ਨਵੀਂ ਦਿੱਲੀ – ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਸੋਮਵਾਰ ਨੂੰ ਕਿਹਾ ਕਿ ਆਪਣੇ ਤੀਜੇ ਕਾਰਜਕਾਲ ਦੇ ਪਹਿਲੇ 100 ਦਿਨਾਂ ਵਿਚ ਉਨ੍ਹਾਂ ਦੀ ਸਰਕਾਰ ਨੇ ਦੇਸ਼ ਦੀ ਤੇਜ਼ੀ ਨਾਲ ਤਰੱਕੀ ਲਈ ਹਰ ਖੇਤਰ ਅਤੇ ਕਾਰਕ ’ਤੇ ਧਿਆਨ ਦੇਣ ਦੀ ਕੋਸ਼ਿਸ਼ ਕੀਤੀ ਹੈ।
ਉਨ੍ਹਾਂ ਇਹ ਗੱਲ ਗਾਂਧੀਨਗਰ ਵਿੱਚ ਗਲੋਬਲ ਰੀਨਿਊਏਬਲ ਐਨਰਜੀ ਇਨਵੈਸਟਰਸ ਮੀਟ ਐਂਡ ਐਗਜ਼ੀਬਿਸ਼ਨ (ਰੀ-ਇਨਵੈਸਟ 2024) ਦੇ ਚੌਥੇ ਐਡੀਸ਼ਨ ਨੂੰ ਸੰਬੋਧਨ ਕਰਦਿਆਂ ਕਹੀ।
ਉਨ੍ਹਾਂ ਕਿਹਾ ਕਿ ਦੇਸ਼ ਵਾਸੀ ਹੀ ਨਹੀਂ ਬਲਕਿ ਪੂਰੀ ਦੁਨੀਆ ਮਹਿਸੂਸ ਕਰਦੀ ਹੈ ਕਿ 21ਵੀਂ ਸਦੀ ਲਈ ਭਾਰਤ ਸਭ ਤੋਂ ਵਧੀਆ ਸਥਾਨ ਹੈ।
ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਪਹਿਲੇ 100 ਦਿਨਾਂ (ਕੇਂਦਰ ਸਰਕਾਰ ਦੇ ਤੀਜੇ ਕਾਰਜਕਾਲ ਦੇ) ਵਿੱਚ, ਤੁਸੀਂ ਸਾਡੀਆਂ ਤਰਜੀਹਾਂ ਦੀ ਗਤੀ ਅਤੇ ਪੈਮਾਨੇ ਨੂੰ ਦੇਖ ਸਕਦੇ ਹੋ। ਅਸੀਂ ਦੇਸ਼ ਦੀ ਤੇਜ਼ੀ ਨਾਲ ਤਰੱਕੀ ਲਈ ਜ਼ਰੂਰੀ ਹਰ ਖੇਤਰ ਅਤੇ ਕਾਰਕ ਵੱਲ ਧਿਆਨ ਦੇਣ ਦੀ ਕੋਸ਼ਿਸ਼ ਕੀਤੀ ਹੈ।
ਮੋਦੀ ਨੇ ਕਿਹਾ ਕਿ ਭਾਰਤ ਦੀ ਵਿਭਿੰਨਤਾ, ਪੈਮਾਨਾ, ਸਮਰੱਥਾ ਅਤੇ ਪ੍ਰਦਰਸ਼ਨ ਵਿਲੱਖਣ ਹਨ ਅਤੇ ਇਸ ਲਈ ਮੈਂ ਇਸਨੂੰ ਗਲੋਬਲ ਐਪਲੀਕੇਸ਼ਨ ਲਈ ਭਾਰਤੀ ਹੱਲ ਕਹਿੰਦਾ ਹਾਂ।ਉਨ੍ਹਾਂ ਕਿਹਾ ਕਿ ਭਾਰਤ ਅਗਲੇ 1000 ਸਾਲਾਂ ਲਈ ਵਿਕਾਸ ਦੀ ਨੀਂਹ ਰੱਖ ਰਿਹਾ ਹੈ ਅਤੇ ਫੋਕਸ ਸਿਰਫ ਸਿਖਰ ’ਤੇ ਪਹੁੰਚਣ ’ਤੇ ਨਹੀਂ ਬਲਕਿ ਇਸ ਸਥਿਤੀ ਨੂੰ ਬਣਾਈ ਰੱਖਣ ’ਤੇ ਹੈ।
ਉਨ੍ਹਾਂ ਨੇ ਰੀ-ਇਨਵੈਸਟ 2024 ਵਿੱਚ ਕਿਹਾ ਕਿ ਸਾਡੇ ਲਈ ਇੱਕ ਹਰਿਆ ਭਰਿਆ ਭਵਿੱਖ ਅਤੇ ਸ਼ੁੱਧ ਜ਼ੀਰੋ ਨਿਕਾਸ ਸਿਰਫ਼ ਦਿਖਾਵਟੀ ਸ਼ਬਦ ਨਹੀਂ ਹੈ। ਇਹ ਦੇਸ਼ ਦੀਆਂ ਲੋੜਾਂ ਹਨ ਅਤੇ ਅਸੀਂ ਇਨ੍ਹਾਂ ਨੂੰ ਹਾਸਲ ਕਰਨ ਲਈ ਵਚਨਬੱਧ ਹਾਂ। ਸਰਕਾਰ ਅਯੁੱਧਿਆ ਅਤੇ 16 ਹੋਰ ਸ਼ਹਿਰਾਂ ਨੂੰ ਮਾਡਲ ਸੋਲਰ ਸਿਟੀ ਵਜੋਂ ਵਿਕਸਤ ਕਰਨ ਲਈ ਕੰਮ ਕਰ ਰਹੀ ਹੈ।
ਉਨ੍ਹਾਂ ਕਿਹਾ ਕਿ 140 ਕਰੋੜ ਭਾਰਤੀਆਂ ਨੇ ਦੇਸ਼ ਨੂੰ ਦੁਨੀਆ ਦੀ ਤੀਜੀ ਸਭ ਤੋਂ ਵੱਡੀ ਅਰਥਵਿਵਸਥਾ ਬਣਾਉਣ ਦਾ ਸੰਕਲਪ ਲਿਆ ਹੈ।
ਦੇਸ਼ ਵਾਸੀ ਹੀ ਨਹੀਂ ਬਲਕਿ ਪੂਰੀ ਦੁਨੀਆਂ ਮਹਿਸੂਸ ਕਰਦੀ ਹੈ ਕਿ 21ਵੀਂ ਸਦੀ ਲਈ ਭਾਰਤ ਸਭ ਤੋਂ ਵਧੀਆ ਸਥਾਨ: ਮੋਦੀ
