ਵਨ ਨੇਸ਼ਨ ਪਾਰਟੀ ਫੈਰਰ ਉਪ-ਚੋਣ ਦੇ ਵਿੱਚ ਬੇਮਿਸਾਲ ਜਿੱਤ ਤੋਂ ਬਾਅਦ ਖੁਸ਼ੀ ਦੇ ਮੂਡ ਵਿੱਚ ਹੈ ਅਤੇ ਉਸ ਵਲੋਂ ਹੁਣ ਅਗਲੇ ਨਿਸ਼ਾਨੇ ਸੇਧੇ ਜਾਣ ਦੀ ਤਿਆਰੀ ਕੀਤੀ ਜਾ ਰਹੀ ਹੈ। ਵਨ ਨੇਸ਼ਨ ਵਲੋਂ ਆਸਟ੍ਰੇਲੀਆ ਦੀਆਂ 2028 ਦੀਆਂ ਫੈਡਰਲ ਚੋਣਾਂ ਦੇ ਵਿੱਚ ਹੋਰ ਸੀਟਾਂ ਹਾਸਲ ਕਰਨ ਦੇ ਲਈ ਸੰਭਾਵੀ ਉਮੀਦਵਾਰਾਂ ‘ਤੇ ਨਜ਼ਰ ਰੱਖੀ ਜਾ ਰਹੀ ਹੈ।
ਵਨ ਨੇਸ਼ਨ ਦੇ ਨੇਤਾ ਬਾਰਨਾਬੀ ਜੋਇਸ ਨੇ ਕਿਹਾ ਹੈ ਕਿ, “ਵਨ ਨੇਸ਼ਨ ਪਾਰਟੀ ਫੈਰਰ ਉਪ-ਚੋਣ ਦੇ ਵਿੱਚ ਆਪਣੀ ਵੱਡੀ ਜਿੱਤ ਤੋਂ ਬਾਅਦ ਆਸਟ੍ਰੇਲੀਆ ਦੇ ਸਭ ਤੋਂ ਵੱਧ ਆਬਾਦੀ ਵਾਲੇ ਸ਼ਹਿਰਾਂ ਵਿੱਚੋਂ ਇੱਕ ਵਿੱਚ ਸੀਟਾਂ ਜਿੱਤਣ ਦੀ ਕੋਸ਼ਿਸ਼ ਕਰ ਰਹੀ ਹੈ। ਵਨ ਨੇਸ਼ਨ ਹੁਣ ਪੱਛਮੀ ਸਿਡਨੀ ਦੀਆਂ ਸੀਟਾਂ ਅਤੇ 2028 ਦੀਆਂ ਫੈਡਰਲ ਚੋਣਾਂ ਲਈ ਸੰਭਾਵੀ ਉਮੀਦਵਾਰਾਂ ‘ਤੇ ਨਜ਼ਰ ਰੱਖ ਰਿਹਾ ਹੈ। ਪਾਰਟੀ ਹੁਣ ਖੇਤਰੀ ਸੀਟਾਂ ਤੋਂ ਪਰੇ ਅਗਲੀਆਂ ਫੈਡਰਲ ਚੋਣਾਂ ਵਿੱਚ ਵੈਸਟਰਨ ਸਿਡਨੀ ਦੀਆਂ ਸੀਟਾਂ ਨੂੰ ਨਿਸ਼ਾਨਾ ਬਣਾਉਣ ਦੀ ਤਿਆਰੀ ਕਰ ਰਹੀ ਹੈ। ਉਨ੍ਹਾਂ ਨੇ ਮੌਜੂਦਾ ਊਰਜਾ ਮੰਤਰੀ ਕ੍ਰਿਸ ਬੋਵੇਨ ਦੀ ਸੀਟ ਨੂੰ ਵੀ ਰੱਦ ਨਹੀਂ ਕੀਤਾ, ਜਿਸ ਵਿੱਚ ਮੈਕਮੋਹਨ ਤੋਂ ਬਾਅਦ ਬਲੈਕਟਾਊਨ, ਪੈਨਰਿਥ, ਕੰਬਰਲੈਂਡ ਅਤੇ ਫੇਅਰਫੀਲਡ ਇਲਾਕੇ ਆਉਂਦੇ ਹਨ।
