ਦਿਲਜੀਤ ਦੋਸਾਂਝ ਆਪਣੇ ਗੀਤਾਂ ਅਤੇ ਅਦਾਕਾਰੀ ਦੇ ਨਾਲ-ਨਾਲ ਸੋਸ਼ਲ ਮੀਡੀਆ ‘ਤੇ ਵੀ ਸਰਗਰਮ ਰਹਿੰਦੇ ਹਨ। ਹਾਲ ਹੀ ਵਿੱਚ ਦਿਲਜੀਤ ਦੋਸਾਂਝ ਨੇ ਖੁਲਾਸਾ ਕੀਤਾ ਹੈ ਕਿ ਲਗਭਗ 11 ਸਾਲ ਪਹਿਲਾਂ 2015 ਵਿੱਚ ਉਸਨੂੰ ਗਾਲਸਟੋਨ ਵਾਰੇ ਪਤਾ ਲੱਗਿਆ ਸੀ ਅਤੇ ਡਾਕਟਰਾਂ ਨੇ ਇਸ ਦਾ ਆਕਾਰ ਲਗਭਗ 11 ਤੋਂ 12 ਮਿਲੀਮੀਟਰ ਦੱਸਿਆ ਸੀ।
ਵੈਸੇ ਗਾਲਸਟੋਨ ਨੂੰ ਪਿੱਤੇ ਦੀ ਪੱਥਰੀ ਵਜੋਂ ਜਾਣਿਆ ਜਾਂਦਾ ਹੈ ਅਤੇ ਆਮ ਤੌਰ ‘ਤੇ ਪਿੱਤੇ ਦੀ ਥੈਲੀ ਵਿੱਚ ਬਣਦੀ ਹੈ। ਮਾਹਿਰ ਡਾਕਟਰਾਂ ਦੇ ਅਨੁਸਾਰ ਪੱਥਰੀ ਮੁੱਖ ਤੌਰ ‘ਤੇ ਪਿੱਤੇ ਦੀ ਥੈਲੀ ਵਿੱਚ ਕੋਲੈਸਟ੍ਰੋਲ ਜਾਂ ਬਿਲੀਰੂਬਿਨ ਦੇ ਇਕੱਠੇ ਹੋਣ ਨਾਲ ਬਣਦੀ ਹੈ। ਪਿੱਤੇ ਦੀ ਥੈਲੀ ਦਾ ਕੰਮ ਪਿੱਤ ਨੂੰ ਛੱਡਣਾ ਹੈ। ਜਦੋਂ ਪਿੱਤੇ ਵਿੱਚ ਕੋਲੈਸਟ੍ਰੋਲ ਦੀ ਮਾਤਰਾ ਬਹੁਤ ਜ਼ਿਆਦਾ ਹੋ ਜਾਂਦੀ ਹੈ ਜਾਂ ਪਿੱਤ ਨੂੰ ਸਹੀ ਢੰਗ ਨਾਲ ਖਾਲੀ ਨਹੀਂ ਕੀਤਾ ਜਾਂਦਾ ਹੈ ਤਾਂ ਕ੍ਰਿਸਟਲ ਬਣ ਜਾਂਦੇ ਹਨ। ਪਿੱਤੇ ਦੀ ਪੱਥਰੀ ਵਾਲੇ ਕਈ ਲੋਕਾਂ ਵਿੱਚ ਇਸ ਦੇ ਕੋਈ ਲੱਛਣ ਨਹੀਂ ਹੁੰਦੇ। ਪਰ ਕਈ ਵਾਰੀ ਪੱਥਰੀ ਦਾ ਆਕਾਰ ਵਧਦਾ ਹੈ ਤਾਂ ਤਾਂ ਇਹ ਖ਼ਤਰਨਾਕ ਹੋ ਸਕਦੀ ਹੈ। ਗਾਲਸਟੋਨ ਆਮ ਹੀ ਹੋ ਜਾਂਦਾ ਹੈ ਅਤੇ ਇਸ ਦੇ ਕਾਰਣ ਤੇ ਲੱਛਣ ਵੱਖੋ-ਵੱਖਰੇ ਹੋ ਸਕਦੇ ਹਨ ਅਤੇ ਇਲਾਜ ਵੀ ਵੱਖੋ-ਵੱਖਰੇ ਹੁੰਦੇ ਹਨ। ਪੱਥਰੀ ਨੂੰ ਕਈ ਵਾਰ ਦਵਾਈ ਨਾਲ ਹਟਾਇਆ ਜਾ ਸਕਦਾ ਹੈ ਅਤੇ ਕਈ ਵਾਰ ਸਰਜਰੀ ਦੀ ਲੋੜ ਹੁੰਦੀ ਹੈ। ਜੇਕਰ ਕਿਸੇ ਨੂੰ ਪੱਥਰੀ ਦਾ ਪਤਾ ਲੱਗਦਾ ਹੈ ਤਾਂ ਉਸਨੂੰ ਜਿੰਨੀ ਜਲਦੀ ਹੋ ਸਕੇ ਡਾਕਟਰਾਂ ਨਾਲ ਸਲਾਹ ਕਰਨੀ ਚਾਹੀਦੀ ਹੈ ਅਤੇ ਇਲਾਜ ਕਰਵਾਉਣਾ ਚਾਹੀਦਾ ਹੈ।
ਦਿਲਜੀਤ ਦੋਸਾਂਝ ਗਾਲਸਟੋਨ ਦੇ ਵਾਰੇ ਦੱਸਿਆ ਕਿ ਉਸ ਸਮੇਂ ਉਹ ਸਰਜਰੀ ਕਰਵਾ ਸਕਦਾ ਸੀ, ਪਰ ਉਸਦੇ ਇੱਕ ਦੋਸਤ ਨੇ ਸਲਾਹ ਦਿੱਤੀ ਕਿ ਜੇਕਰ ਪੱਥਰੀ ਕੋਈ ਸਮੱਸਿਆ ਨਹੀਂ ਦਿੰਦੀ ਤਾਂ ਜਲਦਬਾਜ਼ੀ ਵਿੱਚ ਸਰਜਰੀ ਕਰਾਉਣ ਦੀ ਕੋਈ ਲੋੜ ਨਹੀਂ। ਅੱਜ ਵੀ ਉਸ ਪੱਥਰੀ ਨੇ ਉਸਨੂੰ ਕੋਈ ਸਮੱਸਿਆ ਨਹੀਂ ਦਿੱਤੀ ਹੈ। ਉਸਦਾ ਮੰਨਣਾ ਹੈ ਕਿ ਪੱਥਰੀ ਸ਼ਾਇਦ ਖਤਮ ਹੋ ਗਈ ਹੈ। ਦਿਲਜੀਤ ਦੋਸਾਂਝ ਸਾਵਧਾਨੀ ਵਜੋਂ ਆਪਣੇ ਨਾਲ ਇੱਕ ਦਵਾਈ ਵਾਲਾ ਬੈਗ ਜਰੂਰ ਰੱਖਦਾ ਹੈ ਤਾਂ ਜੋ ਉਸਨੂੰ ਕੋਈ ਦਰਦ ਹੋਵੇ ਤਾਂ ਉਹ ਤੁਰੰਤ ਦਵਾਈ ਲੈ ਸਕੇ। ਦਿਲਜੀਤ ਦੋਸਾਂਝ ਨੇ ਇਹ ਵੀ ਦੱਸਿਆ ਕਿ ਉਸਨੇ ਆਪਣੇ ਪ੍ਰੀਵਾਰ ਨੂੰ ਇਸ ਵਾਰੇ ਕਦੇ ਨਹੀਂ ਦੱਸਿਆ ਅਤੇ ਉਸਦੇ ਬਹੁਤ ਸਾਰੇ ਨਜ਼ਦੀਕੀ ਦੋਸਤ ਵੀ ਇਸ ਤੋਂ ਅਣਜਾਣ ਹਨ।
‘ਮੈਂ ਵਾਪਸ ਆਉਂਗਾ’ ਫਲਾਪ ਜਾਂ ਹਿੱਟ ?
