਰ ਤੋਂ ਵੱਧ ਖਰਚ ਕੀਤੇ। ਇਸ ਨਾਲ ਭਾਰਤ ਅੰਤਰਰਾਸ਼ਟਰੀ ਖਰਚਿਆਂ ਲਈ ਵਿਕਟੋਰੀਆ ਦੂਜਾ ਸਭ ਤੋਂ ਵੱਡਾ ਬਾਜ਼ਾਰ ਬਣ ਗਿਆ ਹੈ। ਵਿਕਟੋਰੀਆ ਦੇ ਵਿੱਚ ਲਗਭਗ 260,000 ਲੋਕ ਭਾਰਤ ਵਿੱਚ ਜਨਮੇ ਹੋਏ ਹਨ ਅਤੇ 370,000 ਤੋਂ ਵੱਧ ਵਿਕਟੋਰੀਅਨ ਭਾਰਤੀ ਮੂਲ ਦੇ ਹਨ।
ਵਿਕਟੋਰੀਆ ਸੂਬੇ ਦੇ ਵਿੱਚ 30 ਭਾਰਤੀ ਸੈਰ-ਸਪਾਟਾ ਅਤੇ ਕਾਰੋਬਾਰੀ ਨੇਤਾਵਾਂ ਦਾ ਇਹ ਟੂਰ 2 ਤੋਂ 9 ਦਸੰਬਰ ਤੱਕ ਹੋਵੇਗਾ ਜੋ ਵਿਜ਼ਿਟ ਵਿਕਟੋਰੀਆ ਦੁਆਰਾ ਇਨਬਾਉਂਡ ਵਿਜ਼ਟਰ ਅਤੇ ਖਰਚੇ ਦੇ ਵਾਧੇ ਨੂੰ ਮਜ਼ਬੂਤ ਕਰਨ ਅਤੇ ਨਵੇਂ ਦਰਸ਼ਕਾਂ ਅਤੇ ਯਾਤਰੀਆਂ ਨੂੰ ਵਿਕਟੋਰੀਆ ਆਉਣ ਲਈ ਉਤਸ਼ਾਹਿਤ ਕਰਨ ਲਈ ਡਿਜ਼ਾਇਨ ਕੀਤਾ ਗਿਆ ਹੈ।
ਵਿਕਟੋਰੀਆ ਇਸ ਗਰਮੀਆਂ ਵਿੱਚ ਜਿਥੇ ਆਸਟ੍ਰੇਲੀਆ ਅਤੇ ਭਾਰਤ ਵਿਚਕਾਰ ਬਾਕਸਿੰਗ ਡੇ ਟੈਸਟ ਦੀ ਮੇਜ਼ਬਾਨੀ ਵੀ ਕਰੇਗਾ ਉਥੇ ਹੀ 28 ਦਸੰਬਰ ਨੂੰ ਆਸਟ੍ਰੇਲੀਆ ਦੀ ਧਰਤੀ ‘ਤੇ ਖੇਡੇ ਜਾਣ ਵਾਲੇ ਪਹਿਲੇ ਪ੍ਰੋ ਕਬੱਡੀ ਲੀਗ ਦੇ ਪ੍ਰਦਰਸ਼ਨੀ ਮੈਚ ਦੀ ਮੇਜ਼ਬਾਨੀ ਵੀ ਕਰੇਗਾ।
ਭਾਰਤੀ ਵਫ਼ਦ ਮੈਲਬੌਰਨ ਅਤੇ ਖੇਤਰੀ ਵਿਕਟੋਰੀਆ ਨੂੰ ਕਿਉਰੇਟ ਕੀਤੇ ਟੂਰ ਰਾਹੀਂ ਅਨੁਭਵ ਕਰੇਗਾ ਅਤੇ ਵਿਕਟੋਰੀਆ ਦੇ 36 ਉਦਯੋਗਿਕ ਭਾਈਵਾਲਾਂ ਨਾਲ ਬਿਜ਼ਨਸ-ਟੂ-ਬਿਜ਼ਨਸ ਮੀਟਿੰਗਾਂ ਵਿੱਚ ਸ਼ਾਮਲ ਹੋਵੇਗਾ। ਇਹ ਟੂਰ ਇਸੇ ਸਾਲ ਮਈ ਮਹੀਨੇ ਮੈਲਬੌਰਨ ਵਿੱਚ ਆਯੋਜਿਤ ਆਸਟ੍ਰੇਲੀਅਨ ਟੂਰਿਜ਼ਮ ਐਕਸਚੇਂਜ (ਏਟੀਈ) ਦੀ ਹਾਲੀਆ ਸਫਲਤਾ ਤੋਂ ਬਾਅਦ ਆਇਆ ਹੈ ਜਿਸ ਦੌਰਾਨ 400 ਤੋਂ ਵੱਧ ਗਲੋਬਲ ਟਰੈਵਲ ਏਜੰਟਾਂ ਅਤੇ ਖਰੀਦਦਾਰਾਂ ਨੂੰ ਵਿਕਟੋਰੀਆ ਦੇ ਹਰ ਖੇਤਰ ਦੇ ਦੌਰੇ ਦੀ ਮੇਜ਼ਬਾਨੀ ਦੇ ਨਾਲ, 330 ਤੋਂ ਵੱਧ ਵਿਕਟੋਰੀਅਨ ਕਾਰੋਬਾਰਾਂ ਦੀ ਵਿਸ਼ੇਸ਼ਤਾ ਵਾਲੇ 64 ਯਾਤਰਾ ਪ੍ਰੋਗਰਾਮਾਂ ਵਿੱਚ ਹਿੱਸਾ ਲਿਆ ਸੀ।
ਵਰਨਣਯੋਗ ਕਿ ਵਿਕਟੋਰੀਆ ਭਾਰਤੀ ਸੈਲਾਨੀਆਂ ਲਈ ਸੈਰ-ਸਪਾਟੇ ਦਾ ਨੰਬਰ ਇਕ ਸਥਾਨ ਹੈ ਅਤੇ ਵਿਸ਼ਵ ਪੱਧਰ ‘ਤੇ ਹੋਰ ਵੀ ਚਮਕਣ ਲਈ ਆਪਣੀ ਵਿਜ਼ਟਰ ਆਰਥਿਕਤਾ ਨੂੰ ਹੋਰ ਮਜ਼ਬੂਤ ਕਰ ਰਿਹਾ ਹੈ। ਭਾਰਤ ਵਿਕਟੋਰੀਆ ਲਈ ਇੱਕ ਪ੍ਰਮੁੱਖ ਅੰਤਰਰਾਸ਼ਟਰੀ ਬਜ਼ਾਰ ਹੈ ਅਤੇ ਭਾਰਤੀ ਵਫ਼ਦ ਦਾ ਇਹ ਟੂਰ ਮਾਰਕੀਟ ਹਿੱਸੇਦਾਰੀ ਨੂੰ ਹੋਰ ਵਧਾਏਗਾ। ਵਿਕਟੋਰੀਆ ਨੇ ਭਾਰਤੀ ਸੈਲਾਨੀਆਂ ਤੋਂ ਪਿਛਲੇ ਸਾਲ $480 ਮਿਲੀਅਨ ਡਾਲਰ ਤੋਂ ਵੱਧ ਦੀ ਕਮਾਈ ਕੀਤੀ ਅਤੇ ਇਸ ਵਪਾਰਕ ਮਿਸ਼ਨ ਰਾਹੀਂ ਕੁੱਝ ਹੋਰ ਜ਼ਿਆਦਾ ਕਰਨ ਦੀ ਉਮੀਦ ਕੀਤੀ ਜਾ ਰਹੀ ਹੈ।