ਵਨ ਨੇਸ਼ਨ ਪਾਰਟੀ ਦੇ ਉਮੀਦਵਾਰ ਡੇਵਿਡ ਫਾਰਲੇ ਸ਼ਨੀਵਾਰ 9 ਮਈ 2026 ਨੂੰ ਫੈਰਰ ਹਲਕੇ ਤੋਂ ਫੈਡਰਲ ਮੈਂਬਰ ਚੁਣੇ ਗਏ ਹਨ। ਵਨ ਨੇਸ਼ਨ ਪਾਰਟੀ ਨੇ ਨਿਊ ਸਾਊਥ ਵੇਲਜ਼ ਦੀ ਖੇਤਰੀ ਸੀਟ ਫੈਰਰ ‘ਤੇ ਜਿੱਤ ਹਾਸਲ ਕੀਤੀ ਹੈ ਅਤੇ ਲਿਬਰਲ ਪਾਰਟੀ ਗੱਠਜੋੜ ਦੇ 77 ਸਾਲਾਂ ਦੇ ਮਜ਼ਬੂਤ ਗੜ੍ਹ ਨੂੰ ਤੋੜ ਦਿੱਤਾ ਹੈ। ਸਾਲ 1997 ਵਿੱਚ ਪਾਰਟੀ ਦੀ ਸਥਾਪਨਾ ਤੋਂ ਬਾਅਦ ਫੈਡਰਲ ਸੀਟ ਲਈ ਵਨ ਨੇਸ਼ਨ ਦਾ ਇਹ ਪਹਿਲਾ ਸਫਲ ਮੁਕਾਬਲਾ ਸੀ। ਵਨ ਨੇਸ਼ਨ ਪਾਰਟੀ ਨੇ ਫੈਰਰ ਫੈਡਰਲ ਉਪ-ਚੋਣ ਜਿੱਤ ਲਈ ਅਤੇ ਇਹ ਪਹਿਲੀ ਵਾਰ ਹੈ ਕਿ ਪਾਰਟੀ ਨੇ ਫੈਡਰਲ ਹਾਊਸ ਆਫ਼ ਰਿਪ੍ਰਜ਼ੈਂਟੇਟਿਵ ਸੀਟ ਲਈ ਚੋਣ ਜਿੱਤੀ ਹੈ। ਇਸ ਚੋਣ ਵਿੱਚ ਲਿਬਰਲ ਪਾਰਟੀ ਦੀਆਂ ਵੋਟਾਂ ਵਿੱਚ ਵੱਡੀ ਗਿਰਾਵਟ ਆਈ ਜਦਕਿ ਆਜ਼ਾਦ ਉਮਦਵਾਰ ਮਿਸ਼ੇਲ ਮਿਲਥੋਰਪ ਨੇ ਦੂਜਾ ਸਥਾਨ ਹਾਸਲ ਕੀਤਾ ਹੈ।
ਰੀਜ਼ਨਲ ਨਿਊ ਸਾਊਥ ਵੇਲਜ਼ ਸੀਟ ਤੋਂ ਸਾਬਕਾ ਲਿਬਰਲ ਨੇਤਾ ਸੂਸੇਨ ਲੇ ਦੇ ਅਸਤੀਫ਼ੇ ਕਾਰਣ ਇਹ ਉਪ-ਚੋਣ ਹੋਈ। ਪਿਛਲੀ 2025 ਦੀ ਆਮ ਚੋਣਾਂ ਵਿੱਚ ਸੂਸੇਨ ਲੇ ਨੇ ਫੈਰਰ ਵਿੱਚ ਆਜ਼ਾਦ ਉਮੀਦਵਾਰ ਮਿਸ਼ੇਲ ਮਿਲਥੋਰਪ ਨੂੰ 56.2-43.8 ਦੇ ਫਰਕ ਨਾਲ ਹਰਾਇਆ ਸੀ। ਆਸਟ੍ਰੇਲੀਅਨ ਲੇਬਰ ਪਾਰਟੀ ਅਤੇ ਨੈਸ਼ਨਲ ਪਾਰਟੀਆਂ ਦੇ ਵਿੱਚੋਂ ਕਿਸੇ ਨੇ ਵੀ 2026 ਦੀ ਇਹ ਉਪ-ਚੋਣ ਨਹੀਂ ਲੜੀ। ਲਿਬਰਲ ਪਾਰਟੀ ਦੇ ਵੋਟ ਵਿੱਚ ਗਿਰਾਵਟ ਦੇ ਨਾਲ ਹੀ ਪਿਛਲੇ 25 ਸਾਲਾਂ ਤੋਂ ਵੱਧ ਸਮੇਂ ਤੋਂ ਮੌਜੂਦ ਗਠਜੋੜ ਨੂੰ ਵੱਡਾ ਧੱਕਾ ਲੱਗਾ ਹੈ। ਸਮਝਿਆ ਜਾ ਰਿਹਾ ਹੈ ਕਿ ਇਹ ਦਹਾਕਿਆਂ ਤੋਂ ਖੇਤਰੀ ਅਰਥਵਿਵਸਥਾ ਵਿਗੜਨ ਤੋਂ ਬਾਅਦ ਹਰੀ ਊਰਜਾ ਅਤੇ ਨਸਲੀ ਘੱਟ ਗਿਣਤੀਆਂ ਪ੍ਰਤੀ ਗੁੱਸਾ ਹੈ।
ਆਸਟ੍ਰੇਲੀਆ ਦਾ ਫੈਡਰਲ ਚੋਣ ਹਲਕੇ ਫੈਰਰ ਦਾ ਖੇਤਰਫਲ ਬਹੁਤ ਵੱਡਾ ਹੈ ਜੋ ਵਿਕਟੋਰੀਆ ਅਤੇ ਨਿਊ ਸਾਊਥ ਵੇਲਜ਼ ਸੂਬਿਆਂ ਦੀ ਸਰਹੱਦ ‘ਤੇ ਸਥਿਤ ਹੈ। ਇਸ ਹਲਕੇ ਅੰਦਰ ਐਲਬਰੀ, ਗ੍ਰਿਫਿਥ ਅਤੇ ਡੇਨੀਲੀਕੁਇਨ ਵਰਗੇ ਪ੍ਰਮੁੱਖ ਇਲਾਕੇ ਆਉਂਦੇ ਹਨ। ਵਨ ਨੇਸ਼ਨ ਪਾਰਟੀ ਨੇ ਸਾਰੇ 74 ਪੋਲਿੰਗ ਬੂਥ ਜਿੱਤੇ ਅਤੇ ਕੁੱਝ ਛੋਟੇ ਕੇਂਦਰਾਂ ਵਿੱਚ ਪ੍ਰਾਇਮਰੀ ਵੋਟ ਦਾ 60 ਫੀਸਦੀ ਤੋਂ ਵੱਧ ਪ੍ਰਾਪਤ ਕੀਤਾ। ਵਨ ਨੇਸ਼ਨ ਵੱਲ ਲਗਭਗ 33 ਅੰਕਾਂ ਦਾ ਪ੍ਰਾਇਮਰੀ ਝੁਕਾਅ ਦੂਜੀਆਂ ਸੱਜੇ-ਪੱਖੀ ਪਾਰਟੀਆਂ ‘ਚ ਵੀ ਦੇਖਣ ਨੂੰ ਮਿਲਿਆ। ਫੈਮਿਲੀ ਫਸਟ, ਸ਼ੂਟਰਜ਼, ਫਿਸ਼ਰਜ਼ ਐਂਡ ਫਾਰਮਰਜ਼ ਅਤੇ ਜੇਰਾਰਡ ਰੇਨਿਕ ਦੀਆਂ ਪੀਪਲਜ਼ ਫਸਟ ਪਾਰਟੀਆਂ ਨੇ ਪਿਛਲੇ ਸਾਲ ਦੀਆਂ ਚੋਣਾਂ ਦੇ ਮੁਕਾਬਲੇ ਸਮਰਥਨ ਗੁਆ ਦਿੱਤਾ। ਇਸ ਚੋਣ ਦੇ ਵਿੱਚ ਗ੍ਰੀਨਜ਼ ਪਾਰਟੀ ਦੀਆਂ ਵੋਟਾਂ ਵਿੱਚ ਵੀ 2.7 ਪੁਆਇੰਟ ਦੀ ਗਿਰਾਵਟ ਦੇਖੀ ਗਈ ਜਦਕਿ ਲੀਗਲਾਈਜ਼ ਕੈਨਾਬਿਸ ਨੇ 2.3 ਅੰਕ ਜਿਆਦਾ ਪ੍ਰਾਪਤ ਕੀਤੇ ਹਨ।