ਦਿਲਜੀਤ ਦੋਸਾਂਝ ਦੇ ਵਰਕ ਫਰੰਟ ਦੀ ਗੱਲ ਕੀਤੀ ਜਾਵੇ ਤਾਂ ਇਸ ਵੇਲੇ ਅਦਾਕਾਰ ਆਪਣੀ ਨਵੀਂ ਫਿਲਮ ‘ਮੈਂ ਵਾਪਸ ਆਉਂਗਾ’ ਨੂੰ ਲੈ ਕੇ ਚਰਚਾ ਦੇ ਵਿੱਚ ਹੈ। ਇਸ ਫਿਲਮ ਨੇ ਬਾਕਸ ਆਫਿਸ ‘ਤੇ ਅਜਿਹੀ ਸਫਲਤਾ ਪ੍ਰਾਪਤ ਕੀਤੀ ਹੈ ਜਿਸਦੀ ਕਿਸੇ ਨੂੰ ਉਮੀਦ ਨਹੀਂ ਸੀ। ਇਹ ਫਿਲਮ ਜੋ ਸ਼ੁਰੂ ਵਿੱਚ ਫਲਾਪ ਜਾਪਦੀ ਸੀ ਹੁਣ ਦਰਸ਼ਕਾਂ ਦੇ ਪਿਆਰ ਕਾਰਨ ਸਿਨੇਮਾਘਰਾਂ ਵਿੱਚ ਸਨਸਨੀ ਫੈਲਾਅ ਰਹੀ ਹੈ। ਫਿਲਮ ਭਾਰਤ ਅਤੇ ਪਾਕਿਸਤਾਨ ਦੀ ਵੰਡ ਦੇ ਦਰਦ ਨੂੰ ਪਰਦੇ ‘ਤੇ ਦਰਸਾਉਂਦੀ ਹੈ। ਇਹ ਇੱਕ ਭਾਵਨਾਤਮਕ ਕਹਾਣੀ ਹੈ ਜੋ ਪਿਆਰੇ ਅਜ਼ੀਜ਼ਾਂ ਤੋਂ ਵਿਛੋੜੇ ਅਤੇ ਕਿਸੇ ਦੀਆਂ ਜੜ੍ਹਾਂ ਨਾਲ ਜੁੜੇ ਹੋਣ ਦੀਆਂ ਭਾਵਨਾਵਾਂ ਦੀ ਪੜਚੋਲ ਕਰਦੀ ਹੈ। ਇਹ ਫਿਲਮ 12 ਜੂਨ 2026 ਨੂੰ ਸਿਨੇਮਾਘਰਾਂ ਵਿੱਚ ਰਿਲੀਜ਼ ਹੋਈ ਸੀ। ਕਹਾਣੀ ਅਤੇ ਕਲਾਕਾਰ ਦਰਸ਼ਕਾਂ ਨੂੰ ਪਸੰਦ ਆ ਰਹੇ ਹਨ। ਸ਼ੁਰੂ ਵਿੱਚ ਵਪਾਰਕ ਮਾਹਿਰਾਂ ਨੇ ਫਿਲਮ ਨੂੰ ਫਲਾਪ ਕਿਹਾ ਸੀ। ਫਿਲਮ ਦੀ ਸ਼ੁਰੂਆਤ ਬਹੁਤ ਕਮਜ਼ੋਰ ਸੀ ਇਸਨੇ ਪਹਿਲੇ ਦਿਨ ਸਿਰਫ 1æ15 ਕਰੋੜ ਰੁਪਏ ਦੀ ਕਮਾਈ ਹੋਈ। ਨਤੀਜੇ ਵਜੋਂ ਇਹ ਆਪਣੇ ਪਹਿਲੇ ਹਫ਼ਤੇ ਸਿਰਫ 12æ25 ਕਰੋੜ ਰੁਪਏ ਦੀ ਕਮਾਈ ਕਰਨ ਵਿੱਚ ਕਾਮਯਾਬ ਰਹੀ। ਪਰ ਅਸਲ ਮੋੜ ਉਸ ਤੋਂ ਬਾਅਦ ਆਇਆ। ਜਿਵੇਂ-ਜਿਵੇਂ ਲੋਕਾਂ ਨੂੰ ਕਹਾਣੀ ਪਸੰਦ ਆਉਣ ਲੱਗੀ ਸਿਨੇਮਾਘਰਾਂ ਵਿੱਚ ਭੀੜ ਵਧਦੀ ਗਈ। ਮੂੰਹ-ਜ਼ਬਾਨੀ ਪ੍ਰਚਾਰ ਦੇ ਜ਼ੋਰ ਨਾਲ ਫਿਲਮ ਦੀ ਕਮਾਈ ਨੇ ਦੂਜੇ ਹਫ਼ਤੇ ਇੰਨੀ ਤੇਜ਼ੀ ਫੜ ਲਈ ਕਿ ਹਰ ਕੋਈ ਹੈਰਾਨ ਰਹਿ ਗਿਆ। ਦੂਜੇ ਹਫ਼ਤੇ ਫਿਲਮ ਦੀ ਕੁਲੈਕਸ਼ਨ 80 ਫੀਸਦੀ ਤੋਂ ਵੀ ਵੱਧ ਗਈ ਅਤੇ 22æ55 ਕਰੋੜ ਰੁਪਏ ਦੀ ਕਮਾਈ ਹੋਈ। ਜੋ ਫਿਲਮ ਫਲਾਪ ਹੋਣ ਦੇ ਕੰਢੇ ‘ਤੇ ਸੀ ਹੁਣ ਬਾਕਸ ਆਫਿਸ ‘ਤੇ ਸੁਪਰਹਿੱਟ ਸਾਬਤ ਹੋ ਰਹੀ ਹੈ। ਲੋਕ ਹਾਲੇ ਵੀ ਇਸਨੂੰ ਵੀ ਦੇਖਣ ਜਾ ਰਹੇ ਹਨ। ਇਸ ਫਿਲਮ ਦਾ ਕੁੱਲ ਬਜਟ ਲਗਭਗ 70 ਕਰੋੜ ਰੁਪਏ ਦੱਸਿਆ ਜਾ ਰਿਹਾ ਹੈ। ਅੱਜਕੱਲ੍ਹ ਫ਼ਿਲਮਾਂ ਦੀ ਆਮਦਨ ਦਾ ਇੱਕ ਮਹੱਤਵਪੂਰਨ ਹਿੱਸਾ ਓਟੀਟੀ ਤੋਂ ਆਉਂਦਾ ਹੈ, ਇਸ ਲਈ ਜੇਕਰ ਕੋਈ ਫ਼ਿਲਮ ਆਪਣੇ ਬਜਟ ਦਾ 65 ਫੀਸਦੀ ਸਿਨੇਮਾਘਰਾਂ ਤੋਂ ਵਸੂਲ ਕਰਦੀ ਹੈ ਤਾਂ ਇਸਨੂੰ ਹਿੱਟ ਮੰਨਿਆ ਜਾਂਦਾ ਹੈ। ‘ਮੈਂ ਵਾਪਸੀ ਆਉਂਗਾ’ ਫਿਲਮ ਨੂੰ ਹਿੱਟ ਹੋਣ ਲਈ ਸਿਰਫ਼ 45 ਕਰੋੜ ਦੀ ਲੋੜ ਸੀ। ਫ਼ਿਲਮ ਨੇ ਹੁਣ ਬਾਕਸ ਆਫਿਸ ‘ਤੇ 60 ਕਰੋੜ ਦੀ ਕੁਲੈਕਸ਼ਨ ਕਰ ਲਈ ਹੈ। ਇਸ ਲਈ ਵਪਾਰਕ ਮਾਹਰ ਹੁਣ ਇਸ ਫਿਲਮ ਨੂੰ ਬਾਕਸ ਆਫਿਸ ‘ਤੇ ਹਿੱਟ ਮੰਨ ਰਹੇ ਹਨ।
ਲਾਸ ਏਂਜਲਸ ‘ਦਿਲਜੀਤ ਦੋਸਾਂਝ ਡੇਅ’ ਮਨਾਏਗਾ
ਪੰਜਾਬੀ ਗਾਇਕ ਅਤੇ ਅਦਾਕਾਰ ਦਿਲਜੀਤ ਦੋਸਾਂਝ ਦੀਆਂ ਪ੍ਰਾਪਤੀਆਂ ਜਾਰੀ ਹਨ। ਅਮਰੀਕਾ ਵਿੱਚ ਲਾਸ ਏਂਜਲਸ ਸਿਟੀ ਕੌਂਸਲ ਨੇ ਅਧਿਕਾਰਤ ਤੌਰ ‘ਤੇ 6 ਜਨਵਰੀ 2027 ਨੂੰ ‘ਦਿਲਜੀਤ ਦੋਸਾਂਝ ਡੇਅ’ ਮਨਾਉਣ ਦਾ ਐਲਾਨ ਕੀਤਾ ਹੈ। ਇਹ ਮਤਾ ਕੌਂਸਲ ਵੁਮੈਨ ਮੋਨਿਕਾ ਰੌਡਰਿਗਜ਼ ਦੁਆਰਾ ਪੇਸ਼ ਕੀਤਾ ਗਿਆ ਸੀ। ਲਾਸ ਏਂਜਲਸ ਵੱਲੋਂ ਦਿੱਤਾ ਗਿਆ ਇਹ ਸਨਮਾਨ ਨਾ ਸਿਰਫ ਦਿਲਜੀਤ ਦੋਸਾਂਝ ਦੀ ਨਿੱਜੀ ਪ੍ਰਾਪਤੀ ਹੈ, ਬਲਕਿ ਪੰਜਾਬੀ ਭਾਸ਼ਾ, ਸੰਗੀਤ ਅਤੇ ਸੱਭਿਆਚਾਰ ਲਈ ਵੀ ਇੱਕ ਮਾਣ ਵਾਲਾ ਪਲ ਮੰਨਿਆ ਜਾ ਰਿਹਾ ਹੈ।