ਭਾਰਤੀ ਮਹਿਲਾ ਹਾਕੀ ਟੀਮ ਵਿਸ਼ਵ ਰੈਂਕਿੰਗ ’ਚ ਛੇਵੇਂ ਸਥਾਨ ’ਤੇ ਪਹੁੰਚੀ

ਨਵੀਂ ਦਿੱਲੀ – ਹਾਂਗਜ਼ੂ ਏਸ਼ੀਆਈ ਖੇਡਾਂ ਅਤੇ ਏਸ਼ੀਅਨ ਚੈਂਪੀਅਨਜ਼ ਟਰਾਫੀ ਵਿਚ ਸ਼ਾਨਦਾਰ ਪ੍ਰਦਰਸ਼ਨ ਕਰਨ ਵਾਲੀ ਭਾਰਤੀ ਮਹਿਲਾ ਹਾਕੀ ਟੀਮ ਵਿਸ਼ਵ ਰੈਂਕਿੰਗ ਵਿਚ ਆਪਣਾ ਸਰਵੋਤਮ ਪ੍ਰਦਰਸ਼ਨ ਕਰਦੇ ਹੋਏ ਛੇਵੇਂ ਸਥਾਨ ‘’ਤੇ ਪਹੁੰਚ ਗਈ ਹੈ। ਭਾਰਤ ਹੁਣ 2368.83 ਰੇਟਿੰਗ ਅੰਕਾਂ ਨਾਲ ਇੰਗਲੈਂਡ ਤੋਂ ਉਪਰ ਹੈ। ਭਾਰਤੀ ਮਹਿਲਾ ਟੀਮ ਏਸ਼ੀਆਈ ਖੇਡਾਂ ਤੋਂ ਪਹਿਲਾਂ ਅੱਠਵੇਂ ਸਥਾਨ ‘’ਤੇ ਸੀ। ਭਾਰਤ ਨੇ ਹਾਂਗਜ਼ੂ ਵਿੱਚ ਕਾਂਸੀ ਦਾ ਤਗ਼ਮਾ ਜਿੱਤਿਆ ਅਤੇ ਰਾਂਚੀ ਵਿੱਚ ਏਸ਼ੀਅਨ ਚੈਂਪੀਅਨਜ਼ ਟਰਾਫੀ ਵਿੱਚ ਅਜੇਤੂ ਰਿਹਾ। ਪਿਛਲੇ ਸਾਲ ਵੀ ਭਾਰਤੀ ਟੀਮ ਐਫ. ਆਈ. ਐਚ. ਪ੍ਰੋ ਲੀਗ ਦੌਰਾਨ ਰੈਂਕਿੰਗ ਵਿੱਚ ਛੇਵੇਂ ਸਥਾਨ ’ਤੇ ਪਹੁੰਚੀ ਸੀ। ਰੈਂਕਿੰਗ ‘’ਚ ਨੀਦਰਲੈਂਡ ਸਿਖਰ ‘’ਤੇ ਹੈ ਜਦਕਿ ਆਸਟ੍ਰੇਲੀਆ ਦੂਜੇ ਅਤੇ ਅਰਜਨਟੀਨਾ ਤੀਜੇ ਸਥਾਨ ‘’ਤੇ ਹੈ। ਬੈਲਜੀਅਮ ਚੌਥੇ ਅਤੇ ਜਰਮਨੀ ਪੰਜਵੇਂ ਸਥਾਨ ‘’ਤੇ ਹੈ। ਭਾਰਤੀ ਟੀਮ 13 ਤੋਂ 19 ਜਨਵਰੀ ਤੱਕ ਰਾਂਚੀ ਵਿੱਚ ਐੱਫ ਆਈ ਐੱਚ ਹਾਕੀ ਓਲੰਪਿਕ ਕੁਆਲੀਫਾਇਰ ਖੇਡੇਗੀ। ਇਸ ਵਿੱਚ ਉਸਦਾ ਸਾਹਮਣਾ ਜਰਮਨੀ, ਨਿਊਜ਼ੀਲੈਂਡ, ਜਾਪਾਨ, ਚਿਲੀ, ਅਮਰੀਕਾ, ਇਟਲੀ ਅਤੇ ਚੈੱਕ ਗਣਰਾਜ ਨਾਲ ਹੋਵੇਗਾ।