ਭਾਵੇਂ ਪੌਲੀਨ ਹੈਨਸਨ ਦੀ ਪਾਰਟੀ ਫੈਰਰ ਵਿੱਚ ਲਿਬਰਲ ਪਾਰਟੀ ਦੇ ਨਾਲੋਂ ਵੱਧ ਵੋਟਾਂ ਹਾਸਲ ਕਰਕੇ ਇਤਿਹਾਸਕ ਜਿੱਤ ਦਾ ਜਸ਼ਨ ਮਨਾ ਰਹੀ ਹੈ, ਪਰ ਲਿਬਰਲ ਪਾਰਟੀ ਦੀ ਡਿਪਟੀ ਲੀਡਰ ਜੇਨ ਹਿਊਮ ਨੇ ਗੱਠਜੋੜ ਦੇ ਵਨ ਨੇਸ਼ਨ ਪਾਰਟੀ ਨਾਲ ਮਿਲ ਕੇ ਕੰਮ ਕਰਨ ਦੀਆਂ ਸੰਭਾਵਨਾਵਾਂ ਤੋਂ ਇਨਕਾਰ ਕੀਤਾ ਹੈ। ਫੈਰਰ ਉਪ-ਚੋਣ ਵਿੱਚ ਲਿਬਰਲ ਪਾਰਟੀ ਦੀ ਹਾਰ ਤੋਂ ਬਾਅਦ ਡਿਪਟੀ ਲਿਬਰਲ ਨੇਤਾ ਜੇਨ ਹਿਊਮ ਨੇ ਗੱਠਜੋੜ ਅਤੇ ਵਨ ਨੇਸ਼ਨ ਵਿਚਕਾਰ ਗੱਠਜੋੜ ਦੀਆਂ ਉਮੀਦਾਂ ਤੋਂ ਨਾਂਹ ਕੀਤੀ ਹੈ। ਵਨ ਨੇਸ਼ਨ ਦੀ ਨੇਤਾ ਪੌਲੀਨ ਹੈਨਸਨ ਨੇ ਕਿਹਾ ਹੈ ਕਿ ਉਹ ਭਵਿੱਖ ਦੀ ਗੱਠਜੋੜ ਸਰਕਾਰ ਦਾ ਸਮਰਥਨ ਕਰਨ ਲਈ ਤਿਆਰ ਰਹੇਗੀ। ਲਿਬਰਲ ਪਾਰਟੀ ਦੀ ਡਿਪਟੀ ਲੀਡਰ ਜੇਨ ਹਿਊਮ ਨੇ ਕਿਹਾ ਹੈ ਕਿ, “ਲਿਬਰਲ ਪਾਰਟੀ ਦਾ ਨੈਸ਼ਨਲ ਪਾਰਟੀ ਨਾਲ ਪਹਿਲਾਂ ਹੀ ਇੱਕ ਗੱਠਜੋੜ ਹੈ। ਇਸ ਗੱਠਜੋੜ ਨੇ ਆਸਟ੍ਰੇਲੀਆ ਦੇ ਲੋਕਾਂ ਦੀ ਚੰਗੀ ਸੇਵਾ ਕੀਤੀ ਹੈ। ਇਹ ਲਗਭਗ 80 ਸਾਲਾਂ ਤੋਂ ਆਸਟ੍ਰੇਲੀਆ ਦੀ ਤਰੱਕੀ ਅਤੇ ਖੁਸ਼ਹਾਲੀ ਦਾ ਇੱਕ ਮਹੱਤਵਪੂਰਨ ਹਿੱਸਾ ਰਿਹਾ ਹੈ। ਮੈਨੂੰ ਲੱਗਦਾ ਹੈ ਕਿ ਇਹ ਗੱਠਜੋੜ ਬਾਰੇ ਗੱਲ ਕਰਨਾ ਬਹੁਤ ਜਲਦੀ ਹੈ ਅਤੇ ਸ਼ਾਇਦ ਬੇਕਾਰ ਹੈ। ਤਾਜ਼ਾ ਚੋਣ ਨਤੀਜਿਆਂ ਨੂੰ ਸਮਝਣ ਦੀ ਲੋੜ ਹੈ ਕਿ ਫੈਰਰ ਦੇ ਲੋਕ ਸਾਨੂੰ ਕੀ ਕਹਿ ਰਹੇ ਹਨ।”